‘Tou Tokaga Ki Totatou Loto Fale’—ʼE Faigataʼa Tona Fakahoko ʼi Te ʼu Fenua Masiva

NEʼE ʼui fēnei e te ʼapositolo ko Paulo: “ ʼIo, kapau ʼe mole tokaga he tahi ki tona ʼu kāiga, kae tāfito kia nātou ʼo tona loto fale, ʼe kua fakafisi ia ki te tui pea ʼe kovi age ia ʼi he tagata ʼe mole tui.” (1 Timoteo 5:⁠8) ʼI te kua ʼāsili faigataʼa ʼo te taupau ʼo he loto fale ʼi te ʼu fenua koloaʼia, kua toe faigataʼa age te faʼahi ʼaia ʼi te ʼu fenua ʼaē ʼe tuputupu ʼi te faʼahi faka ekonomike.

Ohage la ʼi Afelika, ʼe ko he meʼa māhani te ʼu faigataʼa faka ekonomike. ʼE mole kei lahi te ʼu gāue, pea, ka maʼu he ʼu gāue, pea ʼe lagi tonu ke gāue toko lua te taumatuʼa ke maʼu ai he falā ʼe feʼauga moʼo totogi ʼo te ʼu meʼa ʼaē ʼe ʼaoga ki te maʼuli ʼo tonā loto fale. ʼE lagi tonu ke nātou ʼolo ki he tahi ʼu potu fenua ke maʼu ai hanatou gāue, ʼo nātou tuku tokotahi tonatou hoa pea mo te fānau lolotoga ni ʼu māhina, pe ko ni ʼu taʼu. Tahi ʼaē meʼa, ʼe toe faigataʼa te maʼu ʼo he ʼu ʼapi ʼe lelei. ʼE lahi te ʼu famili ʼi Afelika ʼe nātou kaugamālie; ʼe nātou maʼuʼuli ʼi te ʼu nofoʼaga ʼe efihia, pea ʼe mole maʼu ai te ʼu meʼa ʼaē ʼe ʼaoga ki te maʼuli. Ko te tupuʼaga la ʼaia ʼo te tau mahamahaki ʼa te hahaʼi.

Pea tahi ʼaē, ko te ʼu agaʼi fenua, mo te ʼu talatisio talu mai fualoa, pea mo te ʼu manatu ʼaē ʼe tali e te hahaʼi, ʼe feala ke fakafeagai ki te laumālie ʼo te Folafola ʼa te ʼAtua, te Tohi-Tapu. Tou vakaʼi te ʼu agaʼi fenua ʼo ʼuhiga mo te ʼohoana pea mo te fānau. ʼE manatu e ʼihi ʼu pule famili, ko tonatou pe ia maʼua ko te totogi ʼo te nofoʼaga pea mo te ʼu meʼa ʼaē ʼe ʼaoga ki te ako ʼo tanatou fānau. Ko tonatou ʼu ʼohoana, pea ʼi ʼihi temi mo te ʼu toe lalahi, ʼe ko tonatou maʼua te kumi ʼo te ʼu meʼa ʼaē ʼe ʼaoga tāfito, ohage ko te meʼa kai pea mo te ʼu mutuʼi meʼa.

Pea tahi ʼaē meʼa, ʼe ʼui e ʼihi tagata ʼohoana “ko taku falā ʼe ko taku falā, pea ko tau falā ʼe ʼaʼaku.” Ko te manatu ʼaia ʼe fakatupu ʼita ki te ʼu fafine ʼohoana ʼaē ʼe gāue. Neʼe lāuga fēnei te fafine mai te fenua ʼo Tanzanie: “ ʼE ina pulihi te falā ʼi tana ʼinu kava, kae mole ina fakaʼaogaʼi maʼa māua peʼe maʼa te fānau. ʼE ma gāue toko lua, peʼe lahi age te ʼu meʼa ʼaē ʼe ma fai, kae ʼe ina toʼo fuli te falā ʼo ina ʼui mai kia mātou ʼe ko tana falā ʼa ia, ko ia ʼaē neʼe ina maʼu te falā ʼaia.”

Kae, ʼe fakamuʼamuʼa e te kau Kilisitiano te Folafola ʼa te ʼAtua ʼi te ʼu agaʼi fenua pe ko te ʼu manatu ʼaē ʼe tali e te hahaʼi. ʼE foaki mai e te Tohi-Tapu kia tatou te takitaki ʼaē ʼe ʼaoga, ke feala hatatou foaki te ʼu meʼa ʼaē ʼe ʼaoga ki totatou famili. Ohage la, ʼe ina ʼui fēnei “ ʼe mole ko te fānau ʼaē ʼe tonu ke nātou tuku kehe he meʼa maʼa te ʼu mātuʼa, kae ko te ʼu mātuʼa [ʼaē ʼe tonu ke nātou tuku kehe] maʼa te fānau.” (2 Kolonito 12:14) Koia, ko te ʼu tagata ʼaē ʼe manavasiʼi ki te ʼAtua, ʼaē ʼe feala ke gāue, ʼe mole tonu ke nātou pipiko ʼo nātou tuku ki tanatou ʼu ʼohoana pea mo te ʼu toe lalahi, ke nātou foaki te meʼa kai pea mo te ʼu mutuʼi meʼa ki te famili; ko te maʼua ʼaia ʼo te pule famili.​—1 Kolonito 11:⁠3.

ʼE moʼoni, ʼe mole lagi feʼauga te totogi ʼaē ʼe maʼu e te tagata ʼohoana moʼo totogi ʼaki te ʼu meʼa fuli ʼaē ʼe ʼaoga ki tona famili. Kae kapau ʼe gāue mo te fafine, pea ʼe mole tonu ke lotomamahi ai te tagata Kilisitiano. Kae, ʼe ina gaohi anai ia ia ohage ko hona “kaumeʼa” ʼe ina fakaʼapaʼapaʼi. (Malakia 2:​14) Koia, ʼe mole agakovi anai kia ia, ʼo ina toʼo te falā ʼaē neʼe ina maʼu ʼi tana gāue kinakina, pea mo ina maumauʼi ʼo mole ina tokagaʼi pe la te ʼu meʼa ʼaē ʼe ina logoʼi ʼi tona loto. Kailoa, kae ko ia pea mo tona ʼohoana ʼe nā “felogoi” anai pea mo vakaʼi peʼe nā lava fakaʼaogaʼi feafeaʼi tanā falā ki te maʼuli ʼo tonā loto fale. (Tāʼaga Lea 13:10) Kapau ko he faʼahi ʼe feala, pea ʼe fakagafua e te tagata ʼohoana ki tona ʼohoana ke ina fakaʼaogaʼi tanā falā ki he ʼu faʼahiga meʼa, ohage ko te fakagafua ʼaē neʼe tuku ki te “fafine ʼohoana faʼafai” ʼi te ʼu temi faka Tohi-Tapu. (Tāʼaga Lea 31:​10, 11, 16) Kapau ʼe nā mulimuli ki te ʼu tokoni ʼa te Tohi-Tapu ʼo ʼuhiga mo te ʼu faʼahi ʼaia, pea ʼe nā fakatuputupu anai te fiafia ʼo tonā famili, pea mo tanā fakafeauga ki te ʼu meʼa ʼaē kua nātou maʼu.

Te Tauʼi ʼo Te ʼu Faigataʼaʼia ʼo Te Mole Maʼu Gāue

Tou vakaʼi te fihifihia ʼo te mole maʼu gāue. Ka mole lahi he ʼu gāue pea mo veliveli te totogi, e tokolahi te ʼu pule famili ʼi Afelika ʼe nātou mavae ʼi tonatou ʼapi ʼo kumi gāue ʼi he ʼu potu mamaʼo, ʼi te ʼu lameni, ʼi te ʼu matani gāue, ʼi te ʼu falemanu, pea mo te ʼu gāueʼaga. Kapau ko he tagata Kilisitiano ʼe tau mo te ʼaluʼaga ʼaia, pea ʼe mamaʼo anai ia mo tona ʼu tēhina mo tuagaʼane ʼi te tui, pea mo fakatahi anai mo he ʼu hahaʼi ʼe mole lelei tanatou aga. (Tāʼaga Lea 18:1; 1 Kolonito 15:33) Logope la ko te famili ʼe faiga anai ke ina kātakiʼi te ʼaluʼaga ʼaia, kae ʼe lotomamahi anai ʼi te puli ʼo te tāmai ʼi te loto fale moʼo foaki he takitaki ʼi te faʼahi fakalaumālie, pea mo foaki he tokoni ʼi te ʼu meʼa ʼaē ʼe nātou logoʼi ʼi tonatou loto. Tahi ʼaē meʼa, ko te puli fualoa ʼo te tāmai, ʼe feala ke iku ki te faʼahi ʼaē neʼe mole tonu ke hoko, ʼaē ko te faigataʼaʼia ʼi te faʼahi ʼo te paʼaga.

ʼE ʼui fēnei e te faʼe: “Neʼe ʼalu toku ʼohoana ʼo gāue ʼi te kau gāue kumi aulo. Neʼe ina fakatuʼutuʼu ʼe toe liliu mai anai ʼi te hili ʼo he māhina katoa, peʼe ko māhina pe e lua. Neʼe toe liliu mai hili kiai te taʼu katoa. Neʼe tonu ke ʼau taupau taku ʼu tamaliki ʼe toko ono. Pea neʼe tonu ke ʼau totogi te lue ʼo te ʼapi. ʼUhi ko taku mahamahaki, neʼe tonu ke ʼau totogi te lopitali. Neʼe tonu ke ʼau totogi homatou ʼu mutuʼi meʼa, pea mo tamatou meʼa kai ʼi te ʼaho fuli. Neʼe mole ʼau gāue. Neʼe faigataʼa tomatou maʼuli. Ko te faʼahi ʼaē neʼe faigataʼa tāfito, neʼe ko te tokoniʼi ʼo taku fānau ʼi te faʼahi fakalaumālie, tamatou ako faka famili, te ʼu fono, pea mo te fai faka mafola. Kae, ʼaki te tokoni ʼa Sehova, neʼe mātou haohaoa pe ʼi te ʼu faʼahi ʼaia.”

Māʼiape la mo ʼihi faʼe, neʼe nātou manatu ʼe tonu ke nātou tuku tonatou famili ʼi he temi loaloaga, kae nātou ʼolo ʼo gāue. Ko te gāue ʼa ʼihi ko te faifakatau koloā pea ʼe tahitahiga tanatou nonofo ʼi fale. ʼE maʼua ai ke fakahoko e te ʼu toe lalahi te tuʼulaga ʼo te ʼu mātuʼa, pea mo tokakaga ki te meʼa kai, mo te ʼu gāue ʼo te loto fale, pea mo akoʼi tonatou ʼu tēhina mo tuagaʼane ʼaē kei liliki. ʼE mole kei haʼele lelei tanatou ʼu gāue ʼi te faʼahi fakalaumālie. Ei, ʼe feala ke liliu te faʼahi ʼaia ko he kavega ki te famili!

ʼE moʼoni, kapau ʼe faigataʼa te ʼu ʼaluʼaga faka ekonomike, pea ʼe lagi ko te puleʼaki pe ʼaia e tahi ki te ʼu mātuʼa, ke nā ʼolo ki he tahi koga meʼa ʼo gāue, ke feala hanā foaki ki tanā fānau te ʼu meʼa ʼaē ʼe ʼaoga kia nātou. ʼI te ʼu temi faka Tohi-Tapu, neʼe tonu ke tuku e te ʼu foha ʼo Sakopo tonatou ʼu famili, kae nātou ʼolo ki Esipito ʼo kumi mai ai hanatou meʼa kai. (Senesi 42:​1-5) Koia, mokā hoko te taʼi ʼaluʼaga ʼaia ʼi totatou temi, ʼe tonu ke fakafuafua e te ʼu pule famili te ʼu fua lelei ʼo tanatou ʼolo ʼo gāue mamaʼo, pea mo te ʼu mamahi ʼaē ʼe feala ke hoko ki te famili ʼi te faʼahi fakalaumālie, pea mo te ʼu fua kovi ʼaē ʼe feala ke hoko ʼuhi ko te mavete fualoa ʼaia. ʼE lahi te ʼu famili ʼe nātou leleiʼia age nātou te kātakiʼi ʼo te ʼu faigataʼaʼia faka ekonomike ʼi hanatou mavete fualoa. ʼE nātou manatuʼi te ʼu palalau ʼa Paulo, ʼaē ʼe tou maʼu ia 1 Timoteo 6:8: “Kapau ʼe tou maʼu hatatou meʼa kai mo hotatou ʼu mutuʼi meʼa, pea ʼe tou fakafeauga anai ki te ʼu meʼa ʼaia.”​—Vakaʼi ia Tāʼaga Lea 15:17.

ʼI ʼihi temi, ʼe ʼi ai te tahi ʼu meʼa ʼe feala ke koutou fai, ʼo mole ʼaoga ke koutou ʼolo ʼo gāue mamaʼo. ʼI tanatou fai ʼo he ʼu fakatuʼutuʼu pea mo nātou fakakaukau lelei, neʼe feala ke fai e ʼihi hanatou gāue, he gāue ʼe ʼaoga ki te hahaʼi.a (Vakaʼi ia Tāʼaga Lea 31:24.) Peʼe lagi feala ke nātou fai he ʼu gāue ʼe mole faʼa maʼuhiga, ʼaē ʼe ʼui e ʼihi ʼe ko he ʼu gāue fakapōpula. (Efesi 4:​28) Ko te ʼapositolo ko Paulo neʼe ‘gāue kinakina pea mo gāue mamahi ʼi te po mo te ʼaho’ ke ʼaua naʼa liliu ko he kavega ki ʼihi ʼi te faʼahi ʼo te falā. (2 Tesalonika 3:8) Ia ʼaho nei, ʼe feala ke mulimuli te kau tagata Kilisitiano ki te faʼifaʼitaki ʼaia.

Te ʼu Fihifihia ʼo Te Ako

Ko te tahi fihifihia ʼe ko te ako. ʼI te tahi ʼu potu mamaʼo, ʼe ko he agamāhani te ʼave e te ʼu mātuʼa tanatou ʼu fānau ke nātou ʼolo ʼo maʼuʼuli mo tonatou ʼu kāiga lolotoga he temi, ke feala ai he akoʼi lelei ʼo tanatou ʼu fānau. ʼI tanatou mavete mo tanatou ʼu mātuʼa, ʼe faigataʼa ki te ʼu fānau ʼaia hanatou kau ki te ʼu fono peʼe ko te kau ki te gāue fai faka mafola. ʼI te mole foaki ʼaē kia nātou te akonaki ʼaē ʼe ʼaoga, ʼe faigafua tanatou tō ki te hele ʼaē ko te fakatahi mo he ʼu fakakaugā kovi. ʼUhi ko te faʼahi ʼaia, ko te tokolahi kua nātou mavae ʼi te moʼoni.

ʼE moʼoni, ʼe ʼaoga ke ʼolo te ʼu fānau ki te ako. Kae ʼe faka maʼuhigaʼi e te Tohi-Tapu te akoʼi ʼo nātou ʼi te faʼahi fakalaumālie, pea neʼe foaki e te ʼAtua ki te ʼu mātuʼa, te maʼua ʼaē ke nātou foaki te ako ʼaia. (Teutalonome 11:​18, 19; Tāʼaga Lea 3:​13, 14) Kae, ko te ʼave ʼaia ʼo he tamasiʼi ke nofo fualoa mo hona ʼu kāiga, ʼe ina maumauʼi te ʼu faiga ʼa te ʼu mātuʼa ke nātou taupau ia ia ʼi “te akonaki pea mo te manatu ʼa Sehova.”​—Efesi 6:⁠4.b

Kapau ʼe mole lelei te ʼu fealagia ʼo te ako ʼi te kolo ʼaē ʼe nātou nonofo ai, ko te puleʼaki ʼaē ʼe fai e te ʼu mātuʼa, ko te fai ia meʼa fuli ke nātou akoʼi ke popoto tanatou fānau. ʼE toe tokoni kia nātou totatou “Faiako Lahi,” ia Sehova. (Isaia 30:20) ʼE foaki e te ʼu kokelekasio ʼa te kau Fakamoʼoni ʼa Sehova ʼo te kolo, he ʼu faʼahiga faiako kehekehe. ʼE lahi te ʼu kokelekasio ʼe nātou takitaki te ʼu kalasi ako lautohi pea mo faitohi. Ko te Ako ʼo Te Minisitelio Faka Teokalatike, ʼe ko he fakatuʼutuʼu ʼe feala ke tokoni ki he tamasiʼi ke poto lelei ʼi te lautohi, pea ke palalau lelei.

He Fakakaukau Lelei ʼo ʼUhiga Mo Te Maʼu Fānau

Ko te akoʼi ʼo te fānau ʼe feala ke faigataʼa mokā ʼe nātou kaugamālie. ʼE ʼui anai e he ʼu mātuʼa Afelika ʼe nātou ʼoʼofa ki te ʼu fānau; koia, ʼe nātou fai anai ke lahi tanatou ʼu fānau. Logope la ʼe feala ke maʼu e te ʼu mātuʼa he paʼaga mai te gāue ʼa te fānau, ʼe tokolahi te ʼu mātuʼa ʼe mole feala ke nātou tokakaga lelei kia nātou fuli.

ʼE mahino ia, ʼe ʼui e te Tohi-Tapu “ko te ʼu foha ʼe ko he tofiʼa mai ia Sehova.” (Pesalemo 127:3) Kae koutou fakatokagaʼi, neʼe tohi te ʼu palalau ʼaia ʼi te temi ʼaē neʼe lelei ai te ʼaluʼaga ʼo te maʼuli ʼi Iselaele. Ki muli age, ko te hoge pea mo te tau neʼe nātou fakaliliu te maʼu fānau ko he meʼa faigataʼa ʼaupito. (Tagilāulau 2:​11, 20; 4:​10) ʼUhi ko te ʼaluʼaga faigataʼa ʼaē ʼe mafola ʼi te ʼatu ʼu fenua ʼaē ʼe māsisiva, ko te ʼu Kilisitiano ʼaē ʼe nātou maʼu fānau, ʼe tonu ke nātou fakakaukauʼi lelei peʼe feala anai hanatou foaki ki te ʼu fānau ʼaē ka nātou maʼu, he meʼa kai, he ʼu mutuʼi meʼa, he ʼapi, pea mo akoʼi nātou. ʼI tanatou fakafuafua lelei te faʼahi ʼaia, tokolahi te ʼu taumatuʼa kua nātou fakatotonu, ʼe lelei age tanatou mole mulimuli ki te talatisio ʼaē ko te maʼu ʼo he tuʼuga fānau pea kua nātou faka tuʼakoi tanatou maʼu fānau.c​—Vakaʼi ia Luka 14:28.

ʼE mahino papau, ko te ʼu temi ʼaenī ʼe “ko te ʼu temi maʼuhiga ʼaupito mo faigataʼa.” (2 Timoteo 3:​1-5) ʼI te kua fakaaʼu ʼo te tuʼu ʼo te ʼu faʼahiga meʼa ʼaenī ki tona fakaʼosi, ʼe mahino papau ia ʼe ʼāsili anai te ʼu faigataʼaʼia ʼo te ʼu famili ʼaē ʼe nonofo ʼi te ʼu fenua ʼaē ʼe māsisiva. Kae, kapau ʼe nātou mulimuli lelei ki te ʼu pelesepeto ʼo te Folafola ʼa te ʼAtua, ʼe feala anai ki te ʼu pule famili ke nātou fakahoko fakalelei tonatou maʼua ʼaē ko te foaki ki tonatou famili te ʼu meʼa ʼaē ʼe ʼaoga kia nātou ʼi te faʼahi fakasino pea mo te faʼahi fakalaumālie, koteʼuhi ʼe fai e Sehova te fakapapau ʼaenī kia nātou ʼaē ʼe tauhi agatonu kia te ia: “Kailoa ʼe mole ʼau mavae anai ia te koe, kailoa ʼe mole ʼau līaki anai koe!” (Hepeleo 13:5) Ei, māʼiape la mo te ʼu fenua masiva, ʼe feala ki te kau Kilisitiano ke nātou tauʼi te faigataʼaʼia ʼaē ko te foaki ʼo te ʼu meʼa ʼaē ʼe ʼaoga ki tonatou loto fale!

[Nota ʼi te lalo pasina]