Kia Koutou, ʼe Maʼuli Moʼoni Koa Te ʼAtua?

KA KOUTOU tau mo he ʼu fihifihia fakaloto mamahi, ʼe koutou faikole koa ki te ʼAtua? ʼI takotou faikole, ʼe koutou logoʼi koa ʼe koutou palalau ki he tahi ʼe maʼuli moʼoni?

ʼO ʼuhiga mo tana Tāmai ʼaē ʼi selo, neʼe ʼui fēnei e Sesu Kilisito: “ ʼE maʼuli moʼoni ia ia ʼaē neʼe ina fekauʼi mai ʼau.” (Soane 7:​28) Ei, ʼe maʼuli moʼoni ia Sehova ʼAtua, pea ko takotou faikole kia te ia ʼe hage ko hakotou kumi tokoni ki hokotou kaumeʼa lelei. ʼE mahino ia, kapau ʼe tou loto ke fagono mai te ʼAtua, pea ʼe tonu ke ʼalutahi tatatou ʼu faikole mo te ʼu meʼa ʼaē ʼe ina fakamaʼua mai ke tou fai ʼi te Tohi-Tapu. Ohage la, ʼe tonu ke tou faikole ʼaki he agavaivai kia “Ia ʼaē ʼe fagono ki te ʼu faikole” pea ke tou fai ʼaki te huafa ʼo tona ʼAlo ko Sesu Kilisito.​—Pesalemo 65:2; 138:6; Soane 14:​6.

ʼE lagi manatu ʼihi, mai tona ʼuhiga ʼaē ko te ʼAtua ʼe fakapulipuli, ʼe mole hona ʼu kalitate. Maʼa nātou, ko te ʼAtua ʼe mole tokaga kia nātou. Māʼia mo ʼihi kau Kilisitiano, ʼaē kua nātou ʼiloʼi te ʼu kalitate fakaofoofo ʼa te ʼAtua, ʼi ʼihi temi ʼe lagi faigataʼa kia nātou hanatou mahino ʼe maʼuli moʼoni. Neʼe kua koutou manatu feiā koa? Kapau koia, pea koteā ʼaē ka tokoni anai kia koutou ke koutou mahino ko te ʼAtua ʼe maʼuli moʼoni?

Koutou Ako Te Tohi-Tapu

ʼE koutou ako tuʼumaʼu koa te Tohi-Tapu? Kapau ʼe koutou fai putuputu pea mo koutou fai ke loloto takotou ako Tohi-Tapu, pea ʼe mahino lelei anai kia koutou ko te ʼAtua ʼe maʼuli moʼoni. Ko te ako ʼaia ʼe ina fakamālohiʼi anai takotou tui, pea ʼe feala ai anai ke koutou ‘sio kia Ia ʼaē ʼe fakapulipuli.’ (Hepeleo 11:​6, 27) ʼI te tahi faʼahi, kapau ʼe tōtō takotou ako te Tohi-Tapu peʼe mole koutou fai putuputu pea ʼe mahino ia ʼe fua kovi anai ki takotou tui.

Ohage la, ka fakatotonu atu e te tōketā ke koutou vali tuʼa tolu ʼi te ʼaho he pomate ki te kili ʼe laga ia koutou. ʼE puli anai koa te kili ʼaia mo kapau ʼe koutou fakaʼaogaʼi tuʼa tahi peʼe tuʼa lua te pomate ʼi te māhina? Kailoa. ʼO toe feiā aipe, ʼe foaki mai kia tatou e te tagata fai pesalemo te “faitoʼo” ke tou lelei ʼi te faʼahi fakalaumālie. Koutou lau “leʼo veliveli ʼi te ʼaho mo te po” te Folafola ʼa te ʼAtua. (Pesalemo 1:​1, 2) Kapau ʼe tou fia maʼu te ʼu fua lelei fuli, pea ʼe tonu ke tou fakaʼaogaʼi te “faitoʼo”​—ʼi te ʼaho fuli pe ke tou lau te Folafola ʼa te ʼAtua pea mo te ʼu tohi faka Kilisitiano.​—Sosue 1:8.

ʼE koutou loto koa ke ʼāsili mālohi takotou tui ʼi te ʼu temi ʼaē ʼe koutou ako ai? Koʼeni te meʼa ʼaē ʼe feala ke koutou fai: ʼI takotou ʼosi lau he kapite ʼi te Tohi-Tapu Les Saintes Écritures​—Traduction du monde nouveau peʼe ko he tahi Tohi-Tapu ʼe maʼu ai he ʼu références, koutou fili he vaega pea koutou vakaʼi te tahi ʼu vaega ʼaē ʼe fakahā atu ke koutou vakaʼi. ʼE lahi anai te ʼu meʼa ʼaē ka koutou ako ai, pea ʼe koutou ōfo anai ʼi te ʼalutahi ʼo te ʼu manatu ʼa te Tohi-Tapu. Kapau ʼe koutou fai te faʼahi ʼaia, pea ʼe mahino ai anai kia koutou ʼe maʼuli ia Sehova ʼAtua, ia Ia ʼaē neʼe ina tohi te Tohi-Tapu.

Tahi ʼaē meʼa, kapau ʼe koutou fakaʼaogaʼi te ʼu vaega ʼaia, pea ʼe koutou ʼiloʼi lelei anai te ʼu lea faka polofeta ʼo te Tohi-Tapu pea mo tanatou fakahoko ki muli age. Kua lagi koutou ʼiloʼi lelei te ʼu lea faka polofeta tāfito, ohage ko te ʼu lea faka polofeta ʼaē neʼe nātou fakakikite te maumauʼi ʼo Selusalemi e te kau Papiloni. Kae ʼe tou maʼu ʼi te Tohi-Tapu te ʼatu lea faka polofeta ʼe nātou felogoi, pea ʼe tou maʼu ai mo tonatou fakahoko. Ko ʼihi lea faka polofeta ʼe mole faʼa ʼiloa.

Ohage la, koutou lau te lea faka polofeta ʼo ʼuhiga mo te fakatūʼa ʼaē ka fai anai mo kapau ʼe toe laga e he tahi te kolo ʼo Seliko pea koutou fakatokagaʼi mo tona fakahoko. ʼE tou lau fēnei ia Sosue 6:​26: “Neʼe fai e Sosue te fakapapau ʼi te temi ʼaia, ʼo ina ʼui fēnei: ‘Ke malaʼia ia muʼa ʼo Sehova te tagata ʼaē ka tuʼu ake pea mo ina toe laga moʼoni anai te kolo ʼaia, ko Seliko. Ke ina hili tona ʼu tafitoʼaga ʼo ina totogi ʼaki tona ʼuluaki tupu, pea ke ina faʼu te ʼu matapā ʼo ina totogi ʼaki tona foha muli.’ ” Neʼe hoko te lea faka polofeta ʼaia ia taʼu e 500 ki muli age, heʼe tou lau fēnei ia 1 Hau 16:34: “ ʼI te temi ʼo [te Hau ko Akape] ko Hiele, te Petelite, neʼe ina laga ia Seliko. Neʼe ina hili tona tafitoʼaga ʼo ina totogi ʼaki tona ʼuluaki foha ko Apilame, pea neʼe ina faʼu te ʼu matapā ʼo ina totogi ʼaki ia Sekupe tona foha muli, ʼo mulimuli ki te folafola ʼa Sehova ʼaē neʼe ina fai ʼaki ia Sosue te foha ʼo Nune.”a Neʼe gata pe ki he ʼAtua ʼe maʼuli moʼoni te fealagia ʼaē ke ina fai te ʼu lea faka polofeta ʼaia pea mo ina fakahoko.

ʼI takotou lau te Tohi-Tapu, ʼe lagi ʼi ai he ʼu meʼa ʼe koutou fia ʼiloʼi. Ohage la, ʼe lagi koutou feʼekeʼaki peʼe fakalaka taʼu e fia mai te tala ʼo te lea faka polofeta ʼo aʼu ki tona fakahoko. He koʼe ʼe mole koutou faiga ke koutou kumi ʼe koutou totonu tona tali, kae mole koutou atali pe ke tali atu e he tahi? Koutou fakaʼaogaʼi te ʼu paki ʼaē ʼe tohi ai te ʼu taʼu pea mo te tahi ʼu tohi faka Tohi-Tapu, ʼo koutou faiga ke koutou kumi te ʼu tali, ohage ko hakotou faiga fakamalotoloto ke koutou mahino ki he mape ʼe fakahā atu ai pe kofea te tukuʼaga ʼo he ʼu koloā. (Tāʼaga Lea 2:​4, 5) Kapau ʼe koutou maʼu te ʼu tali kiai, pea ʼe malave lahi anai ki takotou tui pea ʼe mahino anai kia koutou ko Sehova ʼAtua, ʼe ko he tahi ʼe maʼuli moʼoni.

Koutou Faikole Tuʼumaʼu Pea Mo Fai Fakamalotoloto

ʼAua naʼa koutou meʼa noaʼi te maʼuhiga ʼo te faikole pea mo te tui. Neʼe kole fakahagatonu fēnei e te kau tisipulo ʼa Sesu: “Foaki mai kia mātou he tui ʼe lahi ake.” (Luka 17:5) Kapau ʼe hage kia koutou ʼe mole maʼuli moʼoni ia Sehova, pea he koʼe ʼe mole koutou fakahā age kia te ia ʼe ʼaoga kia koutou he tui ʼe lahi ake? Koutou kole ki takotou Tāmai ʼaē ʼi selo ke tokoni atu ke liliu kia koutou ko he tahi ʼe maʼuli moʼoni.

Kapau ʼe koutou lotomamahi ʼuhi ko he fihifihia, koutou fakahā te faʼahi ʼaia ʼaki tokotou loto katoa ki tokotou Kaumeʼa ʼaē ʼi selo. ʼI te ʼamanaki mate ʼa Sesu, neʼe faikole fakamalotoloto. Neʼe ina valokiʼi te aga ʼa te kau takitaki lotu ʼaē ko te fai ʼo he ʼu kole loaloaga, ke nātou hā ia muʼa ʼo te hahaʼi, kae neʼe faikole tokotahi ia Sesu ʼi te po katoa ʼi muʼa ʼo tana filifili tana kau ʼapositolo ʼe toko 12. (Maleko 12:38-​40; Luka 6:​12-​16) ʼE feala ke toe ʼaoga kia tatou te faʼifaʼitaki ʼo Ana, te faʼe ʼa te polofeta ko Samuele. ʼI tana holi ʼaē ke ina maʼu hana tama, “neʼe faikole fakamalotoloto ia muʼa ʼo Sehova.”​—1 Samuele 1:​12.

Koteā te ako tāfito ʼaē ʼe feala ke tou maʼu e tatou fuli mai te faʼifaʼitaki ʼaia? Kapau ʼe koutou loto ke tali ki takotou ʼu faikole, pea ʼe tonu ke koutou faikole fakamalotoloto pea mo fai tuʼumaʼu​—pea ʼe tonu ke ʼalutahi mo te finegalo ʼo te ʼAtua. (Luka 22:44; Loma 12:12; 1 Tesalonika 5:​17; 1 Soane 5:​13-​15) Ko te fai ʼo te faʼahi ʼaia ʼe tokoni atu anai ke koutou mahino ko te ʼAtua ʼe maʼuli moʼoni.

Koutou Fakatokagaʼi Te ʼu Meʼa ʼAē Neʼe Fakatupu

ʼE feala ke ʼiloʼi te ʼulugaaga ʼo he tahi ʼe fai pena ʼi te ʼu paki ʼaē ʼe ina pena. ʼO toe feiā aipe, ko te ʼu “kalitate fakapulipuli” ʼa Sehova, te Tupuʼaga ʼo te ʼatulaulau, ʼe hā lelei ʼi te ʼu meʼa ʼaē neʼe ina fakatupu. (Loma 1:​20) Ka tou fakatokagaʼi fakalelei te ʼu gāue ʼa Sehova, pea ʼe tou mahino lelei ai ki tona ʼulugaaga, pea ʼe mahino ai kia tatou ʼe ko he tahi ʼe maʼuli moʼoni.

Kapau ʼe loloto takotou vakavakaʼi te ʼu meʼa ʼaē neʼe fakatupu e te ʼAtua, pea ʼe lagi koutou ōfo anai ʼi tana ʼu kalitate. Ohage la, ko te ʼiloʼi ʼo te ʼu fealagia ʼa te fefolauʼaki ʼa te ʼu manulele, ʼe lagi fakatuputupu ai takotou leleiʼia te poto ʼa Sehova. ʼI takotou lau he ʼu tohi ʼo ʼuhiga mo te ʼatulaulau, ʼe koutou ʼiloʼi ai ko te Voie lactée, ʼaē ʼe ʼaoga kiai taʼu e 100 000 tupu moʼo fakalaka ai, ʼe ko te fakapupu fetuʼu ʼaia e tahi ʼi te ʼu fakapupu fetuʼu ʼe lauʼi miliale ʼi te ʼatulaulau. ʼE mole koutou sio ai koa ki te poto ʼo te Tupuʼaga?

Ei, ʼe moʼoni te poto ʼo Sehova! Kae koteā tona faka ʼuhiga kia koutou? ʼE ʼiloʼi e te ʼAtua te tonu ʼo ʼuhiga mo te ʼu fihifihia ʼaē ʼe tou fakahā age kia te ia ʼi te faikole. Ei, ʼe feala ke koutou ʼiloʼi ko Sehova ʼe maʼuli moʼoni, tatau aipe peʼe koutou ʼiloʼi he kihiʼi meʼa veliveli ʼi te ʼu meʼa ʼaē neʼe ina fakatupu.

Koutou Haʼele Mo Sehova

ʼE feala koa ke koutou ʼiloʼi e koutou totonu ʼe maʼuli moʼoni te ʼAtua? Ei, mo kapau ʼe koutou hage ko te pateliaka agatonu ko Noe. Neʼe fakalogo tuʼumaʼu kia Sehova, ʼo feala ai ke ʼui fēnei: “Neʼe haʼele ia Noe mo te ʼAtua moʼoni.” (Senesi 6:9) Neʼe maʼuli ia Noe ohage pe neʼe nofo ia Sehova ʼi ʼona tafa. ʼE feala ke mahino feiā kia koutou ko te ʼAtua ʼe ko he tahi ʼe maʼuli moʼoni.

Kapau ʼe koutou haʼele mo te ʼAtua, pea ʼe koutou falala ki te ʼu fakapapau faka Tohi-Tapu pea mo koutou mulimuli kiai. Ohage la, ʼe koutou falala ki te ʼu palalau ʼaenī ʼa Sesu: “Koutou haga kumi muʼa te puleʼaga pea mo [te] faitotonu [ʼa te ʼAtua], pea ʼe toe foaki atu anai mo te ʼu meʼa fuli ʼaia kia koutou.” (Mateo 6:​25-​33) ʼE moʼoni, ʼe mole foaki tuʼumaʼu e Sehova te meʼa ʼaē ʼe ʼaoga kia koutou ʼi te ʼaluʼaga ʼaē ʼe koutou loto kiai. Kae ka koutou faikole pea mo koutou logoʼi te tokoni ʼa te ʼAtua, pea ʼe koutou mahino anai ʼe maʼuli moʼoni, ohage ko he tahi ʼe nofo ʼi ʼokotou tafa.

Ko te felogoi lelei ʼaia ʼe tuputupu mokā haʼele tuʼumaʼu he tahi mo te ʼAtua. Koutou fakatokagaʼi te faʼifaʼitaki ʼo Manuela, ko te tuagaʼane Saponia, neʼe ina kātakiʼi te ʼatu ʼahiʼahi kehekehe neʼe hoko kia ia. ʼE ina ʼui fēnei: “ ʼI te ʼu temi ʼaē neʼe ʼau lotomamahi ai peʼe ʼau faigataʼaʼia, neʼe ʼau maʼuliʼi te pelesepeto ʼaē ʼe tou maʼu ia Tāʼaga Lea 18:10. ʼE ʼau lele kia Sehova moʼo kumi tokoni kiai. ʼI te temi fuli pe neʼe ko ‘he tule mālohi’ kia ʼau.” ʼE feala ke ʼui e Manuela te faʼahi ʼaia he kua taʼu 36 tana falala kia Sehova pea mo te tokoni ʼa Sehova kia ia.

Ko takotou hoki kamata falala koa ʼaenī kia Sehova? ʼAua naʼa koutou lotovaivai mo kapau ʼe mole heʼeki liliu takotou felogoi mo ia ohage ko te meʼa ʼaē ʼe koutou loto kiai. ʼI te ʼaho fuli koutou haʼele mo te ʼAtua. Kapau ʼe koutou agatonu ʼi tokotou maʼuli, pea ʼe koutou felogoi lelei anai mo Sehova.​—Pesalemo 25:14; Tāʼaga Lea 3:​26, 32.

Tahi ʼaē meʼa, kapau ʼe koutou fia haʼele mo te ʼAtua, pea ʼe tonu ke koutou kau tuʼumaʼu ki tana tauhi. Ka koutou kau ki te gāue fai faka mafola ʼo te Puleʼaga, pea ʼe koutou haʼele fakatahi mo Sehova. (1 Kolonito 3:9) Ko takotou mahino kiai ʼe tokoni atu anai kia koutou ke koutou ʼiloʼi ko te ʼAtua ʼe maʼuli moʼoni.

ʼE fai e te tagata fai pesalemo te fakaloto mālohi ʼaenī: “Tekaʼi tou ala kia Sehova, pea ke ke falala kia te ia, pea ʼe ina fakahoko totonu anai.” (Pesalemo 37:5) Koutou tuku tuʼumaʼu takotou ʼu kavega fuli peʼe ko takotou ʼu tuʼania ki te ʼAtua. Koutou kumi tuʼumaʼu tana tokoni pea mo tana takitaki. Kapau ʼe koutou faikole kia te ia pea mo koutou falala katoa kia te ia, pea ʼe koutou fīmālie anai heʼe koutou ʼiloʼi ʼe ina fai anai te meʼa ʼaē ʼe lelei kia koutou. ʼE koutou loto falala koa mokā koutou fakahā kia Sehova takotou ʼu tuʼania? ʼE feala anai mo kapau ʼe koutou ʼiloʼi ʼe maʼuli moʼoni te ʼAtua.

[Nota ʼi te lalo pasina]

[Paki ʼo te pasina 21]

Koutou fakaʼaogaʼi te ʼu temi ʼaē ʼe koutou ako ai te Tohi-Tapu moʼo fakamālohiʼi takotou tui

[Paki ʼo te pasina 22]

Koutou faikole tuʼumaʼu pea mo fai fakamalotoloto

[Paki ʼo te pasina 23]

Koutou vakavakaʼi peʼe hā feafeaʼi te ʼu kalitate ʼa te ʼAtua ʼi te ʼu meʼa ʼaē neʼe ina fakatupu

[Haʼuʼaga ʼo te paki]

Hummingbird: U.S. Fish and Wildlife Service, Washington, D.C./Dean Biggins; stars: Photo: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands