Ko Te ʼu Tali Ki ʼa Kotou ʼu Fehuʼi

◼ ʼE tonu koa ke tou telefoni ki te Sosiete ke tou maʼu he ʼu tali ki te ʼu fehuʼi faka tohi-tapu peʼe ko te kole ʼo he ʼu tokoni?

Tokolahi te hahaʼi ʼe nātou fakaʼaogaʼi te telefoni ke ʼaua naʼa puli tonatou temi, kae ʼe mole ko te tupuʼaga pe ʼaia ʼo tanatou fakaʼaogaʼi te telefoni. Ko te aga kua māhani ʼi te mālama ʼaenī, ko te hikihiki ki muʼa ʼo tokita fīmālie takitokotahi; ko te hahaʼi ʼe mole kei nātou leleiʼia he faiga ʼi he fahaʼi.

Ko te meʼa ʼaia ʼe kehekehe mo te ʼu tokoni fakaʼatua! ʼE fakaloto mālohiʼi tatou e te ʼAtua ke tou kumi te mālama ohage ko he koloā neʼe fūfū; ko tona ʼuhiga ʼaē ʼe tonu ke tou faiga mālohi. ʼE hā mai ʼi te ʼu faʼahiga meʼa ʼe hoko, ko te aga ʼaia ʼe ina foaki mai he loto fiafia ʼe tologa age. — Taag. 2⁠:​1-4.

ʼE tonu ke fai he faiga fēia mokā lagaʼi he fehuʼi lolotoga tatatou teuteuʼi he akonaki ki he fono peʼe tou tau mo he faigataʼaʼia. ʼO mole telefoni ki te Sosiete kae ʼe tou maʼu anai he ʼu manuʼia mokā ʼe tou kumi ʼi te Tohi-Tapu pea mo te ʼu tohi ʼo te Sosiete, tāfito ʼi te Kumiʼaga, ʼo tatau aipe ʼi te kumiʼaga ʼo te ʼu akonaki ʼaē fai, ʼo fēia foki ki te kumiʼaga faka tohi-tapu, ʼe maʼuhiga ʼaupito te ʼu fahaʼi ʼaia e lua.

ʼI te ʼosi foki ʼo te ‘kumi ʼo te koloā neʼe fūfū’, ʼe feala hatatou faka felogoi mo he tagata ʼāfea ʼo te kokelekasio mokā ʼe ʼaoga mai he tokoni makehe. Ko te ʼu tagata ʼāfea ʼe ia nātou he mālama lahi ʼo te Tohi-Tapu pea kua nātou māhani ʼi te fai ʼo te ʼu kumi. Kapau ʼe ʼaoga kia tatou he tokoni ʼo ʼuhiga mo he faʼahiga meʼa kia tatou totonu peʼe ko he tonu ke tou fai, ʼe feala hanatou foaki mai he tokoni ʼe ʼaoga pea mo totonu ki te fahaʼi ʼaia, heʼe nātou ōvi mo tatou pea ʼe nātou ʼiloʼi lelei totatou ʼaluʼaga. — Vakaʼi ia Gāue 8⁠:​30, 31.

Kapau ʼe tuʼu mālohi tatatou manatu ʼaē ʼe tonu ke tou faka felogoi totonu ki te Sosiete ke tou maʼu ai he ʼu logo ʼo lahi age, ʼe ʼaoga ke fakamomoli he tohi. ʼI te fahaʼi ʼaia, ko te ʼu tagata ʼāfea ʼe feala tanatou tokoni mai ki tona fai. Ko he tohi ʼe tuku anai ki te ʼu tēhina ʼi te pilo honatou temi ke nātou fakakaukauʼi pea mo fai he ʼu kumi ʼe ʼaoga ki te fahaʼi ʼaia, ko te meʼa ʼaia ʼe mole feala ʼi te fai telefoni.