Ke Tuputupu Fakalaumālie ʼi Te Temi Matuʼa
“Ko nātou ʼaia kua tō ʼi te ʼapi ʼo Sehova . . . ʼe kei natou haga tuputupu anai ʼi tonatou temi matuʼa.”—Pesalemo 92:13, 14.
1, 2. (a) ʼI te agamāhani, koteā te manatu ʼo ʼuhiga mo te temi matuʼa? (b) Koteā ʼaē ʼe fakapapauʼi mai ʼi te Tohi-Tapu ʼo ʼuhiga mo te ʼu ikuʼaga ʼo te agahala mai iā Atama?
ʼE FEAFEAʼI kiā koutou ia te temi matuʼa? Ko he kili kua fefe? Ko he tahi kua tuli? Ko he sino kua tetetete? Peʼe ko he faʼahi ʼe kau ki “te ʼu ʼaho faigataʼa” ʼaē ʼe fakamatalatala iā Tagata Tānaki 12:1-7? Kapau ko takotou manatu ʼaia ʼo ʼuhiga mo te temi matuʼa, pea ʼe lagi lelei ke tou vakaʼi age muʼa ia te fakamatalatala ʼaē iā Tagata Tānaki kāpite 12 ʼo ʼuhiga mo te temi matuʼa, he neʼe mole ko te fakatuʼutuʼu ʼaia ʼa te Tupuʼaga ko Sehova ʼAtua ʼi te kamata, kae neʼe ko te ikuʼaga ʼo te agahala mai iā Atama.—Loma 5:12.
2 Ko te liliu ʼo matuʼa ʼe mole ko he malaʼia ia, koteʼuhi ke hoko atu te maʼuli ʼe tonu ke loaloaga te maʼuli. ʼI tona fakahagatonu, ʼe ko he ʼu faʼahi lelei mokā lahilahi ake ia meʼa maʼuli fuli pea mo liliu ʼo kātoa. Kua vave liliu ko he meʼa ʼāfea ia te ʼu fua kovi ʼo te agahala iā taʼu e ono afe pea mo te agahala ʼaē ʼi te mālamanei, pea ko te hahaʼi fakalogo fuli ʼe natou toe maʼuli anai ohagē ko te fakatuʼutuʼu ʼuluaki, ʼaē neʼe mole tonu ke ʼi ai te ʼu mamahi fakasino pea mo fakaʼatamai ʼo te temi matuʼa pea mo te mate. (Senesi 1:28; Fakahā 21:4, 5) ʼI te temi ʼaia: “ ʼE mole he tahi ʼe ina ʼui anai: ‘ ʼE au mahaki.’ ” (Isaia 33:24) ʼE toe maʼu anai e te hahaʼi mātutuʼa tonatou “mālohi faka tūpulaga” pea ko tonatou kakano ʼe toe liliu anai ʼo ‘foʼou ake ʼi tonatou temi tūpulaga.’ (Sopo 33:25) ʼI te temi nei, ʼe tonu kiā tātou fuli ke tou tauʼi ia te ʼu fua kovi ʼo te agahala ʼaē mai iā Atama. Kae ko te ʼu kaugana ʼa Sehova ʼe natou maʼu ia te tapuakina makehe ʼi tonatou temi matuʼa.
3. Ko te ʼu ʼaluʼaga fea ʼe feala ai ki te kau Kilisitiano ke natou “haga tuputupu anai ʼi tonatou temi matuʼa”?
3 ʼE fakapapauʼi mai ʼi te Folafola ʼa te ʼAtua “ko nātou ʼaia kua tō ʼi te ʼapi ʼo Sehova . . . ʼe kei natou haga tuputupu anai ʼi tonatou temi matuʼa.” (Pesalemo 92:13, 14) ʼAki he lea fakatātā, ʼe fakahā e te tagata fai pesalemo ia te moʼoni tāfito ʼo ʼuhiga mo te ʼu kaugana agatonu ʼa te ʼAtua, ʼe feala ke natou fua ʼo lahi age ʼi te faʼahi fakalaumālie, tatau aipē peʼe ʼi te faʼahi fakasino kua natou vaivavai. ʼE lahi te ʼu faʼifaʼitaki ʼo te temi muʼa pea mo te temi nei ʼe tonu ke tou manatuʼi.
“Neʼe Mole Puli Ia ʼi He ʼAho”
4. Neʼe fakahā feafeaʼi e te polofetā finematuʼa ko Ana ia tana tauhi ʼaē ki te ʼAtua, pea neʼe tapuakina feafeaʼi?
4 Tou vakaʼi age muʼa ia te maʼuli ʼo te polofetā fafine ko Ana ʼi te ʼuluaki sēkulō. ʼI tona taʼu 84 “neʼe mole puli ia ʼi he ʼaho ʼi te fale lotu, ʼo ina fai te tauhi tapu ʼi te pō mo te ʼaho ʼaki te sēsuniō pea mo te ʼu kole mamahi.” Neʼe mole feala kiā Ana ke nofo ʼi te fale lotu heʼe ko tana tamai neʼe mole ko he Levite “mai te telepī ʼo Asele.” Kotou fakakaukauʼi age muʼa te ʼu fakatuʼutuʼu neʼe tonu ke ina fai moʼo ʼalu ki te fale lotu ʼi te ʼaho fuli ke kau ki te selevisi ʼo te ʼuhu ʼo aʼu ki te selevisi ʼo te afiafi! Pea ʼi tana tauhi lelei ʼaia, neʼe tapuakina lahi ia Ana, he neʼe ko he pilivilēsio kiā ia ʼi tana nofo ʼi te fale lotu ʼi te temi ʼaē neʼe ʼomai ai Sosefo mo Malia mo te kiʼi tamasiʼi ko Sesu, moʼo fakahā kiā Sehova ohagē ko tona fakahā ʼi te Lao. ʼI tana sio kiā Sesu, “neʼe fakafetaʼi ia [Ana] ki te ʼAtua pea mo palalau ʼo ʼuhiga mo te tamasiʼi kiā nātou fuli ʼaē neʼe natou fakatalitali ki te faka ʼāteaina ʼo Selusalemi.”—Luka 2:22-24, 36-38; Faka au 18:6, 7.
5, 6. Ko te ʼu ʼaluʼaga fea iā ʼaho nei ʼe fakahā ai e te tokolahi kua mātutuʼa ia te manatu ʼe hagē ko Ana?
5 ʼE tokolahi te hahaʼi mātutuʼa iā tātou iā ʼaho nei, ʼe natou hagē ko Ana ʼi tanatou kau tuʼumaʼu ki te ʼu fono, mo tanatou ʼu kole fakamālotoloto ke tuputupu te tauhi moʼoni, pea mo tanatou faiga mālohi ʼaē ke natou kau ki te faka mafola ʼo te logo lelei. Ko he tehina ʼi tona taʼu 80, neʼe kau tuʼumaʼu ki te ʼu fono mo tona ʼohoana, neʼe ina ʼui fēnei: “Neʼe ko hamā agamāhani ia te ʼolo ki te ʼu fono. ʼE mole mā fia ʼolo ki he tahi age faʼahi. Ko te faʼahi pē ʼaē neʼe nonofo ai te ʼu kaugana ʼa te ʼAtua, pea ko ia pē ʼaē ʼe mā fia nonofo ai. Heʼe ko te faʼahi pē ʼaia ʼaē ʼe mā fiafia ai.” ʼE ko he faʼifaʼitaki fakaloto mālohi kiā tātou fuli!—Hepeleo 10:24, 25.
6 “Kapau ʼe ko he meʼa fakalaumālie ʼe pipiki kiai ia te tauhi moʼoni pea ʼe au lava kau kiai, ʼe au fia fai.” ʼE ko te kiʼi palalau ʼe tau ʼui tuʼumaʼu e Jean, ko he finematuʼa vītua Kilisitiano ʼe taʼu 80 tupu. ʼE ina toe ʼui fēnei: “ ʼE moʼoni, ʼe au lotomamahi ʼi ʼihi temi, kae he koʼē mo kapau ʼe au lotomamahi ʼe tonu ke lotomamahi mo ʼihi?” Neʼe loʼa ʼona mata, pea neʼe ina fakahā tona fiafia ʼi tana ʼalu ki te tahi ʼu fenua ki te ʼu ʼaluʼaga fakalaumālie fakatupu lotomālohi. ʼI tana folau mole heʼeki faʼa fualoa, neʼe ina ʼui ki tona ʼu kaumeʼa ʼaē neʼe folau mo ia: “ ʼE mole kei au fia mamata ki he tahi age ʼu mātaga tulisi; ʼe au fia ʼalu au ʼo fai faka mafola!” Logolā tana mole ʼiloʼi ia te lea ʼo te fenua, kae neʼe feala kiā Jean hana lagaʼi te fia logo ʼa te hahaʼi ki te logo lelei ʼo te Tohi-Tapu. Tahi ʼaē, lolotoga ni ʼu taʼu, neʼe gāue mo te kōkelekāsio neʼe ʼaoga kiai he tokoni, logolā neʼe tonu ki te faʼahi ʼaia ke ina ako he lea foʼou pea mo hola kātoa tana ʼalu ʼaē ki te ʼu fono.
Ke Mālohi Tuʼumaʼu Totatou ʼAtamai
7. Lolotoga tona temi matuʼa, neʼe fakahā feafeaʼi e Moisese tana fia fakatuputupu ia tana ʼu felōgoi mo te ʼAtua?
7 ʼE tou mahino lelei ki te ʼaluʼaga ʼo te maʼuli ʼaki te temi. (Sopo 12:12) Pea ʼe mole kita maʼu pē ia te fakapotopoto ʼi te faʼahi fakalaumālie ʼaki pē te temi. Koia, ko te ʼu kaugana agatonu ʼa te ʼAtua ʼe mole natou falala fau ki te ʼatamai mālama ʼaē kua natou maʼu, kae ʼe natou faiga ke ‘tuputupu tanatou mahino’ ʼaki ia te temi. (Tāʼaga Lea 9:9) Neʼe ko te taʼu 80 ʼo Moisese, ʼi te temi ʼaē neʼe fekauʼi ai e Sehova ke ʼalu ki Esipito. (Ekesote 7:7) ʼI te temi ʼo Moisese, neʼe tahitahiga ia te hahaʼi ʼe natou māʼuʼuli ʼo aʼu ki tona taʼu, he neʼe ina tohi fēnei: “Ko te ʼu ʼaho ʼo totatou ʼu taʼu ʼe ko taʼu pē e fitugofulu; pea . . . mo kapau ʼe makehe totatou mālohi, ʼe ko he ʼu taʼu e valugofulu.” (Pesalemo 90:10) Koia, neʼe mole ʼui e Moisese kua matuʼa fau ia ke ina ako he tahi age meʼa. Hili te ʼu lauʼi hogofulu taʼu ʼo tana kaugana ki te ʼAtua, pea mo te ʼu tuʼuga pilivilēsio ʼaē neʼe ina maʼu pea mo te ʼu maʼua lalahi neʼe ina fakahoko, neʼe kolekole fēnei leva e Moisese kiā Sehova: “Fakalelei siʼi ʼou loto, kae ke ke fakahā mai tou ʼu ala, ke feala ai haku ʼiloʼi koe.” (Ekesote 33:13) ʼI te temi fuli pē neʼe fia fakatuputupu e Moisese ia tana ʼu felōgoi mo Sehova.
8. Neʼe puipui feafeaʼi e Taniela tona ʼatamai ʼi tona taʼu 90 tupu, pea neʼe koteā tona ʼu fua?
8 Ko te polofetā ko Taniela, lagi ʼi tona taʼu 90 tupu, neʼe kei feala pē tana metitāsioʼi te ʼu tohi taputapu. Ko te ʼu meʼa ʼaē neʼe ina fakatokagaʼi lolotoga tana ako ʼo “te ʼu tohi”—lagi ko te tohi ʼa Levitike, Isaia, Selemia, Osea, pea mo Amosi— neʼe ina uga ia ia ke ina kumi ia Sehova ʼi te faikole fakamālotoloto. (Taniela 9:1, 2) Neʼe tali tana faikole ʼaia, he neʼe fakahā age ki ai ʼaki te takitaki ʼa te laumālie ia te haʼu ʼa te Mēsia pea mo te fakatuʼu ʼo te tauhi maʼa ʼi te kā haʼu.—Taniela 9:20-27.
9, 10. Koteā te ʼu gāue ʼaē neʼe fai e ʼihi ke mālohi tuʼumaʼu tonatou ʼatamai?
9 Ohagē ko Moisese pea mo Taniela, ʼe feala hatatou puipui totatou ʼatamai ʼaki hatatou tōkakaga tuʼumaʼu ki te ʼu gāue fakalaumālie ʼi totatou temi maʼuli. Tokolahi neʼe natou fai fēia. Ko Worth, ko te tagata ʼāfea ʼi tona taʼu 80 tupu ʼe faiga tuʼumaʼu ke ina fakaʼaogaʼi ia te meʼa kai fakalaumālie ʼaē ʼe foaki mai e “te tagata kaugana agatonu mo poto.” (Mateo 24:45) ʼE ina ʼui fēnei: “ ʼE au manako ʼaupitō ki te moʼoni, pea ʼe au fiafia ʼi taku sio ki te tuputupu ʼo te mālama ʼo te moʼoni.” (Tāʼaga Lea 4:18) ʼO toe fēia, ko Fred ʼaē neʼe kau ki te minisitelio temi kātoa iā taʼu e 60 tupu, ʼe ina maʼu ia te fakaloto mālohi ʼi te faʼahi fakalaumālie moʼo kamata ia he ʼu fai palalau faka Tohi-Tapu mo tona ʼu tehina mo tuagaʼane. ʼE ina ʼui fēnei: “ ʼE tonu ke liliu tuʼumaʼu ia te Tohi-Tapu ʼo maʼuli ʼi toku ʼatamai. Pea kapau ʼe kotou lava tāʼofi ia te Tohi-Tapu ke maʼuli, ke ʼaoga kiā koutou, pea kapau ʼe kotou lava taupau te ʼu meʼa ʼaē ʼe kotou ako ʼi ‘te ʼu akonaki tāfito ʼo te haofaki,’ pea ʼe kātoa anai te ʼu meʼa ʼaē ʼe kotou mahino kiai. ʼE kotou mahino anai kiā meʼa fuli ʼi tona tuʼulaga.”—2 Timoteo 1:13.
10 ʼE mole ʼui leva kua matuʼa he tahi, pea ʼe mole kei ina lava ako he ʼu meʼa foʼou pea mo faigataʼa. ʼE ʼi ai te hahaʼi ʼi tonatou taʼu 60 tupu pea mo 70 tupu, māʼiapē lā mo tonatou taʼu 80 tupu, neʼe natou akoako ia te lautohi pea mo te faitohi, peʼe ko te ako ʼo he tahi age lea. Ko ʼihi ʼi te kau Fakamoʼoni ʼa Sehova neʼe natou fai ia te faʼahi ʼaia ʼaki te fakatuʼutuʼu ke natou faka mafola ia te logo lelei ki te hahaʼi kehekehe. (Maleko 13:10) Ko Harry pea mo tona ʼohoana neʼe ko tonā taʼu 60 tupu ʼi te temi ʼaē neʼe nā fakatotonu ai ke nā tokoni ki te faka mafola ʼi te telituale Potukalia. ʼE ʼui fēnei e Harry: “ ʼI tona fakahagatonu, kā tou mātutuʼa pea kua hagē pē ia te gāue fuli kua faigataʼa ʼaupitō.” Koia ʼaki te faiga pea mo te faʼa kātaki, neʼe nā lava fai ia tanā ʼu ako Tohi-Tapu faka Potukalia. Talu mai te ʼu taʼu ʼo aʼu mai ki te temi nei, neʼe fai foki e Harry te ʼu akonaki faka Potukalia ʼi te fakatahi faka tisitilike.
11. He koʼē ʼe lelei ke tou vakaʼi te ʼu meʼa ʼaē neʼe fai e te hahaʼi mātutuʼa agatonu?
11 ʼE moʼoni, ʼe mole ko te hahaʼi fuli ʼe natou lava fai anai ia te faʼahi ʼaia, heʼe ko ʼihi ʼe natou mahamahaki peʼe ko he tahi atu ʼu fihifihia. Kae he koʼē neʼe tou talanoa ki te ʼu gāue neʼe fai e ʼihi kua mātutuʼa? ʼE mahino ia, ʼe mole tonu anai ke tou ʼui ʼe tonu ke tou faiga fuli ke tou fakakaku ki te gāue ʼe tahi. Kae neʼe ko te manatu ʼaia ʼa te ʼapositolo ko Paulo ʼi tana tohi ki te kau Kilisitiano Hepeleo ʼo ʼuhiga mo te kau tagata ʼāfea agatonu ʼo te kōkelekāsio: “ ʼI takotou tokagaʼi te ikuʼaga ʼo tanatou aga, kotou faʼifaʼitakiʼi tanatou tui.” (Hepeleo 13:7) Kā tou sio ki te ʼu faʼifaʼitaki faʼafai ʼaia, pea ʼe tou lotomālohi aipē ke tou muliʼi ia te tui mālohi ʼaē neʼe ina uga te hahaʼi mātutuʼa ʼaia ʼi tanatou selevisi ki te ʼAtua. ʼI te fakamahino e Harry ia te meʼa ʼaē neʼe ina uga ia ia, ʼaē ʼi te temi nei kua taʼu 87, ʼe ina ʼui fēnei: “ ʼE au fia fakaʼaogaʼi fakapotopoto ia te ʼu taʼu ʼaenī ʼe kei au maʼuli ai pea mo au maʼumaʼua lahi ʼi te gāue kiā Sehova ʼo mulimuli pē ki toku ʼu fealagia.” Ko Fred ʼaē neʼe kua tou talanoa ki ai, ʼe ina maʼu ia te fiafia lahi ʼi tana fai fakalelei ia tana gāue ʼi te Petele. ʼE ina ʼui fēnei: “ ʼE feala ke kotou ʼiloʼi ai peʼe koteā ʼaē ʼe kotou lava fai ke lelei age takotou gāue ʼaē kiā Sehova pea mo kotou haga fai takotou selevisi ʼaia.”
ʼE Natou Faʼafai Logolā Te ʼu Fetogi Fakasino ʼo Te Vaivai Matuʼa
12, 13. Neʼe fakahā feafeaʼi e Palesilai ia tana tauhi fakalotu logolā te ʼu fetogi fakasino ʼi tana kua vaivai matuʼa?
12 ʼE feala ke mata faigataʼa ki he tahi ʼe matuʼa ia te ʼu fetogi fakasino ʼaē ʼe hoko kiā te ia. Kae ʼe kei feala pē hana fakahā he tauhi fakalotu logolā te ʼu fetogi ʼaia. Ko Palesilai ia te tagata Kileate ʼe ko he faʼifaʼitaki lelei ʼo ʼuhiga mo te faʼahi ʼaia. ʼI tona taʼu 80, neʼe ina fakahā ia te tali kāiga kiā Tavite pea mo tana foʼi kautau, ʼo ina foaki age tanatou meʼa kai pea mo tonatou nofoʼaga ʼi te temi ʼaē neʼe fakafeagai ai ia Apisalome ki tana tamai. ʼI te temi ʼaē neʼe liliu ai ia Tavite ki Selusalemi, neʼe kaugā fagona ia Palesilai mo nātou ʼo aʼu ki te Vaitafe ʼo Solotane. Neʼe fakahā age e Tavite tona loto ʼaē ke kau ia Palesilai ʼi tana hahaʼi gāue ʼi te fale hau. Neʼe koteā ia te tali ʼa Palesilai kiai? “Iā ʼaho nei kua au matuʼa iā taʼu e valugofulu. . . . Peʼe kei feala ʼapē koa ki tau tagata kaugana ke ina leleiʼia he meʼa kā ina kai pea mo he meʼa kā ina ʼinu? Peʼe kei feala anai koa ke au toe logo ki te leʼo ʼo te kau tagata hiva pea mo te kau fafine hiva? . . . Koʼenī tau tagata kaugana ko Kimame. Ke ʼalu mo toku ʼaliki hau, pea ke ke fai kiā te ia te meʼa ʼaē ʼe ke leleiʼia.”—2 Samuele 17:27-29; 19:31-40.
13 Logolā tona ʼu fetogi fakasino ʼi tana kua vaivai matuʼa, kae neʼe fai e Palesilai ia te meʼa ʼaē neʼe kei ina lavaʼi moʼo lagolago ki te hau ʼaē neʼe fakanofo e Sehova. Logolā tana ʼiloʼi ʼaē ʼe mole kei tatau tona ʼu logoʼaga sino ʼo ʼuhiga mo te ʼiloʼi ʼo te kano lelei ʼo he meʼa pea mo te logo ki he meʼa, neʼe mole lotomamahi ʼaupitō ia. Kae neʼe ina ʼui age, ko Kimame ʼaē kā ʼalu anai mo te hau, ʼo fakahā moʼoni ai e Palesilai ia te faʼahiga tagata ʼaē neʼe ʼi tona loto. Ohagē ko Palesilai, tokolahi te hahaʼi mātutuʼa iā ʼaho nei ʼe natou fakahā ia te taʼi faʼahiga manatu ʼaia pea mo loto manavaʼofa. ʼE natou fai ia meʼa fuli ʼe natou lavaʼi moʼo lagolago ki te tauhi moʼoni, heʼe natou ʼiloʼi ko “te ʼu taʼi sākilifisio ʼaia ʼaē ʼe leleiʼia e te ʼAtua.” ʼE ko he tapuakina ia te maʼu iā tātou te ʼu taʼi tehina mo tuagaʼane agatonu ʼaia!—Hepeleo 13:16.
14. Ko te fakahā ʼo te temi matuʼa ʼo Tavite ʼe ina faka maʼuhigaʼi feafeaʼi ia te ʼu palalau ʼaē ʼe tuʼu iā Pesalemo 37:23-25?
14 Logolā neʼe fetogi tuʼa lahi te maʼuli ʼo Tavite lolotoga te ʼu taʼu, kae neʼe ina ʼiloʼi papau ʼe mole fetogi ia te tokaga ʼaē ʼa Sehova ki tana ʼu kaugana agatonu. ʼI muʼa ʼo tana mate, neʼe fai e Tavite ia te hiva ʼe tou ʼiloʼi fuli ʼe tuʼu iā Pesalemo 37. Kotou fakakaukauʼi age muʼa ia Tavite ʼi he temi neʼe manamanatu, ʼo ina tā te ʼalepa pea mo hiva ia te ʼu palalau ʼaenī: “Neʼe teuteuʼi e Sehova ia te ala ʼo te tagata mālohi, pea ʼe fiafia ʼi tona ala. Tatau aipē mo kapau ʼe higa, ʼe mole tuku anai ia ʼi lalo, heʼe ko Sehova ʼe ina puke tona nima. Neʼe au tūpulaga, pea kua au matuʼa foki, kae neʼe mole au sio ki te tagata agatonu kua liʼaki kātoa, pea neʼe mole au sio ki tona hākoga ʼe kumi pane.” (Pesalemo 37:23-25) Neʼe fakafuafua e Sehova ʼe maʼuhiga ke fakahā ʼi te pesalemo ʼaia neʼe takitaki e te laumālie ia te temi matuʼa ʼo Tavite. ʼE ko he ʼu manatu loloto ʼe toe hilifaki mai ki te ʼu palalau manavaʼofa ʼaia!
15. Koteā te faʼifaʼitaki lelei ʼo te agatonu ʼaē neʼe tuku e Soane logolā te ʼu fetogi ʼo tona maʼuli pea mo tana kua matuʼa?
15 Ko te ʼapositolo ko Soane ʼe ko he tahi faʼifaʼitaki agatonu lelei logolā te ʼu fetogi ʼaē neʼe hoko ʼi tona temi maʼuli pea mo tana kua vaivai matuʼa. ʼI tana ʼosi kaugana ki te ʼAtua iā taʼu e 70, neʼe ʼaunofo ʼi te motu ʼo Patemosi ‘he neʼe palalau ʼo ʼuhiga mo te ʼAtua pea mo fakamoʼoni kiā Sesu.’ (Fakahā 1:9) Kae ko tana gāue neʼe mole heʼeki ʼosi. ʼI tona fakahagatonu, ko te ʼu tohi fuli ʼi te Tohi-Tapu ʼaē neʼe tohi e Soane, neʼe tohi ʼi te fakaʼosi ʼo tona maʼuli. ʼI tana ʼi te motu ʼo Patemosi, neʼe fakahā age ki ai te meʼa fakatupu mataku, pea neʼe ina tohi fakalelei te ʼu meʼa ʼaē neʼe sio kiai. (Fakahā 1:1, 2) ʼE ʼui pē, lagi neʼe faka ʼāteaina mai tana ʼaunofo ʼi te temi ʼo te Tuʼi ʼAliki Loma ko Nerva. Ki muli age, ʼi te teitei taʼu 98 ʼo totatou temi, lagi neʼe ko tona taʼu 90 peʼe taʼu 100, ʼaē neʼe tohi e Soane ia te Evaselio pea mo te ʼu episitola e tolu ʼaē ʼe fakahigoaʼi ki tona higoa.
Ko He Hisitolia ʼe Kei ʼAoga ʼo ʼUhiga Mo Te Faʼa Kātaki
16. ʼE fakahā feafeaʼi e nātou ʼaē kua natou tuli pea kua faigataʼa ia tanatou felōgoi mo ʼihi ia tanatou tauhi ʼaē kiā Sehova?
16 ʼE tahi ʼalu pē te ʼu tuʼakoi ʼo te temi matuʼa. Ohagē lā ko ʼihi kua natou tuli pea kua faigataʼa ia tanatou felōgoi mo ʼihi. Kae ʼe kei natou ʼiloʼi pē ia te ʼu manatu loloto ʼo ʼuhiga mo te ʼofa pea mo te agaʼofa ʼa te ʼAtua. Logolā te kua faigataʼa ʼo tanatou fai palalau ʼaki tonatou gutu, kae ʼi ʼonatou loto ʼe kei natou ʼui pē kiā Sehova: “ ʼE au manako ki tau lao! ʼI te ʼaho fuli pē ʼe au manatu kiai.” (Pesalemo 119:97) Pea ko Sehova ʼe ina ʼiloʼi ia nātou ʼaē ʼe natou “manatuʼi tona huafa,” pea mo ʼofa ki te taʼi hahaʼi ʼaia ʼe kehekehe mo te kaugamālie, ʼaē ʼe natou meʼa noaʼi tona ʼu ala. (Malakia 3:16; Pesalemo 10:4) ʼI meʼa fakaloto fīmālie hata ʼiloʼi ko Sehova ʼe fiafia ʼi te metitāsio ʼo tota loto!—1 Fakamatala 28:9; Pesalemo 19:14.
17. Koteā te gāue neʼe fai e te ʼu kaugana ʼa Sehova kua fualoa pea ʼe makehe ʼaupitō?
17 Tou manatuʼi ia nātou ʼaē neʼe kaugana agatonu kiā Sehova lolotoga ni ʼu taʼu, neʼe natou fai te gāue makehe ʼaupitō pea ʼe mole lava maʼu ʼaki he tahi age faʼahiga fai—ko he hisitolia ʼe kei ʼaoga ʼo ʼuhiga mo te faʼa kātaki. Neʼe ʼui fēnei e Sesu: “ ʼAki takotou faʼa kātaki, ʼe kotou maʼu ai anai tokotou ʼu nefesi.” (Luka 21:19) ʼE maʼuhiga ia te faʼa kātaki moʼo maʼu ia te maʼuli heʼegata. Ko nātou iā koutou ʼe “fai ia te finegalo ʼo te ʼAtua” pea mo agatonu ʼi tokotou maʼuli, ʼe feala ke talitali fakafiafia ke ina maʼu ia “te fakahoko ʼo te fakapapau.”—Hepeleo 10:36.
18. (a) Koteā ʼaē ʼe fakafiafia kiai Sehova mokā sio ifo kiā nātou kua mātutuʼa? (b) Koteā ʼaē kā tou vakaʼi anai ʼi te ʼalatike kā hoa mai?
18 ʼE leleiʼia e Sehova takotou tauhi age kiā te ia ʼaki tokotou loto kātoa tatau aipē peʼe lahi peʼe veliveli. Logolā te meʼa ʼaē neʼe hoko ki te “ ʼuhigaʼi tagata ʼaē ʼi tuʼa” ohagē lā ko te matuʼa, kae ko te “ ʼuhigaʼi tagata ʼaē ʼi loto” ʼe feala ke fakafoʼou ʼi te ʼaho mo te ʼaho. (2 Kolonito 4:16) ʼE mole fakaʼapē lua ia te leleiʼia e Sehova te meʼa ʼaē neʼe kua kotou fakahoko ʼi muʼa atu, kae ʼe ina toe leleiʼia foki te meʼa ʼaē ʼe kotou lolotoga fai nei ʼo ʼuhiga mo tona huafa. (Hepeleo 6:10) ʼI te ʼalatike kā hoa mai, ʼe tou vakaʼi ai anai te ʼu fua lelei ʼo te taʼi agatonu ʼaia.
ʼE Kotou Tali Feafeaʼi Anai?
• Koteā te faʼifaʼitaki lelei neʼe tuku e Ana ʼo ʼuhiga mo te kau Kilisitiano mātutuʼa iā ʼaho nei?
• He koʼē ko te temi matuʼa ʼe mole ko he tuʼakoi ia ki he fakahoko ʼo he meʼa?
• ʼE lava fakahā feafeaʼi e te hahaʼi mātutuʼa tanatou tauhi fakalotu?
• ʼE faka ʼuhiga feafeaʼi e Sehova ia te tauhi ʼaē ʼe fai age kiā te ia e te hahaʼi mātutuʼa?
[Paki ʼo te pasina 25]
Ko Taniela ʼaē neʼe kua matuʼa, neʼe mahino kiā ia ʼaki “te ʼu tohi” ia te loaloaga ʼo te ʼaunofo ʼa Suta
[Paki ʼo te pasina 27]
Tokolahi te hahaʼi mātutuʼa ʼe natou tuku he faʼifaʼitaki lelei ʼi tanatou kau tuʼumaʼu ki te ʼu fono, mo tanatou faʼafai ʼi te fai faka mafola, pea mo fakafiafia ʼi te ako