ʼAki He Agavaivai Tou Faka ʼAlutahi Totatou Maʼuli Mo Te Ala ʼa Sehova

Ko Te Kau Faka Mafola ʼo Te Puleʼaga ʼe Nātou Fakamatala

ʼAki He Agavaivai Tou Faka ʼAlutahi Totatou Maʼuli Mo Te Ala ʼa Sehova

“KOUTOU kumi ia Sehova, ia koutou fuli, ʼaē ko te kau agavaivai ʼo te kele.” Ko te fakaafe ʼaia ʼaē neʼe kalagaʼi e te polofeta Hepeleo ko Sofonia ia sēkulō e 26 ki muʼa atu, pea ʼe kei fakahā ia ʼaho nei ki te hahaʼi ʼi te malamanei katoa. (Sofonia 2⁠:⁠3) Koteā te faka ʼuhiga ʼo te ʼui ʼaē ke kita kumi ia Sehova? ʼUluaki, ʼe tonu ke tou kamata maʼu te ʼatamai mālama ʼo ʼuhiga mo Sehova, te ʼAtua pe e tahi ʼaē ʼe moʼoni pea mo maʼuli.—Selemia 10:10; Soane 17:3.

Kae ko te maʼu ʼo te ʼatamai mālama ʼaia, ʼe mole feʼauga ke feala ai hakita maʼu te ʼofa ʼa te ʼAtua. Ke kita maʼu te faʼahi ʼaia, ʼe tonu ke kita maʼuliʼi te ʼatamai mālama ʼaia. ʼO feafeaʼi? ʼE tonu ke tou faka ʼalutahi tatatou ʼu manatu pea mo tatatou aga, mo te ʼu lekula ʼa te ʼAtua, ohage ko te meʼa ʼaē neʼe fai e te tagata ʼi Suriname.—Efesi 4:22-24.

Ko Eddy, te tagata faiako ʼe taʼu 30 vaelua, neʼe holi mālohi ke ina maʼu te ʼu tali totonu ki te ʼu fehuʼi ʼaenī: ‘Koteā te tuʼulaga ʼo te lotu ʼi te sosiete ʼo totatou temi?’ pea ‘ ʼE ʼalutahi koa te Tohi-Tapu, ʼaē ko he tohi ʼāfea, mo te ʼu meʼa poto lalahi?’ ʼI te temi ʼaē neʼe ʼōmai ai te kau Fakamoʼoni ʼa Sehova kiō ia, neʼe fakalogo lelei ia Eddy ki te ʼu tali ʼaē neʼe nātou fai age ʼaki te Tohi-Tapu. Pea neʼe ina toʼo he ʼu kiʼi nota ke feala ai hana vakaʼi peʼe totonu te ʼu fakamahino ʼaē neʼe fai age e te kau Fakamoʼoni ʼa Sehova.

ʼI muʼa atu, neʼe kau ia Eddy ʼi te lotu neʼe ina ako ai, ko te ʼAtua neʼe ina fakatupu te ʼu geli ke nātou liliu ʼaki te evolisio ko he ʼu tagata. Koia neʼe ina tali fakalelei te tohi La vie : comment est-elle apparue ? Évolution ou création ? ʼaē neʼe tuku age e te kau Fakamoʼoni kia ia. Neʼe ōfo ʼi te fakamahino lelei ʼa te tohi ʼaia te fakamatala ʼo te Tohi-Tapu ʼo ʼuhiga mo te fakatupu. ʼI tana ako te Tohi-Tapu, neʼe mahino papau kia ia kua ina maʼu te moʼoni!

Kae neʼe tau mo te ʼahiʼahi. Neʼe nofo ia Eddy mo te ʼu hahaʼi ʼe nātou aga kaihaʼa pea mo nātou maʼuli kākā. Koia neʼe tonu ke ina filifili peʼe ina muliʼi te aga fakahehema ʼo tona ʼu kaumeʼa, peʼe ina līaki te aga ʼaia ʼo mulimuli ki te faʼahiga maʼuli ʼaē ʼe ina vikiʼi te ʼAtua. Pea ʼaki he agapoto, neʼe fili e Eddy te tonu fakamuli. Neʼe ina līaki tana ʼu fakakaugā kovi pea mavae mai te ʼapi ʼaia.—1 Kolonito 15:33, 34.

Neʼe tuputupu fakavilivili ia Eddy ʼi tana kamata kau ki te ʼu fono ʼi te Fale ʼo te Puleʼaga. Neʼe ina fetogi tona faʼahiga teu pea mo te gaohi ʼo tona ʼulu, pea neʼe ina kamata fakahā ki tona ʼu kaumeʼa pea mo tona ʼu kāiga te ʼu meʼa ʼaē neʼe ina ako. Ki muli age, neʼe ʼāsili tana fiafia he neʼe tali ke ina kamata faka mafola te “logo lelei.” (Mateo 24:14; Gāue 20:20) ʼI Tesepeli 1996, neʼe hoko mai te ʼaho ʼaē neʼe kua fualoa tana talitali kiai, he neʼe papitema ʼi te vai moʼo fakahā kua ina foaki tona maʼuli kia Sehova.

ʼI te taʼu fuli, ko te hahaʼi fakamalotoloto ʼe toko lauʼi teau afe ʼe nātou tali te fakaafe ʼaē ke nātou “kumi ia Sehova.” ʼI tanatou fai te faʼahi ʼaia, ʼe hoko moʼoni kia nātou te meʼa ʼaē ʼe ʼui fēnei ia Tāʼaga Lea 22:4: “Ko te ikuʼaga ʼo te agavaivai pea mo te manavasiʼi kia Sehova, ʼe ko te koloā, mo te kolōlia pea mo te maʼuli.” Ei, ʼi tanatou mulimuli ʼaki he agavaivai ki te ala ʼa Sehova, ko te hahaʼi ʼaē ʼe manako ki te moʼoni, ʼe nātou maʼu te ʼu tapuakina ʼaia ʼi te temi nei, pea ʼe nātou fakaʼamu ʼaki he loto falala ki te ʼu tapuakina heʼegata ʼaē ʼe foaki anai kia nātou ʼi te kele ʼaenī.—Pesalemo 37:29.

[Mape ʼo te pasina 18]

(Vakaʼi te nusipepa]

Mer des Caraïbes

GUYANA

SURINAME

GUYANE

BRÉSIL

[Haʼuʼaga ʼo te paki]