Tou Ako Te Ala Lelei ʼAupito ʼo Te ʼOfa

Ko Kosovo, mo Bosnie, mo Lipania, pea mo Ilelani. Mole heʼeki faʼa fualoa, neʼe tou tau logo ki te ʼu higoa ʼaia ʼi te ʼu tala logo. ʼE nātou fakamanatuʼi mai te ʼu ligi toto ʼaē neʼe hoko, mo te ʼu foʼi pulu ʼaē neʼe fakapā, pea mo te ʼu fai fakapō. ʼE moʼoni, ʼe mole ko he meʼa foʼou te ʼu tau fakamataku ʼaia ʼaē ʼe hoko ʼuhi ko te kehekehe ʼo te lotu, mo te ʼu lanu, peʼe ko he tahi atu meʼa. Ei, kua hoko lahi te ʼu meʼa ʼaia ʼi te hisitolia, pea maʼuli mamahi ai te malamanei.

ʼI TANATOU sio ki te ʼu tau ʼaē neʼe hoko ʼi te hisitolia, kua manatu te tokolahi ʼe mole lava tekeʼi te ʼu tau pea ko te fefehiʼaʼaki ʼe ko he meʼa ʼe mole feala ke fetogi ʼi te natula ʼo te tagata. Kae ko te taʼi manatu ʼaia ʼe mole ʼalutahi ia mo te ʼu akonaki ʼa te Folafola ʼo te ʼAtua, te Tohi-Tapu. ʼE ʼui fakalelei e te Tohi-Tapu: “Ko ae e mole ofa, nee mole ina iloi te Atua, koteuhi ko te Atua e ko Ofa.” (1 Soane 4:8) ʼE hā lelei mai ai ʼe loto e te Tupuʼaga ke feʼofaniʼaki te hahaʼi.

ʼE toe fakahā mai e te Tohi-Tapu neʼe fakatupu te tagata ki te paki ʼo te ʼAtua. (Senesi 1:​26, 27) Ko tona faka ʼuhiga ʼe maʼu e te hahaʼi fuli te fealagia ʼaē ke nātou faʼifaʼitakiʼi te ʼu kalitate ʼa te ʼAtua, pea ko tona kalitate ʼaē ʼe lahi tāfito ʼe ko te ʼofa. Kapau koia ʼaia, pea he koʼe koa ʼi te hisitolia katoa, neʼe mole feʼofaniʼaki te hahaʼi? ʼE toe fakamahino mai e te Tohi-Tapu. Ko tona tupuʼaga ʼaē ko te ʼuluaki taumatuʼa, ia Atama mo Eva, neʼe nā talagataʼa ki te ʼAtua pea nā agahala, ʼo tupu ai te agahala pea mo te heʼe haohaoa ʼo tonā hōloga katoa. ʼE fakamahino fēnei ia Loma 3:​23: “Kua agahala fuli mo hala i te kololia o te Atua.” ʼE mole kei fealagia ke tou fakahā te ʼofa haohaoa ʼaē neʼe foaki e te ʼAtua, heʼe kua tou agahala pea mo heʼe haohaoa. Ko tona faka ʼuhiga koa ʼe mole feala anai ke feʼofani te hahaʼi ʼi he temi? ʼE feala koa ke tou ʼamanaki ʼe tou felogoi anai ʼi he ʼaho ʼi te tokalelei mo te ʼofa?

Ke Tou Ako Te ʼOfa Ki Te ʼAtua

ʼE ʼiloʼi e Sehova ʼAtua, logope la te ʼu faʼahi ʼaia, kae ʼe feala pe ki te hahaʼi ke nātou fakahā te ʼofa. Ko te tupuʼaga la ʼaia ʼo tana fakamaʼua kia nātou fuli ʼaē ʼe nātou fia fakafiafia tona loto ke nātou fakahā te ʼofa, ʼo mulimuli ki tanatou fealagia. Neʼe fakahā lelei te fakamaʼua ʼaia e te ʼAlo ʼo te ʼAtua, ia Sesu Kilisito, ʼi te temi ʼaē neʼe fehuʼi age ke ina fakahā te lao ʼaē ʼe lahi tokotahi ʼi te Lao ʼaē neʼe foaki age ki Iselaele. Neʼe ina ʼui fēnei: “ ‘E ke ofa anai ki te Aliki tou Atua mo tou loto katoa, mo tou laumalie katoa, pea mo tou atamai katoa.’ Ko te fekau lahi pau aia pea e uluaki.” Pea neʼe ina toe ʼui fēnei: “Pea e hagepe ko ia tona lua: E ke ofa anai ki tou kaiga o hagepe ko koe. Ia fekau aeni e lua e pipiki ai te katoa o te lao mo te kau polofeta.”​—Mateo 22:37-​40.

Kae ʼe tokolahi ia nātou ʼaē ʼe nātou manatu ʼe faigataʼa hanatou ʼofa ki he tahi ʼe mole nātou sio kiai, pea ʼe mole tou lava sio kia Sehova ʼAtua heʼe Laumālie ia. (Soane 4:​24) Kae ʼi te ʼaho fuli, ʼe tou sio ki te ʼu meʼa ʼaē ʼe fai e te ʼAtua, heʼe ʼaoga kia tatou fuli te ʼu meʼa lelei ʼaē neʼe ina fakatupu maʼa tatou. Neʼe fakahā lelei e te ʼapositolo ko Paulo te faʼahi ʼaia, ʼi tana ʼui fēnei: “Nee mole haganoa [te ʼAtua] i tona manavaofa, e ina fakato ifo te ua mai te lagi kia tatou pea mo fakafua te u taukai i onatou temi, e ina fakamahu tatou pea mo fakafonu fiafia o tatou loto.”​—Gaue 14:17.

Logope la ʼe maʼu e te hahaʼi fuli te ʼu lelei ʼo te ʼu meʼa ʼaia ʼaē ʼe foaki mai e te Tupuʼaga, kae ʼe tokosiʼi ia nātou ʼaē ʼe loto fakafetaʼi peʼe nātou fakamālo kia te ia. Koia, ʼe ʼaoga ke tou fakafuafua te ʼu meʼa lelei fuli ʼaē neʼe fai e te ʼAtua maʼa tatou, pea mo tou metitasio ki te ʼu kalitate fakaofoofo ʼaē ʼe ina maʼu moʼo fai ia meʼa fuli ʼaia. Kapau ʼe tou fai feiā, pea ʼe tou ʼiloʼi ai anai te lahi ʼo te poto pea mo te mālohi ʼo totatou Tupuʼaga Lahi. (Isaia 45:18) Pea ʼe ko te faʼahi tāfito ʼaia ʼaē ka tokoni mai kia tatou ke tou sio ki te ʼofa lahi ʼa te ʼAtua, he neʼe mole ina foaki mai pe ia te maʼuli, kae neʼe ina toe faka fealagia foki ke lahi te ʼu meʼa ʼe tou fakafiafia ai ʼi totatou maʼuli.

Ohage la, koutou fakakaukauʼi te ʼatu fisiʼi teu matalelei pea mo kehekehe ʼaē neʼe fakatupu e te ʼAtua ʼi te kele. ʼE ko he meʼa taulekaleka tana toe foaki mai foki mo te fealagia ʼaē ke tou mamata pea mo tou fiafia lahi ʼi te ʼu meʼa matalelei ʼaia! Pea neʼe toe foaki mai e te ʼAtua he ʼu meʼa kai kehekehe ke tou maʼuʼuli ai. Neʼe ina toe fakahā ai tana lototokaga ʼi tana fakatupu tatou ʼaki te fealagia ʼaē ke tou ʼahiʼahi te ʼu meʼa kai ʼaia pea mo tou leleiʼia! ʼE mole ko he ʼu fakamoʼoni koa la ʼaia ʼo te ʼofa moʼoni ʼa te ʼAtua kia tatou pea mo tana loto ʼaē ke tou maʼuli fiafia?​—Pesalemo 145:16, 17; Isaia 42:​5, 8.

ʼE mole gata pe tatatou ʼiloʼi totatou Tupuʼaga ʼaki te “tohi ʼo te natula,” kae ʼe tou toe ʼiloʼi foki te ʼulugaaga ʼo te ʼAtua ʼaki tona Folafola, te Tohi-Tapu. Koteʼuhi ʼe fakamatala ʼi te Tohi-Tapu te ʼu gāue ʼofa ʼaē neʼe fai e Sehova ʼAtua ʼi te temi muʼa, pea mo te ʼu tapuakina lahi ʼaē ʼe ina fakapapau ki te malamanei ʼi te ka haʼu. (Senesi 22:17, 18; Ekesote 3:​17; Pesalemo 72:​6-​16; Apokalipesi 21:​4, 5) Pea ko te meʼa ʼaē ʼe maʼuhiga tāfito, heʼe fakahā mai e te Tohi-Tapu te ʼofa lahi ʼaē neʼe fakahā e te ʼAtua ki te malamanei​—ʼi tana momoli ifo tona ʼAlo ʼulu tokotahi ke ina totogi tatou mai te agahala pea mo te mate. (Loma 5:8) Koia, kapau ʼe lahi te ʼu meʼa ʼaē ʼe tou ako ʼo ʼuhiga mo totatou Tupuʼaga ʼofa pea ʼe toe lahi anai mo tatatou ʼofa kia te ia.

Ke Tou Ako Te ʼOfa Ki Te Hahaʼi

Ohage ko tona fakahā lelei mai e Sesu, ʼo hilifaki ki tatatou ʼofa ki te ʼAtua ʼaki totatou loto katoa, mo totatou nefesi katoa, pea mo totatou ʼatamai katoa, ʼe tonu ke tou ʼofa ki totatou kāiga ohage pe ko tatou. ʼI tona fakahagatonu, kapau ʼe tou ʼofa ki te ʼAtua pea ʼe tonu ke tou ʼofa ki te hahaʼi. Neʼe fakamahino fēnei e te ʼapositolo ko Soane: “U ofaina, kapau nee feia te ofa o te Atua ia tatou, pea mo tatou foki, e tonu ke tou feofaofani.” Neʼe ina toe ʼui fēnei: “Kapau e lau e he tahi: ‘E au ofa ki te Atua,’ pea fehia ki tona tehina, e ko he tagata kaka. He ko ae e mole ofa ki tona tehina e sio ki ai, e mole feala tana ofa ki te Atua ae e mole sio ki ai. Pea ko te fekau aeni e tou mau maia te ia: ko ae e ofa ki te Atua pea ke ofa ki tona tehina.”​—1 Soane 4:​11, 20, 21.

Ia ʼaho nei, ʼe tou maʼuʼuli ʼi he mālama ʼe manatu pe te hahaʼi kia nātou totonu, ʼo nātou “tahi ofa pe kia te ia,” ohage ko tona fakakikite e te Tohi-Tapu. (2 Timoteo 3:2) Koia, kapau ʼe tou fia ako te ala lelei ʼaupito ʼo te ʼofa, pea ʼe tonu ke tou faiga ke tou fakafoʼou totatou ʼatamai pea mo tou faʼifaʼitakiʼi totatou Tupuʼaga ʼofa, kae mole tou mulimuli ki te aga ʼa te hahaʼi, ʼaē ʼe nātou manatu pe kia nātou. (Loma 12:2; Efeso 5:1) Ko te ʼAtua “e agalelei kia ia e fiatuu mo ia e agakovi,” pea ʼe ina “fakahopoʼake tana laa ki te hahai agakovi mo te hahai agalelei, pea e ina fakaʼua ifo ki te hahai agatonu mo te hahai agahala.” Mai tona ʼaluʼaga ʼaē ʼe tuku mai kia tatou e tatatou Tāmai ʼi selo te faʼifaʼitaki matalelei ʼaia, koia ʼe tonu ke tou faiga ke tou agalelei pea mo tokoni ki te hahaʼi fuli pe. Kapau ʼe tou fai feiā, pea ʼe tou fakahā anai ko tatou “ko te u fanau o [tatatou] Tamai e i Selo.”​—Luka 6:​35; Mateo 5:​45.

ʼI ʼihi temi, ʼe feala ke tou fakahā totatou ʼofa ʼo tou tokoni ki te hahaʼi ke nātou tauhi ki te ʼAtua moʼoni. Kua hili kiai ni ʼu taʼu, neʼe faiga te tuagaʼane Fakamoʼoni ʼa Sehova, ke ina fakahā te logo ʼo te Tohi-Tapu ki te fafine e nā vāhaʼa fale, kae neʼe mole ina tali. Neʼe mole lotovaivai ai te tuagaʼane. Neʼe agalelei tuʼumaʼu pe ki te fafine ʼaia pea neʼe faiga ke tokoni age ki ai. ʼI te tahi ʼaho neʼe tokoni ki ai moʼo fetuku tana ʼu meʼa, he neʼe hiki ki te tahi ʼapi. Pea ʼi te tahi ʼaho neʼe ina fakatuʼutuʼu ke ʼalu he tahi mo te fafine ʼaia ki te malaʼe vakalele moʼo tali folau ki tona kāiga. Ki muli age, neʼe tali e te fafine ʼaia hana ako Tohi-Tapu pea kua liliu ko he Fakamoʼoni faiva, logope la tona fakatagaʼi e tona ʼohoana. Ei, ko te fakahā ʼaia ʼo te ʼofa ʼe ko he fakatafito ki ni ʼu tapuakina heʼegata.

Kapau ʼe tou fakakaukau fakalelei, pea ʼe tou fakamoʼoni anai ki te ʼui ʼaē ʼe mole ʼofa te ʼAtua kia tatou ʼuhi ko te ʼatu ʼu kalitate fakaofoofo ʼaē ʼe tou maʼu. Kailoa ia, kae ʼe ʼofa kia tatou tatau aipe peʼe lahi tatatou ʼu vaivaiʼaga pea mo tatatou ʼu lākahala. Koia, ʼo toe feiā mo tatou, ʼe tonu ke tou ako ke tou ʼofa ki te hahaʼi fuli pe logope la tanatou ʼu lākahala. Kapau ʼe tou ako ke tou fakasiosio tonu pea mo leleiʼia te ʼu kalitate ʼa ʼihi kae mole tou kumi tanatou ʼu hala, pea ʼe faigafua anai hatatou ʼofa kia nātou. ʼE lagi tou fakahā anai kia nātou te ʼofa ʼaē ʼe mulimuli ki te ʼu pelesepeto, pea mo te ʼofa māfana ʼaē ʼe maʼu e he ʼu kaumeʼa.

Ke Tuputupu Totatou ʼOfa

ʼE tonu ke “fakatuputupu” te ʼofa pea mo te aga fakakaumeʼa, pea moʼo fakahoko te faʼahi ʼaia ʼe tonu ke tou aga fakamalotoloto pea mo agatonu. ʼE faiga e ʼihi ke nātou fufū tanatou ʼu vaivaiʼaga ke leleiʼia nātou e te hahaʼi ʼaē ʼe nātou fia kaumeʼa mo nātou. Kae ʼi te agamāhani ʼe fua kovi te aga ʼaia kia nātou totonu, heʼe ka ʼiloʼi ki muli age e te hahaʼi te moʼoni pea ʼe nātou fehiʼa kia nātou ʼaia he neʼe nātou kākāʼi nātou. Koia, ʼe mole tonu ke tou tuʼania te fakahā ki ʼihi totatou ʼuhiga moʼoni​—tatau aipe peʼe ʼi ai hotatou ʼu vaivaiʼaga ʼe tou faiga ke tou tauʼi. ʼE tokoni te faʼahi ʼaia ke tou kaumeʼa mo nātou.

Ohage la, ʼi te kokelekasio ʼi te fenua Nai, ko te tuagaʼane Fakamoʼoni kua finematuʼa, neʼe mole ako fualoa ʼi te faleako. Kae neʼe mole ina faiga ke ina fufū te faʼahi ʼaia ki te hahaʼi. Ohage la, neʼe ina fakahā fakalelei ʼe mole poto ʼi te fakamahino ki ʼihi peʼe feafeaʼi te fakaʼaogaʼi ʼo te ʼu lea faka polofeta pea mo te hisitolia ʼo te Tohi-Tapu moʼo fakamoʼoni neʼe fakaʼosi te temi ʼo te kau Senitile ʼi te taʼu 1914.a Kae ʼe ina tuku he faʼifaʼitaki lelei ʼi tana gāue mālohi ʼi te fai faka mafola, pea mo tana ʼofa pea mo tana agalelei ki te ʼu tēhina, pea kua fakahigoaʼi ia ia ko te ʼofainaʼi lahi ʼo te kokelekasio.

ʼI ʼihi ʼu fenua, ʼe mole faʼa leleiʼia hakita fakahāhā tokita ʼofa ki he tahi; ʼe akoʼi ki te hahaʼi ke nātou aga fakaʼapaʼapa ki te hahaʼi. Logope la ʼe ko he meʼa lelei hatatou fakahā tuʼumaʼu he aga fakaʼapaʼapa ki te hahaʼi, kae ʼe mole ʼui leva ke mole tou fakahā totatou ʼofa ki te hahaʼi. Neʼe mole ufiufi ia Sehova ʼAtua ʼi te fakahā tona ʼofa ki te hahaʼi ʼaē neʼe ina fili, ia Iselaele ʼo te temi muʼa, he neʼe ina ʼui fēnei kia nātou: “Neʼe ʼau ʼofa kia te koe ʼaki te ʼofa ʼe mole hona gataʼaga.” (Selemia 31:3) ʼO toe feiā pe, neʼe ʼui fēnei e te ʼapositolo ko Paulo ki tona ʼu tēhina mo tuagaʼane ʼi Tesalonika: “I tomatou ofa kia koutou, nee mole gata’pe mo tamatou leleiʼia ke tuku atu kia koutou te Evaselio a te Atua, pea mo omatou mauli foki, koteuhi kua koutou liliu ko omatou ofaʼaga.” (1 Tesalonika 2:8) Koia, ʼi tatatou faiga ʼaē ke tou fakatuputupu te ʼofa moʼoni ki te hahaʼi, tou fakahā te kalitate ʼaia kae mole tou fakatātāʼofi, pea kapau ʼe tou fai feiā pea ʼe tou mulimuli anai ki te akonaki ʼa te Tohi-Tapu.

ʼE Maʼua Ke Tou Faiga Tuʼumaʼu

Ko tatatou ako ʼaē ke tou ʼofa pea mo tou fakahā te ʼofa ki te hahaʼi ʼe ko he meʼa ʼe fai hoholo. Moʼo fai te faʼahi ʼaia ʼe maʼua ke tou faiga mālohi, heʼe tonu ke tou tauʼi totatou ʼu vaivaiʼaga pea mo tekeʼi te ʼu fakaneke ʼo te mālama agakovi ʼaenī. Kae ʼe fakapale lahi anai tatatou ʼu faiga ʼaia.​—Mateo 24:12.

Logope la ʼe tou maʼuʼuli ʼi te mālama heʼe haohaoa ʼaenī, kae ʼe feala pe ke hikihiki te lelei ʼo tatatou ʼu felogoi mo te hahaʼi, pea ʼe tou maʼu anai he fiafia lahi, te tokalelei, pea mo he fakafimālie kia tatou pea mo te hahaʼi. Kapau ʼe tou faiga feiā, pea ʼe tau mo feʼauga anai mo tatou te ʼamanaki taulekaleka ʼo te maʼuli heʼegata ʼi te mālama foʼou ʼaē ka takitaki e te ʼAtua. Ko te meʼa ʼaē ʼe maʼuhiga tāfito, kapau ʼe tou ako te ala ʼaē ʼe lelei ʼaupito ʼo te ʼofa, pea ko totatou Tupuʼaga ʼofa ʼe ina tali anai pea mo tapuakina tatou, ʼi te temi nei pea ʼo talu ai!

[Nota ʼi te lalo pasina]

[Paki ʼo te pasina 10]

Te ʼu aga ʼofa faka Kilisitiano

[Haʼuʼaga ʼo te paki pasina 8]

UN PHOTO 186226/M. Grafman