Neʼe Natou Lotolelei Ke Natou Olo—Ki Mekesike

ʼE KO he aluʼaga fakalotomalohi tatatou iloʼi ʼae tokolahi ia te kau tupulaga Kilisitiano ʼe natou fakafaigafua ia tonatou maʼuli moʼo lagolago ki te minisitelio. (Mat. 6:22) Kotea te ʼu fetogi neʼe tonu ke natou fakahoko? Kotea te ʼu faigataʼaʼia ʼe feala anai ke tau mo natou? Moʼo tali ki te ʼu fehuʼi ʼaia, tou vakaʼi ia te faʼifaʼitaki ʼo ʼihi ʼe natou faifakamafola ʼi Mekesike.

“NEʼE ʼAOGA KE MA FAKAHOKO HE ʼU FETOGI”

Ko Dustin pea mo Jassa ʼe ko he taumatuʼa mai Amelika, neʼe nā ʼohoana ʼi te mahina ʼo Sanualio 2007. Mole faʼa fualoa ʼi te hili pe ʼo tanā ʼohoana, neʼe nā fakahoko ia tanā fakatuʼutuʼu ʼae ke nā toʼo honā vaka pea mo nā maʼuʼuli ai. Neʼe tau tonā vaka ʼi Astoria, ʼi Oregon, ʼi Amelika, ʼe ko he kiʼi kolo matalelei ʼe tuʼu ovi ki te ʼu moʼuga pea mo te vao matuʼa, ʼe tuʼu ovi ki te Tai ʼo te Pasifika. Neʼe ui fenei e Dustin: “Ko te faʼahi fuli ʼe ke sio ki ai ʼe taulekaleka ʼaupito!” Ki te manatu ʼa te taumatuʼa ʼe nā maʼuli fakafeauga ʼo nā falala kia Sehova. Neʼe nā manatu fenei: “ ʼE ma maʼuʼuli ʼi he kiʼi vaka ʼe teitei meta 8 pe, ʼe ma gaue vaelua ʼi temi, ʼe ma kau ki te kokelekasio ʼe palalau ʼi he lea matapule pea ʼe ma tautau toʼo ia te selevise pionie vaelua ʼi temi.” Kaʼe ki muli age, neʼe nā tokagaʼi ʼe nā faihala. Neʼe ui fenei e Dustin: “Mole ui ke ma lagolago ki te kokelekasio, neʼe ma maʼumaʼua ki te faʼu ʼo toma vaka. Neʼe ma iloʼi kapau ʼe ma fia fakamuʼamuʼa ia Sehova ʼi toma maʼuli, neʼe ʼaoga ke ma fakahoko he ʼu fetogi.”

Neʼe toe ui fenei e Jassa: “ ʼI muʼa ʼo taku ʼohoana, neʼe au maʼuli ʼi Mekesike, neʼe au kau ʼi te kokelekasio ʼe palalau ʼi te lea Fakapilitania. Neʼe au fiafia ʼi taku gaue ʼi ai, pea neʼe au toe fia liliu ki ai.” Moʼo fakamalohiʼi ia tamā loto ʼae ke ma olo ʼo lagolago ki te faifakamafola ʼi he tahi age fenua, neʼe ma kamata lau ʼi te lolotoga ʼo tamā ako fakafamili ia te ʼu fakamatala ʼo te ʼu tehina mo tuagaʼane neʼe olo ki he tahi age telituale. Pea neʼe natou fiafia ʼi tanatou maʼu he telituale ʼe ʼaoga lahi ki ai he kau gaue. (Soa. 4:35) Neʼe ui fenei e Dustin: “Neʼe ma toe fia maʼu mo maua ia te fiafia ʼaia.” ʼI tanā logo ʼae neʼe hoki faʼufaʼu age pe ia te kiʼi kutuga ʼi Mekesike pea neʼe ʼaoga ki ai he tokoni, neʼe fai atu aipe e Dustin mo Jassa ia tanā fakatuʼutuʼu. Neʼe nā mavae ʼi ʼanā gaue, mo nā fakatau tonā vaka pea nā olo ai leva ki Mekesike.

“HE ALUʼAGA TAULEKALEKA NEʼE HOKO KIA MAUA”

Neʼe nonofo ia Dustin mo Jassa ʼi te kolo ko Tecomán, ʼe tuʼu ovi ki te Tai ʼo te Pasifika, ia kilometa ʼe 4 345 mai Astoria. Neʼe ui fenei e Dustin: “Ki muʼa atu neʼe ma sisio ki te ʼu moʼuga pea mo logoʼi ia te mokomoko ʼo te fenua kaʼe ʼi te temi nei ʼe ma logoʼi ia te vevela pea ko te ʼu kiʼi fuʼu ʼakau pe ʼae ʼe ma sisio ki ai ʼe ko te ʼu kiʼi fuʼu tipolo.” ʼI te kamata, neʼe faigataʼa ia te maʼu ʼo he gaue. ʼI te mole kei lahi ʼo tanā foʼi falā, neʼe nā kai pe ʼi te ʼaho fuli ia te laisi pea mo te aliko lolotoga he ʼu vahaʼa. Neʼe ui fenei e Jassa: “ ʼI te temi ʼae neʼe kua ma fiu ai ʼi te kai ʼo te ʼu meʼa kai ʼaia, neʼe to lelei mo te ʼaumai e ʼama ako ia te ʼu mago, mo te ʼu ta ʼi meʼa momoho, mo te ʼu foʼi leosi pea mo te ʼu taga tipolo!” Ki muli age leva neʼe nā maʼu leva ʼanā kiʼi gaue ʼi te Neti, ʼo nā gaue maʼa he fale ako ʼo Taiwan. ʼE feala leva ʼaki te kiʼi gaue ʼaia ke nā toʼo ia te ʼu meʼa ʼae ʼe ʼaoga kia naua.

Kotea te manatu ʼa Dustin pea mo Jassa ʼo ʼuhiga mo tonā faʼahiga maʼuli foʼou? Neʼe nā ui fenei: “Ko tamā olo ki Mekesike, neʼe ko he aluʼaga taulekaleka neʼe hoko kia maua. ʼE malohi age ʼama felogoʼi mo Sehova pea mo tamā felogoʼi fakataumatuʼa. ʼI te ʼaho fuli, ʼe ma gaue fakatahi, ohage la ʼe ma faifakamafola fakatahi, ʼe ma faipalalau ʼo ʼuhiga mo ʼama ako pea ʼe ma teuteu fakatahi te ʼu fono. ʼE mole kei ma maʼu ia te ʼu tuʼania ʼo te temi muʼa.” Neʼe nā toe ui kua nā mahino ki te fakapapau ʼae ʼe tuʼu ia Pesalemo 34:8, MN: “Kotou ʼahiʼahi pea mo kotou sisio ʼe lelei ia Sehova.”

KOTEA ʼAE ʼE INA UGA NATOU?

Ko te toko 2 900 tupu ʼo te ʼu tehina mo tuagaʼane kua natou ʼohoana peʼe kei natou selipatea, ʼe natou taʼu 20 ki te taʼu 30, neʼe natou olo ki Mekesike heʼe mole hahaʼi ai ia te kau faifakamafola. He ko ʼe neʼe fai e te ʼu tehina mo tuagaʼane ʼaia ia te fakatuʼutuʼu ʼaia? ʼI te fai ʼo te fehuʼi ki ʼihi ia natou ʼaia, neʼe natou fakaha ia te ʼu tupuʼaga ʼaeni ʼe tolu.

Moʼo fakaha ia tonatou ʼofa ʼae kia Sehova pea mo te hahaʼi. Neʼe papitema ia Leticia ʼi tona taʼu 18. Neʼe ina ui fenei: “ ʼI taku foaki ia toku maʼuli kia Sehova, neʼe au iloʼi ʼe tonu ke au tauhi kia te ia ʼaki toku loto katoa pea mo toku maʼuli katoa. Pea moʼo fakaha ia toku ʼofa ʼae kia Sehova, neʼe au fia fakaʼaogaʼi lahi ia toku temi pea mo toku malohi ki taku tauhi ʼae kia te ia.” (Mko. 12:30) Ko Hermilo, ʼae kua ʼohoana nei mo Leticia, neʼe kei taʼu 20 ʼi te temi ʼae neʼe alu ai ʼo lagolago ki te gaue ʼi te ʼu potu ʼae ʼe mole hahaʼi ai ia te kau faifakamafola. ʼE ina fakamatala fenei: “Neʼe au mahino ʼaki taku tokoni ki te hahaʼi ʼi te faʼahi fakalaumalie ʼe au fakaha ai ia toku ʼofa ʼae kia natou.” (Mko. 12:31) Neʼe mavae mai tana gaue ʼi te fale paʼaga ʼi te kolo maʼu koloa ʼo Monterrey ʼae neʼe maʼuli fimalie ai, ʼo alu leva ki te kiʼi kolo veliveli.

Ke natou iloʼi ia he fiafia moʼoni ʼe tologa. Mole faʼa fualoa ʼi te hili ʼo te papitema ʼa Leticia, neʼe kauga olo ʼo gaue lolotoga te mahina katoa mo te tuagaʼane pionie kua mahani ʼi te minisitelio ʼi he kiʼi kolo ʼe tuʼu mamaʼo. Neʼe manatuʼi fenei e Leticia: “Neʼe au punamaʼuli. ʼI taku sio ki te tali lelei e te hahaʼi ia te logo neʼe ma fiafia ʼaupito ai. ʼI te fakaʼosi ʼo te mahina ʼaia, neʼe au iloʼi ai peʼe kotea ʼae ʼe au loto ke au fai.” ʼO toe feia aipe mo te tuagaʼane ko Essly, ʼe taʼu 20 tupu, neʼe ko tana sio ki te fiafia ʼa ʼihi ʼae neʼe tupu ai tana toʼo ia tana selevisi. ʼI tana tatuʼu ki te lise, neʼe felaveʼi ai mo te ʼu tehina mo tuagaʼane faʼafai ʼe natou gaue ʼi te ʼu koga meʼa ʼae ʼe mole hahaʼi ai ia te kau faifakamafola. Neʼe ina ui fenei: “ ʼI taku sio ki te fiafia ʼo te ʼu tehina mo tuagaʼane, neʼe au fakaʼamu ai ke toe feia mo toku faʼahiga maʼuli.” Tokolahi te ʼu tuagaʼane neʼe natou maʼu ia te faʼahiga manatu ʼae neʼe maʼu e Essly. ʼI Mekesike, ko te toko 680 tupu ʼo te ʼu tuagaʼane ʼe natou gaue ai heʼe mole hahaʼi ia te kau faifakamafola. ʼE ko he faʼifaʼitaki lelei ki te kau tupulaga pea mo te hahaʼi ʼae kua matutuʼa.

Ke ʼi ai he ʼuhiga ʼo tonatou maʼuli pea mo natou fiafia ai. ʼI te hili ʼo te ako ʼa Essly ʼi te lise, neʼe ina maʼu ia te tokoni fakapaʼaga ke hu ki te univelesite. Ko ʼihi kau tupulaga neʼe natou fakaneke ia ia ke ina tali ia te ako ʼaia, ke feala hana maʼuli fimalie, ke maʼu tona pepa, ke maʼu hana gaue lelei, mo hana motoka pea mo fefolauʼaki. Kaʼe neʼe mole mulimuli ia ki ʼanatou fakaneke. Neʼe ui fenei e Essly: “Tokolahi ʼoku kaumeʼa Kilisitiano, neʼe natou hoko atu tanatou ako, kaʼe neʼe au tokagaʼi neʼe mole natou fakamuʼamuʼa ʼanatou fakatuʼutuʼu fakalaumalie. Neʼe au fakatokagaʼi neʼe natou lotomamahi ʼuhi ko ʼonatou fihifihia he neʼe natou maʼumaʼua ʼi te ʼu meʼa ʼo te malama. Neʼe au fia fakaʼaogaʼi ia toku temi tupulaga ke au tauhi ai kia Sehova.”

Neʼe ako gaue ia Essly ke feala hana maʼu hana kiʼi gaue moʼo toʼo ʼaki te ʼu meʼa ʼae neʼe ʼaoga ki ai ʼi te temi ʼae neʼe pionie ai, pea neʼe alu ʼo gaue ʼi te koga meʼa ʼae neʼe mole hahaʼi ai he kau faifakamafola. Neʼe ina ako ia te ʼu lea ʼa te kau Otomi pea mo te kau Tlapaneco. Hili ki ai taʼu ʼe tolu ʼi tana gaue ʼi te koga meʼa ʼaia, neʼe ina ui fenei: “ ʼE au fiafia ʼi taku gaue ʼi heni, pea kua ʼi ai te ʼuhiga ʼo toku maʼuli. Pea tahi, neʼe toe malohi age ʼaku felogoʼi mo Sehova.” ʼE toe maʼu e Phillip mo Racquel, te taumatuʼa Amelika kei taʼu 30, ia te manatu ʼaia. Neʼe nā ui fenei: “ ʼI te fakavilivili ʼo te fetogi ʼo te aluʼaga ʼo te maʼuli, tokolahi ʼe natou manatu ʼe mole ʼi ai he ʼuhiga ʼo tonatou maʼuli. Kaʼe ko takita gaue ʼi he koga meʼa ʼe hahaʼi ai ia natou ʼae ʼe natou fia fakalogo ki te logo ʼae ʼe tuʼu ʼi te Tohi-Tapu, ʼe kita tokagaʼi ai ʼe ʼi ai te ʼuhiga ʼo tokita maʼuli. Pea ʼe kita fiafia ai!”

ʼE KOTOU LAVA TAUʼI FEAFEAʼI IA TE ʼU FIHIFIHIA?

ʼE moʼoni, ʼe mole faigafua ia te olo ʼo gaue ʼi he koga meʼa ʼe mole hahaʼi ai ia te kau faifakamafola ʼo te Puleʼaga. ʼE tonu ke tou kumi ia te ʼu meʼa ʼae ʼe ʼaoga kia tatou. Pea ʼe tonu foki ke tou fakamamahani mo te telituale. ʼE fakamahino fenei e te tuagaʼane pionie kua mahani ʼi te minisitelio, ʼe higoa ko Verónica: “ ʼI te tahi koga meʼa, neʼe au fakatau ai te ʼu kiʼi meʼa kai ʼe mole totogi kovi. ʼI te tahi age koga meʼa, neʼe au fakatau ai te ʼu mutu ʼi meʼa pea mo au faikosi ai. Pea ʼi te temi nei, ʼe au fai menasi pea mo au akoako ki ʼihi matuʼa peʼe feafeaʼi hanatou maʼu he ʼu felogoʼi mo ʼanatou fanau.”

ʼE mole faigafua hatatou mulimuli ki te faʼahiga maʼuli ʼo he fenua tafitō la mo kapau ko tatou ko he ʼu matapule. Neʼe fai e Phillip mo Racquel ia te faʼahi ʼaia, ʼi tanā olo ʼo maʼuʼuli ʼi te koga meʼa ʼo te kau Nahuatl. Neʼe ui fenei e Phillip: “ ʼE kehe pe tonatou ia faʼahiga maʼuli.” Kotea ʼae neʼe tokoni kia naua ke nā leleiʼia te koga meʼa ʼaia? Neʼe tali fenei e Racquel: “Neʼe ma tokagaʼi ia te ʼu lelei ʼo te kau Nahuatl, ohage la ʼe natou gaohi meʼa fakafamili tuʼumaʼu, ʼe natou logotahi pea mo natou loto foaki. Neʼe lahi te ʼu meʼa kua ma mahino ki ai ʼi tamā maʼuʼuli ʼi heni pea mo tamā gaue fakatahi mo te ʼu tehina mo tuagaʼane ʼo te fenua.”

ʼE FEAFEAʼI HAKOTOU TEUTEU?

ʼE feafeaʼi anai hakotou teuteu mo kapau ʼe tonu ke kotou olo ʼo faifakamafola ʼi he koga meʼa ʼe mole hahaʼi ai he kau faifakamafola? Koʼeni te talamanatu ʼa ʼihi tehina mo tuagaʼane neʼe kua natou fakahoko ia te faʼahi ʼaia: ʼI muʼa ʼo hakotou olo, ʼe tonu muʼa ke kotou fakafaigafua ia tokotou maʼuli pea mo kotou maʼuli fakafeauga. (Filp. 4:11, 12) Kotea te tahi ʼu faʼahi ʼe tonu ke kotou fai? ʼE fakamatala fenei e Leticia: “ ʼE mole au kumi he gaue ʼe ina fakamaʼua au ke au gaue tuʼumaʼu ai. ʼE au fia feʼaluʼaki, ʼi te temi ʼae ʼe au loto ki ai pea mo te faʼahi ʼae ʼe au fia alu ki ai.” Neʼe ui fenei e Hermilo: “Neʼe au ako kuka, mo faifo pea mo faifakamolemole.” ʼE fakamatala fenei e Verónica: “ ʼI taku kei maʼuli mo toku kiʼi famili, neʼe au tokoni kia natou ʼi te fai ʼo te menasi pea mo fai he ʼu kiʼi kuka. Neʼe au faigaʼi ke au tatanaki he kiʼi foʼi falā.”

Ko Levi pea mo Amelia ʼae ʼe ʼomai mai Amelika pea kua taʼu valu ia tanā ʼohoana, ʼe nā fakamatala pe neʼe tokoni feafeaʼi age ʼanā faikole ke tupu ai hanā ʼomai ki Mekesike. ʼE ui fenei e Levi: “ ʼE ma laulau tamā foʼi falā ke feala hamā iloʼi peʼe ko te fia anai ʼe ʼaoga kia maua ki tamā nonofo lolotoga he taʼu katoa, pea neʼe ma faikole kia Sehova ke tokoni mai ke feala hamā maʼu ia te falā ʼaia.” Hili ki ai te ʼu mahina, neʼe feala ke maʼu ia te tau paʼaga ʼaia, pea neʼe nā olo ai. ʼE ui fenei e Levi: “Neʼe tali e Sehova ʼamā faikole, ʼi te lakaga leva ʼaeni, ʼa maua leva te fakahoko ʼo tamā fakatuʼutuʼu.” ʼE toe ui fenei e Amelia: “Ki tamā manatu, neʼe lagi feala pe ke ma nonofo ʼi he taʼu pe ʼe tahi, kaʼe ki muli age neʼe ma nonofo ia taʼu ʼe fitu, neʼe mole pe la heʼeki ma manatu ke ma toe liliu. ʼI tamā maʼuʼuli ʼi heni, neʼe feala ke ma tokagaʼi ai te tokoni ʼa Sehova. ʼI te ʼaho fuli ʼe ma tokagaʼi ai tona loto manavaʼofa.”

Ko Adam pea mo Jennifer, ʼae ko he taumatuʼa Amelika, ʼe nā gaue ʼi he kokelekasio ʼe palalau ʼi te lea Fakapilitania ʼi Mekesike, neʼe ʼaoga kia naua ia te faikole. ʼE nā foaki mai ia te tokoni ʼaeni: “ ʼAua naʼa kotou fakaʼatalitali ke hoki tokalelei ia meʼa fuli. Kotou faikole kia Sehova ʼo ʼuhiga mo ʼakotou fakatuʼutuʼu pea mo kotou fakahoko ʼo mulimuli ki ʼakotou faikole. Kotou fakafaigafua tokotou maʼuli, kotou faitohi ki te filiale ʼo te fenua ʼae ʼe kotou fia olo ki ai, kotou fakakaukauʼi te paʼaga ʼae ʼe ʼaoga pea hoki kotou olo leva.”a Kapau ʼe kotou fai ia te faʼahi ʼaia, ʼe kotou maʼuli fiafia anai pea mo koloaʼia ʼi te faʼahi fakalaumalie.