ʼE Mole Tou Tokotahi Mokā ʼAhiʼahiʼi Tatatou Tui

Ko Vicky neʼe ko tamā kiʼi tamasiʼi fafine agalelei neʼe ma ʼofa mamahi ai—neʼe mole mahaki, neʼe finemui, pea mo mālohi. Neʼe tupu ʼi te fasiga taʼu mātala ʼo te 1993, pea neʼe ma fiafia ʼaupito. Neʼe mātou nonofo ʼi te kiʼi kolo veliveli ʼo te potu saute ʼo Suete, pea neʼe mātou maʼuli fiafia.

ʼI TE taʼu tahi vaelua ʼo Vicky, neʼe hage neʼe mole kei he ʼuhiga ʼo tomā maʼuli. Neʼe mahamahaki, pea neʼe ma ʼave ia ia ki te lopitali. ʼE mole galo anai kia māua, te temi ʼaē neʼe fakahā mai ai e te tōketā ʼe kau tamā kiʼi taʼahine ʼi te mahaki ʼaē ko te leucémie lymphoblastique, ko he faʼahiga kosea ʼo te ʼu globules blancs.

ʼI te fakahā mai ʼaē ʼe kau tamā kiʼi tamasiʼi fafine ʼi te mahaki fakamataku ʼaia, neʼe mole ma tui ki te logo ʼaia. Mole heʼeki faʼa fualoa tona maʼuli pea koʼeni leva ka mate. Neʼe fakaloto fīmālieʼi māua e te tōketā, ʼo ina ʼui mai ʼe ʼi ai te faitoʼo ʼe lava maʼuli ai tamā tamasiʼi, ko te chimiothérapie pea mo te ʼu foʼi huki toto. Neʼe mole ma tali te faitoʼo ʼaia.

Neʼe ʼAhiʼahiʼi Tamā Tui

Neʼe ma ʼofa moʼoni ki tamā kiʼi tamasiʼi fafine, pea neʼe ma fia maʼu te faitoʼo ʼaē ʼe lelei anai ki tona mahaki. Kae neʼe mole ma tali te ʼu foʼi huki toto. ʼE ma tui mālohi ki te Folafola ʼa te ʼAtua, ia te Tohi-Tapu, ʼaē ʼe ʼui ai ki te kau Kilisitiano ke nātou ‘fakafisi ki te toto.’ (Gaue 15:28, 29) Neʼe toe mahino kia māua ʼe fakatupu tuʼutāmaki te ʼu foʼi huki toto. Neʼe mahahaki te toko lauʼi afe pea mo nātou mamate ʼuhi pe ko te ʼu foʼi huki toto. Ko te puleʼaki pe e tahi ko he faitoʼo lelei ʼe mole fakaʼaogaʼi ai te ʼu foʼi huki toto. ʼI te faʼahi ʼaia neʼe kamata ʼahiʼahiʼi ai tamā tui.

Koteā te meʼa neʼe lava ke ma fai? Neʼe ma telefoni ki te filiale ʼo te kau Fakamoʼoni ʼa Sehova ʼo Suete ke tokoni mai te Selevisi ʼo Te ʼu Logo ʼo Te Lopitali.a Neʼe foimo fai atu aipe te ʼu tohi ki te ʼu lopitali kehekehe ʼo te Eulopa moʼo kumi he lopitali pea mo he tōketā ʼe lotolelei ke ina fai te chimiothérapie kae mole ina fakaʼaogaʼi te ʼu foʼi huki toto. Neʼe ko he meʼa fakaloto mālohi tamā sio ki te ʼu faiga mālohi pea mo te ʼofa ʼo tomatou ʼu tēhina moʼo tokoni mai kia māua. Neʼe mole ma tokotahi ʼi tamā tau ʼaē ʼo ʼuhiga mo tamā tui.

ʼI te ʼu hola ʼaē neʼe hoa mai, neʼe maʼu ia te lopitali pea mo te tōketā ʼi te kolo ʼo Siamani ko Homburg/Saar. Neʼe fai te ʼu fakatuʼutuʼu ke ma ʼolo kiai ʼi te ʼaho ake, ke vakaʼi ai ia Vicky. ʼI tamatou tau atu, neʼe tali mātou e te ʼu tēhina ʼo te kokelekasio ʼo te kau Fakamoʼoni ʼa Sehova ʼi Homburg, pea mo ʼihi age ʼo tomā ʼu kāiga. Pea neʼe fakatalitali lelei mātou e te tēhina ʼe kau ki te Komite Faka Felogoi Mo Te Lopitali ʼo te kolo. Neʼe kaugā ʼolo mo mātou ki te lopitali pea neʼe lagolago mālohi kia māua. Neʼe ko he meʼa fakaloto fīmālie tamā sisio māʼiape la mo te fenua kehe ʼaē neʼe mātou ʼolo kiai, kae neʼe ʼi ai te ʼu tēhina fakalaumālie neʼe tokoni mai kia mātou.

ʼI tamā felāveʼi mo te tōketā ko Graf ʼi te lopitali, neʼe toe ʼāsili age tomā fakaloto mālohiʼi. Neʼe mahino te tōketā ki te meʼa ʼaē ʼi tomā loto pea neʼe faiga ke ina faitoʼo ia Vicky kae mole ina fakaʼaogaʼi te ʼu foʼi huki toto. Neʼe ina ʼui mai, tatau aipe mo kapau ʼe hifo tona toto ki te 5 g/dl, kae ʼe mole ina fakaʼaogaʼi anai te ʼu foʼi huki toto. Neʼe ina toe ʼui mai ko te ʼuluaki sivi pea mo te faitoʼo fakavilivili ʼo Vicky ʼe lava ke fua lelei kia ia. Neʼe ina fakahā lelei mai ko tana hoki fai ʼaē ʼo te chimiothérapie kae mole ina fakaʼaogaʼi te foʼi huki toto. Neʼe ma fakafetaʼi pea mo vikiʼi te lototoʼa ʼo te tōketā ko Graf pea mo tana faiga ʼaē ke tokoni mai kia māua.

Te Fihifihia ʼo ʼUhiga Mo Te Totogi

Kae neʼe ʼi ai te tahi fihifihia, ʼe feafeaʼi anai tamā totogi ʼo te ʼu faitoʼo ʼo Vicky? Neʼe ma punamaʼuli ʼi te fakahā mai ʼaē ko te ʼu taʼu e lua ʼaē ʼe faitoʼo ai ia Vicky, ʼe teitei pe ke 10 miliona tona totogi. Neʼe mole ma maʼu pe la te foʼi falā ʼaia, kae neʼe kua tonu ke foimo kamata te faitoʼo ʼo Vicky. ʼI tamatou mavae mai Suède ki Siamani, neʼe mole fai mai e te puleʼaga he tokoni ki te faʼahi ʼaia. Neʼe kua ma fakatahi mo tamā kiʼi taʼahine ʼi henī pea kua maʼu mo te tōketā ʼe ina tali lelei ke tokoni mai, kae neʼe mole lahi tamatou falā moʼo totogi te faitoʼo.

Neʼe tokoni te lopitali kia māua pea neʼe nātou ʼui mai, ʼe lava pe ke foimo faitoʼo ia Vicky mo kapau ʼe ma ʼuluaki li age he 1 200 000, pea mo sinie he pepa ʼe fakamoʼoni ai ki te toega falā ʼaē ʼe tonu ke ma huʼi. Neʼe ʼi aipe tamā foʼi falā neʼe ma tānaki, pea ʼaki te tokoni ʼofa ʼo tomā ʼu kaumeʼa pea mo te ʼu famili, neʼe foaki age ia te 1 200 000, kae e feafeaʼi leva ki te toe ʼaē ʼe tonu ke huʼi?

Neʼe ma toe manatuʼi ai ʼe mole ma tokotahi ʼi tamā tau ʼo ʼuhiga mo te tui. Koia neʼe tali lelei e te tēhina fakalaumālie ʼe mole mātou feʼiloʼiʼaki ke ina totogi te falā ʼaē kei toe. Kae neʼe mole ma fakaʼaogaʼi tona manavaʼofa lahi, koteʼuhi neʼe tuku mai kia mātou te tahi ʼu fealagia.

Te Gāue ʼa Te Kau Tōketā Popoto

Neʼe kamata te chimiothérapie. Neʼe fualoa te fai ʼo te faitoʼo. ʼI ʼihi temi neʼe faigataʼa ʼaupito pea mo fakakinakina kia māua taumatuʼa pea mo tamā kiʼi taʼahine. Tahi ʼaē meʼa, neʼe ma fiafia ʼaupito pea mo fakafetaʼi ʼi te ʼu temi fuli ʼaē neʼe ma sio ai kua ai mai tana kiʼi siasiaʼa. Neʼe māhina valu te fai ʼo te chimiothérapie. Neʼe hifo te toto ʼo Vicky ki te 6 g/dl, pea neʼe mulimuli pe te tōketā ko Graf ki tamā kole.

Kua hili nei kiai taʼu e ono, pea neʼe fai te sivi fakamuli ʼo tona huʼa céphalo-rachidien ʼo hā ai kua puli tona leucémie. ʼE ko he kiʼi taʼahine kua maʼuli fiafia nei heʼe mole kei mahaki. Ei, ʼe hage ko he milakulo te kua lelei ʼosi ʼo te mahaki ʼo Vicky. ʼE ma ʼiloʼi kua lahi te ʼu tamaliki ʼaki te mahaki pe ʼaia, kua nātou mamate logola neʼe fai age kia nātou te chimiothérapie pea mo te ʼu foʼi huki toto.

Neʼe ma mālo ʼi tamā tau ʼo ʼuhiga mo te tui, ʼaki te tokoni ʼo tomā ʼu famili, mo te ʼu tēhina pea mo tuagaʼane Kilisitiano, pea mo te ʼu tōketā. Neʼe lagolago ʼaupito kia māua ʼi te ʼaho katoa, Te Selevisi ki te ʼu Logo ʼo te Lopitali. Ko te tōketā ko Graf pea mo tana ʼu kaugā gāue neʼe nātou fakaʼaogaʼi tonatou ʼu fealagia moʼo faitoʼo ia Vicky, pea ʼe ma fakafetaʼi ʼo ʼuhiga mo te ʼu meʼa fuli ʼaia.

Neʼe Fakaloto Mālohiʼi Tamā Tui

Pea ko te meʼa ʼaē ʼe maʼuhiga tāfito, ʼe ma fakafetaʼi ki tomā ʼAtua ia Sehova, ki tana tokaga ʼofa pea mo te mālohi ʼaē neʼe ma maʼu ʼi tana Folafola ia te Tohi-Tapu. Ka ma fakakaukauʼi te fihifihia ʼaia neʼe hoko, ʼe mahino kia māua neʼe lahi te ʼu meʼa neʼe ma ako ai pea mo fakaloto mālohiʼi ai tamā tui.

ʼI te temi nei ʼe ma fakaʼamu ʼi tomā loto katoa ke ma taupau maʼu tamā felogoi lelei ʼaē mo Sehova ʼAtua, pea ke ma akoʼi ki tamā kiʼi taʼahine ia te maʼuhiga ʼaē ke maʼuli ʼo mulimuli ki tana ʼu fakatuʼutuʼu. Ei, ʼe ma fia foaki ki tamā kiʼi taʼahine he tofiʼa fakalaumālie lelei, ko te maʼuli heʼegata ʼi te Palatiso ʼaē ka fakatuʼu ʼi te kele.—Ko he tahi ʼi te kau lautohi.

[Kiʼi nota]