Tou Fakaloto Mālohiʼi Te Hahaʼi Ke Nātou Haga Sio Kia Sesu
1 Ko te tohi Le plus grand homme de tous les temps ʼe ko he tohi fakatalakitupua ia. Ko tona ʼu kapite e 133 ʼe feala te fakaloto mālohiʼi ʼo te hahaʼi lautohi, ke nātou haga sio kia Sesu pea mo foaki age kia nātou te holi tāfito ke nātou mulimuli ki tana faʼifaʼitaki. Neʼe kua ʼosi fakatuʼutuʼu ʼe ko te ʼu hau fuli ʼaē neʼe fakanofo neʼe mole feala, ia nātou fuli ʼaia, tanatou fai he ʼu fetogi ohage ko te talatuʼu ʼa Sesu ki te maʼuli ʼo te tagata ʼi te kele. Ko nātou ʼaē ʼe haga sio kia Sesu ʼe mole gata tanatou maʼu hona lelei.
2 Neʼe fakahāhā e Sesu tana Tāmai ki tana ʼu tisipulo, pea neʼe ina fakahā, ʼaki tana faʼifaʼitaki, te ʼu kalitate maʼuhiga ʼo te ʼAtua. ʼE loloto tatatou fakafetaʼi mokā ʼe tou fakasiosio te poto ʼo tana fai akonaki, te faiva pea mo te manavaʼofa neʼe ia te ia. Ka tou fakakaukau pe neʼe aʼu kifea tona mamahi moʼo totogi ʼo tatou, ʼe fonu totatou loto ko te fakafetaʼi. Ko te tohi Le plus grand homme de tous les temps ʼe ina tokoniʼi anai te hahaʼi ke nātou sio kia Sesu ʼi te fahaʼi ʼaia.
3 Tou teuteu fakalelei: Ke tou teuteu fakalelei moʼo kamata ʼaki he felogoi faka tohi-tapu ʼe ina fakaloto mālohiʼi ai te hahaʼi ke nātou haga sio kia Sesu. Ko te ʼu famili pea mo ʼihi kau faka mafola ʼe feala tanatou gāue fakatahi ʼi te faʼahi ʼaia. Tou faigaʼi ʼo uga te fia logo ʼa te hahaʼi pea mo faiga ke nātou lau ia te tohi Le plus grand homme. Moʼo hoko ʼo te fahaʼi ʼaia ʼe lagi tonu anai ke lahi he ʼu felogoi. Kapau ko he tahi ʼe mole faʼa fia logo ʼi te ʼuluaki felogoi, ʼe feala ke tou tuku age he kiʼi pepa lotu, peʼe lagi ko he kaupepa peʼe ko he nusipepa.
4 ʼI tesepeli, ʼe fakatafito tatatou ʼu fai palalau ʼi te ʼu ʼapi kia Sesu pea ʼe fakaloto mālohiʼi ai te hahaʼi ke nātou mahino lelei kia te ia. ʼAki te fakamahino ʼo te ʼu manatu ʼe tuʼu ʼi te tohi Le plus grand homme, ʼe feala tatatou tokoniʼi te hahaʼi ke nātou sio kia Sesu mole gata pe ko he tagata ʼo te hisitolia, kae ohage ko te ʼAlo ʼo te ʼAtua pea ko te Hau ʼo te puleʼaga ʼaē ka ina fakatonutonuʼi te ʼu faigataʼaʼia ʼe hoko ʼi te malamanei.
5 ʼE lahi te ʼu tupuʼaga ʼaē ʼo tatatou fakahā tatatou fiafia ʼo tou fakahā te tohi ʼaia. ʼI te temi ʼaenī ʼo te taʼu, ʼe tokolahi te hahaʼi ʼo totatou telituale ʼe nātou fai ni fehuʼi ʼo ʼuhiga mo te ʼAlo ʼo te ʼAtua pea mo te maʼuhiga ʼo tana gāue. Kapau kua tou ʼiloʼi te lotolotoiga ʼo te tohi, ʼe tou maʼu ai anai he ʼu faʼahiga meʼa moʼo uga ʼo te fia logo ʼa te hahaʼi ʼaē ʼe felāveʼi anai mo tatou. Ke tou fakahā fakamalotoloto ki te hahaʼi tatatou leleiʼia te tohi ʼaia.
6 Ko he tahi ʼe mole faʼa fia lautohi neʼe ina ʼui fēnei ʼe ina leleiʼia te tohi Le plus grand homme; neʼe ina toe ʼui mai ʼaki te tohi ʼaia, ko te lautohi ʼe ko he meʼa lelei kia te ia ʼi te afiafi. Tou tokoniʼi niʼihi hahaʼi ke nātou logoʼi te meʼa ʼaia ʼo tou fai ia meʼa fuli ʼe tou feala moʼo fakaloto mālohiʼi ʼo nātou ke nātou haga sio kia Sesu pea ke nātou lau ʼaki he fia logo fakamalotoloto ki te tohi Le plus grand homme de tous les temps.