Tou Atali ʼAki “He Lotohoha”
“Ko te atali ʼaki he lotohoha ʼa te ʼu meʼa ʼaē neʼe fakatupu ʼe nātou talitali ki te fakahā ʼo te ʼu foha ʼo te ʼAtua.”—Loma 8:19.
1. Koteā ʼaē ʼe tatau ai te ʼaluʼaga ʼo te kau Kilisitiano ʼo te temi ʼaenī pea mo te ʼaluʼaga ʼo te kau Kilisitiano ʼo te ʼuluaki sēkulō?
ʼE TATAU te ʼaluʼaga ʼo te kau Kilisitiano moʼoni ʼo te temi ʼaenī pea mo te ʼaluʼaga ʼo te kau Kilisitiano ʼo te ʼuluaki sēkulō. Neʼe ʼi ai te lea faka polofeta neʼe tokoni ki te ʼu kaugana ʼa Sehova ʼo te temi ʼaia ke nātou ʼiloʼi te temi ʼaē neʼe tonu ke hā ai te Mesia. (Taniela 9:24-26) Pea neʼe toe fakakikite e te lea faka polofeta ʼaia te fakaʼauha ʼo Selusalemi, kae neʼe mole lava ʼiloʼi fakatomuʼa e te kau Kilisitiano te ʼaho ʼaē ka hoko ai te fakaʼauha ʼo te kolo ʼaia. (Taniela 9:26b, 27) ʼO toe feiā aipe, neʼe ʼi ai te lea faka polofeta neʼe fakatalitali kiai te kau ako fakamalotoloto ʼo te Tohi-Tapu ʼo te 19 sēkulō. ʼI tanatou fakapipiki te ʼu “temi e fitu” ʼo Taniela 4:25 ki “te ʼu temi ʼo te kau Senitile,” neʼe nātou ʼiloʼi fakatomuʼa ai ʼe nofo hau anai ia Kilisito ʼi te Puleʼaga ʼi te taʼu 1914. (Luka 21:24, King James Version; Esekiele 21:25-27) Logope la ʼe lahi te ʼu lea faka polofeta ʼi te tohi ʼo Taniela, kae ʼe mole feala ʼaki te ʼu lea faka polofeta ʼaia ke ʼiloʼi e te kau ako ʼo te Tohi-Tapu ʼo te temi ʼaenī, te ʼaho tonu ʼaē ka fakaʼauha katoa ai te tuʼu ʼo te ʼu faʼahiga meʼa ʼa Satana. (Taniela 2:31-44; 8:23-25; 11:36, 44, 45) Kae kua vave hoko mai te faʼahi ʼaia, heʼe tou maʼuʼuli nei ʼi “te temi fakaʼosi.”—Taniela 12:4.a
Tou Nonofo Fakaonoono Lolotoga ʼi Te ʼi Henī ʼa Kilisito
2, 3. (a) Koteā ʼaē ʼe ina fakamoʼoni tāfito kua tou maʼuʼuli lolotoga ʼi te ʼi henī ʼa Kilisito ʼi tona ʼuhiga hau? (b) Koteā ʼaē ʼe ina fakahā mai neʼe tonu ke nofo fakaonoono te kau Kilisitiano lolotoga ʼi te ʼi henī ʼa Sesu Kilisito?
2 ʼE moʼoni, neʼe ko te lea faka polofeta ʼaē neʼe tupu ai te nofo talitali ʼa te kau Kilisitiano ʼi muʼa ʼo te ʼafio ʼa Kilisito ʼi te puleʼaga ʼi te taʼu 1914. Kae ko te “fakaʼiloga” ʼaē neʼe talanoa kiai ia Kilisito ʼo ʼuhiga mo tana ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī, ʼe faka ʼuhiga ki te ʼu meʼa kehekehe ʼe tonu ke hoko. Pea ʼe lahi te ʼu meʼa ʼaia neʼe tonu ke hoko ʼi te ʼosi kamata ʼo tana ʼi henī. Ko te ʼu meʼa ʼaia—te ʼu tau, mo te ʼu hoge, mo te ʼu mafuike, mo te ʼu mahaki, mo te tuputupu ʼo te meʼa noaʼi ʼo te lao, mo te fakataga ʼo te kau Kilisitiano, pea mo te fai faka mafola ʼo te logo lelei ʼo te Puleʼaga ʼi te malamanei katoa—ʼe ko te fakamoʼoni tāfito ʼaia kua tou maʼuʼuli lolotoga ʼi te ʼi henī ʼa Kilisito ʼi tona mālohi faka hau.—Mateo 24:3-14; Luka 21:10, 11.
3 Kae neʼe tokoni tāfito fēnei ia Sesu ki tana ʼu tisipulo: “Koutou haga lamalama, . . . [mo] nonofo ʼalaʼala, . . . koutou nonofo fakaonoono.” (Maleko 13:33, 37; Luka 21:36) Kapau ʼe tou lau fakalelei te ʼu vaega ʼaē ʼe tuʼu ʼi muʼa ʼo tana fai te ʼu tokoni ʼaia ke nātou nonofo fakaonoono, pea ʼe fakahā mai e te ʼu vaega ʼaia neʼe mole ʼui e Kilisito ke nātou nonofo fakaonoono ʼo ʼuhiga mo te fakaʼiloga ʼo te kamata ʼo tana ʼi henī. Kae neʼe ina fakatotonu ki tana kau tisipulo moʼoni ke nātou nonofo fakaonoono lolotoga tana ʼi henī. He koʼe neʼe tonu ke nonofo fakaonoono te kau Kilisitiano moʼoni?
4. Koteā te ʼaoga ʼo te fakaʼiloga ʼaē neʼe fakahā e Sesu?
4 Neʼe fakahā e Sesu tana lea faka polofeta lahi, moʼo tali ki te fehuʼi ʼaenī: “Tala mai kia mātou: Ko ʼafea ʼaē ka hoko ai anai te ʼu meʼa ʼaia [ʼaē ka iku anai ki te fakaʼauha ʼo te tuʼu ʼo te ʼu faʼahiga meʼa faka Sutea], pea koteā anai te fakaʼiloga ʼo tau ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī?” (Mateo 24:3) ʼE feala anai ʼaki te fakaʼiloga ʼaē neʼe tala fakakikite ke ʼiloʼi ai te ʼi henī ʼa Kilisito, pea mo te ʼu meʼa ʼaē ʼe tonu ke hoko ʼo iku ai ki te fakaʼosi ʼo te tuʼu ʼo te ʼu faʼahiga meʼa agakovi ʼaenī.
5. Neʼe fakahā feafeaʼi e Sesu, ʼe “haʼu” anai lolotoga tana kua ʼi henī?
5 Neʼe fakahā e Sesu, ʼi te lolotoga ʼo tana “ ʼi henī” (ʼi te faka Keleka, pa·rou·siʹa) ʼe haʼu anai ʼaki te mālohi pea mo te kolōlia. ʼO ʼuhiga mo tana “haʼu” (mai te kupu faka Keleka erʹkho·mai), neʼe ina ʼui fēnei: “Pea ʼe hā mai anai ʼi te lagi te fakaʼiloga ʼo te Foha ʼo te tagata, pea ʼe tuki fatafata ai anai mo fetāgihi ia te ʼu telepi fuli ʼo te kele, pea ʼe nātou sisio anai ki te Foha ʼo te tagata ʼe haʼu ʼi te ʼu ʼao ʼo te lagi mo te mālohi pea mo te kolōlia lahi. . . . ʼI he toʼo ʼo te ʼakau ko te fiku ohage ko he lea fakatātā, koutou ako te meʼa ʼaenī: Ka mālū tona vaʼa ʼaē kei mui pea mo tupu hona ʼu lau, pea ʼe koutou ʼiloʼi ai kua ōvi mai te fasiga taʼu māfana. Pea ʼe toe feiā pe mo koutou, ka koutou sisio anai ki te ʼu meʼa fuli ʼaia, ke koutou ʼiloʼi kua ōvi mai [ia Kilisito] ki te ʼu matapā. . . . Ke koutou nofo fakaonoono, heʼe mole koutou ʼiloʼi pe ko te ʼaho fea ʼaē ʼe haʼu ai tokotou ʼAliki. . . . Ke koutou nofo teuteu, heʼe ko te Foha ʼo te tagata ʼe haʼu ʼi te hola ʼaē ʼe mole koutou manatu kiai.”—Mateo 24:30, 32, 33, 42, 44.
He Koʼe ʼe Haʼu Ia Sesu Kilisito?
6. ʼE hoko feafeaʼi anai te fakaʼauha ʼo “Papiloni Lahi”?
6 Logope la kua ʼi henī ia Sesu Kilisito ʼi tona ʼuhiga Hau talu mai te taʼu 1914, kae ʼe tonu ke ina fakamāuʼi te ʼu kautahi kehekehe pea mo te ʼu hahaʼi, ʼi muʼa ʼo tana fakamāuʼi ia nātou ʼaē ʼe agakovi. (Vakaʼi ia 2 Kolonito 5:10.) Kua ōvi mai te temi ʼaē ka fakalotoʼi ai e Sehova te kau takitaki politike ke nātou fakaʼauha ia “Papiloni Lahi,” te kautahi faka malamanei ʼo te lotu hala. (Fakahā 17:4, 5, 16, 17) Neʼe ʼui fakalelei e te ʼapositolo ko Paulo, ʼe fakaʼauha anai e Sesu Kilisito “te tagata ʼaē ʼe manuki ki te lao”—ʼaē ʼe ina fakatātā te kau takitaki lotu ʼaposita ʼo te Keletiate, te koga tāfito ʼo “Papiloni Lahi.” Neʼe tohi fēnei e Paulo: “ ʼE hā anai te tagata ʼaē ʼe manuki ki te lao, ʼaē ka molehi anai e te ʼAliki ko Sesu ʼaki te laumālie ʼo tona gutu pea mo ina laliki ʼi te hā ʼo tana ʼi henī.”—2 Tesalonika 2:3, 8.
7. ʼI te temi ʼaē ka haʼu ai te Foha ʼo te tagata ʼi tona kolōlia, koteā te fakamāu ʼaē ka ina fai anai?
7 ʼI te temi ka haʼu ʼaē kua ōvi mai, ʼe fakamāu anai e Kilisito te hahaʼi ʼo te ʼu puleʼaga ʼo mulimuli ki te ʼu meʼa ʼaē neʼe nātou fai ki tona ʼu tēhina ʼaē kei nonofo ʼi te kele. ʼE tou lau fēnei: “Ka haʼu anai te Foha ʼo te tagata ʼi tona kolōlia, pea mo te kau ʼaselo fuli mo ia, pea ʼe heka anai ki tona hekaʼaga faka hau faka kolōlia. Pea ʼi ʼona muʼa ʼe tānaki anai te ʼatu puleʼaga katoa, pea ʼe ina fevaevae kehe ʼaki anai te hahaʼi, ohage ko te vaheʼi e te tagata tauhi ōvi te ʼu ōvi mai te ʼu tao. Pea ʼe ina tuku anai te faga ōvi ki tona toʼomataʼu, kaʼe ko te faga tao ki tona toʼohema. . . . ʼE tali age anai e te hau ʼo ʼui maʼana ki [te ʼu ōvi]: ‘ ʼE ʼau tala moʼoni atu kia koutou: ʼI te fakafuafua ʼo te meʼa ʼaē neʼe koutou fai ki he tahi ia nātou ʼaē ʼe liliki ʼosi ʼo toku ʼu tēhina ʼaenī, neʼe ko ʼau ia ʼaē neʼe koutou fai kiai.’ . . . Pea ko [te ʼu tao] ʼe nātou ʼolo ai anai ki te pulinoa heʼegata, kaʼe ko te kau agatonu, ki te maʼuli heʼegata.”—Mateo 25:31-46.
8. ʼE fakamatala feafeaʼi e Paulo te haʼu ʼa Kilisito moʼo fakahoko te fakamāu ki te hahaʼi ʼaē ʼe mole pipiki ki te ʼAtua?
8 Ohage ko tona fakahā ʼi te lea fakatātā ʼo te ʼu ōvi pea mo te ʼu tao, ʼe fakahoko anai e Sesu te fakamāu fakamuli ki te hahaʼi fuli ʼaē ʼe mole pipiki ki te ʼAtua. Neʼe fakamoʼoni e Paulo ki te ʼu tēhina ʼaē neʼe tau mo he ʼu mamahi, “te fīmālie mo mātou, mokā hā anai te ʼAliki ko Sesu, mai te lagi mo tana kau ʼaselo mālohi, ʼi he afi kakaha, mokā ina fakahoko anai te lagavaka kia nātou ʼaē ʼe mole nātou ʼiloʼi te ʼAtua pea mo nātou ʼaē ʼe mole fakalogo ki te logo lelei ʼo ʼuhiga mo totatou ʼAliki ko Sesu. ʼE hoko anai kia nātou ʼaia te tautea fakamāu ʼo te fakaʼauha heʼegata ia muʼa ʼo te ʼAliki pea ia muʼa ʼo te kolōlia ʼo tona mālohi, ʼi te temi ʼaē ka haʼu ai ke faka kolōliaʼi ʼo ʼuhiga mo te kau maʼoniʼoni.” (2 Tesalonika 1:7-10) ʼI tatatou fakatalitali ke hoko mai te ʼu meʼa fakaofoofo fuli ʼaia, ʼe mole tonu koa la ke tou tui pea mo tou haga nonofo fakaonoono ʼo ʼuhiga mo te haʼu ʼa Kilisito?
Ko He Atali ʼAki He Lotohoha Ki Te Fakahā ʼo Kilisito
9, 10. He koʼe ʼe atali ʼaki he lotohoha e te kau fakanofo ʼaē ʼe kei maʼuʼuli ʼi te kele te fakahā ʼo Sesu Kilisito?
9 Ko ‘te hā ʼo te ʼAliki ko Sesu mai te lagi’ ʼe mole gata ʼaki pe te fakaʼauha ʼa te kau agakovi, kae ʼe hoko ai anai mo te fakapale ʼa te kau agatonu. Ko te toe ʼo te ʼu tēhina fakanofo ʼa Kilisito ʼaē kei maʼuʼuli ʼi te kele, ʼe kei lagi nātou tau mo he ʼu mamahi ʼi muʼa ʼo te hā ʼaia ʼa Kilisito, kae ʼe nātou fiafia ʼuhi ko tanatou ʼamanaki faka kolōlia ʼaē ke nātou ʼolo ki selo. Neʼe tohi fēnei e te ʼapositolo ko Petelo ki te kau Kilisitiano fakanofo: “Koutou haga fiafia lahi, heʼe koutou kau ki te ʼu mamahi ʼa Kilisito, ke koutou fakafiafia pea mo koutou toe fonu foki ʼi te fiafia lolotoga te hā ʼo tona kolōlia.”—1 Petelo 4:13.
10 ʼE fia nonofo agatonu te kau fakanofo ʼo aʼu ki tanatou ‘fakatahitahi mo Kilisito,’ ke liliu ai tanatou “tui ʼaē kua ʼahiʼahiʼi” ko he “meʼa ke vikiʼi, mo faka kolōliaʼi pea mo faka maʼuhigaʼi ʼi te temi ʼo te fakahā ʼo Sesu Kilisito.” (2 Tesalonika 2:1; 1 Petelo 1:7) ʼE tou lau fēnei ʼo ʼuhiga mo te kau Kilisitiano agatonu ʼaia ʼaē neʼe fakanofo ʼaki te laumālie: “Ko te fakamoʼoni ʼo ʼuhiga mo Kilisito neʼe mālohi iō koutou, ʼo tupu ai he mole hala mo koutou he meʼa ʼofa lolotoga te temi ʼaē ʼe koutou fakatalitali ai ʼaki he lotohoha ki te fakahā ʼo totatou ʼAliki ko Sesu Kilisito.”—1 Kolonito 1:6, 7.
11. ʼI tanatou atali ki te fakahā ʼo Sesu Kilisito, koteā ʼaē ʼe fai e te kau Kilisitiano fakanofo?
11 ʼE maʼu e te toe ʼo te kau fakanofo te manatu ʼa Paulo, ʼaē neʼe ina tohi fēnei: “ ʼE ʼau fakafuafua ko te ʼu mamahi ʼo te temi ʼaenī ʼe ko he meʼa noa ia mokā fakatatau ki te kolōlia ʼaē ka fakahā ia tatou.” (Loma 8:18) ʼE mole fakalogo tanatou tui ki te lau ʼo te ʼu temi. ʼE nātou maʼumaʼua tuʼumaʼu ʼi te tauhi kia Sehova, ʼo nātou foaki ai he faʼifaʼitaki lelei ki tanatou ʼu kaugā gāue, te “tahi ʼu ōvi.” (Soane 10:16) ʼE ʼiloʼi e te kau fakanofo ʼaia kua ōvi mai te fakaʼosi ʼo te tuʼu ʼo te ʼu faʼahiga meʼa agakovi ʼaenī, pea ʼe nātou manatuʼi ai te tokoni ʼaenī ʼa Petelo: “Koutou fakamālohiʼi takotou fakakaukau ʼo ʼuhiga mo te gāue, koutou nonofo katoa ʼi te aga poto; koutou tuku takotou ʼamanaki ki te ʼofa makehe ʼaē ʼe tonu ke fakahoko kia koutou ʼi te temi ʼo te fakahā ʼo Sesu Kilisito.”—1 Petelo 1:13.
“Te Atali ʼAki He Lotohoha ʼa Te ʼu Meʼa ʼAē Neʼe Fakatupu”
12, 13. Neʼe liliu feafeaʼi te hahaʼi ʼo “fakalogo ki te vaʼiga,” pea koteā ʼaē ʼe holi kiai te tahi ʼu ōvi?
12 ʼE toe maʼu koa e te tahi ʼu ōvi he tupuʼaga ke nātou atali ʼaki he lotohoha? Ei. ʼI tana ʼosi talanoa ʼo ʼuhiga mo te ʼamanaki faka kolōlia ʼo nātou ʼaē kua fili e Sehova ko tona ʼu “foha” fakalaumālie, pea mo nātou “kaugā maʼu tofiʼa mo Kilisito” ʼi te Puleʼaga ʼi selo, neʼe ʼui fēnei e Paulo: “Ko te atali ʼaki he lotohoha ʼa te ʼu meʼa ʼaē neʼe fakatupu ʼe nātou talitali ki te fakahā ʼo te ʼu foha ʼo te ʼAtua. Heʼe ko te ʼu meʼa ʼaē neʼe fakatupu neʼe tuku ke nātou fakalogo ki te vaʼiga, ʼo mole nātou fai he neʼe nātou loto kiai, kae ʼuhi ko ia ʼaē neʼe ina fai ke nātou fakalogo kiai, ʼuhi ko te ʼamanaki ʼaē ʼe faka ʼāteaina anai te ʼu meʼa ʼaē neʼe fakatupu mai te popūla ki te maumau pea ʼe nātou maʼu anai te ʼāteaina faka kolōlia ʼo te fānau ʼa te ʼAtua.”—Loma 8:14-21; 2 Timoteo 2:10-12.
13 ʼAki te agahala ʼa Atama, ko tona hākoga fuli kua “fakalogo ki te vaʼiga,” heʼe nātou tutupu ʼo popūla ki te agahala pea mo te mate. ʼE mole feala ke nātou faka ʼāteaina ia nātou totonu mai te ʼu noʼo ʼaia. (Pesalemo 49:7; Loma 5:12, 21) ʼE fakaʼamu ʼaupito te tahi ʼu ōvi ke hoko mai la te temi ʼaē ka “faka ʼāteaina [ai] nātou mai te popūla ki te maumau”! Kae ʼi muʼa ʼo te hoko ʼo te faʼahi ʼaia, ʼe ʼi ai te ʼu meʼa ʼe tonu ke hoko ʼo mulimuli ki te ʼu temi pea mo te ʼu fasiga taʼu ʼa Sehova.
14. Koteā ʼaē ka hoko anai ʼi “te fakahā ʼo te ʼu foha ʼo te ʼAtua,” pea ʼe faka ʼāteaina feafeaʼi anai e te faʼahi ʼaia te malamanei “mai te popūla ki te maumau”?
14 ʼE tonu muʼa ke ‘fakahā’ te toe ʼo te ʼu “foha [fakanofo] ʼo te ʼAtua.” ʼE hoko feafeaʼi anai te faʼahi ʼaia? ʼI te temi ʼaē kua fakatuʼutuʼu kiai e te ʼAtua, ʼe mahino lelei anai ki te tahi ʼu ōvi te kua “fakaʼiloga” ʼa te kau fakanofo pea mo tonatou kua faka kolōlia ke nātou kaugā hau mo Kilisito. (Fakahā 7:2-4) Ko te ʼu “foha ʼo te ʼAtua” ʼaē kua fakatuʼuake, ʼe toe ‘fakahā’ anai nātou ʼi te temi ʼaē ka nātou kau fakatahi ai mo Kilisito ki te fakaʼauha ʼo te tuʼu ʼo te ʼu faʼahiga meʼa agakovi ʼa Satana. (Fakahā 2:26, 27; 19:14, 15) Pea lolotoga te ʼu Taʼu e Afe ʼaē ka nofo Hau ai ia Kilisito, ʼe toe ‘fakahā’ anai nātou, heʼe nātou gāue faka pelepitelo anai moʼo fakahoko ki “te ʼu meʼa ʼaē neʼe fakatupu,” te ʼu tapuakina ʼo te sakilifisio faitotogi ʼa Sesu. ʼE hoko ai anai maʼa te malamanei te “faka ʼāteaina mai te popūla ki te maumau” pea mo nātou kau anai ki “te ʼāteaina faka kolōlia ʼo te ʼu fānau ʼa te ʼAtua.” (Loma 8:21; Fakahā 20:5; 22:1, 2) ʼUhi ko te ʼu meʼa fakaofoofo ʼaia ʼaē ka hoko, ʼe mole tonu koa ki te tahi ʼu ōvi ke nātou “talitali ki te fakahā ʼo te ʼu foha ʼa te ʼAtua” ʼaki “he lotohoha”?—Loma 8:19.
Ko Te Kātaki ʼa Sehova ʼe Ina Hāofaki
15. Koteā ʼaē ʼe tonu ke tou manatuʼi tuʼumaʼu ʼo ʼuhiga mo te ʼu meʼa ʼaē kua fakatuʼutuʼu e Sehova ke hoko?
15 ʼE ko Sehova ʼaē ʼe Pule ki te temi. ʼE hoko lelei anai te ʼu meʼa ʼaē kua ina fakatuʼutuʼu. ʼE mole lagi hoko te ʼu meʼa ohage ko te meʼa ʼaē neʼe tou ʼamanaki kiai. Kae ʼe feala ke tou falala katoa, ʼe hoko anai te ʼu fakapapau fuli ʼa te ʼAtua. (Sosue 23:14) ʼE lagi ina tuku he ʼu meʼa ke hoko fualoa, ka neʼe mole ʼamanaki feiā te tokolahi. Kae tou faiga ke tou mahino ki tana ʼu ala pea mo tou loto fakafetaʼi ki tona poto. Neʼe tohi fēnei e Paulo: “Siʼi loloto ʼo te koloaʼia pea mo te poto pea mo te mālama ʼo te ʼAtua! Ko ʼana fakamāu ʼe mole feala hona sivi pea ʼe mole feala ke maʼu tona ʼu ala! Heʼe ‘ko ai ʼaē kua mahino ki te manatu ʼa Sehova, peʼe ko ai ʼaē kua liliu ko tona tagata fai tokoni?’ ”—Loma 11:33, 34.
16. Ko ai ʼaē ka ina maʼu anai te ʼu tapuakina ʼaki te faʼa kātaki ʼa Sehova?
16 Neʼe tohi fēnei e Petelo: “Kau ʼofaina, mai tona ʼuhiga ʼaē ʼe koutou atalitali ki te ʼu meʼa ʼaia [te fakaʼauha ʼo te “lagi” ʼāfea pea mo te “kele” ʼāfea ʼo fetogi ʼaki te “lagi foʼou” pea mo te “kele foʼou” ʼaē neʼe fakapapau e te ʼAtua], koutou faiga ʼaupito ke maʼu atu koutou ʼi te fakaʼosi ʼe koutou maʼa pea mo heʼe mele pea ʼi te tokalelei. Pea koutou faka ʼuhiga te kātaki ʼo totatou ʼAliki ohage ko he hāofaki.” ʼAki te kātaki ʼa Sehova, ʼe feala ai ki te toko lauʼi miliona hahaʼi ke nātou hāo ʼi te “ ʼaho ʼo Sehova,” ʼaē ka haʼu fakafokifā anai, “ohage ko he tagata kaihaʼa.” (2 Petelo 3:9-15) ʼAki tana faʼa kātaki ʼaia, ʼe toe feala ai foki kia tatou takitokotahi ‘ke tou haga gāue ki totatou fakamaʼuli ʼaki te manavasiʼi pea mo te tekelili.’ (Filipe 2:12) Neʼe ʼui e Sesu ʼe tonu ke tou ‘tokakaga kia tatou’ pea mo tou “nonofo ʼalaʼala” mo kapau ʼe tou loto ke tali tatou pea ke tou lava “tutuʼu ʼi muʼa ʼo te Foha ʼo te tagata” ʼi te temi ʼaē ʼe haʼu ai moʼo fakahoko te fakamāu.—Luka 21:34-36; Mateo 25:31-33.
Tou Haga Talitali ʼAki He Loto Faʼa Kātaki
17. Koteā te ʼu palalau ʼa te ʼapositolo ko Paulo ʼaē ʼe tonu ke tou manatuʼi?
17 Neʼe fakaloto mālohiʼi e Paulo tona ʼu tēhina fakalaumālie ke nātou haga sio, “mole [haga sio] ki te ʼu meʼa ʼaē ʼe feala ke tou sio kiai, kae ki te ʼu meʼa ʼaē ʼe mole tou sio kiai.” (2 Kolonito 4:16-18) Neʼe loto e Paulo ke mole nenefu tanatou sio ki te fakapale ʼaē ʼi selo, ʼaē ʼe fakatalitali kia nātou. Peʼe tou kau ki te kau Kilisitiano fakanofo peʼe tou kau ki te tahi ʼu ōvi, tou manatuʼi te ʼamanaki taulekaleka ʼaē ka hoko kia tatou pea ʼaua naʼa tou fiu ʼi te faʼahi ʼaia. Tou ‘haga talitali ʼaki he loto faʼa kātaki,’ ke tou fakamoʼoni ai “ ʼe mole tou kau ia nātou ʼaē ʼe holomuli ki te fakaʼauha, kae kia nātou ʼaē ʼe tui ki te hāofaki ʼo te nefesi.”—Loma 8:25; Hepeleo 10:39.
18. He koʼe ʼe feala ke tou falala ki te fakatuʼutuʼu ʼa Sehova ʼo ʼuhiga mo te ʼu temi pea mo te ʼu fasiga taʼu?
18 ʼE feala ke tou falala kia Sehova ʼo ʼuhiga mo te fakatuʼutuʼu ʼo te ʼu temi pea mo te ʼu fasiga taʼu. Ko te fakahoko ʼo tana ʼu fakapapau “ ʼe mole tauhala anai ia” ʼo mulimuli ki te temi ʼaē kua ina fakatuʼutuʼu. (Hapakuke 2:3) ʼO fakatalitali ki te ʼaho ʼaia, ʼe maʼuhiga ʼaupito kia tatou te tokoni ʼaē neʼe fai e Paulo kia Timoteo. Neʼe ina ʼui fēnei: “ ʼE ʼau fakatotonu mālohi atu ʼi muʼa ʼo te ʼAtua pea mo Kilisito Sesu, ʼaē ʼe tonu ke ina fakamāuʼi te kau maʼuli pea mo te kau mate, pea ʼaki tona fakahā pea mo tona puleʼaga, faka mafola te folafola, fai ʼaki te lotomālohi ʼi te temi faigamālie pea mo te temi faigataʼa . . . Fai te gāue ʼa he tagata fai faka mafola evaselio, fakahoko katoa tau minisitelio.”—2 Timoteo 4:1-5.
19. Koteā te gāue ʼaē ʼe kei tonu ke fai e te hahaʼi ʼa Sehova, pea koteā tona tupuʼaga?
19 ʼE ʼi ai te ʼu maʼuli ʼe tonu ke hāofaki, totatou maʼuli pea mo te maʼuli ʼa te hahaʼi. Neʼe tohi fēnei e Paulo: “Tokaga tuʼumaʼu kia koe, pea mo tau faiakonaki. Kātaki ʼi te ʼu meʼa ʼaia, koteʼuhi ʼi tau fai te faʼahi ʼaia, ʼe ke hāofaki anai ia koe, pea mo nātou ʼaē ʼe fakalogo kia te koe.” (1 Timoteo 4:16) Kua nounou ʼaupito te temi ʼaē kei toe ki te tuʼu ʼo te ʼu faʼahiga meʼa agakovi ʼaenī. ʼI tatatou atali ʼaki he lotohoha ki te ʼu meʼa fakaofoofo ʼaē kua ʼamanaki hoko mai, ʼe tonu ke mahino kia tatou ʼe kei tuku e Sehova he temi pea mo he fasiga taʼu ke faka mafola ai tana hahaʼi te logo lelei ʼo te Puleʼaga. ʼE tonu ke tou fakahoko te gāue ʼaia ʼo aʼu ki te temi ʼaē ka ina fakagata ai. “Pea,” ohage ko tona ʼui e Sesu, ʼe “hoko mai anai te fakaʼosi.”—Mateo 24:14.
[Nota ʼi te lalo pasina]
a Koutou vakaʼi te kapite 10 pea mo te 11 ʼo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼaē neʼe tā e te Watchtower Bible and Tract Society of New York, Inc.
Tou Toe Fakamanatu
◻ ʼO ʼuhiga mo te lau ʼo te temi, he koʼe ʼe tatau totatou ʼaluʼaga pea mo te ʼaluʼaga ʼo te kau Kilisitiano ʼo te ʼuluaki sēkulō?
◻ He koʼe ʼe tonu ke “nofo fakaonoono” te kau Kilisitiano ʼi te lolotoga ʼo te ʼi henī ʼa Kilisito?
◻ He koʼe ʼe atali ʼaki he lotohoha te ʼu meʼa ʼaē neʼe fakatupu ki “te fakahā ʼo te ʼu foha ʼo te ʼAtua”?
◻ He koʼe ʼe feala ke tou falala ki te fakatuʼutuʼu ʼa Sehova ʼo ʼuhiga mo te ʼu temi pea mo te ʼu fasiga taʼu?
[Paki ʼo te pasina 17]
ʼE tonu ke nonofo ʼalaʼala te kau Kilisitiano ʼi tanatou talitali ki te haʼu ʼa Kilisito
[Paki ʼo te pasina 18]
ʼE maʼumaʼua te toe ʼo te kau fakanofo ʼi te tauhi kia Sehova, pea ʼe mole nātou fakatafito tanatou tui ki te lau ʼo te temi