Ko Te Kau Fai Faka Mafola ʼo Te Puleʼaga
Kua Ina Maʼu Te ʼAtua ʼOfa
ʼI TONA taʼu 16, ko te tūpulaga Pelesile ko Antônio, neʼe mole kei falala ia ki he ka haʼu lelei. Neʼe ina fakaʼaogaʼi te toloke pea mo te kava he neʼe hage kia ia ʼe mole kei he ʼuhiga ʼo tona maʼuli. Neʼe lahi te ʼu lakaga neʼe fia fakamate ai. Pea ko te ʼu lakaga ʼaia neʼe ina manatuʼi ai te ʼu palalau ʼaē neʼe fai age e tana faʼe: “Ko te ʼAtua ʼe ʼofa.” (1 Soane 4:8, MN) Kae neʼe ʼifea koa te ʼAtua ʼofa ʼaia?
ʼI tana faiga ʼaē ke ina tuku te toloke pea mo te kava, neʼe kumi tokoni Antônio ki te patele ʼo tona kolo. Logope la te kua gāue mālohi ʼa Antônio ʼi te ʼēkelesia Katolika, kae neʼe kei lahi te ʼu meʼa neʼe ina fia ʼiloʼi. Ohage la, neʼe fia mahino ki te ʼu palalau ʼaenī ʼa Sesu: “E koutou iloi anai te mooni, pea e fakaateaina anai koutou e te mooni.” (Soane 8:32) Koteā te faʼahiga ʼāteaina ʼaē ʼe fakapapauʼi mai e Sesu? Neʼe mole maʼu e te lotu he ʼu tali lelei ki tana ʼu fehuʼi. Ki muli age, neʼe toe vaivai ia Antônio pea toe liliu ki tona maʼuli ʼāfea, ʼo toe ʼāsili age tana fakaʼaogaʼi te toloke pea mo te kava.
ʼI te temi ʼaia, neʼe kamata e Maria, te ʼohoana ʼo Antônio, tana ako Tohi-Tapu mo te kau Fakamoʼoni ʼa Sehova. Logope la tana mole fakafeagai ki te ako ʼo tona ʼohoana, kae neʼe ina tukugakoviʼi te kau Fakamoʼoni ʼo ina ʼui ʼe ko he “lotu Amelika ʼe lagolago ki te fakahaʼele ʼo te ʼu meʼa ʼo te puleʼaga Amelika.”
Kae neʼe mole lotovaivai Maria, he neʼe ina tuku haʼele ʼi tona ʼapi, te ʼu alatike ʼo Te Tule Leʼo pea mo te Réveillez-vous ! ʼaē ʼe ina ʼiloʼi ʼe feala ke fia lau anai e Antônio. Pea talu mai ai te fiafia ʼa Antônio ʼi tona lau, koia ʼi te temi ʼaē ʼe puli ai tona ʼohoana ʼe ina foimo fakasiosio te ʼu alatike ʼaia. Pea ko tana hoki maʼue te ʼu tali ki tana ʼu fehuʼi ʼo ʼuhiga mo te Tohi-Tapu. ʼE ina ʼui fēnei: “Neʼe ʼau kamata tokagaʼi ai foki, te ʼofa pea mo te agalelei ʼaē neʼe fai mai e toku ʼohoana pea mo te kau Fakamoʼoni ʼa Sehova.”
Pea ʼi te vaelua ʼo te taʼu 1992, neʼe fakatuʼutuʼu e Antônio ke ina ako te Tohi-Tapu mo te kau Fakamoʼoni ʼa Sehova. Kae neʼe kei hoko atu pe tana fakaʼaogaʼi lahi ʼo te toloke pea mo tana ʼinu kava. ʼI te tahi po, ko ia mo tona ʼu kaumeʼa neʼe nātou liliu mai te kiʼi kolo masiva kiō nātou, pea neʼe puke nātou e te kau polisi. Neʼe maʼu e te kau polisi ʼe taka Antônio mo te toloke ʼaē ko te cocaïne, pea neʼe nātou tā ia ia. Pea neʼe haga te tahi polisi ʼo tokahi ia ia ki te pela, pea ina fakahaga tana fana ki te ʼulu ʼo Antônio. Pea neʼe kalaga age te tahi polisi: “Fanahi ia ia!”
ʼI tana takoto ʼi te pela, neʼe toe manatuʼi e Antônio tona maʼuli. Ko te ʼu meʼa lelei ʼaē neʼe feala ke ina manatuʼi, neʼe ko tona famili pea mo Sehova. Neʼe faikole ai Antônio, ʼo kole kia Sehova ke tokoni age kia ia. Pea fokifā pe, neʼe tuku age ia ia e te kau polisi. Pea neʼe liliu ki tona ʼapi, pea mo tana ʼiloʼi papau ʼaē neʼe hāofaki e Sehova tona maʼuli.
Pea ʼaki he lotomālohi foʼou, neʼe toe kamata ako e Antônio te Tohi-Tapu. ʼAki te temi, neʼe ina fetogi tona maʼuli ke ʼalutahi mo te ʼu meʼa ʼaē ʼe loto kiai Sehova. (Efeso 4:22-24) ʼAki tana maʼuliʼi te loto lolomi, neʼe ina lava tauʼi tona ʼu fihifihia ʼo ʼuhiga mo te toloke. Kae neʼe ʼaoga kiai te tokoni ʼa te ʼu tōketā. Pea ko tana nofo māhina lua ʼi te lopitali, neʼe ina faka fealagia kia ia ke ina lau te ʼu tuʼuga tohi faka Tohi-Tapu, ʼo kau kiai mo te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Pea ko te ʼu meʼa ʼaē neʼe ina ako ʼi te ʼu tohi ʼaia, neʼe ina fakamatala ki te hahaʼi ʼaē neʼe nonofo mo ia ʼi te fale mahaki.
ʼI tana ʼosi mavae mai te lopitali, neʼe toe hoko atu e Antônio tana ako te Tohi-Tapu ʼaki te kau Fakamoʼoni ʼa Sehova. Pea ʼi te temi nei, ko ia mo Maria, mo tana ʼu taʼahine e lua, pea mo tana faʼe, ʼe nātou tauhi faka famili kia Sehova ʼaki he loto fiafia pea mo he logo tahi. ʼE ʼui fēnei e Antônio: “ ʼI te temi nei kua ʼau mahino ki te ʼuhiga moʼoni ʼo te ʼu kupu ʼaenī: ‘Ko te ʼAtua ʼe ʼofa.’ ”
[Paki ʼo te pasina 8]
Tana fai faka mafola ʼi Rio de Janeiro