He Koʼe ʼe Tonu Ke Tou Loto Fakafetaʼi?
ʼUHI ko te tafa ʼo tona tuʼa, neʼe tonu ke mavae ia Harley ʼi tana matani gāue ʼaē neʼe ina gaohi ai te ʼu masini, ke ʼalu ʼo gāue pilō. ʼI tona fakafehuʼi pe koteā tana manatu ki te fetogi ʼaia, neʼe ʼui fēnei e Harley: “ ʼE moʼoni, ʼe ʼi ai ʼihi temi ʼe ʼau toe fia gaohi ai te ʼu masini. Kae ʼi tona fakahagatonu, ʼe ʼau fiafia age ʼi taku gāue ʼi te temi ʼaenī, ʼi te gāue ʼaē neʼe ʼau fai ki muʼa atu.”
ʼI tana fakamahino te tupuʼaga ʼo tona fiafia, ʼe ʼui fēnei e Harley: “ ʼE tupu ko te aga ʼa te hahaʼi ʼaē ʼe nātou gāue mo ʼau. ʼE mole nātou hage ko nātou ʼo taku matani gāue ʼāfea, he ko toku patolo pea mo te ʼu hahaʼi ʼaē ʼe mātou gāue tahi, ʼe nātou leleiʼia te ʼu meʼa ʼaē ʼe ʼau fai, pea ʼe nātou fakamālo tuʼumaʼu mai kia ʼau. ʼE kehe ʼaupito te faʼahi ʼaia mo taku gāue ʼāfea.” Kua gāue fiafia ia Harley, heʼe ina ʼiloʼi ʼe ʼi ai tona ʼaoga.
Ko te fai ʼo he fakavikiviki pea mo te fakahā ʼo te loto fakafetaʼi mokā ʼe ʼaoga, ʼe ko he ʼu meʼa ʼe fakatupu fiafia moʼoni. Kae ʼi te tahi faʼahi, ko te maʼuli galo ʼe fakatupu lotomamahi, ohage ko tona ʼui fēnei e Shakespeare: “Agi mai, agi mai, ê matagi ʼo te temi nive, he mole ke kovi age koe ʼi te maʼuli galo ʼa te tagata.” Meʼa fakaʼofaʼofa foki, heʼe tokolahi te hahaʼi ʼaē ʼe fai kia nātou te agakovi ʼaia.
Koutou Tekeʼi Te Maʼuli Galo
ʼI te mālama ʼaenī, ʼe tahitahiga te fakahā e te hahaʼi tonatou loto fakafetaʼi. Ohage la, ko te tagata faitohi neʼe ina fai te fehuʼi ʼaenī: “Kapau ʼe maʼu he temi ʼo te fafine ʼohoana ke ina tohi te ʼu kiʼi pepa fakaafe e 200, he koʼe ʼe mole feala hana maʼu he temi ke ina tohi he ʼu kiʼi pepa moʼo fakamālo ki te ʼu meʼa ʼofa e 163 ʼaē neʼe fai age kia ia?” ʼI te agamāhani, ʼe mole tou puʼaki pe la te kupu “mālo” ki te hahaʼi. Ko te loto fakafetaʼi ʼe fetogi ʼaki te manatu pe ʼaē kia kita totonu. Ko te faʼahi ʼaia ʼe kau ki te ʼu fakaʼiloga ʼo te ʼu ʼaho fakamuli. Neʼe fai e te ʼapositolo ko Paulo te fakatokaga ʼaenī: “ ʼE tonu ke mahino kia koe, ʼe hoko anai ʼi te ʼu ʼaho fakamuli he ʼu temi ʼe fakatupu tuʼutāmaki. Tokolahi ʼe nātou manatu pe anai kia nātou totonu. . . . ʼE ʼiloga lelei anai tonatou maʼuli galo.”—2 Timoteo 3:1, 2, Phillips.
ʼI te tahi ʼu ʼaluʼaga, ko te loto fakafetaʼi ʼe fetogi ʼaki te fakalai. Ka kita fakahā tokita loto fakafetaʼi, ʼe kita fai ʼaki he loto katoa pea ʼe mole kita fakaʼamu ke liufaki mai he meʼa kia kita. Kae ko te fakalai ʼe ko he fakavikiviki ʼe lahi fau pea ʼe mole fakamalotoloto, pea ʼe lagi kita fai te faʼahi ʼaia ke hikihiki tokita tuʼulaga, peʼe ke fua lelei kia kita. (Suta 16) Ko te faʼahiga palalau mālie ʼaia ʼe mole gata pe ki te fakaoloolo ʼo he tahi, kae ʼe ko he fakahā ʼaia ʼo takita fialahi pea mo takita fiatuʼu. Koia, ʼe koutou leleiʼia anai koa ke fai atu kia koutou he ʼu fakalai malualoi? Ko te loto fakafetaʼi fakamalotoloto, ʼe ko he meʼa ʼe fakaloto fīmālie moʼoni.
ʼE fua lelei te loto fakafetaʼi kia ia ʼaē ʼe ina fakahā te kalitate ʼaia. Ko te ʼofa ʼaē ʼe fakahā age ki ai e te hahaʼi ʼuhi ko tona loto fakafetaʼi, ʼe tupu ai tona fiafia pea mo tona fīmālie. (Vakaʼi ia Tāʼaga Lea 15:13, 15.) Tahi ʼaē meʼa, ko te loto fakafetaʼi ʼe ko he kalitate ʼe lelei, pea ʼe ina puipui kita mai te ʼita, mo te maheka, pea mo te lotokovi.
“Koutou Fakahā Tokotou Loto Fakafetaʼi”
ʼE fakaloto mālohiʼi tatou e te Tohi-Tapu ke tou maʼuliʼi te loto fakafetaʼi. Neʼe tohi fēnei e Paulo: “Koutou loto fakafetaʼi kia meʼa fuli. Heʼe ko te finegalo ʼaia ʼo te ʼAtua ʼo fakatahi mo Kilisito Sesu ʼo ʼuhiga mo koutou.” (1 Tesalonika 5:18) Pea neʼe fai e Paulo te tokoni ʼaenī ki te kau Kolose: “Ke pule te tokalelei ʼo Kilisito ʼi ʼokotou loto . . . Pea ke koutou fakahā tokotou loto fakafetaʼi.” (Kolose 3:15) ʼE lahi te ʼu pesalemo ʼaē ʼe tou maʼu ai he ʼu palalau fakafetaʼi, ʼo hā mai ai ko te fakafetaʼi fakamalotoloto ʼe ko he kalitate fakaʼatua. (Pesalemo 27:4; 75:1) ʼE mahino mai ai, ʼe leleiʼia e Sehova mokā tou fakahā he loto fakafetaʼi ʼi te ʼu faʼahi fuli ʼo totatou maʼuli.
Kae koteā te ʼu fihifihia ʼo te malamanei agakovi ʼaenī, ʼaē ʼe faigataʼa ai tatatou maʼuliʼi te loto fakafetaʼi? ʼE lava feafeaʼi hatatou fakahā he loto fakafetaʼi ʼi te ʼaho fuli pe ʼo totatou maʼuli? ʼE tou vakaʼi anai te faʼahi ʼaia ʼi te alatike ʼaē ka hoa mai.