ʼAki Tona Ako ʼe Tou Maʼu Ai Te Maʼuli Heʼegata

“Pea koeni te mauli heegata, ke natou iloi koe, ia koe, ko te Atua e tahi mo mooni, pea mo ae nee ke fekaui mai, Sesu-Kilisito.”—SOANE 17:3.

KO TE poto fakatagata ʼe feala ke ina haofaki he maʼuli. ʼI te temi ʼaē neʼe laga ai te mahaki ʼo Nouhou ʼaē neʼe māhina hogofulu, neʼe ʼiloʼi e tana faʼē ia te meʼa ʼaē neʼe tonu ke fai koteʼuhi neʼe gāue fakatahi mo te kau tōketā ʼi Niger. Neʼe ina teuteuʼi ia he vai ʼaki he moʼi suka mo te moʼi māsima ke ʼinu e tana kiʼi tamasiʼi. ʼE ʼui e te Fonds des Nations unies pour lʼenfance, ʼi tana “ ʼiloʼi te meʼa ʼaē neʼe tonu ke fai pea mo foaki fakavilivili ia te faitoʼo ʼaia, neʼe mālōlō atu aipē ia te mahaki ʼo tana kiʼi toe.”

Ko te poto Fakatohi-tapu ʼe ina toe fakafealagia ia te haofaki ʼo te maʼuli. Neʼe ʼui fēnei e Moisese, te ʼuluaki tagata faitohi ʼo te Tohi-Tapu: “E mole ko he mea noa ia ia kia koutou; kae ko tokotou mauli aia, pea ko te mea aia e ina fakatologa anai okotou aho.” (Tetelonome 32:47) ʼE feala moʼoni koa ki te Tohi-Tapu ke ina fakatologa ʼotatou ʼaho? Koteā tona fakaʼuhiga ki totatou maʼuli?

Neʼe fakahā mai e te ʼu ʼuluaki ʼalatike e nima ia te makehe ʼo te Tohi-Tapu mai te ʼu tohi fuli ʼaē, koteʼuhi neʼe hoko tuʼumaʼu ʼana lea fakapolofetā, mo ʼana fakamatala, mo te totonu ʼo ʼana tokoni fakatōketā, mo tana talanoa ki he manatu pē e tahi, pea mo tona kei ʼaoga iā ʼaho nei. ʼE mole ko he fakamoʼoni koa lā ʼaia ʼo te makehe ʼa te Tohi-Tapu? Koia, kā ina fakahā mai te meʼa ʼaē ʼe tonu ke tou fai ke tou maʼu ai ia te maʼuli heʼegata, ʼe mole tonu koa lā ke tou fakakaukauʼi lelei ia te ʼu manatu ʼaia?

ʼE matou fakalotomālohiʼi koutou ke kotou vakaʼi peʼe fakafealagia feafeaʼi e te poto Fakatohi-tapu ia te tokalelei ʼo te loto ʼi te temi nei pea mo te fiafia ʼi te temi kā haʼu. ʼE fiafia anai ia te kau Fakamoʼoni ʼa Sehova ʼi hanatou fakahā atu peʼe koteā ʼaē ʼe tonu anai ke kotou fai ke kotou maʼu ai ia te poto ʼaia.

[Talanoa/Paki ʼo te pāsina 9]

ʼE gata pē ki te Tohi-Tapu ʼe ina foaki ia he ʼu tali fakapotopoto mo tuha mo te falala ki te ʼu fehuʼi maʼuhiga ʼaenī:

• He koʼē koa ʼe tou māʼuʼuli ʼi te kele?

• He koʼē kua lahi fēia ia te ʼu mamahi?

• ʼE ʼi ai koa he ʼamanaki ʼo tatatou kau mate?

ʼE kotou maʼu anai ia he ʼu tali Fakatohi-tapu ki te ʼu fehuʼi ʼaia ʼi te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.