Ko Te Temi ʼAenī Ke Tou Filifili
“Neʼe fakatupu e te ʼAtua te tagata ʼo mulimuli ki tona pāki, neʼe ina fakatupu ia ia ʼo mulimuli ki te pāki ʼo te ʼAtua; neʼe ina fakatupu ia nāua ko te tagata mo te fafine.”—Senesi 1:27.
KO TE ʼu palalau ʼaia kua tou ʼiloʼi lelei ʼi te ʼu ʼuluaki pāsina ʼo te Tohi-Tapu, ʼe fakahā ai ia te ʼu meʼa lalahi tokotahi ʼaē “neʼe . . . fai [e te ʼAtua] ke matalelei ʼi tona temi,” ia tana fakatupu ia te taumātuʼa haohaoa, ia Atama mo Eva. (Tagata Tānaki 3:11) ʼUhi ko ia tonā Tupuʼaga, neʼe ʼui fēnei ai e Sehova ʼAtua kiā nāua: “Kolua fānaunau, pea kolua liliu ʼo hahaʼi, pea kolua fakafonu te kele, pea kolua puleʼi, pea kolua pule ki te ʼu ika ʼo te tai, pea mo te ʼu manulele ʼo te lagi pea mo te ʼu meʼa maʼuli fuli pē ʼaē ʼe maʼuli ʼi te kele.”—Senesi 1:28.
ʼI tana palalau ʼaia ki te ʼuluaki taumātuʼa, neʼe fakahā ai e te ʼAtua kiā nāua tana fakatuʼutuʼu. Neʼe tonu ke nā fānaunau pea mo tōkakaga ki te kele, ʼo nā fakaliliu ko he palatiso ʼi te kele kātoa maʼa nāua pea mo tonā hōloga. Neʼe mole ina fakatuʼutuʼu he temi ke nā māʼuʼuli ai pea mo mamate ai. Kae neʼe tuku e te ʼAtua ʼi ʼonā muʼa ia he ʼamanaki taulekaleka. Kapau ʼe nā fai ia te tonu ʼaē ʼe lelei pea mo haga fakalogo ki te ʼAtua, pea ʼe nā māʼuʼuli anai ʼi te tokalelei kātoa pea mo te fiafia ʼo heʼegata.
Neʼe nā filifili ia te meʼa ʼaē ʼe kovi, pea neʼe maʼu ai e te mālamanei kātoa ia te matuʼa pea mo te mate. Neʼe fakamoʼoni fēnei e te pāteliaka ko Sopo: “Ko te tagata, ʼaē neʼe tupu mai te fafine, ʼe nounou tona maʼuli pea ʼe fonu ʼi te lotohoha.” (Sopo 14:1) Koteā ʼaē neʼe hoko?
ʼE fakamahino fēnei ʼi te Tohi-Tapu: “ ʼAki pē te tagata e tahi neʼe hū te agahala ki te mālamanei, pea ʼaki te agahala te mate, pea koia kua mafola ai te mate ki te tagata fuli pē koteʼuhi kua natou agahala fuli.” (Loma 5:12) ʼE mahino ia ko “te tagata e tahi” ʼaia, ʼe ko Atama, ʼaē neʼe ina filifili ʼaki he loto faʼifaʼitaliha ke ina maumauʼi ia te fakatotonu ʼa te ʼAtua, ʼaē neʼe faigafua pea mo matala lelei. (Senesi 2:17) ʼUhi ko te meʼa ʼaia ʼaē neʼe filifili e Atama, neʼe ina pulihi ai tona fealagia ʼaē ke maʼuli ʼo heʼegata ʼi te palatiso ʼi te kele. Neʼe ina toe pulihi maʼa tona hōloga ia he tōfiga maʼuhiga pea ina tuku holo kiā nātou ia te fakatūʼā ki te agahala pea mo te mate. Kua hagē neʼe mole kei ʼi ai he ʼamanaki, kae neʼe koia koa?
Ko He Temi Ki He Fakafoʼou
Iā taʼu e afe ki muli age, neʼe takitaki e te ʼAtua ia te tagata fai pesalemo ke ina tohi fēnei: “ ʼE maʼu anai te kele e te kau faitotonu, pea ʼe natou nonofo ai anai ʼo talu ai.” (Pesalemo 37:29) Ohagē ko he fakamoʼoni ki te hoko anai ʼo tana fakapapau ʼaē neʼe ina fai ʼi Eteni, ʼe fakamatala ʼi te Folafola ʼa te ʼAtua ʼi hona ʼaluʼaga fakaofoofo te meʼa ʼaē kā ovi mai ke ina fai: “ ʼE ina holoholoʼi anai te ʼu loʼimata fuli pē ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he lāuga, he mamahi. Ko te ʼu meʼa ʼāfea kua puli ia.” Pea ʼe ʼui fēnei e te ʼAtua totonu: “Koʼenī, ʼe au fakafoʼou ia meʼa fuli.”—Fakahā 21:4, 5.
Mai tona ʼaluʼaga ʼaē ʼe ʼi ai he temi kiā meʼa fuli pē, ʼe ko te fehuʼi ʼaenī ʼaē ʼe lagaʼi: Ko te temi fea ʼaē kā hoko ai anai ia te fakafoʼou ʼaia, ke hoko ai ia te ʼu fakapapau taulekaleka ʼa te ʼAtua? Ko nātou ʼaē ʼe natou tā ia te nusipepa ʼaenī, ia te kau Fakamoʼoni ʼa Sehova, ʼe natou faiga ke natou fakatokaga ki te hahaʼi ʼe tou māʼuʼuli nei ʼi te temi ʼaē ʼe higoaʼi ʼi te Tohi-Tapu ko “te ʼu ʼaho fakamuli” pea kua ovi mai te temi ʼaē kā haga anai te ʼAtua ʼo “fakafoʼou ia meʼa fuli.” (2 Timoteo 3:1) ʼE matou fakalotomālohiʼi koutou ke kotou vakavakaʼi ia te Tohi-Tapu pea mo ako ʼo ʼuhiga mo te ʼu ʼaluʼaga taulekaleka ʼaē ʼe feala ke kotou maʼu. ʼE matou toe fakalotomālohiʼi koutou ke kotou tali ia te fakaafe ʼaenī: “Kotou kumi ia Sehova, ʼi te temi ʼaē kei feala ai tona maʼu. Kotou pāui kiā te ia, ʼi te temi ʼaē ʼe kei ovi mai ai.” (Isaia 55:6) ʼE fakalogo tokotou maʼuli pea mo tokotou kā haʼu heʼegata kiā koutou kae mole kua ʼosi fakatuʼutuʼu fakatomuʼa ia!
[Paki ʼo te pasina 8]
“Koʼenī, ʼe au fakafoʼou ia meʼa fuli”