Te ʼu Lea Fakapolofeta Neʼe Hoko Moʼoni

Neʼe tou talanoa ʼi te kamata ki te kakaʼi ʼo Crésus e te patele ʼo Delphes, ʼo iku ai ki te malo ʼa te Hau ʼo Pelesi. Kae, ʼe maʼu ʼi te Tohi-Tapu te lea fakapolofeta fakaofoofo ʼo ʼuhiga mo te Hau ʼo Pelesi. Pea neʼe hoko moʼoni te ʼu faʼahi fuli ʼo te lea fakapolofeta ʼaia.

ʼI muʼa atu ia teitei taʼu ʼe 200 ki te tupu ʼa te hau, neʼe fakakikite e te polofeta Hepeleo ko Esaia tona higoa, ʼe ko Silusi. Pea neʼe ina fakaha peʼe feafeaʼi anai hana maʼu te kolo ʼo Papiloni.

Esaia 44:24, 27, 28: “Koeni te folafola a [Sehova, MN]: . . . E au ui ki te vanu loloto: Ke ke mamaha, e au fakamaha anai ou vaitafe. E au ui kia Silusi: Ko taku tagata tauhi manu ia ia, pea e ina fakahoko anai toku finegalo katoa; e ina ui anai ki Selusalemi: Ke toe lagai ia ia! Ki te fale tapu: Ke toe fakatafito ia ia!”

Ohage ko tona ui e te tagata faihisitolia Keleka ko Hérodote, neʼe ofeʼi kehe e te kautau ʼa Silusi te Vai Tafe Eufalate, ʼae neʼe tafe ʼi te loto kolo ʼo Papiloni. Neʼe feala ai ki te kautau ʼa Silusi ke natou ulufi te kolo ʼo natou fakalaka ʼi te liuʼa. Hili te maʼu e Silusi te kolo, neʼe ina fakaʼateainaʼi te kau Sutea ʼae neʼe popula ʼi Papiloni. Pea neʼe ina fakagafua ke natou toe liliu ʼo toe laga ia Selusalemi, ʼae neʼe maumauʼi kua hili ki ai taʼu ʼe 70.

Esaia 45:1, MN: “Koʼeni te meʼa ʼae neʼe ui e Sehova ki tana tagata fakanofo, kia Silusi, ʼae neʼe au puke tona nima mataʼu, moʼo puleʼi ʼi ʼona muʼa te ʼu puleʼaga, ke au veteki te kiliʼi pipi ʼi te ʼu koga loto ʼo te ʼu hau, ke au avahi ʼi ʼona muʼa te ʼu matapa ʼaki ʼona fakamaʼu ʼe lua, ʼo tupu ke mole mapunuʼi te ʼu matapa.”

Neʼe ulufi e te kau Pelesi te kolo, ʼi te ʼu foʼi matapa lalahi ʼe lua ʼae neʼe mole mapunuʼi. Kapau la neʼe iloʼi e te kau Papiloni te fakatuʼutuʼu ʼa Silusi, neʼe natou pupunu te ʼu matapa fuli ʼae ʼe haga ki te vai tafe. Kae, neʼe mole koia ʼaia.

ʼE kau te lea fakapolofeta fakaofoofo ʼaeni ʼi te ʼu lea fakapolofeta ʼe hogofulu tupu ʼae ʼe maʼu ʼi te Tohi-Tapu pea neʼe hoko moʼoni.a ʼE mole hage ia ko te ʼu faifakakikite ʼa te tagata mai ʼonatou ʼatua loi. Kae, ʼe haʼu te ʼu lea fakapolofeta ʼo te Tohi-Tapu mai ia Ia ʼae neʼe ina ui: “E au fakaha mai te kamataaga te mea ae e tonu ke hoko, pea mai mamao te mea ae e heeki hoko.”—Esaia 46:10.

ʼE ko Sehova pe te ʼAtua moʼoni, ʼe feala ke ina fai te ʼu palalau ʼaia. ʼE fakaʼuhiga tona huafa “ ʼE Ina Fakahoko.” ʼE ha ai tona fealagia ʼae ke ina iloʼi te ka haʼu pea ke ina fakaalutahi mo tona finegalo. ʼE tou tui papau ai ʼe ina fakahoko anai ʼana fakapapau fuli.

TE ʼU LEA FAKAPOLOFETA ʼAE ʼE HOKO IA ʼAHO NEI

ʼE kotou fia iloʼi koa pe kotea ʼae ʼe ui ʼi te ʼu lea fakapolofeta ʼo te Tohi-Tapu ʼo ʼuhiga mo totatou temi? Kua hili atu teitei taʼu ʼe 2000, neʼe fakakikite ʼi te Tohi-Tapu ʼe ʼi ai anai ʼi “te ʼu ʼaho fakamuli” he ʼu “temi makehe pea mo faigataʼa.” Ko te ʼu ʼaho fakamuli ʼo te ʼa? ʼE mole ʼo te kele peʼe ʼo te tagata, kae ʼo te ʼu malaʼia, mo te ʼu mamahi ʼae ʼe tau mo te tagata talu mai ni sekulo. Tou vakaʼi ʼihi lea fakapolofeta ʼe fakamoʼoni ai “te ʼu ʼaho fakamuli.”

2 Timoteo 3:1-5: “ ʼI te ʼu ʼaho fakamuli . . . , ʼe ʼoʼofa pe anai te hahaʼi kia natou totonu, mo manako ki te paʼaga, mo fiameʼameʼa, mo fiatuʼu, mo laukovi ki te ʼAtua mo te hahaʼi, mo talagataʼa ki ʼanatou matuʼā, mo maʼuli galo, mo heʼe agatonu, mo heʼe ʼofa, mole natou maʼuli felogoʼi, mo faifasituʼu, mole natou lotololomi, mo fekai, mo fehihiʼa ki te lelei, mo natou kakaʼi ʼonatou kaumeʼa, mo logogataʼa, mo fiameʼalahi, mo natou ʼoʼofa ki te ʼu fakafiafia kaʼe mole ki te ʼAtua, pea ʼe natou fia fakaha ʼe natou pipiki ki te ʼAtua kaʼe ʼe mole natou fai ʼi ʼonatou maʼuli.”

ʼE mole kotou fakamoʼoni koa la kua ʼasilisili kovi age te ʼu aga ʼaia ia ʼaho nei? ʼE kotou tokagaʼi koa la kua ʼatua pe te hahaʼi kia natou totonu, mo natou manako pe ki te falā, pea mo natou fialahi? ʼE natou fakakinauʼi ni meʼa ki ʼihi pea ʼe mole kei natou felogoi lelei mo te hahaʼi. Pea ʼe lagi kotou toe tokagaʼi te talagataʼa ʼa te ʼu fanau ki ʼanatou matuʼā mo te kua lahi age ʼo te ʼofa ʼa te hahaʼi ki te ʼu fakafiafia ʼi te ʼofa ki te ʼAtua. Pea ʼaki te temi, ʼe toe ʼaʼasili kovi age la te ʼu aluʼaga ʼaia.

Mateo 24:6, 7: “ ʼE kotou logo anai ki he ʼu tau pea mo he ʼu fakamatala ʼo ʼuhiga mo ni tau. . . . Koteʼuhi ʼe fakafeagai anai he fenua ki he tahi age fenua, pea mo he puleʼaga hau ki he tahi age puleʼaga hau.”

ʼE fakafuafua ko te toko 100 miliona tupu hahaʼi neʼe mamate talu mai te taʼu 1914 ʼuhi pe ko te ʼu tau mo te ʼu fehokosi ʼae ʼe fakaʼaogaʼi ai te ʼu mahafu tau. Pea ʼe natou kaugā malie age ʼi te hahaʼi ʼo ni fenua ʼe lahi. Fakakaukauʼi age muʼa te ʼu loʼimata, mo te lotomamahi ʼuhi ko te ʼu mateā ʼaia. Kae, neʼe taʼofi mai koa e te ʼu puleʼaga ni ako mai ʼanatou lakahala ke fakagata ai la te tau?

Mateo 24:7: “ ʼE hoko anai ni hoge.”

ʼE ui fenei ʼi te Programme alimentaire mondial: “ ʼI te malama ʼaeni, ʼe feʼauga pe te meʼa kai ki te hahaʼi fuli. Kae ko te toko 815 miliona hahaʼi ʼae ʼe momoe pakupaku ʼi te po fuli. ʼE toe hahaʼi age la ia natou ʼae ʼe mole feʼauga hanatou meʼa kai.” ʼE fakafuafua ko tamaliki ʼe tolu miliona tupu ʼae ʼe mamate pakupaku ʼi te taʼu fuli.

Luka 21:11: “ ʼE hoko anai ni mafuike lalahi.”

ʼI te taʼu fuli, ʼe lau ko mafuike ʼe 50 000 tupu ʼe logoʼi e te hahaʼi. Ko teitei mafuike ʼe 100 ʼae ʼe maumau ai te ʼu fale, pea ʼi te teitei taʼu fuli ʼe hoko te mafuike ʼe malohi age. ʼO mulimuli ki te sivi neʼe fai, talu mai te taʼu 1975 ki te taʼu 2000, neʼe ko te toko 471 000 neʼe mamate ʼi te ʼu mafuike.

Mateo 24:14: “Ko te logo lelei ʼaeni ʼo te Puleʼaga ʼe fakamafola anai ʼi te kele katoa ko he fakamoʼoni ki te ʼatu puleʼaga, pea hoki hoko mai anai ia te fakaʼosi.”

ʼE ko te toko valu miliona tupu kau Fakamoʼoni ʼa Sehova ʼe natou fakamafola te logo lelei ʼo te Puleʼaga ʼo te ʼAtua ia fenua ʼe 240 tupu. ʼE natou fakaha te logo lelei ʼi te ʼu kolo lalahi, mo te ʼu kolo liliki, ʼi te vao mo te ʼu koga meʼa moʼugaʼia. Pea ʼi te temi ʼae ka fakagata ai anai e te ʼAtua te gaue, ʼe ui fenei ʼi te lea fakapolofeta: “Pea hoki hoko mai anai ia te fakaʼosi.” Kotea tona fakaʼuhiga? ʼE ko te fakaʼosiʼaga ʼaia ʼo te pule ʼa te tagata pea ʼe ko te kamataʼaga ʼaia ʼo te pule ʼo te Puleʼaga ʼo te ʼAtua. Kotea te ʼu fakapapau ʼae ka fakahoko anai ʼaki te Puleʼaga ʼo te ʼAtua? Tou vakaʼi fakatahi.