Kei Koutou Manatuʼi Koa?

Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:

• He koʼe koa ʼe lelei māʼia mo te temi nei, ke tokagaʼi te ʼu fehuʼi ʼaē neʼe lagaʼi ʼi te kapite 38 ʼo Sopo?

ʼE lahi te ʼu gāue fakaofoofo neʼe tokaga kiai te ʼAtua ʼe mole feala ia ke mahino katoa kiai māʼia mo te kau tagata popoto ʼo te temi ʼaenī. ʼI te ʼu gāue ʼaia ʼe kau ai te pesanteur ʼaē ʼe ina faka fealagia ki te kele ke ina foliʼi lelei te laʼā, mo te ʼuhiga totonu ʼo te mālama, mo te kehekehe ʼaupito ʼo te ʼu eveʼi nive, mo te kamataʼaga ʼo te ʼu mosiʼi ʼua, pea mo te mālohi lahi ʼaē ʼe maʼu ʼi te ʼu afā.—15/4, pasina 4 ki te 11.

• Koteā te ʼu faʼifaʼitaki faka Tohi-Tapu ʼe lava tokoni mai kia tatou moʼo tekeʼi te ʼu manatu ʼaē ʼe mole lelei?

Ko Asafe, mo Paluke, pea mo Naomi neʼe ʼi ai te ʼu temi neʼe nātou lotovaivai ai, peʼe neʼe nātou maʼu te tahi ʼu manatu ʼe mole lelei, pea ʼe lava tokoni kia tatou te ʼu fakamatala faka Tohi-Tapu ʼo ʼuhiga mo tanatou lava tekeʼi te ʼu ʼaluʼaga ʼaia.—15/4, pasina 22 ki te 24.

• Koteā he ʼu koga ʼe ʼaoga moʼo tokoni ki te kau vitua Kilisitiano?

ʼE feala ki te ʼu kaumeʼa ke nātou tokoni age kia nātou ʼaki te ʼofa. ʼE lagi feala ki te famili peʼe ko ʼihi, ke nātou tokoni age kia nātou ʼi te faʼahi ʼo te paʼaga peʼe ko te ʼu koloā, mokā ʼe ʼaoga moʼoni te faʼahi ʼaia. ʼE feala ki te kau Kilisitiano ke nātou tokoni ʼo nātou lagolago age pea mo fakaloto fīmālieʼi nātou ʼi te faʼahi fakalaumālie.—1/5, pasina 5 ki te 7.

• He koʼe koa ʼe maʼuhiga ke kita ʼohoana “ ʼi te ʼAliki pe,” ohage ko tona tokoniʼi mai ia 1 Kolonito 7:39 (MN )?

ʼI te agamāhani, ʼe fakaʼofaʼofa te ʼohoana ʼa he Kilisitiano mo he tahi ʼe mole tui. Tahi ʼaē meʼa, ko te muliʼi ʼo te tokoni fakaʼatua ʼaia ʼe ko he agatonu kia Sehova ʼAtua. Ka tou mulimuli ki te Folafola ʼa te ʼAtua, pea ʼe mole tou maʼuli hoha. (1 Soane 3:21, 22)—15/5, pasina 20 ki te 21.

• Mai te ʼaluʼaga ʼaē ʼe ko Sehova tokotahi pe ʼaē ʼe ina lava fakamolemole ʼatatou agahala, he koʼe koa ʼe kofesioʼi e te kau Kilisitiano te ʼu agahala mamafa ki te kau tagata ʼāfea ʼo te kokelekasio?

ʼE moʼoni, ʼe tonu ki te Kilisitiano ke ina kole kia Sehova ke ina fakamolemole age tana ʼu agahala mamafa. (2 Samuele 12:13) Kae ohage pe ko te tokoni ʼa Natane kia Tavite, ʼe feala pe ki te kau tagata ʼāfea pea mo fakapotopoto ke nātou tokoni ki te kau agahala ʼaē ʼe fakahemala. Ko te kumi tokoni ki te kau tagata ʼāfea ʼe ʼalutahi mo te fakatotonu ʼaē ʼe tuʼu ia Sakopo 5:14, 15.—1/6, pasina 31.

• Koteā te fakamoʼoni ʼaē ʼe tonu ai ke tou tokakaga kia nātou ʼe hala mo tāmai pea mo te kau vitua ʼaē ʼe faigataʼaʼia?

ʼE fakahā e te hisitolia faka Tohi-Tapu, ko te taʼi tokaga ʼaia neʼe ina fakaʼiloga kehe ai te tauhi moʼoni ʼi te kau Hepeleo ʼo te temi muʼa pea mo te ʼu ʼuluaki Kilisitiano. (Ekesote 22:22, 23; Kalate 2:9, 10; Sakopo 1:27) Neʼe tohi e te ʼapositolo ko Paulo te ʼu fakatotonu lelei maʼa te kau Kilisitiano, ke nātou tokakaga ki te kau vitua ʼaē ʼe faigataʼaʼia. (1 Timoteo 5:3-16)—15/6, pasina 9 ki te 11.

• Koteā te kalavi ki he maʼuli fiafia pea mo fua lelei?

ʼE tonu ke tou fakatuputupu pea mo taupau he felogoi lelei mo Sehova, tatatou Tāmai ʼe ʼi selo. Ko te ako ʼo te Tohi-Tapu ʼe ko he tokoni maʼuhiga ki tatatou fai ʼo te faʼahi ʼaia.—1/7, pasina 4 ki te 5.

• ʼE ʼi ai koa he laumālie tuputupua ʼo te tagata ʼe maʼuli ʼi te hili ʼo te mate?

Logope ʼe tui ʼihi hahaʼi ko te laumālie—kae mole ko te nefesi—ʼe tuputupua, kae ʼe mole lagolago te Tohi-Tapu ki te manatu ʼaia. ʼE ina fakahā mai ka mate te tagata, pea ʼe toe liliu ʼo efu pea mo pulinoa. Kae ʼe maʼu e te ʼAtua te fealagia ke ina toe fakamaʼuli ia ia ʼaē kua mate, koia ko te ʼamanaki ʼo ʼuhiga mo te maʼuli ki te ka haʼu, ʼaki te fakatuʼuake, ʼe fakalogo ki te ʼAtua. (Tagata Tānaki 12:7)—15/7, pasina 3 ki te 6.

• Neʼe ʼifea ia Taniela ʼi te temi ʼaē neʼe ʼahiʼahiʼi ai te toko tolu Hepeleo ʼi te mafa ʼo Tula?

ʼE mole fakahā mai e te Tohi-Tapu. Neʼe lagi mole fakamaʼua kia ia ke kau ai ʼuhi ko tona tuʼulaga, pe neʼe lagi hinoʼi ia ia ki he gāue faka puleʼaga ʼi he tahi koga meʼa. Kae ʼe tou falala neʼe nofo agatonu aipe kia Sehova.—1/8, pasina 31.