“Ko Te Ako Fakaʼatua”—Fakatahi Faka Tisitilike 1993
Ko te ʼu fakatahi faka tisitilike 1992 “Hahaʼi toʼo mālama” ʼaē neʼe hoko ʼi te telituale ʼo te filiale ʼo Niu-Kaletonia neʼe ina faka fealagia ki te toko 3 193 hahaʼi ke nātou mahino lelei ki te pilivilesio ʼonatou ko te hahaʼi toʼo mālama ʼi he mālama fakapōʼuli (2 Petelo 1:19). Ko he meʼa fakafiafia tatatou sio ki te toko 63 ia nātou neʼe foaki tonatou maʼuli ʼonatou papitema pea nātou fakatahi ki te hahaʼi tokolahi toʼo mālama! Moʼo faiva ʼi te fahaʼi ʼaia, ko te hahaʼi toʼo mālama ʼe tonu ke nātou faʼifaʼitaki ki tonatou Faiako lahi. ʼE ʼi ai moʼoni he logo ‘maʼuhiga’ ke logologo, pea ko te taʼu ʼaenī, ko te ʼu fakatahi faka tisitilike “Ko te ako fakaʼatua” ʼe tokoniʼi anai tatou ke tou fakaʼaogaʼi te logo ʼaia ko tona ʼuhiga ko te maʼuli, moʼo uga fakapotopoto ai te loto ʼo te hahaʼi (Pes. 119:160; Mat. 28:20). Ko te kau misionea ʼi te kele katoa kua nātou teuteu nei ke nātou ʼolo ki tonatou fenua ʼo kau ki te ʼu fakatahi ʼaia. Ko tokotou famili pea mo koutou, ʼe koutou fai feiā koa? He koʼe mole koutou fakaloto mālohiʼi te hahaʼi ʼaē ʼe nātou ako te Tohi-Tapu mo koutou ke nātou kau ki te fakatahi fakalaumālie ʼaia?
Koutou teuteu lelei pea koutou faikole ke koutou kau ki te fakatahi fakalaumālie ʼaia e ʼaho fā, ʼo kamata ʼaki te katiko ʼi te kamata ʼo aʼu ki te faikole fakaʼosi. Ka koutou fai he ʼu fakatuʼutuʼu ke koutou kau ki te fakatahi, manatuʼi foki ʼaki te ʼofa ia nātou ʼaē ʼe ʼaoga kia nātou he tokoni, tāfito ia nātou ʼaē neʼe hoki nātou ʼiloʼi pe te moʼoni, ke feala ai hanatou kau ki te ʼu ʼaho ʼaia e fā (Kal. 6:10). Ko te felianima, ʼe kamata te fakatahi ʼi te hola tahi vaelua pea fakaʼosi ʼi te hola nima afiafi. Ko te feliaono pea mo te moeaki, ʼe kamata ʼi te hola hiva ʼosi ʼuafulu pea fakaʼosi, ʼaki te katiko pea mo te faikole ʼi te hola nima afiafi. Ko te ʼahotapu uhu ʼe kamata ʼi te hola hiva ʼosi ʼuafulu pea fakaʼosi te fakatahi ʼi te hola fā osi hogofulu. Ko te ʼu fakamahino ʼaenī ʼe tokoni anai kia koutou ʼi takotou teuteu.
Te ʼu ʼaho pea mo te ʼu fahaʼi ʼe hoko ai te ʼu fakatahi faka tisitilike: ʼE fakatuʼutuʼu e te Sosiete ke fai pe he fakatahi e tahi ʼi Niumea ʼi te ʼaho 2 ki te ʼaho 5 ʼo sepetepeli 1993. Ko te fahaʼi ʼaē ʼe fai ai ʼe hoki fakahā atu anai. ʼI Vanuatu, ko te fakatahi ʼaia ʼe hoko anai ʼi te ʼaho 26 ki te ʼaho 29 ʼo ʼaukusito 1993 ʼi Luganville ʼi te motu ʼo Santo.
Meʼa nofo: ʼE fai anai he ʼu fakatuʼutuʼu fakatomuʼa ke faka fealagia kia nātou ʼaē ʼe mole nonofo ʼi te kolo ʼaē ʼe fai ai te fakatahi ke maʼu honatou meʼa nofo. — Sake 2:15-17; 1 Soane 3:17, 18.
Ko takotou faifaitahi ʼe ʼaoga ia: Ko te haʼele lelei pea mo te fakapotopoto ʼo te selevisi ʼo te meʼa nofo ʼe fakalogo ia ki te faifaitahi ʼa nātou ʼaē ʼe nātou kumi he koga fale (Hep. 13:17). Koia ʼaē ʼe mātou kole atu kia koutou ke koutou faifaitahi mo te selevisi ʼo te meʼa nofo ʼaē neʼe fakatuʼutuʼu e te Sosiete ke ʼaua naʼa tou felāveʼi mo he ʼu faigataʼaʼia lalahi mokā ʼe tou kumi he ʼu koga fale.
Kua tou loto ke hoko mai te ʼaho ʼaia ke tou fakatahi ai ʼi te fakatahi fakatalakitupua ʼaia. Ke tapuakina e Sehova te ʼu teuteu ki te fakatahi faka tisitilike ʼaia.