Tou Taupau Te Fia Logo ʼAki He Fakasiosio Lelei Lolotoga Te ʼu ʼAho Lafeti
1 ʼI tesepeli, tokolahi te hahaʼi ʼaē neʼe fia logo ki te moʼoni ʼe lagi ʼe nātou maʼumaʼua anai ʼuhi ko te ʼu faʼahiga meʼa ʼe ʼalu tahi mo te ʼu ʼaho lafeti. Koia, ka tou toe liliu ʼo ʼaʼahi nātou, ke ia tatou he fakasiosio lelei. ʼE lagi tonu anai ke tou fakahā fakavilivili age te tupuʼaga ʼo tatatou ʼaʼahi, ʼo fakalogo pe mokā ʼe loto ia ke hoko atu te fai palalau.
2 Tou fakakaukauʼi te meʼa ka tou talanoa anai ki ai: ʼE tonu ke mālama tuʼumaʼu ki totatou ʼatamai te meʼa ʼe tou fia fakahā ki te hahaʼi. Koia ʼe tonu ai ke tou vakaʼi te ʼu nota ʼaē neʼe tohi lolotoga te ʼaʼahi kua hili, pea ke tou manatuʼi te ʼu puani neʼe tou palalau ki ai, ʼo feiā foki ki te ʼu fehuʼi neʼe mole tali.
3 Kapau neʼe tou fakaʼaogaʼi te manatu ʼaē ʼi te palakalafe 5 ʼo te alatike ʼi ʼoluga, lolotoga te ʼaʼahi ʼe feala ke tou ʼui age:
◼ “ ʼI te temi ʼaenī ʼo te taʼu, tokolahi te hahaʼi ʼe manatu ki te ʼaho tupu ʼo Sesu. ʼI tatā felogoi talu mai, neʼe ʼau fakapapau atu ʼe ʼau toe haʼu ʼo fakahā atu he manatu ʼaoga ʼo ʼuhiga mo te koga meʼa neʼe tupu ai Sesu. ʼE ke ʼiloʼi koa neʼe fakakikite e te Tohi-Tapu ʼe tupu anai ia Sesu ʼi Petelehemi, pea neʼe fakahā te fahaʼi ʼaia ia taʼu e 700 ki muʼa atu?” ʼI te hili ʼo he kiʼi temi neʼe tuku ai ke fai mai hana tali pea mo lau ia Mikea 5:2, ʼe feala ke tou ʼui age: “ ʼE fakapuna’maʼuli foki ia te lea faka polofeta ʼaenī? Kae ʼe ke ʼiloʼi koa ʼe ʼi ai nei ʼihi lea faka polofeta ʼe fakahoko ʼi te temi nei?” Kapau ʼe maʼu hona temi, ʼe feala ke hoko atu tatatou fai palalau. Kae, kapau ʼe maʼumaʼua, ʼe feala hatatou ʼui age ki ai hoki tou toe ʼomai ʼi he tahi temi moʼo fakahoko atu te fai palalau.
4 Kapau neʼe tou tuku te kiʼi pepa lotu, “Ko te malamanei ʼo te temi ʼaenī ʼe hāo anai koa?”, ʼe feala ke tou ʼui age:
◼ “Fakatokagaʼi mai muʼa te meʼa ʼe talanoa ki ai te kiʼi pepa lotu ʼaenī ʼi te pasina 3, ʼi te kupu ʼaē ‘Te fakaʼiloga’. ʼE talanoa ʼi heni ki te ʼu faʼahiga meʼa, kia Sesu, ʼe fakaʼiloga ai te ʼu ʼaho fakamuli. [Vakaʼi te ʼu lea faka polofeta e lua peʼe tolu.] ʼI tau manatu ʼe hoko koa te ʼu lea faka polofeta ʼaenī ʼi totatou temi?” Kapau ʼe ina fakahā mai hana fia logo moʼoni pea kapau ʼe fealagia te temi, ʼe lagi ʼaoga anai ke fakaafe ia ke ina vakaʼi te tohi Le plus grand homme. ʼOsi ʼaia pea tou fakahā age te kapite 111 ʼe palalau ai ki te ʼu faʼahiga meʼa kehekehe ʼo ʼuhiga mo te fakaʼiloga ʼaē neʼe talanoa ki ai Sesu. Kapau ʼe ina tali pe te kiʼi pepa lotu, ʼe feala anai, ʼi hatatou tahi ʼaʼahi ke tou fakatokagaʼi ia ia ki he tahi kiʼi pepa lotu pe ko he kaupepa, ohage la Kote puleaga ae ka ina fakatuu anai te Palatiso peʼe ko te “Voici, je fais toutes choses nouvelles”.
5 Tou fakaue te ako faka tohi-tapu ʼi te ʼu ʼapi: Kapau ko he tahi ʼe ina tali te tohi Le plus grand homme peʼe kua nofo ia mo te tohi ʼaia, ʼe ko he meʼa lelei anai te fakahā age ki ai, ʼaki te kapite 111, pe ʼe feafeaʼi tatatou ako te Tohi-Tapu mo te hahaʼi. ʼE feala ke tou fai te fahaʼi ʼaia ʼo tatau mo te ako tohi. Kapau ʼe hoko atu te ako, ʼe feala hatatou fakaʼaogaʼi he kaupepa peʼe fai fakahagatonu ʼaki te tohi Mauli heegata.
6 Tou teuteu tuʼumaʼu ʼo taupau te fia logo ʼa he tahi. ʼE tonu ke tou maʼu he fakasiosio lelei pea ʼaua naʼa galo, ʼi te ʼosi ʼo te ʼu felogoi fuli, ke fai he fakatafito ʼo he ʼaʼahi ʼo lagaʼi he ʼu fehuʼi ʼe ʼaoga. ʼAki te aga ʼaia, ʼe tou ‘faiva katoa ia meʼa fuli moʼo fai ʼo he gāue lelei’. — 2 Tim. 3:17.