Kua Fetogi Te ʼu Temi

NEʼE lagi ko he fiafia lahi te maʼuli ʼi te Iselaele ʼāfea ʼi te pule faka kolōlia ʼo te Hau agatonu ko Salomone. Neʼe ko te temi ʼo te tokalelei, ʼo te mahu, pea mo te manuʼia. Lolotoga te temi ʼaē neʼe lagolago lelei ai ia Salomone ki te tauhi moʼoni, neʼe lahi te tapuakina ʼa Sehova ki te fenua. Neʼe mole gata ʼaki pe te foaki e te ʼAtua he ʼu koloā lahi ki te Hau ko Salomone, kae neʼe ina toe foaki foki mo “he loto poto pea mo ʼatamai” ke pule Salomone ʼaki te faitotonu pea mo te ʼofa. (1 Hau 3:12) ʼE fakamatala fēnei e te Tohi-Tapu: “Neʼe kumi e te ʼu hau fuli ʼo te kele te fofoga ʼo Salomone moʼo fagono ki tona poto, te poto ʼaē neʼe ʼai e te ʼAtua moʼoni ki tona loto.”—2 Fakamatala 9:23.

Neʼe foaki e Sehova te fīmālie, te tokalelei pea mo te mahu ʼo te ʼu meʼa lelei fuli ki te hahaʼi. ʼE ʼui fēnei e te Folafola ʼa te ʼAtua: “Neʼe kaugamālie ia Suta pea mo Iselaele, ohage ko te lahi ʼo te ʼu tegaʼi ʼone ʼaē ʼi te matatai; neʼe nātou kakai, pea mo nātou ʼiʼinu pea mo nātou fakafiafia.” ʼI tona ʼuhiga moʼoni pea mo fakatā, ko te hahaʼi neʼe “haga nonofo ʼi te fīmālie, ʼo tahi nofo ʼi tona lalo fuʼu vite pea mo tona lalo fuʼu fiku . . . ʼi te ʼu ʼaho fuli ʼo Salomone.”—1 Hau 4:20, 25.

Kua fetogi te ʼu temi. ʼE kehekehe ʼaupito te maʼuli ʼo te temi nei pea mo te ʼu ʼaho manuʼia ʼaē kua hili. ʼO mole tatau mo te temi ʼo Salomone, ko te fihifihia maʼuhiga ia ʼaho nei ko te masiva. Māʼiape la mo te ʼu fenua koloaʼia, ʼe ʼi ai te masiva. Ohage la, ʼi Amelika pea mo te kūtuga ʼo te ʼu puleʼaga ʼo Eulopa ʼaē ʼe fakatahi ʼo ʼuhiga mo tanatou ʼu meʼa faka ekonomike, ʼe teitei pe ko te toko 15 ki te teau te hahaʼi ʼe maʼuʼuli ʼi te masiva, ko te faʼahi ʼaia neʼe fakatokagaʼi e te Programme des Nations unies pour le développement.

ʼO ʼuhiga mo te ʼaluʼaga ʼo te malamanei, ʼe fakatokagaʼi e te The State of the Worldˈs Children 1994, ko te tānaki ʼa te UNICEF (Fonds des Nations unies pour lʼenfance), ko te koga e tahi ia koga e nima ʼo te malamanei ʼe maʼuʼuli ʼi te masiva ʼaupito, ʼo ina toe ʼui ko te maʼuli ʼa te tokolahi ʼi te mālama masiva kua “liliu ʼo ʼāsili faigataʼa pea mole kei ʼi ai he ʼamanaki.”

ʼI ʼihi fenua, ʼe toe hilifaki ki te ʼu faigataʼa ʼo te maʼuli masiva ia te ʼāsili totogi kovi ʼo te ʼu meʼa ʼaē ki te maʼuli. ʼE ʼui fēnei e te fafine ʼi te fenua ʼo Afelika: “ ʼE koutou sisio ki he meʼa ʼi te fale koloā, pea koutou ʼui, ‘ ʼE ʼau toe liliu nei ki fale ʼo ʼaumai he foi falā moʼo totogi te meʼa ʼaia.’ Hili kiai he hola, ʼe koutou toe liliu mai kae ʼe ʼui atu ʼe mole feala hakotou toʼo te meʼa ʼaia ʼuhi kua hiki tona totogi. Koteā ʼaē ʼe feala ke fai e he tahi? ʼE ko he faʼahi fakatupu lotomamahi.”

ʼI te potu pe ʼaia, ʼe ʼui fēnei e te tahi fafine: ‘Ke mātou maʼuʼuli, ʼe mātou galoʼi ʼihi ʼu meʼa ʼaē ʼe ʼaoga kia mātou. ʼI te temi nei ko te meʼa ʼaē ʼe mātou tuʼaniaʼi peʼe feafeaʼi he maʼu ʼo hamatou meʼa kai.’

Ohage pe ko te ʼAtu Fenua ʼo Amelika, ko te temi ka haʼu ʼe fakatupu lotomamahi ia. Ohage la, ʼe fakafuafua e te UNICEF kapau ʼe haga tuputupu pe te hahaʼi ʼi te temi nei, ko te lahi ʼo te hahaʼi māsisiva ʼi te malamanei ʼe fakalaka anai ʼo tuʼa fā “lolotoga te temi maʼuli ʼa te tagata.”

Kae, logope te ʼāsili kovi ʼo te faʼahi faka ekonomike pea mo te ʼu ʼaluʼaga ʼo te maʼuli, ʼe ʼi ai te tupuʼaga ʼo te loto falala ʼa te kau kaugana ʼa te ʼAtua. Logope la tanatou maʼuʼuli ʼaē mo nātou ʼe mole kei ʼamanaki ki te temi ka haʼu, ko te kau kaugana ʼa te ʼAtua ʼe nātou fiafia pea mo nātou falala ki te temi ka haʼu. ʼE vakaʼi anai ʼi te alatike ʼaē ka hoa mai te ʼu tupuʼaga ʼo tanatou ʼamanaki.

[Haʼuʼaga ʼo te paki pasina 3]

De Grunne/Sipa Press