Tou Fakalogo Te Fakatokaga!
ʼI TE ʼaho 3 ʼo Sūnio 1991, neʼe pa te Moʼuga Afi ʼo Fugen ʼi Saponia pea neʼe gugulu mālohi, ʼo ina fakaʼalu ki tuʼa te tuʼuga kasa pea mo te lefulefu mātolu. Neʼe hali ʼi te moʼuga te ʼu meʼa vela fuli ʼaia. Ko te toko 43 neʼe nātou mamate ʼi te pa ʼo te moʼuga afi ʼaia. Ko ʼihi neʼe nātou hāo kae neʼe nātou lāvevea kovi. Ko ʼihi neʼe nātou kole mamahi ke ʼavage hanatou moʼi vai. Neʼe gāue fakavilivili te hahaʼi tamate afi pea mo te kau polisi moʼo tokoni kia nātou.
KO VĀHAʼA e lua ʼi muʼa atu, neʼe fakatokagaʼi ʼe tuputupu ʼi te tumutumu ʼo te Moʼuga Fugen ai te huʼa vela ʼo te moʼuga afi, koia neʼe nofo tokaga ai te puleʼaga pea mo te hahaʼi ʼo te kolo. Lolotoga te vāhaʼa katoa ʼi muʼa ʼo te hoko ʼo te tuʼutāmaki ʼaia, neʼe kole ki te hahaʼi ke nātou mavae ʼi te potu fenua ʼaia. Ko te ʼaho katoa ʼi muʼa ʼo te tuʼutāmaki, neʼe kole e te kau polisi ki te hahaʼi tala logo ke ʼaua naʼa nātou hū ki te potu fenua ʼaē neʼe tapuʼi ki te hahaʼi. Kae ʼi te hoʼatā ʼaē neʼe pa ai te moʼuga, ko te toko 43 neʼe nātou nonofo ʼi te potu fenua ʼaē neʼe hoko ai te tuʼutāmaki.
He koʼe koa neʼe nātou ʼolo kiai ʼo nonofo ai? Ko ʼihi hahaʼi gāue kele ʼaē neʼe nātou mavae ʼi tonatou ʼapi, neʼe nātou toe liliu kiai moʼo vakaʼi tonatou ʼu koloā pea mo tanatou ʼu gāueʼaga. Ko hahaʼi sivi moʼuga afi e tolu neʼe nātou fakaōvi ki te moʼuga afi he neʼe nātou fia sivisivi peʼe hoko feafeaʼi anai te faʼahi ʼaia. Pea ko te ʼu hahaʼi tala logo pea mo fai paki, neʼe nātou fakalaka ʼi te ʼu tuʼakoi he neʼe nātou fia fai he ʼu paki matalelei ʼo te moʼuga afi. Neʼe toe nonofo ai mo te ʼu tagata fai takisi e tolu ʼaē neʼe totogi e te ʼu hahaʼi tala logo. Pea neʼe toe ʼi ai mo te kau polisi pea mo te hahaʼi tamate afi ʼaē neʼe gāue ai. Ki te hahaʼi fuli ʼaia, neʼe ʼi ai te tupuʼaga ʼo tanatou nonofo ʼi te potu fenua ʼaē neʼe hoko ai te tuʼutāmaki, pea neʼe nātou mamate fuli ai.
ʼE Koutou Nonofo Koa ʼi He Faʼahi ʼe Hoko Ai Anai He Tuʼutāmaki?
ʼE lagi mole tou nonofo fuli ia tafa ʼo he moʼuga afi. Kae e feafeaʼi mo kapau ʼe hoko mai anai he tuʼutāmaki faka malamanei, ʼo tou tuʼutāmaki fuli ai tatau aipe pe kofea te faʼahi ʼaē ʼe tou nonofo ai? Ko te tohi ʼaē neʼe hoko moʼoni tana ʼu lea faka polofeta, ʼe ina fakatokagaʼi mai kia tatou ʼe hoko anai te tuʼutāmaki faka malamanei pea ʼe ina fakamatala fēnei te faʼahi ʼaia: “E fakapouli anai te laa, e mole tukuʼage anai e te mahina tona malama, e maofa ifo anai te u fetuu mai te lagi, pea e luluʼi anai te u malohi o te lagi. . . . Pea e tuki fatafata anai ia hako fuape o te kelekele.” (Mateo 24:29, 30) ʼI te vaega ʼaia, ʼe ʼui ai ko te ʼu meʼa ʼaē ka hoko ʼi te lagi pea mo te ʼatulaulau ʼe hoko anai ki te ʼu “hako fuape o te kelekele.” Ko tona faka ʼuhiga, ʼe fakakikite e te lea faka polofeta ʼaia ʼe hoko anai te tuʼutāmaki kia tatou fuli.
Ko te tohi ʼaē ʼe maʼu ai te ʼu lea faka polofeta moʼoni ʼe ko te Tohi-Tapu. Ko te meʼa ʼaē ʼe lelei, he ko te koga faka Tohi-Tapu ʼaē ʼe tuʼu ai te vaega ʼaē neʼe tou vakaʼi, ʼe ina fakamatalatala te ʼu meʼa fuli ʼaē ka iku ai ki te malaʼia ʼo te malamanei katoa. Ko te foʼi huʼa vela ʼaē neʼe ʼi te tumutumu ʼo te moʼuga afi pea mo te tahi ʼu fakaʼiloga, neʼe nātou ʼeke ai te puleʼaga ʼo Shimbara ke nātou tala ki te hahaʼi, ʼe hoko anai te tuʼutāmaki ʼi te potu fenua ʼaia. ʼE toe feiā pe mo te Tohi-Tapu, ʼe ina foaki mai he ʼu tupuʼaga lelei ke tou nofo tokaga pea ke tou hāofaki totatou maʼuli. ʼE ʼaoga kia tatou te tuʼutāmaki ʼaē neʼe hoko ʼi te Moʼuga Fugen pea ke tou fakatokagaʼi te tuʼutāmaki lahi ʼaē ka hoko mai.
[Haʼuʼaga ʼo te paki pasina 3]
Yomiuri/Orion Press/Sipa Press