Ko Te Kau Faka Mafola ʼo Te Puleʼaga ʼe Nātou Fakamatala

Te ʼu Fili ʼi Te Temi Muʼa Kua Logo Tahi ʼo Tauhi Kia Sehova

“NEʼE ʼau ʼuluaki logo ki te palalau ʼo ʼuhiga mo te kau Fakamoʼoni ʼa Sehova neʼe hoko ʼi te temi ʼaē neʼe ʼau kau ai ʼi te tau ʼi Bosnie,” ko te fakamatala ʼaia ʼa Branko.a

Neʼe leʼoleʼo e Branko te gāue ʼi te lopitali ʼaē neʼe faitoʼo ai te hahaʼi lāvevea. Ko he tahi ʼi te ʼu tōketā ʼe lolotoga tana ako te Tohi-Tapu mo te kau Fakamoʼoni, pea ʼi te lolotoga ʼo te gāue ʼi he tahi po, neʼe ina fakamatala age kia Branko te ʼu meʼa lahi ʼaupito ʼaē neʼe ina ako ʼi te Tohi-Tapu.

Ko te meʼa ʼaē neʼe logo ki ai ia Branko ʼi te po ʼaia neʼe malave kia ia ʼo foimo mavae ai ʼi te tau. Neʼe ina kumi te kau Fakamoʼoni pea ina maʼu, pea neʼe lahi tana fia ʼiloʼi he ʼu meʼa. ʼI he temi ki muli age, ʼi tana mavae ki te tahi fenua ʼo te Eulopa, neʼe kumi e Branko te Fale ʼo te Puleʼaga pea neʼe ʼalu ia ki te fono ʼi te kokelekasio ʼa te kau Fakamoʼoni ʼa Sehova ʼi te lea faka Iukoselavia. Neʼe felāveʼi ia Branko mo Slobodan ʼi te faʼahi ʼaia.

Neʼe haʼu foki mo Slobodan mai Bosnie pea neʼe kau ia ki te tau ohage pe ko Branko​—kae ʼi te tahi age ia kūtuga. Neʼe tau ia Slobodan ʼi te kūtuga ʼa te kau Serbe ki te kau Croate. ʼI te temi ʼaē neʼe nā felāveʼi ai, neʼe kua liliu ia Slobodan ko te Fakamoʼoni ʼa Sehova kua ʼosi papitema. Neʼe ina ʼui age kia Branko, ʼaē ko tona fili ʼi te temi ki muʼa atu, ke ina fai hana ako Tohi-Tapu. ʼI te tuputupu ʼo tana ako, neʼe lahi te meʼa neʼe ako e Branko ʼo ʼuhiga mo Sehova, pea neʼe tuputupu ai tona ʼofa ki te ʼAtua. Ko te meʼa ʼaia neʼe ina uga ai ia Branko ke ina foaki tona maʼuli ki te Tupuʼaga. ʼI ʼOketopeli ʼo te taʼu 1993 neʼe ina foaki tona maʼuli ʼaki te papitema ʼi te vai.

Neʼe liliu feafeaʼi ia Slobodan ko te Fakamoʼoni ʼa Sehova? Neʼe mavae ia ʼi te koga meʼa ʼaē neʼe hoko ai te tau ʼi Bosnie ʼi te temi ki muʼa atu. Neʼe ina lau te ʼu tohi ʼaē neʼe foaki age e te kau Fakamoʼoni, kae neʼe tuputupu pe tana fia logo ki te Folafola ʼa te ʼAtua ʼi te temi ʼaē neʼe ʼaʼahi ai e te ʼu Fakamoʼoni e toko lua ʼi tona ʼapi ʼi te kamataʼaga ʼo te taʼu 1992. Ko ai koa ʼaē neʼe ina ʼaʼahi ia Slobodan, ʼo ina ʼui age ke fai hana ako Tohi-Tapu? Neʼe ko te tagata ko Mujo, ʼaē neʼe toe liliu mai foki mo ia mai Bosnie kae neʼe tupu ake ia ko te Mahometa. ʼI tana tuputupu ʼi tana ako Tohi-Tapu, ko Mujo pea mo Slobodan, te ʼu fili ʼi te temi muʼa, neʼe nā fakaʼaogaʼi he kiʼi temi ʼi te ʼaho fuli moʼo fefakaloto mālohiʼaki ʼo tanā tui.

Ko te tau ʼi te Iukoselavia ʼāfea neʼe ina pulihi te ʼu maʼuli ʼe lauʼi teau afe. Kae ko Branko, Slobodan, pea mo Mujo ʼe nātou gāue fakatahi ʼi te temi nei ko te ʼu kaugā fai faka mafola katoa ʼo te logo lelei ʼi te kokelekasio ʼa te kau Fakamoʼoni ʼa Sehova. Neʼe nātou tauʼi te fihi ʼo ʼuhiga mo te lanu pea mo te ʼu fihi fakafenua, pea ʼi te temi nei, ʼe nātou kumi te tokalelei ʼi tanatou fakalogo ki te Tupuʼaga, ko Sehova.

Kae koteā ʼaē neʼe tupu ai te ʼu fetogi ʼaia? ʼUhi ko tanatou ʼofa kia Sehova, mo tanatou fakaʼapaʼapa ki te Tohi-Tapu, pea mo tanatou holi ʼaē ke nātou maʼuliʼi te moʼoni ʼo te Tohi-Tapu. Ohage ko te ʼui e te Tohi-Tapu Maʼoniʼoni, “ko te folafola ʼa te ʼAtua ʼe maʼuli pea ʼe ina fakalogoʼi tana gāue . . . pea ʼe feala ia ke ina ʼiloʼi lelei te ʼu manatu pea mo te ʼu fakatuʼutuʼu ʼo te loto.”​—Hepeleo 4:​12.

[Nota ʼi te lalo pasina]