Ko Te “Faifakamāu ʼAē ʼe Fakatafito Ki He ʼu Kumi”—ʼE Ko He Akonaki ʼe Fakatafito Koa Ki Te Tohi-Tapu?

KO TE ʼaho 22 ʼo ʼOketopeli 1844, neʼe ko he ʼaho makehe ʼaupito ki te toko 50 000 hahaʼi ʼaē neʼe nonofo ʼi te Potu Hahake ʼo Amelika. Neʼe ʼui e te tagata lotu ʼaē neʼe ina takitaki nātou, ko William Miller, ʼe toe liliu mai anai ia Sesu ki te kele ʼi te ʼaho pe ʼaia. Ko te hahaʼi ʼaia ʼaē neʼe fakahigoa ko te kau Millerites, neʼe nātou talitali ʼi tonatou ʼu fale fono ʼo aʼu ki te tō ʼo te laʼā. ʼI te ʼaho ake, neʼe mole heʼeki haʼu te ʼAliki. ʼI te mole fakahoko ʼo tanatou ʼamanaki, neʼe nātou toe liliu ki tonatou ʼu ʼapi pea neʼe nātou fakahigoaʼi te ʼaho ʼaia ko te ʼaho ʼo te “Lotomamahi Lahi.”

Kae mole tuai, pea liliu tonatou lotomamahi ko he ʼamanaki. Ko te fafine ko Ellen Harmon neʼe ina uga ʼihi hahaʼi Millerites ke nātou tui, neʼe fakahā age e te ʼAtua neʼe tonu tanatou lau te ʼu taʼu. Neʼe tui te fafine ʼaia, neʼe hoko te meʼa maʼuhiga ʼi te ʼaho ʼaia​—neʼe hū ia Kilisito ki “te potu taputapu ʼaupito ʼo te sagatualio ʼaē ʼe ʼi selo.”

Hili kiai taʼu e hogofulu tupu, ko te tagata fai faka mafola adventiste ko James White (ʼaē neʼe ʼohoana mo Ellen Harmon), neʼe ina maʼu he ʼu palalau foʼou moʼo fakamahino pe koteā te gāue ʼa Kilisito talu mai te māhina ʼo ʼOketopeli 1844. ʼI te nusipepa Review and Herald ʼo te ʼaho 29 ʼo Sanualio 1857, neʼe ʼui e White ʼe kua kamata e Sesu te “faifakamāu ʼe fakatafito ki he ʼu kumi.” Pea ko te faʼahi ʼaia kua liliu ʼo aʼu ki te temi nei, ko he akonaki tāfito ʼo te toko fitu miliona hahaʼi ʼaē fakahigoaʼi ko te kau adventistes.

Kae, ko ʼihi tagata sivi Tohi-Tapu ʼo te ’Ēkelesia adventiste neʼe nātou fai te fehuʼi ʼaē pe ko te “faifakamāu ʼaē ʼe fakatafito ki he ʼu kumi” ʼe ko he akonaki koa ʼe fakatafito ki te Tohi-Tapu. He koʼe ʼe nātou lotolotolua ʼo ʼuhiga mo te akonaki ʼaia? Kapau ko koutou ko he kau adventistes, pea ʼe tonu ke koutou fai te fehuʼi ʼaenī. Koteā te “faifakamāu ʼaē ʼe fakatafito ki he ʼu kumi”?

Koteā Te Faifakamāu ʼAia?

Ko te vaega Tohi-Tapu tāfito ʼaē ʼe fakaʼaogaʼi moʼo lagolago ki te akonaki ʼaia ʼe ko te koga tohi ʼo Taniela 8:​14. ʼE ʼui fēnei: “Pea neʼe ʼui mai kia te ʼau, ʼo aʼu ki te ʼu ʼaho e lua afe tolugeau; pea ʼe tonu anai ke fakamaʼa te sagatualio.” (Tohi-Tapu Roi Jacques) ʼUhi ko te kupuʼi palalau “pea ʼe tonu anai ke fakamaʼa te sagatualio,” ko te tokolahi ʼi te kau adventistes ʼe nātou fakapipiki te vaega ʼaia ki te tohi ʼo Levitike kapite 16. ʼE talanoa te tohi ʼaia ki te fakamaʼa e te pelepitelo lahi Sutea te sagatualio ʼi te ʼAho ʼo Te ʼu Faifakalelei. ʼE nātou toe fakapipiki foki te ʼu palalau ʼa Taniela mo te koga tohi ʼo Hepeleo kapite 9, ʼaē ʼe talanoa ai kia Sesu ʼi tona ʼuhiga Pelepitelo Lahi Māʼoluga ʼaē ʼi selo. Ko te tahi tagata sivi Tohi-Tapu adventiste ʼe ina ʼui ko te faʼahiga fakakaukau ʼaia ʼe fakatafito ki he ʼu koga tohi moʼoni. ʼE maʼu ai e te tagata ʼaia “te kupu ohage ko te sagatualio ʼaē ia Taniela 8:​14, pea mo ina toe maʼu ia Hepeleo kapite 7, 8, mo te 9,” pea ina ʼui ai “ko te ʼu vaega ʼaia ʼe nātou talanoa fuli ki te meʼa pe e tahi.”

Ko te manatu ʼaenī ʼa te kau adventistes: Ko te kau pelepitelo ʼi te Iselaele ʼāfea neʼe nātou tauhi ʼi te ʼaho fuli ʼi te kogafale ʼo te fale lotu ʼaē ʼe fakahigoaʼi ko te Potu Taputapu, ʼo fakamolemole ai tanatou ʼu agahala. ʼI te ʼAho ʼo Te ʼu Faifakalelei, neʼe fakahoko e te pelepitelo lahi te gāue neʼe fai tuʼa tahi pe ʼi te taʼu ʼi te Potu Taputapu ʼAupito (ʼaē neʼe tuʼu ʼi te potu taupotu ʼo te fale lotu), pea neʼe molehi ai te ʼu agahala. Koia, ʼe nātou manatu ko te gāue faka pelepitelo ʼa Kilisito ʼi selo, ʼe ko koga e lua. Ko te ʼuluaki koga neʼe kamata ʼi te temi ʼaē neʼe hake ai ki selo ʼi te ʼuluaki sēkulō pea neʼe fakaʼosi ʼi te taʼu 1844, pea neʼe hoko ai te fakamolemole ʼo te ʼu agahala. Ko te lua koga ʼo tona tauhi pelepitelo, peʼe ko te “temi faifakamāu,” neʼe kamata ʼi te ʼaho 22 ʼo ʼOketopeli 1844, pea ʼe kei hoko atu te faʼahi ʼaia ʼi te temi nei, pea ʼe tupu ai anai te molehi ʼo te ʼu agahala. ʼE hoko feafeaʼi te faʼahi ʼaia?

ʼE nātou ʼui, talu mai te taʼu 1844, ʼe sivisivi e Sesu te maʼuli ʼo nātou fuli ʼaē ʼe nātou ʼui ʼe nātou tui kia ia (ʼo ʼuluaki fai muʼa ki te kau mate, ʼosi ʼaia pea ina fai ki te kau maʼuʼuli), ke ina fakafuafua mo kapau peʼe feala ke nātou maʼu te maʼuli heʼegata. Ko te sivisivi ʼaia ʼe ko te “faifakamāu ʼaē ʼe fakatafito ki he ʼu kumi.” ʼI te ʼosi fakamāu ʼaia ʼa te hahaʼi, pea ʼe molehi ʼi te ʼu tohi te ʼu agahala ʼo nātou ʼaē ʼe mālo ʼi te ʼahiʼahi ʼaia. Kae ʼe fakamahino e Ellen White, ko nātou ʼaē ʼe mole mālo ʼi te ʼahiʼahi ʼaia, ‘ ʼe molehi anai tonatou higoa ʼi te tohi ʼo te maʼuli.’ ʼE hā ʼaki mai ai, “ko te hahaʼi fuli, ʼe nātou fakatuʼutuʼu fakatomuʼa anai peʼe maʼuʼuli anai te hahaʼi peʼe nātou mamate anai.” ʼI te temi ʼaia, ʼe ʼosi anai te fakamaʼa ʼo te sagatualio pea ʼe hoko anai te vaega ʼo Taniela 8:​14. Ko te meʼa ʼaia ʼaē ʼe akoʼi e te kau adventistes. Kae ko te tohi Adventist Review ʼe ina fakamoʼoni fēnei: “Ko te kupuʼi palalau te faifakamāu ʼaē ʼe fakatafito ki he ʼu kumi ʼe mole maʼu ia ʼi te Tohi-Tapu.”

ʼE Mole Hona Pikipikiga Mo Te Fakaliliu

Neʼe mahalohalo ʼihi adventistes ʼo ʼuhiga mo te akonaki ʼaia. Ko te tahi tagata ʼe ina ʼui fēnei, “ ʼe hā ʼi te hisitolia, ko ʼihi tagata takitaki fakamalotoloto ʼi tomatou ʼēkelesia neʼe lotomamahi ʼaupito ʼi tanatou vakavakaʼi tamatou ʼu akonaki ʼo ʼuhiga mo te faifakamāu ʼaē ʼe fakatafito ki he ʼu kumi.” ʼE ina toe ʼui fēnei, ʼi te ʼu taʼu pe ʼaenī, ko te lotomamahi ʼaia neʼe liliu ko he lotolotolua ʼi te kamata “fakafihiʼi e te kau tagata sivi Tohi-Tapu te ʼu tafitoʼaga ʼo tamatou akonaki ʼo ʼuhiga mo te fakamaʼa ʼo te sagatualio.” Tou vakaʼi te ʼu tafitoʼaga ʼaia e lua.

Ko te ʼuluaki tafitoʼaga: Ko te koga tohi ʼo Taniela kapite 8 ʼe fakapipiki ki te Levitike kapite 16. Ko te manatu ʼaia ʼe ʼi ai tona ʼu fihifihia e lua​—ko te lea pea mo te ʼu vaega ʼaē ʼi muʼa pea mo te ʼu vaega ʼaē ʼe hoa ki te ʼu kapite ʼaia. ʼUluaki meʼa, koutou vakaʼi te lea ʼaē neʼe fakaʼaogaʼi. ʼE tui te kau adventistes ko te ‘sagatualio ʼaē neʼe fakamaʼa’ ʼaē ʼe talanoa kiai ia Taniela kapite 8, ʼe ko te fakatātā ʼaia ʼo te ‘sagatualio ʼaē neʼe fakamaʼa’ ia Levitike kapite 16. Neʼe hage neʼe tonu te manatu ʼaia ʼo aʼu ki te temi ʼaē neʼe ʼiloʼi ai e te kau tagata fakaliliu, ko te kupu “fakamaʼa” ʼi te Tohi-Tapu Roi Jacques, ʼe ko he fakaliliu hala ʼo te kupu faka Hepeleo tsa·dhaqʹ (ko tona faka ʼuhiga ʼaē “ke kita faitotonu”) ʼaē ʼe fakaʼaogaʼi ia Taniela 8:​14. ʼE ʼui fēnei e te Polofesea fai teolosia ko Anthony Hoekema: “ ʼE ko he meʼa fakaʼofaʼofa te kua fakaliliu ʼo te kupu ʼaia ko te kupu fakamaʼa, mai tona ʼuhiga ʼaē ko te kupu faka Hepeleo [ta·herʹ] ʼaē ʼe fakaliliu ʼi te agamāhani ʼaki te kupu fakamaʼa, ʼe mole fakaʼaogaʼi ʼi te vaega ʼaia.”a ʼE fakaʼaogaʼi te kupu ʼaia ia Levitike kapite 16, pea ko te Tohi-Tapu Roi Jacques ʼe ina fakaliliu te kupu ta·herʹ ʼaki te kupu “fakamaʼa” pea “ke maʼa.” (Levitike 16:19, 30) Koia, ʼe tonu te manatu ʼaenī ʼo te Dr. Hoekema, ʼi tana ʼui ʼaē: “Kanapaula neʼe fia talanoa ia Taniela ki te faʼahiga fakamaʼa ʼaē neʼe fai ʼi te ʼAho ʼo Te ʼu Faifakalelei, kanaʼauala neʼe ina fakaʼaogaʼi te kupu taheer [ta·herʹ] kae mole ko te kupu tsadaq [tsa·dhaqʹ].” Kae ʼe mole maʼu te kupu tsa·dhaqʹ ia Levitike, pea ʼe mole maʼu te kupu ta·herʹ ʼi te tohi ʼo Taniela. ʼE mole honā pikipikiga mo te fakaliliu.

Koteā ʼAē ʼe Fakahā e Te ʼu Kapite ʼAē ʼe Tuʼu Ai Te ʼu Vaega ʼAia?

ʼI te temi nei koutou vakaʼi te ʼu kapite katoa ʼaē ʼe tuʼu ai te ʼu vaega ʼaia. ʼE ʼui e te kau adventistes, ko te koga tohi ʼaē ia Taniela 8:​14 ʼe “ko he vaega ʼe mole hona pikipikiga” mo te ʼu vaega ki muʼa atu. Kae ʼe koutou manatu feiā koa mokā koutou lau te koga tohi ʼo Taniela 8:​9-​14 ʼi te kiʼi talanoa ʼaē ko tona kupu tāfito ʼaenī “Ko Taniela 8:​14 ʼi Te Kapite Katoa”? ʼE talanoa ʼi te vaega 9 ki he fili, ko te kiʼi tala. ʼE fakahā ʼi te ʼu vaega 10 ki te 12 ko te kiʼi tala ʼaia ʼe ina ʼohofi anai te sagatualio. ʼE fai te fehuʼi ʼaenī ʼi te vaega 13, ‘ ʼE hoko anai ʼo aʼu ki ʼafea te ʼohofi ʼaia?’ Pea ʼe tali fēnei e te vaega 14: “ ʼO aʼu ki te ʼu afiafi pea mo te ʼu uhu e lua afe tolugeau; pea ko te potu taputapu ʼe toe fakatuʼu anai ki tona ʼuhiga totonu.” ʼE hā lelei mai ai, ʼe fai ʼi te vaega 13 te fehuʼi ʼaē ʼe maʼu tona tali ʼi te vaega 14. ʼE ʼui fēnei e te tagata fai teolosia ko Desmond Ford: “Kapau ʼe mole tou fakapipiki ia Taniela 8:​14 mo te fehuʼi ʼaē ʼe fai ki muʼa, pea ʼe tou fai te akonaki ʼe mole hona tafitoʼaga.”b

He koʼe ʼe mole fakapipiki e te kau adventistes te vaega 14 ki te tahi ʼu vaega ʼo te kapite ʼaia? ʼE nātou fai te faʼahi ʼaia ke ʼaua naʼa nātou fakahā te manatu ʼe mole nātou leleiʼia. Ko te kapite ʼaia ʼe ina fakahā, ko te ʼulihi ʼo te sagatualio ʼaē ʼe talanoa kiai te vaega 14, ʼe pipiki ki te meʼa ʼaē ʼe fai e te kiʼi tala. Kae ko te akonaki ʼo te “faifakamāu ʼaē ʼe fakatafito ki he ʼu kumi,” ʼe ina fakahā ko te ʼulihi ʼo te sagatualio ʼe pipiki ki te ʼu gāue ʼa Kilisito. ʼE ʼui ʼe ina ʼave ki te sagatualio ʼaē ʼe ʼi selo, te ʼu agahala ʼo nātou ʼaē ʼe nātou tui. Koia, koteā te meʼa ʼaē ʼe hoko mo kapau ʼe tali e te kau adventistes tanatou akonaki ʼo toe feiā pe mo te talanoa ʼo te tahi ʼu vaega ʼo te kapite? Neʼe tohi fēnei e te Dr. Raymond Cottrell, ko te tagata adventiste ʼaē neʼe kau ki te tā ʼo te tohi SDA Bible Commentary: “Kapau ʼe tou ʼui ko te manatu ʼa te kau adventistes ʼe ʼalutahi mo te ʼu vaega ʼaē ʼi muʼa ʼo Taniela 8:​14, pea ʼe tou ʼui ko te kiʼi tala ʼe ko Kilisito.” Ko te Dr. Cottrell ʼe ina fakamoʼoni fēnei: “ ʼE mole feala ke faka ʼalutahi te akonaki adventiste mo te kapite katoa ʼo Taniela.” ʼO ʼuhiga mo te akonaki ʼo te “faifakamāu ʼaē ʼe fakatafito ki he ʼu kumi,” neʼe tonu ki te ’Ēkelesia Adventiste ke ina filifili​—peʼe ina tali tanatou akonaki peʼe ko te ʼu vaega ʼaē ki muʼa pea mo hoa mai kia Taniela 8:​14. Meʼa fakaʼofaʼofa foki, neʼe nātou tali tanatou akonaki, ka mole ko te ʼu vaega faka Tohi-Tapu. ʼE ʼui e te Dr. Cottrell, ʼe mole ko he meʼa fakapunamaʼuli te ʼui ʼa ʼihi tagata ako Tohi-Tapu ko te kau adventistes ʼe nātou “ ʼai ki te Tohi-Tapu” te ʼu meʼa ʼaē ʼe mole feala ke “toʼo mai te Tohi-Tapu”!

ʼI te taʼu 1967, neʼe teuteuʼi e te Dr. Cottrell te kapite ʼo ʼuhiga mo te tohi ʼa Taniela, pea neʼe ʼave te ako ʼaia ki te ʼu ʼēkelesia adventistes ʼo te malamanei katoa. Neʼe ʼui ʼi te ako ʼaia, ko te koga tohi ʼo Taniela 8:​14 ʼe pipiki moʼoni ki te kapite katoa ʼo Taniela 8, pea ko te ‘fakamaʼa’ ʼe mole faka ʼuhiga kia nātou ʼaē ʼe nātou tui. Ko te meʼa ʼaē ʼe feala ke tou fakatokagaʼi, ko te ako ʼaia neʼe mole talanoa ki te “faifakamāu ʼaē ʼe fakatafito ki he ʼu kumi.”

Ko He ʼu Tali Fakapunamaʼuli

ʼE ʼiloʼi koa e te kau adventistes ko te ʼuluaki tafitoʼaga ʼaē neʼe tou talanoa kiai ʼe mole feʼauga moʼo lagolago ki te akonaki ʼo te “faifakamāu ʼaē ʼe fakatafito ki he ʼu kumi?” Neʼe fai te fehuʼi ʼaenī e te Dr. Cottrell ki te kau takitaki adventistes e toko 27, ‘Koteā te ʼu tafitoʼaga ʼi te fakaliliu peʼe ko te ʼu vaega Tohi-Tapu ʼaē ʼe feala ke koutou fakaʼaogaʼi moʼo fakapipiki ki te koga tohi ʼo Taniela kapite 8 pea mo Levitike 16?’ Neʼe koteā tanatou tali?

“Ko te toko 27 ʼaia neʼe nātou fakamoʼoni, ʼe mole he tafitoʼaga ʼi te fakaliliu peʼe ko te ʼu vaega faka Tohi-Tapu moʼo fakapipiki te koga tohi ʼo Taniela 8:​14 ki te ʼaho ʼo te ʼu faifakalelei ʼo totatou temi pea mo te faifakamāu ʼaē ʼe fakatafito ki he ʼu kumi.” Neʼe ina toe kole age kia nātou, ‘ ʼE ʼi ai koa he tahi ʼu tupuʼaga moʼo fai ʼo te pikipikiga ʼaia?’ Ko te tokolahi ʼi te kau tagata sivi Tohi-Tapu faka adventistes neʼe nātou ʼui neʼe mole he tahi ʼu tupuʼaga, pea ko te toko nima neʼe nātou tali, neʼe nātou fai te manatu ʼaia koteʼuhi neʼe fai e Ellen White te faʼahi ʼaia, pea ko te toko lua neʼe nā ʼui neʼe nātou fakatafito te akonaki ʼaia ki “he faihala” ʼi te fakaliliu. ʼE fakatokagaʼi fēnei e te tagata fai teolosia ko Ford: “Ko te ʼu palalau ʼaia ʼaē neʼe fai e tamatou ʼu tagata maʼuhiga ʼi te sivi Tohi-Tapu, ʼe nātou fakahā lelei mai ʼe mole he tafitoʼaga ki tatatou akonaki ʼo ʼuhiga mo Taniela 8:14.”

ʼE Lagolago Koa Te Tohi ʼa Te Kau Hepeleo Ki Te Akonaki ʼAia?

Ko te lua tafitoʼaga: Ko te koga tohi ʼo Taniela 8:​14 ʼe fakapipiki ki te kapite 9 ʼo Hepeleo. ʼE ʼui fēnei e te tagata fai teolosia ko Ford, “ko tatatou akonaki ʼo ʼuhiga mo Taniela 8⁠:14 ʼe fakatafito ki te fakamahino ʼo te kapite 9 ʼo Hepeleo.” Neʼe fai te pikipikiga ʼaia ʼi te hili ʼo te “Lotomamahi Lahi” ʼaē neʼe hoko ʼi te taʼu 1844. ʼI tana kumi ke ina maʼu he tokoni, neʼe fakatō e te tagata adventiste ko Hiram Edson tana Tohi-Tapu ke tō ava ki te laupapa. Koteā te meʼa ʼaē neʼe hoko? Neʼe tō te Tohi-Tapu ʼo ava ʼi te kapite 8 mo te 9 ʼo Hepeleo. ʼE ʼui fēnei e Ford: “Neʼe mole feala ke maʼu he meʼa neʼe lelei age moʼo lagolago ki te akonaki ʼa te kau adventistes ʼaē ʼe nātou ʼui ko te ʼu kapite ʼaia ʼe nātou fakahā te faka ʼuhiga ʼo te taʼu 1844 pea mo te faka ʼuhiga ʼo te koga tohi ʼo Taniela 8:​14!”

“Ko te manatu ʼaia ʼe maʼuhiga ʼaupito ki te kau adventistes,” ko te ʼui ʼaia ʼa te Dr. Ford ʼi tana tohi Daniel 8:​14, the Day of Atonement, and the Investigative Judgment. “Ko te fakamahino ʼo te faka ʼuhiga ʼo te akonaki ʼo te sagatualio ʼaē ʼe maʼuhiga ʼaupito kia tatou, ʼe maʼu pe ia ʼi te kapite 9 ʼo Hepeleo.” ʼE moʼoni, ko te kapite 9 ʼo Hepeleo ʼe ko te kapite ʼaia ʼaē ʼe maʼu ʼi te Tauhi Foʼou moʼo fakamahino te faka ʼuhiga faka polofeta ʼo te tohi ʼo Levitike kapite 16. Kae ʼe toe ʼui foki e te kau adventistes, ko te vaega ʼo Taniela 8:​14 ʼe ko te vaega ʼo te Tauhi ʼĀfea ʼaē ʼe ina fai te fakamahino ʼaia. Kapau ʼe tonu te ʼu manatu ʼaia e lua, pea ʼe tonu ke toe ʼi ai foki he pikipikiga ʼo te tohi ʼa te kau Hepeleo kapite 9 pea mo te tohi ʼo Taniela kapite 8.

ʼE ʼui fēnei e Desmond Ford: “ ʼE ʼi ʼai te ʼu meʼa ʼe hā lelei mokā lau e he tahi ia Hepeleo kapite 9. ʼE mole talanoa te kapite ʼaia ki te tohi ʼo Taniela, pea ʼe mahino ia, ʼe mole talanoa ki te koga tohi ʼo Taniela 8:​14. . . . Ko te kapite katoa ʼaia ʼe ko he fakamahino ʼo te Levitike kapite 16.” ʼE ina ʼui fēnei: “ ʼE mole feala ke maʼu tamatou akonaki ʼo te sagatualio ʼi te tohi pe e tahi ʼo te Tauhi Foʼou ʼaē ʼe talanoa ki te faka ʼuhiga ʼo te ʼu gāue ʼaē neʼe fakahoko ʼi te sagatualio. Neʼe fakamoʼoni ki te faʼahi ʼaia te kau adventistes ʼiloa ʼi te malamanei katoa.” Koia, ko te lua tafitoʼaga ʼe mole feala ke lagolago ki te akonaki ʼaia.

Kae ʼe mole foʼou te manatu ʼaia. ʼE ʼui e te Dr. Cottrell, talu mai ni ʼu taʼu “neʼe ʼiloʼi lelei e te kau tagata sivi Tohi-Tapu ʼo te ’Ēkelesia te ʼu manatu hala ʼaē neʼe fai ʼi tanatou fakamahino te ʼu koga tohi ʼo Taniela 8:​14 pea mo Hepeleo kapite 9.” Kua hili nei kiai taʼu e 80, ko te tagata adventiste ʼiloa ko E. J. Waggoner neʼe ina ʼui fēnei: “Ko te akonaki adventiste ʼo ʼuhiga mo te sagatualio, pea mo te ‘faifakamāu ʼaē ʼe fakatafito ki he ʼu kumi’ . . . , ʼe hage ko he fakafisi ʼaia ki te moʼoni ʼo ʼuhiga pea mo te faifakalelei.” (Confession of Faith) Kua hili nei kiai taʼu e 30, neʼe fakahā te ʼu fihifihia ʼaia ʼi te Fono Lahi ʼaē ʼe kau kiai te ʼu tagata takitaki ʼo te ’Ēkelesia Adventiste.

Ko He ʼu Fihifihia ʼe Mole Hona Puleʼaki

Ko te Fono Lahi ʼaia neʼe ina fakatuʼutuʼu he “Komite Ki Te ʼu Fihifihia ʼo Te Tohi ʼo Taniela.” Neʼe tonu ke ina teuteuʼi he tānaki ʼo ʼuhiga mo te ʼu puleʼaki ʼaē ʼe feala ke fai moʼo fakatokatoka ʼo te ʼu fihifihia ʼo te koga tohi ʼo Taniela 8:​14. Ko te ʼu tagata e toko 14 ʼaē neʼe kau ki te komite ʼaia, neʼe nātou sivisivi te faʼahi ʼaia lolotoga taʼu e nima, kae neʼe mole feala ke nātou maʼu he puleʼaki ʼe nātou ʼio fuli kiai. ʼI te taʼu 1980, ko Cottrell, ʼaē neʼe kau ki te komite, neʼe ina ʼui ko nātou ʼaē neʼe kau ki te komite neʼe nātou manatu ko te fakamahino faka adventiste ʼo te koga tohi ʼo Taniela 8:​14, neʼe feala ke “fakamoʼoni kiai” ʼaki te ʼu “meʼa ʼe mole ʼiloʼi papau,” pea neʼe tonu ke “galoʼi” te ʼu fihifihia ʼaia. Neʼe ina toe ʼui fēnei: “Koutou manatuʼi, ko te higoa ʼo te komite neʼe ko te Komite Ki Te ʼu Fihifihia ʼo Te Tohi ʼo Taniela, pea ko te tokolahi neʼe nātou ʼui ʼe tonu ke tou galoʼi te ʼu fihifihia ʼaia, pea mo ʼaua naʼa tou ʼui he meʼa ʼo ʼuhiga mo te ʼu faʼahi ʼaia.” Kapau neʼe nātou ʼui te faʼahi ʼaia, ʼe ko he “fakamoʼoni ʼaia ʼe mole hanatou ʼu tali ʼo ʼuhiga mo te ʼu fihifihia ʼaia.” Koia, ko ʼihi neʼe mole nātou lagolago ki te manatu ʼa te tokolahi, pea neʼe mole nātou tohi ʼi he pepa te faʼahi ʼaia, ke fakahā ki te hahaʼi. Neʼe mole he puleʼaki ki te ʼu fihifihia ʼo tanatou akonaki.

ʼI tana talanoa ki te fihifihia ʼaia, ʼe ʼui fēnei e te Dr. Cottrell: “ ʼE kei toe te fihifihia ʼo Taniela 8:​14, koteʼuhi ʼo aʼu ki te temi nei, neʼe mole feala hatatou fakamoʼoni ʼe ʼi ai moʼoni he fihifihia maʼuhiga ʼi tatatou fakamahino ʼo te vaega faka Tohi-Tapu ʼaia. ʼE mole puli anai te fihifihia ʼaia mo kapau ʼe tou ʼui ʼe mole ʼi ai he fihifihia, pea kapau ko tatou takitokotahi pea mo tatou fuli ʼi totatou ʼuhiga takitaki lotu, ʼe mole tou fia fetogi tatatou ʼu manatu.”​—Spectrum, ko te nusipepa ʼe tā e te Association des forums adventistes.

Ko te Dr. Cottrell ʼe ina fakaloto mālohi te kau adventistes ke nātou “toe vakavakaʼi fakalelei te ʼu manatu tāfito pea mo te ʼu faʼahiga fakakaukau ʼaē neʼe fakatafito kiai tatatou fakamahino ʼo te vaega faka Tohi-Tapu ʼaia ʼaē ʼe maʼuhiga ʼaupito​—ki te lotu adventiste.” ʼE mātou fakaloto mālohiʼi te kau adventistes ke nātou vakaʼi te akonaki ʼo te “faifakamāu ʼaē ʼe fakatafito ki he ʼu kumi,” ke nātou ʼiloʼi ai peʼe maʼu moʼoni tona ʼu tafitoʼaga ʼi te Tohi-Tapu, peʼe fakatafito ia ki he ʼu talatisio ʼe mole feala hatatou falala kiai.c ʼAki he agapoto, neʼe fai e te ʼapositolo ko Paulo te fakaloto mālohi ʼaenī: “Koutou vakaʼi peʼe moʼoni ia meʼa fuli; koutou pipiki maʼu ki te meʼa ʼaē ʼe lelei.”​—1 Tesalonika 5:​21.

[Nota ʼi te lalo pasina]

[Talanoa ʼo te pasina 27]

Ko Taniela 8:​14 ʼi Te Kapite Katoa

TANIELA 8:9 “Pea mai te tala e tahi ʼo te ʼu tala ʼaia neʼe tupu ai te tahi tala, ko he tala veliveli, pea neʼe lahilahi ʼaupito ki te potu toga pea ki te hopoʼaga ʼo te laʼā pea ki te fenua Matalelei. 10 Pea neʼe hoko aipe tana lahilahi ʼo aʼu ki te kautau ʼo te lagi, ʼo ina fakatō ai ki te kele ia ʼihi ʼo te kautau pea mo ʼihi fetuʼu, pea neʼe malamalaki nātou. 11 Pea ʼo aʼu ki te ʼAliki ʼo te kautau neʼe laupisi, pea neʼe toʼo mai ia ia te sakilifisio ʼaē ʼe fai hoholo, pea ko te potu ʼaē neʼe tuʼu ai tana sagatualio neʼe fakatō ki lalo. 12 Pea, ʼaki te temi, neʼe līaki he kautau, ʼo toe feiā aipe mo te sakilifisio ʼaē ʼe fai hoholo, ʼuhi ko te talagataʼa; pea neʼe ina lī te moʼoni ki te kele, pea neʼe ina fai he ʼu meʼa neʼe lava lelei.

“13 Pea neʼe ʼau logo ki te maʼoniʼoni neʼe palalau, pea ko te tahi maʼoniʼoni neʼe ʼui maʼana kia ia ʼaē neʼe palalau: ‘ ʼE hoko anai ʼo aʼu ki ʼafea te meʼa ʼaē ʼe hā ai te sakilifisio ʼaē ʼe fai hoholo, pea mo te talagataʼa ʼaē ʼe ina fakatupu te maumau, ke liliu ai te potu taputapu pea mo te kautau, ko he ʼu meʼa ʼe tonu ke malamalaki?’ 14 Pea neʼe ʼui maʼana kia te ʼau: ‘ ʼO aʼu ki te ʼu afiafi pea mo te ʼu uhu ʼaē e lua afe tolugeau; pea ko te potu taputapu ʼe toe fakatuʼu moʼoni anai ki tona ʼuhiga totonu.’ ”​—Les Saintes Écritures — Traduction du monde nouveau.