Te ʼu Fehuʼi ʼa Te Kau Lautohi

ʼI te fakatotonu e Sesu ki tana kau tisipulo ke nātou ‘tali ke toʼo maʼua he tahi ia nātou, kae ʼaua naʼa nātou ʼamanaki ke liufaki ake,’ neʼe faka ʼuhiga koa ke ʼaua naʼa nātou toe kole ke huʼi age te koga tāfito ʼo te maʼua?

ʼE hoki tou mahino lelei anai ki te ʼu palalau ʼa Sesu ʼaē ʼe tuʼu ia Luka 6:35 mo kapau ʼe tou mahino lelei ki te Lao ʼa Moisese. ʼI te Lao ʼaia, neʼe fakatotonu e te ʼAtua ki te kau Iselaele ke nātou foaki he falā ki ʼonatou tēhina Iselaele ʼaē neʼe faigataʼaʼia pea mo māsisiva, kae ke ʼaua naʼa nātou fakamaʼua ke huʼi age te maʼua ʼaia ʼaki he tupu. (Ekesote 22:25; Levitike 25:35-37; Mateo 5:42) Ko ia ʼaē neʼe ina foaki te falā ʼaia, neʼe mole tonu ke ina foaki ʼo fakaʼamu ke ina maʼu ai hana tahi paʼaga. Kae ko te falā ʼaia ʼaē neʼe foaki kae mole fakamaʼua kiai hona tupu, neʼe fakatuʼutuʼu moʼo tokoni kia ia ʼaē neʼe maʼuli masiva peʼe kia ia ʼaē neʼe hoko ki ai he faigataʼaʼia. Heʼe mole ko he agaʼofa ki he Iselaele ke ina fakamaʼua ki ai he tupu ʼo te falā ʼaia, koteʼuhi ʼe faigataʼaʼia ʼi te faʼahi faka paʼaga. Kae ko ia ʼaē neʼe tuʼu maʼua neʼe tonu ke ina liufaki tona maʼua tāfito, pea neʼe ina tau tuku he fakamoʼoni ʼe ina liufaki anai te maʼua.​—Teutalonome 15:7, 8.

Logola neʼe lagolago ia Sesu ki te Lao, kae neʼe ina hilifaki te tahi faka ʼuhiga ʼo te fakatotonu ʼaia, ʼo ina ʼui ai ko ia ʼaē ʼe ina fakahā tona ʼofa ʼe mole tonu ke ‘talitali ke liufaki age he faʼahiga meʼa.’ Ohage ko te kau Iselaele, ʼi ʼihi temi ʼe felāveʼi te kau Kilisitiano mo te ʼu faigataʼaʼia faka ekonomika peʼe ko he tahi ʼu ʼaluʼaga ʼe feala ke nātou māsisiva ai. Kapau ʼe loto e he tēhina ke tou tokoni age ki ai ʼi te faʼahi faka paʼaga heʼe nofo ʼi te faigataʼaʼia ʼaia, ʼe ko he agaʼofa hata fia tokoni ki ai. ʼI tona fakahagatonu, ko te ʼofa moʼoni ʼe ina uga anai he Kilisitiano ke fia tokoni ki he tēhina neʼe hoko faka punamaʼuli kia ia he faigataʼaʼia faka paʼaga. (Tāʼaga Lea 3:27) ʼE lagi feala ke kita foaki he meʼa ʼofa ki te tēhina ʼaia ʼe nofo ʼi te faigataʼaʼia, tatau aipe peʼe veliveli age ʼi te maʼua ʼaē neʼe kole age ki ai.​—Pesalemo 37:21.

ʼI te ʼuluaki sēkulō ʼo totatou temi, neʼe fekauʼi te ʼu ʼapositolo ko Paulo pea mo Palenapasi ke nā ʼolo mo te ʼu meʼa ʼofa mai te kau Kilisitiano ʼo Asia Veliveli maʼa te ʼu tēhina ʼi Sutea, he neʼe hoge tonatou fenua. (Gaue 11:28-30) ʼO toe feiā pe ia ʼaho nei, ka tuʼutāmakiʼia totatou ʼu tēhina mo tuagaʼane, ʼe ko he meʼa māhani ʼa te kau Kilisitiano ke nātou momoli he ʼu meʼa ʼofa. ʼI tanatou fai te faʼahi ʼaia, ʼe nātou tuku ai mo he faʼifaʼitaki lelei ki te hahaʼi. (Mateo 5:16) Kae ʼe lelei ke kita vakavakaʼi muʼa te aga pea mo te ʼaluʼaga ʼo ia ʼaē ʼe kole maʼua. He koʼe ʼe nofo ʼi te faigataʼaʼia? ʼE maʼuhiga te ʼu palalau ʼaenī ʼa Paulo: “Kapau ko he tahi e mole fia gaue, aua naa kai!”​—2 Tesalonika 3:10.

Kapau ko he tēhina ʼe kole maʼua ʼe mole faigataʼaʼia ke feafeaʼi kae ʼe ina loto ke tokoni faka temi age ke feala hana toe fakatokatoka tona fihifihia ʼi te faʼahi faka paʼaga, ʼe lagi feala ke kita foaki age ki ai he maʼua kae mole kita fakamaʼua kiai hona tupu. ʼI te ʼu taʼi ʼaluʼaga ʼaia, ko te fakatoʼo ʼo he maʼua ʼaki te manatu ʼaē ʼe toe liufaki age anai, ʼe mole fakafifihi ki te ʼu palalau ʼaē ʼe tuʼu ia Luka 6:35. ʼE tonu ke tohi lelei ki he pepa te talaga ʼaia, pea ko ia ʼaē neʼe foaki age ki ai ia te maʼua ʼe tonu ke ina faigaʼi ke ina huʼi te paʼaga ʼaia ʼo mulimuli ki te talaga ʼaē neʼe kua tuku ʼaki. ʼI tona fakahagatonu, ʼe tonu ki te ʼofa faka Kilisitiano ke ina uga ia ia ʼaē neʼe kole maʼua ke ina huʼi te maʼua ʼaia, ohage pe ko te ʼofa ʼaē neʼe ina uga ia ia ʼaē neʼe ina foaki age tana falā.

Ko ia ʼaē ʼe ina foaki te maʼua (peʼe ina fai he meʼa ʼofa) ʼe tonu foki mo ia ke ina vakavakaʼi tona ʼaluʼaga faka famili. Ohage foki la, kapau ʼe ina fai te fakatuʼutuʼu ʼaia, ʼe mole fakatupu tuʼutāmaki anai koa ki tona maʼua faka Tohi-Tapu, ʼaē ko te foaki ki tona famili te ʼu meʼa ʼaē ʼe ʼaoga kia nātou ʼi te faʼahi fakasino? (2 Kolonito 8:12; 1 Timoteo 5:8) Logola te faʼahi ʼaia, kae ʼe faigaʼi e te kau Kilisitiano mo kapau ʼe nātou fealagia, ke nātou fefakahāʼaki tonatou ʼofa, ʼi he ʼaluʼaga ʼe ʼaoga kiai pea mo ʼalutahi mo te ʼu pelesepeto faka Tohi-Tapu.​—Sakopo 1:27; 1 Soane 3:18; 4:7-11.