Ko Te Kau Fai Faka Mafola ʼo Te Puleʼaga
ʼE Nātou Tokoni Ki Te Hahaʼi Kehekehe ʼi Holani
NEʼE makehe te tui ʼa Apalahamo. Neʼe ʼui fēnei e te ʼapositolo ko Paulo, “i tona paui” neʼe fakalogo Apalahamo ki te leʼo ʼo te ʼAtua pea “nee alu ia, nee mole mahino pe kofea kua tonu ke alu ki ai.” ʼI tana ʼosi mavae mo tona famili katoa, neʼe “nofo ia i te kele o te Fakapapau, o hage ko he kele matapule” ia taʼu e teau ʼo aʼu ki tona mate.
ʼO toe feiā ia ʼaho nei, tokolahi te kau Fakamoʼoni ʼa Sehova ʼe nātou tali ke nātou ʼolo ki he tahi fenua ke nātou gāue ʼi te ʼu koga meʼa ʼaē ʼe ʼaoga lahi ai he kau fai faka mafola. Ko ʼihi neʼe nātou ako he tahi lea ke feala hanatou faka mafola ki te hahaʼi matāpule ʼaē neʼe feholaki mai ki tonatou fenua. Ohage ko tona fakahā mai e te ʼu faʼifaʼitaki ʼaenī ka tou vakaʼi, neʼe avahi ai “he matapā lahi ki te gāue” ʼi Holani, ʼaē ʼi te toko 15 miliona hahaʼi ʼaē ʼe nonofo ʼi ai, ʼe ko te hahaʼi e tahi miliona ʼe ʼōmai mai te tahi ʼu fenua.—1 Kolonito 16:9, MN.
◻ Ko Bahram, ʼe haʼu mai te fenua Alape, pea neʼe ko te tagata faiako kalate. Neʼe ʼavage tana Tohi-Tapu pea mo te ʼu tohi ʼa te Sosiete Watch Tower. Neʼe heʼeki ʼosi te māhina katoa, kae neʼe mahino kia Bahram kua ina maʼu te moʼoni. Neʼe kamata tana ako mo tona ʼohoana, kae neʼe ʼi ai te fihifihia—ko ia ʼaē neʼe ina fai tanā ako neʼe mole poto ʼi tanā lea. ʼE nā manatuʼi tanatou fai fakamahino ʼaki te ʼu nima. ʼAki te temi, neʼe maʼu e Bahram pea mo tona ʼohoana te kokelekasio ʼe fai ai te ʼu fono ʼi tanā lea, pea nā tuputupu ai ʼi te faʼahi fakalaumālie. ʼI te temi nei, kua papitema ia Bahram.
◻ Ko te taumatuʼa pionie ʼi Holani neʼe nā palalau ki te tagata Itonesia neʼe tuʼu ʼi te muʼa fale koloā. Neʼe punamaʼuli pea mo fiafia te tagata ʼaia ʼi tana logo ʼaē ʼe nā palalau ʼi tana lea. Neʼe fai te fakatuʼutuʼu ke ʼaʼahi ia ia ʼi tona ʼapi. Neʼe nā ʼiloʼi ki muli age ko te tagata ʼaia neʼe nofo ʼi Lusia ia taʼu e 20 tupu, pea neʼe liliu ai ko te tōketā vakaʼi fatu. Neʼe ina ʼui ʼe mole tui ki te ʼAtua, kae ʼi te temi fuli pe ʼaē neʼe ina fakafānauʼi ai he fafine, neʼe ko he meʼa fakatalakitupua kia ia, pea neʼe ina ʼui fēnei: “ ʼI meʼa taulekaleka leva te sino ʼo te tagata pea ʼe ko he milakulo ia!” Neʼe ina tali ke fai hana ako Tohi-Tapu pea neʼe fakatui ai leva ʼe ʼi ai te Tupuʼaga ʼe tokaga ki te malamanei katoa. (1 Petelo 5:6, 7) ʼI te temi ʼaenī, kua papitema pea ʼe gāue ʼi te kokelekasio lea faka Itonesia ʼi te kolo ʼo Amsterdam.
◻ ʼI Rotterdam, ʼaē ʼe kau ʼi te ʼu ʼuafu ʼaē ʼe lahi ʼaupito ʼi te malamanei, kua popoto te kau pionie ʼi te fai faka mafola ki te hahaʼi lea kehekehe ʼo te ʼu vaka ʼaē ʼe ʼōmai ʼo tau ai. ʼAki te gāue ʼo te kau fai faka mafola fakamalotoloto ʼaia, ko te tokolahi ʼo te kauvaka neʼe nātou tali te moʼoni, ʼo feiā mo te kapiteni, mo te tagata ofisie, pea mo te tagata leʼo. ʼI te temi ʼaenī ʼe nātou tokoni mo nātou ki te faka mafola ʼo te logo ʼo te Puleʼaga ʼa te ʼAtua ʼi te malamanei katoa.—Mateo 24:14.
Ohage ko tona fai ʼi te tahi ʼu fenua ʼo te malamanei katoa, ʼe faiga mālohi e te kau Fakamoʼoni ʼa Sehova ʼi Holani, ke nātou tala te logo lelei heʼegata ki te ʼu puleʼaga, mo te ʼu telepi, mo te ʼu lea, pea mo te hahaʼi fuli pe.—Apokalipesi 14:6.