Te Kalavi ʼo Te Maʼuli Fakafeauga

ʼI te tohi fakaloto mālohi neʼe fai e te ʼapositolo ko Paulo ki te kau Kilisitiano ʼi Filipe, neʼe ina tohi fēnei ai: “Nee kuʼau ako’pe ki te mauli fakafeauga i he aluaga’pe e au mauli ai. . . . I te meafuape, mo te aluaga fuli nee au ako te nofo makona mo te nofo halofia, te mauli mahu mo te mauli masiva.”​—Filipe 4:​11, 12.

Neʼe koteā te kalavi ʼo te maʼuli fakafeauga ʼa Paulo? Ka tou tokagaʼi te totogi kovi ʼo te maʼuli pea mo te ʼu faigataʼaʼia ʼi te faʼahi faka ekonomika ʼo totatou temi, ʼe mahino ia ʼe ʼaoga ki te kau Kilisitiano moʼoni ke nātou ako te maʼuli fakafeauga ke feala ai hanatou faka maʼuhiga tanatou gāue ki te ʼAtua.

ʼI TE kamataʼaga ʼo tana tohi, neʼe fakamatala e Paulo te koloaʼia ʼo tona maʼuli ʼāfea. Neʼe ina ʼui fēnei: “Kapau ʼe manatu e he tahi tagata ʼe ʼi ai tona ʼu tupuʼaga ke falala ai ki te kakano, ʼe ʼau lakaʼage: neʼe silikosisioʼi ʼau ʼi te valu ʼaho, mai te lanu ʼo Iselaele, mai te telepi ʼo Pesamino, Hepeleo tupu mai te ʼu Hepeleo, ko he faliseo ʼo ʼuhiga mo te lao; ʼo ʼuhiga mo te faʼafai, neʼe ʼau fakatagaʼi te kokelekasio; ʼo ʼuhiga mo te faitotonu ʼo te lao, neʼe ʼau heʼe mele.” (Filipe 3:​4-6, MN ) Pea tahi ʼaē meʼa, ʼi tona ʼuhiga Sutea faʼafai, neʼe foaki e te kau Pelepitelo pule ʼo Selusalemi te fakatotonu kia Paulo pea neʼe nātou lagolago kia te ia. ʼAki te ʼu faʼahi fuli ʼaia, neʼe ina maʼu ai ʼi te tuʼu faka Sutea ia te mālohi pea mo te logona ʼi te faʼahi faka politike, mo te faʼahi faka lotu, pea ʼe mahino ia mo te faʼahi paʼaga.​—Gaue 26:10, 12.

Kae ʼi te temi ʼaē neʼe liliu ai ia Paulo ko he minisi Kilisitiano faʼafai, neʼe fetogi katoa tona maʼuli. Maʼa te logo lelei, neʼe lītuʼa ki tona tuʼulaga lelei pea mo te ʼu meʼa fuli ʼaē ki muʼa atu neʼe maʼuhiga kia ia. (Filipe 3:​7, 8) E feafeaʼi ʼapē ʼi te temi leva ʼaia hana tokaga kia ia? ʼE ʼi ai anai koa hona totogi ʼi tona ʼuhiga minisi? ʼE feafeaʼi anai hana taupau ia tona maʼuli?

Neʼe fai e Paulo tona minisitelio kae neʼe mole totogi. Ke mole liliu ko he kavega maʼa nātou ʼaē neʼe tokoni ki ai, neʼe kaugā gāue mo Akila pea mo Pilisila ki te faʼu ʼo te ʼu falelā ʼi Kolonito, pea neʼe ina fai mo te tahi ʼu meʼa moʼo taupau tona maʼuli. (Gaue 18:​1-3; 1 Tesalonika 2:9; 2 Tesalonika 3:​8-​10) Neʼe fai e Paulo tana ʼu folau misionea lalahi e tolu, pea neʼe toe ʼalu foki ki te ʼu kokelekasio ʼaē neʼe ʼaoga ke ʼaʼahi. Mai te ʼaluʼaga ʼaē neʼe maʼumaʼua katoa ki te gāue ʼa te ʼAtua, neʼe mole lahi hona ʼu koloā. ʼI te agamāhani, neʼe foaki age e te ʼu tēhina ia te ʼu meʼa neʼe ʼaoga kia ia. Kae ʼi ʼihi temi, ʼuhi ko te ʼu ʼaluʼaga tokakovi, neʼe maʼuli fakamasiva. (2 Kolonito 11:27; Filipe 4:​15-​18) Kae neʼe mole ʼi ai he temi neʼe meo ai ia Paulo ʼo ʼuhiga mo te ʼu meʼa ʼaē neʼe hoko kia ia, pea neʼe mole mānumānu ki te ʼu meʼa ʼaē neʼe maʼu e ʼihi. Neʼe lotolelei pea mo fiafia ʼi te gāue mālohi maʼa tona ʼu tēhina Kilisitiano. Neʼe ko Paulo totonu ʼaē neʼe ina fai te ʼu palalau ʼiloa ʼa Sesu: “ ʼE lahi age te fiafia ʼi takita foaki, ʼi takita tali.” ʼE ko he faʼifaʼitaki maʼuhiga kia tatou fuli!​—Gaue 20:33-​35, MN.

Te Faka ʼUhiga ʼo Te Maʼuli Fakafeauga

Ko te meʼa tāfito ʼaē neʼe kau ki te fiafia ʼa Paulo neʼe ko tana maʼuli fakafeauga. Kae koteā te faka ʼuhiga ʼo te maʼuli fakafeauga? ʼI tona fakanounou, ʼe faka ʼuhiga pe ke tou fakafeauga ki te ʼu meʼa ʼaē ʼe maʼuhiga tāfito ki tokita maʼuli. ʼO ʼuhiga mo te faʼahi ʼaia, neʼe ʼui fēnei e Paulo kia Timoteo, tona kaugā fagona ʼi te minisitelio: “ ʼE moʼoni, ʼe fakatupu maʼu meʼa te pipiki ki te ʼAtua pea mo te maʼuli fakafeauga. He neʼe mole tou ʼaumai he meʼa ki te malamanei, pea ʼe mole feala foki ke tou ʼave he meʼa. Koia, kapau ʼe tou maʼu te meʼa kai pea mo te meʼa kofu, ʼe tou feʼauga pe anai ʼi te ʼu meʼa ʼaia.”​—1 Timoteo 6:​6-8, MN.

Koutou fakatokagaʼi neʼe fakapipiki e Paulo te maʼuli fakafeauga ki te pipiki ki te ʼAtua. Neʼe mahino kia ia ko te fiafia moʼoni ʼe haʼu mai te pipiki ki te ʼAtua, mai tatatou fakamuʼamuʼa tatatou tauhi ki te ʼAtua ʼi totatou maʼuli, kae mole haʼu mai tatatou fakamuʼamuʼa te ʼu lelei fakasino peʼe ko ni ʼu koloā. Ko te “meʼa kai pea mo te [ʼu] meʼa kofu” ʼe ko he ʼu meʼa ʼe nātou faka fealagia ke tou hoko atu ia tatatou pipiki ki te ʼAtua. Koia maʼa Paulo ko te kalavi ʼo te maʼuli fakafeauga neʼe ko te falala kia Sehova, logope he ʼu faʼahiga ʼaluʼaga ʼe feala ke hoko.

Tokolahi te hahaʼi ia ʼaho nei ʼe nātou maʼuli hoha pea ʼe mole nātou maʼuli fīmālie, koteʼuhi ʼe mole nātou mahino peʼe mole nātou ʼiloʼi ia te kalavi ʼaia. ʼE nātou leleiʼia age hanatou falala ki te paʼaga pea mo te meʼa ʼaē ʼe lava totogi e te falā, ʼi hanatou maʼuli fakafeauga. Neʼe fakatupu e te publicité pea mo te ʼu tala logo he ʼu meʼa ke manatu ia te hahaʼi ʼe hoki nātou maʼuli fīmālie mo kapau ʼe nātou maʼu te ʼu meʼa foʼou​—pea ke nātou foimo toʼo fakavilivili. Koia, tokolahi ʼe nātou tō ki te hele ʼaē ko te fia maʼu paʼaga pea mo faiga ki te ʼu koloā fakamālama. ʼE mole nātou maʼu te fiafia pea mo te fīmālie, kae ʼe nātou “higa ki te fakahala, mo te matahele, pea mo te u manumanu kehekehe fakavale mo fakatupu tuutamaki, e natou fakaʼuku te hahai ki te auha mo te malaia.”​—1 Timoteo 6:​9, 10.

Neʼe Nātou Ako Te Maʼuli Fakafeauga

Ia ʼaho nei, ʼe feala koa ke kita pipiki ki te ʼAtua pea mo maʼuli fakafeauga, pea mo maʼu ia he maʼuli manuʼia pea mo fīmālie? Ei ʼe feala. ʼIo, ia ʼaho nei ko te ʼu toko lauʼi miliona hahaʼi ʼe nātou fai ia te meʼa ʼaia. Kua nātou maʼu te kalavi ʼo te maʼuli fīmālie, ʼo nātou fakafeauga ki te ʼu meʼa ʼaē kua nātou maʼu. Ko nātou ʼaia ʼe ko te kau Fakamoʼoni ʼa Sehova, ʼaē kua nātou foaki tonatou maʼuli ki te ʼAtua, pea ʼe nātou fai tona finegalo pea mo akoʼi tana fakatuʼutuʼu ki te hahaʼi ʼi te ʼu potu fuli.

Ohage la koutou fakatokagaʼi, te kau misionea ʼaē neʼe nātou tali lelei ke akoʼi nātou pea mo fekauʼi nātou ki he ʼu fenua kehe moʼo faka mafola ai ia te logo lelei ʼo te Puleʼaga ʼo te ʼAtua. (Mateo 24:14) ʼI te agamāhani, ʼe mole nātou maʼu ʼi te ʼu fenua ʼaē neʼe fekauʼi nātou kiai ia te ʼu meʼa fuli ʼaē neʼe nātou maʼu māhani. Ohage la, ʼi te kaku ʼa te ʼu misionea ki te kolo ʼo Asia ʼi te kamataʼaga ʼo te taʼu 1947, neʼe kei masiva te kolo ʼuhi ko te tau, pea neʼe mole lahi te ʼu ʼapi ʼaē neʼe haʼele ai te hila. ʼE lahi te ʼu fenua, ko te ʼu misionea neʼe nātou fakaʼaogaʼi te ʼu lauʼi papa peʼe ko te ʼu fuga maka ʼi he vaitafe moʼo fō ai tonatou ʼu mutuʼi meʼa, he neʼe mole ʼi ai hanatou ʼu masini fai fō. Kae neʼe tonu ke nātou akoʼi te ʼu moʼoni ʼo te Tohi-Tapu ki te hahaʼi, koia neʼe tonu ai ke nātou fakafeauga tonatou maʼuli ki te ʼu meʼa ʼaē ʼe nātou maʼu ʼi te ʼu fenua ʼaia, pea ke nātou maʼumaʼua ʼi te minisitelio.

Ko ʼihi neʼe nātou pionie peʼe neʼe nātou ʼolo ki he ʼu koga meʼa neʼe heʼeki aʼu kiai te logo lelei. Ko Adulfo neʼe pionie ia taʼu e 50 tupu ʼi te ʼu potu kehekehe ʼo Mekesike. ʼE ina ʼui fēnei: “Ohage ko te ʼapositolo ko Paulo, ko ʼau pea mo toku ʼohoana neʼe fakafeauga tomā maʼuli ki te ʼu ʼaluʼaga ʼaē neʼe tau mo māua. Ohage la, ko te tahi kokelekasio neʼe ma ʼaʼahi, neʼe tuʼu mamaʼo ʼi te ʼu kolo lalahi pea mo te ʼu fakatauʼaga meʼa. ʼI te ʼu temi kai, ko te ʼu tēhina neʼe nātou kai pe te fakapaku e tahi mo te kihiʼi moʼi gakoʼi puaka, mo te moʼi māsima pea mo ʼinu pe tonatou kafe. Neʼe ko te gataʼaga pe ʼaia ʼo tanatou meʼa kai​—te ʼu fakapaku e tolu ʼi te ʼaho. Koia neʼe ma ako ke ma maʼuli ohage ko te ʼu tēhina. Neʼe ʼau sio ki te ʼu tuʼuga meʼa feiā lolotoga ʼo te ʼu taʼu e 54 ʼaē neʼe ʼau pionie ai kia Sehova.”

ʼE manatuʼi e Florentino te temi ʼaē neʼe tonu ai kia ia pea mo tona famili ke nātou fakafeauga tonatou maʼuli ʼi te ʼu ʼaluʼaga faigataʼaʼia. ʼI tana manatuʼi ia tona maʼuli ʼi te kamata, ʼe ina ʼui fēnei: “Ko taku tāmai neʼe ko he tagata faifakatau maʼu koloā. Neʼe lahi tona ʼu kele. Kei ʼau manatuʼi tomatou fale koloā. Neʼe ʼi ai te kiʼi puha e satimeta 50 tona laulahi, pea neʼe loloto ia satimeta e 20, pea neʼe koga fā. Neʼe tānaki ai te falā ʼa te hahaʼi ʼaē neʼe ʼōmai ʼo faifakatau ʼi te fale koloā. ʼI te fakaʼosi ʼo te ʼaho, neʼe fonu tuʼumaʼu pe te falā ʼi te kiʼi puha ʼaia.

“Pea fokifā pe, mai tomatou maʼuli koloaʼia neʼe mātou liliu ʼo māsisiva. Neʼe mole kei ʼi ai hamatou meʼa gata pe ki tomatou ʼapi. Tahi ʼaē meʼa, ko toku tahi tēhina neʼe hoko ki ai te tuʼutāmaki pea neʼe palalisia ai tona ʼu vaʼe. Neʼe mole kei tatau leva tomatou maʼuli. Lolotoga he temi neʼe ʼau fakatau te ʼu fuaʼi ʼakau mata pea mo te ʼu kanoʼi manu. Neʼe ʼau kau ki te tae ʼo te vavae, pea mo te ʼu fuaʼi vite, pea mo te luzerne, pea mo te fakavai ʼo te ʼu gāueʼaga. Neʼe higoaʼi ʼau e ʼihi ko he tahi ʼe poto ʼi te ʼu gāue kehekehe. Neʼe tautau fakaloto mālohiʼi mātou e taku faʼe, ʼo ina ʼui mai ʼe mātou maʼu te moʼoni, ʼaē ko he koloā fakalaumālie ʼe mole maʼu e he tokolahi. Koia neʼe ʼau ʼiloʼi ai te maʼuli ʼi te mahu pea mo te maʼuli ʼi te masiva. ʼI te temi nei, kua taʼu 25 taku pionie maʼa Sehova, kua feala ke ʼau ʼui ʼi te temi fuli pe, neʼe ʼau maʼu te tapuakina ʼi taku filifili te maʼuli ʼaē ʼe lelei age​—ʼaē ko taku tauhi temi katoa kia Sehova.”

ʼE fakahā lelei mai e te Tohi-Tapu ko “te ʼaluʼaga ʼo te malamanei ʼe fetogi.” Ko te faʼahi la ʼaia, ʼaē ʼe ina toe fakaloto mālohiʼi tatou: “Ko nātou ʼe fakafiafia ke hage ʼe mole nātou fakafiafia, mo nātou ʼaē ʼe fai fakatau ke hage ʼe mole hanatou meʼa, ko nātou ʼaē ʼe nātou fakaʼaogaʼi te mālama, ke nātou hage ko nātou ʼaē ʼe mole nātou fakaʼaogaʼi katoa.”​—1 Kolonito 7:​29-​31, MN.

Koia la ʼaē ʼi te temi nei ʼe tonu ai ke koutou vakavakaʼi fakalelei tokotou faʼahiga maʼuli. Kapau ʼe mole lahi ni ʼokotou ʼu koloā, pea koutou tokaga ke ʼaua naʼa koutou lotomamahi, peʼe koutou fonu ʼi te ʼita peʼe koutou maheka. Tahi ʼaē meʼa, tatau aipe peʼe koteā ʼaē ʼe koutou maʼu, ʼe lelei anai ke koutou fakafuafua lelei te ʼu meʼa ʼaia ke ʼaua naʼa nātou puleʼi koutou. Ohage ko te fakaloto mālohi ʼa te ʼapositolo ko Paulo, ʼaua naʼa koutou tuku takotou falala “ki he u koloa fakalakilua, kae ki te Atua ae e ina fakakoloa mai tatou, aki te meafuape, tou fakafiafia ai.” Kapau ʼe koutou fai feiā, pea ʼe feala anai ke koutou ʼui kua koutou maʼu te kalavi ʼo te maʼuli fakafeauga.​—1 Timoteo 6:​17-​19.

[Paki ʼo te pasina 9]

Neʼe gāue ia Paulo ke ʼaua naʼa liliu ko he kavega ki niʼihi

[Paki ʼo te pasina 10]

Ko te ʼu lauʼi afe ʼe nātou maʼuli fiafia ʼi “te pipiki ki te ʼAtua pea mo te maʼuli fakafeauga”