ʼE ʼAoga Iā ʼAho Nei

“Ko tau folafola ko he malama taki i oku vae, pea ko he malama i toku ala.”—PESALEMO 119:105.

HE KO’Ē ʼE MAKEHE IA TE TOHI-TAPU? ʼE feala ke ʼui ʼe lelei ia he ʼu tohi kae ʼe mole faʼa lelei ia ki te takitaki ʼo te maʼuli. Pea ko te ʼu tohi ako ʼo te temi nei ʼe ʼaoga ke fakafoʼou tuʼumaʼu ia te ʼu manatu. Kae ʼi te tahi faʼahi, ʼe ʼui ʼi te Tohi-Tapu “ko te u mea fuli nee tohi fakatomua, nee tohi natou ki totatou akoi.”—Loma 15:4.

HE FAʼIFAʼITAKI: Logolā ʼe mole ko he tohi fakatōketā, kae ʼe maʼu ʼi te Tohi-Tapu ia he ʼu tokoni ʼaoga ki te lelei ʼo te loto pea mo te maʼuli haohaoa ʼo te hahaʼi. Ohagē lā, ʼe ina ʼui “ko he loto lelei ko te mauli ki te sino.” (Taaga Lea 14:30) ʼE toe fakatokagaʼi fēnei mai ʼi te Tohi-Tapu: “Ko ia ae e tuu kehe e ina kumi te mea ae e lelei kia ia, e itaita ia ki te u mea fuli e poto.” (Taaga Lea 18:1) Pea ʼi te tahi faʼahi, ʼe ina ʼui “e lahi age te manuia i te foaki i te tali.”—Gaue 20:35.

TE ʼU MAʼU MAI TE ʼU FEKUMI: ʼE fua lelei ki te maʼuli haohaoa ia te loto fakatokatoka, mo he ʼu felōgoi fakakaumeʼa ʼe lelei pea mo he loto fia foaki. ʼE ʼui fēnei ʼi te sulunale (The Journal of the American Medical Association): “ ʼI te agamāhani, ko nātou ʼaē ʼe hoko ʼita ʼe natou iku tuʼumaʼu ki te mate fakafokifā peʼe ko te pā ʼo he ua ʼi te ʼuto.” Neʼe maʼu ʼi te fekumi neʼe fai lolotoga ni taʼu e hogofulu, ko te hahaʼi ʼaē mātutuʼa ʼe natou “maʼu he ʼu felōgoi fakakaumeʼa lelei” ʼe loaloaga age tonatou maʼuli. Pea ʼi te taʼu 2008, neʼe tokagaʼi e te ʼu tagata fekumi ʼo Kanata pea mo Amelika “ ʼe maʼu age te fiafia ʼi te totogi ʼo he meʼa maʼa he tahi ʼi hakita totogi maʼa kita.”

KOTEĀ TAKOTOU MANATU? ʼE kotou falala anai koa ki he tokoni ʼa he tahi age tohi neʼe tohi iā taʼu e 2 000 ki muʼa atu, peʼe gata pē ia ki te Tohi-Tapu?

[Fakamatala ʼo te pāsina 8]

“ ʼE maʼuhiga ʼaupitō kiā au ia te Tohi-Tapu . . . koteʼuhi ʼe maʼu ai he ʼu tokoni fakatōketā lelei.”—HOWARD KELLY, M.D., FOUNDING FACULTY MEMBER OF THE JOHNS HOPKINS UNIVERSITY SCHOOL OF MEDICINE