ʼE Talanoa ʼAna Tohi Ki Te Manatu Pē e Tahi

“Nee mole he folafola pe e tahi nee tuku mai e he finegalo o te tagata, kae nee ekenaki e te Laumalie Maonioni ni tagata ke natou palalau mai te Atua.”—2 PETELO 1:21.

HE KO’Ē ʼE MAKEHE IA TE TOHI-TAPU? Māʼia mo te ʼu tohi ʼo te temi ʼāfea ʼaē neʼe tohi ʼi te temi pē e tahi ʼe fefakafeagaiʼaki ʼanatou manatu. Pea ko he ʼu tohi neʼe tohi e he ʼu tagata kehekehe, ʼi he ʼu koga meʼa kehekehe, peʼe ʼi he temi kehekehe ʼe mole feala ke ʼalutahi ʼanatou manatu. Kae, ʼe ʼui ʼi te Tohi-Tapu ko ʼana tohi e 66 ʼe haʼu mai te ʼAtua, pea ʼe natou talanoa fuli ki te manatu pē e tahi.—2 Timoteo 3:16.

HE FAʼIFAʼITAKI: Neʼe tohi e Moisese, ia te tagata tauhi ovi ʼi te ʼu taʼu 1500 I.M.T.S., ʼi te ʼuluaki tohi ʼo te Tohi-Tapu ʼe haʼu anai he “hakoga” ʼo haofaki ia te mālamanei. Ki muli age, neʼe toe fakakikite ʼi te tohi ʼaia ʼe hifo mai anai ia te hākoga mai iā Apalahamo, mo Isaake pea mo Sakopo. (Senesi 3:15; 22:17, 18; 26:24; 28:14) Hili kiai taʼu e 500, neʼe fakahā e te polofetā ko Natane ʼe kau anai ia te hākoga ʼaia ki te hōloga hau ʼo Tavite. (2 Samuele 7:12) ʼOsi kiai taʼu e afe, neʼe fakamahino e te ʼapositolo ko Paulo ko te hākoga ʼe ko Sesu pea mo te kiʼi kūtuga ʼaē kā filifili anai mai tana kau tisipulo. (Loma 1:1-4; Kalate 3:16, 29) Pea ʼi te teitei taʼu 96 H.T.S.,a neʼe fakakikite ʼi te tohi fakaʼosi ʼo te Tohi-Tapu ko ʼihi ʼo te hākoga ʼe natou fai anai he fakamoʼoni ʼo ʼuhiga mo Sesu ʼi te kele, pea ʼe fakatuʼuake anai nātou ke natou kaugā hau mo ia ʼi selō lolotoga taʼu e 1 000. Pea ʼe tauteaʼi anai e te hākoga ʼaia ia te Tiapolo pea mo haofaki ia te mālamanei.—Apokalipisi 12:17; 20:6-10.

TE TALAMANATU ʼA TE KAU SIVI TOHI-TAPU: ʼI te hili ʼo tana sivisivi fakalelei ia te ʼu tohi e 66 ʼo te Tohi-Tapu, neʼe ʼui e Louis Gaussen neʼe punamaʼuli ki te “talanoa ʼa te ʼu tohi fuli ʼaia ki he manatu pē e tahi, ʼaē neʼe tohi lolotoga taʼu e afe nimageau e he ʼu tagata faitohi kehekehe, . . . logolā neʼe mole natou faʼa mahino kātoa kiai kae neʼe natou faiga ke natou mulimuli pea mo haga taupau ia te fakatuʼutuʼu e tahi, ʼaē ko te fakamatala ʼo te totogi ʼo te mālamanei e te ʼAlo ʼo te ʼAtua.”—Theopneusty—The Plenary Inspiration of the Holy Scriptures.

KOTEĀ TAKOTOU MANATU? ʼE ʼi ai koa he tahi age tohi neʼe tohi lolotoga taʼu e 1 500 tupu e he ʼu tagata faitohi e toko fāgofulu neʼe natou palalau ki te manatu pē e tahi, peʼe ʼe gata pē ia ki te Tohi-Tapu?

[Nota]

[Fakamatala ʼo te pāsina 7]

“Kā fakatahiʼi ia te ʼu tohi ʼaia, pea ʼe natou faʼufaʼu ia te tohi e tahi ʼe mulimuli ki he fakatuʼutuʼu. . . . ʼE mole ʼi ai he tahi age tohi ʼi te ʼu tohi fuli ʼe tatau mo ia.”—THE PROBLEM OF THE OLD TESTAMENT, BY JAMES ORR