Tou Tokoni Kia Nātou Fuli ʼAē ʼe Fia Logo
1 Lolotoga te māhina ko malesio, ko tatatou tui pea mo totatou ʼofa ʼe uga ai tatou ke tou tokoni ki te hahaʼi ʼaē ʼe fia logo ki te logo ʼo te Puleʼaga pea mo fakaafe nātou ki te ʼaho Fakamanatu. ʼIo, ʼe ʼaoga ke nātou ʼiloʼi te ʼu fakatuʼutuʼu neʼe fai e Sehova ʼo ʼuhiga mo te fakamaʼuli, fakatuʼutuʼu ʼe fakatafito ki te sakilifisio faitotogi ʼo Kilisito. — Hep. 9:28.
2 Ko he manatu lelei ʼaē ke tou fai he lisi ʼo te hahaʼi ʼaē ʼe tou fia fakaafe mai ki te ʼaho Fakamanatu. ʼE tou manatu anai kia nātou ʼaē ʼe tautau ʼomai ki te ʼu fono, nātou neʼe ako ʼi te temi ki muʼa peʼe ko nātou ʼaē ʼe nātou fakahā mai hanatou faʼahiga fia logo. Ke ʼaua naʼa galo te ʼu ʼohoana kei nofo ʼi te mālama ʼonatou ʼaē ʼi te moʼoni pea mo totatou famili. ʼOsi ʼaia tou fai he faiga makehe moʼo faka felāveʼi mo nātou fuli ʼe tuʼu ʼi tatatou lisi. Ki ʼihi ʼaʼahi, ʼe ʼaoga ke kole ki he tagata ʼāfea he tokoni mai.
3 Koteā koa te meʼa ke palalau ki ai lolotoga te ʼaʼahi?
ʼI te ʼosi ʼo tatatou fakamālo fakalelei kia ia ʼe palalau mo tatou, ʼe feala anai ke tou ʼui age he meʼa ohage la:
◼ “ ʼI te temi muʼa, neʼe ke fakahā mai tau fia logo ki te ʼu meʼa fakalaumālie. Koia neʼe ʼau manatu ai leva ʼe ke fiafia anai ʼo tali te fakaafe ʼaenī ki te fono makehe. [Foaki te pepa fakaafe ki te ʼaho Fakamanatu.] Ko te ʼaho Fakamanatu ʼe ko te toʼotoʼoga pe ʼaia e tahi neʼe fakatotonuʼi e te ʼAliki ko Sesu Kilisito ki tana kau tisipulo ke fai. ʼE ko he meʼa fakafiafia anai tatatou fakamanatu ia te ʼu meʼa neʼe fakahoko e Kilisito ʼi tana foaki tona maʼuli pea, ʼaki tona sakilifisio, ʼe feala ke tou maʼu ai te maʼuli heʼegata. ʼI te taʼu kua hili, neʼe laka ʼi te 11 miliona hahaʼi neʼe ʼomai ki te ʼaho Fakamanatu. ʼE ʼau fiafia anai mokā ʼe ke haʼu mo ʼau ʼi te taʼu ʼaenī ki te ʼaho Fakamanatu.” Vakaʼi naʼa galo ke fakahā te faʼahi pea mo te hola ʼo te ʼaho Fakamanatu ʼi te pepa fakaafe. Tou ʼui age ki ai ʼe feala tatatou ʼomai ʼo kumi age ia ki te toʼotoʼoga ʼaia mokā ʼe ʼaoga.
4 ʼE tonu ke lelei tatatou aga kia nātou ʼaē ʼe ʼomai ki te ʼaho Fakamanatu. Tou tokoni kia nātou ke nātou ʼiloʼi te ʼu kau faka mafola ʼo te kokelekasio pea ke tou fakahā ia nātou ki niʼihi hahaʼi ʼi tonatou kolo. ʼE nātou leleiʼia anai mokā ʼe nātou ʼiloʼi ʼe ʼi ai niʼihi ʼi tonatou vāhaʼa fale ʼe fia logo ki te moʼoni. Kapau ʼe feala, tou fakaafe ia nātou ke nātou heheka mo totatou famili lolotoga te toʼotoʼoga ʼo te ʼaho Fakamanatu.
5 ʼE moʼoni, ʼe mole ko te haʼu pe ʼaē ki te ʼaho Fakamanatu ʼe maʼu ai ʼe he tahi te Fakamaʼuli. Kae, ki te tokolahi ʼaē neʼe tou fakaafe, ʼe lagi ko te ʼuluaki meʼa ʼe taki ai nātou ke nātou haga tui ki te taʼataʼa neʼe liligi e Sesu. ʼI tatatou kaugā ʼolo mo nātou ki tonatou ʼapi, ʼe feala ke tou fehuʼi age pe ʼe nātou fia ʼomai ki te fono ki te hahaʼi pea mo Te Tule Leʼo ʼe fai anai ʼi te ʼahotapu ki muli mai ʼo te ʼaho Fakamanatu. Ke tou agaʼi kāiga pea mo agalelei. Tou fakahā kia nātou ʼaē neʼe tou fakaafe mai ʼe tou fia tokoniʼi anai nātou ʼi te ʼu faʼahi fuli ʼe tou fealagia kiai. Kapau ʼe haʼu fakavilivili he tahi ki te ʼu fono ʼo te kokelekasio, pea ʼe toe vave ai foki mo tana tuputupu fakalaumālie. ʼE ko he fiafia pea mo he fakafimālie te maʼuli fakatahi anai ʼi te “toe mamahi lahi” mo nātou fuli ʼaē neʼe tou tokoniʼi! — Fkhā. 7:9, 14.