Ke Tou Haga Palalau Ki Te ʼu Meʼa Neʼe Tou Sio Pea Mo Logo Ki Ai
1 Logope neʼe tonu ke tamateʼi nātou pea mo pilisoniʼi, neʼe fēnei te ʼui age e te kau ʼapositolo ki tonatou ʼu fili: “ ʼE mole feala ke tuku tamatou palalau ki te ʼu meʼa neʼe mātou sisio pea mo logo ki ai.” (Gāue 4:20). Neʼe nātou faka maʼuhigaʼi te ʼu gāue pea mo te ʼu akonaki ʼa Sesu.
2 Ko te logo lelei ʼo ʼuhiga mo Sesu pea mo tona Puleʼaga ʼe toe maʼuhiga foki ki te hahaʼi ia ʼaho nei. ʼE tonu ke tou faigaʼi te ʼu faʼahiga meʼa fuli ʼe tou fealagia moʼo palalau ai ki te ʼu meʼa neʼe tou sisio pea mo logo ki ai ʼo ʼuhiga mo te Folafola ʼa te ʼAtua. Lolotoga te ʼu ʼaho lafeti, ʼe faigafua te palalau ʼa te hahaʼi ki te ʼu manatu faka lotu, ko ʼihi ʼaia faʼahi ʼe feala ai ke tou fakahā te moʼoni.
3 Tūpulaga, koutou taupau fakalelei takotou tui: Ko te temi ʼaenī ʼo te taʼu ʼe feala ai ke koutou fai he meʼa makehe ‘moʼo taupau ʼo te ʼamanaki ʼaē ʼe ia koutou’. — 1 Petelo 3:15.
Kapau ʼe fehuʼi atu pe koʼe ʼe mole koutou kau ki te ʼu talatisio faka lotu ʼaē ʼe ʼalu tahi mo te Potapu, ʼe feala ke koutou ʼui age:
◼ “ ʼE mole ʼau kau ki te ʼu lafeti ʼo te Potapu koteʼuhi heʼe mole ina fakahā ia Sesu ohage ko te fakamaʼuli pea ko ia tokotahi pe ʼaē ka ina pulihi anai te tau pea mo te faigataʼaʼia ʼo ʼuhiga mo te lanu. [Fakahā peʼe lau ia Gāue 4:12.] Ko Sesu ʼe mole ko he kihiʼi tamasiʼi neʼe hoki tupu, kae ko he Hau kua fakanofo. Ko te tohi ʼaenī Le plus grand homme de tous les temps, ʼe ina vakaʼi te ʼu akonaki fuli pea mo te ʼu milakulo ʼa Sesu pea ʼe ina fakahā mai peʼe feafeaʼi anai tana pulihi te ʼu mamahi ʼa te malamanei.” ʼOsi ʼaia pea fakahā age te paki ʼaē ʼe tuʼu ʼi te kapite 133 pea lau te lua palakalafe ʼo te pasina ki muli mai. Vakaʼi niʼihi puani ʼe ʼaoga anai kia ia ʼaē ʼe felogoi mo tatou. Ke lahi tatatou fiafia ʼo fakahā te tohi ʼaia ʼaki te totogi fakaʼofa ʼe fakatuʼutuʼu ki ai.
4 Koutou palalau ki ʼakotou kaugā gāue: Ko he tēhina neʼe ina tuku te ʼu tohi e 63 Le plus grand homme ki tana kaugā gāue, ʼaki pe tana hilihili te tohi ʼaia ki tona pilo. Ko te tuʼai tohi taulekaleka pea mo te kupu ʼe lagaʼi ai he ʼu fehuʼi. ʼE feala pe hakotou ʼui age ki he tahi ʼe gāue mo koutou: “Kia koe, ko ai te tagata ʼaē ʼe lahi tokotahi ʼo te ʼu temi fuli?” ʼOsi ʼaia pea koutou toe ʼui age: “Ko te tohi ʼaenī ʼe ina fakamatala fakalelei te maʼuli katoa ʼo Sesu, ʼe ina vakaʼi tana ʼu akonaki takitokotahi, ʼe tali ki te ʼu fehuʼi ʼe fai e te tokolahi ʼo ʼuhiga mo tana ʼu milakulo pea mo foaki mai he ʼu manatu maʼuhiga. Ko te fakasiosio maʼuhiga ʼo te meʼa ʼaē ʼe fakahā e te Tohi-Tapu ʼo ʼuhiga mo Sesu ʼe hā ʼaki ai neʼe ko ia ko te tagata ʼaē ʼe lahi tokotahi ʼo te ʼu temi fuli.” ʼOsi ʼaia, koutou toe vakaʼi te talanoa ʼa Napoléon ʼo ʼuhiga mo Sesu, ʼe tuʼu ʼi te tolu palakalafe ʼo te kamataʼaga ʼo te tohi.
5 ʼO tatau aipe, ʼe ʼi ai he ʼu faʼahi ʼe ʼaoga ke tou fakahā ai te logo lelei ki ʼotatou ʼu vāhaʼa fale peʼe ki ʼotatou ʼu kāiga ʼe mole tui. Tou faikole kia Sehova ke ina foaki mai te faiva pea mo te fakapotopoto ke tou palalau ai ʼi te temi totonu (Gāue 4:29, 31). Ko te meʼa ʼaē ka tou fakahā ʼo ʼuhiga mo Sesu ʼe ina fakaloto mālohiʼi ai te hahaʼi fakakaukau ʼaē ʼe ʼoʼofa ki te faitotonu. ʼE ko he meʼa lelei kia tatou te tokoniʼi ʼo he kaumeʼa, he kaugā gāue pe ko hotatou kāiga ke nātou hu ki te ala ʼo te maʼuli heʼegata? — Soane 14:6.