Ke Tau Tatatou Aga ʼi Te Fai Faka Mafola
1 ʼE tautau ʼui fēnei ko te meʼa kehekehe ʼe ina foaki he lelei ki te maʼuli. ʼE feala hatatou tautau fakaliliu he akonaki ke lelei age ʼo faigaʼi ke kehekehe tona fai. ʼE moʼoni foki te faʼahi ʼaia ʼi te fai faka mafola. Kapau ʼe mole tou tokaga ki te faʼahi ʼaia, ʼe tou fai anai te ʼu fakahā ʼe tou fai tuʼumaʼu pe. Kapau ko tatatou ʼuluaki palalau ʼe tatau tuʼumaʼu pe, ʼe fakatupu kinakina kia tatou feiā foki kia nātou ʼe fakalogo mai. ʼE tonu foki ke tau tatatou aga ʼi te fai faka mafola. Kae ʼe feafeaʼi koa te aʼu ki te faʼahi ʼaia?
2 ʼO mole ʼui age pe he meʼa ohage ko te “Fakamālo, Tagata [peʼe Fafine], ʼe mātou fai palalau mo ʼomātou vāhaʼa fale ki te logo lelei ʼo te Puleʼaga”, he koʼe ʼe mole tou fakakaukauʼi te faʼahiga fai ke kehekehe tatatou ʼu ʼuluaki palalau? Ko te tohi Comment raisonner ʼi te ʼu pasina 9 ki te 15, ʼe ʼi ai te lisi ʼo te ʼu ʼuluaki palalau ʼi te ʼu kupu tafito kehekehe e 18. ʼE lahi te ʼu faʼahi, ʼe hinoʼi mai te ʼu ʼuluaki palalau e lua ʼe ʼaoga ki te faʼahi ʼaia.
3 Kapau ʼe tou fakahā te kaupepa “ ʼE tokaga moʼoni koa te ʼAtua kia tatou?”, ʼe feala ke tou fakaʼaogaʼi te ʼuluaki palalau ʼaē ʼe tuʼu ʼi te ʼu kupu “Vie/Bonheur”, ʼi te pasina 14:
◼ “ ʼE mātou fai palalau mo te hahaʼi ʼaē ʼe nātou tuʼania fakamalotoloto te maʼuhiga ʼo te maʼuli. Ko ʼihi ʼe nātou fehufehuʼi peʼe feala te ʼiloʼi ʼo te fīmālie moʼoni. Ko te kaupepa ʼaenī ʼe talanoa ki te manatu fakaloto mālohi ʼe uga ai tatou ke tou fakakaukauʼi.” Tou avahi te kaupepa ʼi te pasina 25 pea tou lau he ʼu manatu e tahi peʼe lua ʼe ʼaoga ʼi te ʼu palakalafe 15 pea mo te 16.
4 Ko ʼihi kau faka mafola ʼo te Puleʼaga — tāfito te kau tūpulaga pea mo nātou ʼe kei foʼofoʼou, mo nātou foki ʼaē kua matutuʼa — ʼe ʼui maʼa nātou ʼe faigafua te kamata ʼo te fai palalau ʼaki te ʼu kiʼi pepa lotu.
Ko he tūpulaga kau faka mafola ʼe feala anai tana ʼui age, ʼaki tana fakaʼaogaʼi te kiʼi pepa lotu “Fiafia ʼi he maʼuli faka famili”:
◼ “ ʼE ʼi ai te logo ʼe ʼau fia fakahā atu ʼo ʼuhiga mo te meʼa ka fai anai e te ʼAtua moʼo fakaliliu ʼo te ʼu famili ke logo tahi pea mo fiafia. ʼE ʼau fia tuku atu te kiʼi pepa lotu ʼaenī Fiafia ʼi he maʼuli faka famili.” Ko te kau faka mafola ʼaē kua matumatuʼa ʼe kaugā fagona mo ia kei tūpulaga ʼe feala ke ina fakasiosio, ʼi te aga ʼa ia ʼaē ʼe fai palalau mo nāua, peʼe ʼaoga ke hoko atu te fai palalau.
5 Kapau ʼe ina fakahā mai tana fia logo, ko te kau faka mafola ʼaē kua matumatuʼa ʼe feala ke ina ʼui age:
◼ “Ko te Tohi-Tapu ʼe ina tokoniʼi tatou ʼo ʼuhiga mo te maʼua ʼo te tagata ʼohoana, ʼo te fafine pea mo te ʼu fānau ʼi te loto famili. ʼUhi ko te ʼAtua ʼaē ko te Tupuʼaga ʼo te famili, ʼe mole ʼi tau manatu, ʼe ina ʼiloʼi lelei te meʼa ke fakahā mai ʼo ʼuhiga mo tona fakahaʼeleʼi? ʼE ʼau fia ʼiloʼi tau manatu ʼo ʼuhiga mo te ʼu tokoni fakahagatonu ʼe foaki mai e te Tohi-Tapu ki te famili takitokotahi.” ʼOsi ʼaia pea ina lau anai ia Efesi 5:22, 23, 28-31.
6 Kapau ʼe tou fakahā te tohi Révélation: dénouement, he koʼe ʼe mole tou fakahāhā age te temi fakatalakitupua ka haʼu ʼe tuʼu ia Fakahā 21:3, 4? ʼOsi ʼaia pea tou lau te palakalafe 7, ʼi te pasina 303. Tou fehuʼi kia ia ʼaē ʼe fai palalau mo tatou peʼe ko he fakapotopoto mokā ʼe tou tui ʼe fakahoko anai e te ʼAtua tana ʼu fakapapau. ʼAki te fakasiosio fakanounou mo ia te ʼu lea faka polofeta ʼo te Tohi-Tapu ʼaē kua ʼosi hoko, ʼe tou fakaloloto anai tana falala ʼaē ki te mālohi ʼo te ʼAtua ʼo ina tapuakina te hahaʼi katoa.
7 Ko te kau faka mafola fuli ʼo te Puleʼaga ʼe nātou fia kaugana ki te teokalasia, ʼo nātou to te ʼu fua ʼo te moʼoni ʼi te potu ʼaē ʼe fealagia ai, pea mo taupau te fia logo. ʼI te ʼosi fai ʼo tatatou gāue, ʼe feala leva ke tou tuku ʼaki te falala katoa ia te tuputupu ki te ʼu nima ʼo Sehova. ʼE ia tatou he logo ʼe lelei age ia, ke vaevae mo totatou kāiga. ʼAki tatatou teuteu lelei tuʼumaʼu, ʼe tou fakahā anai te logo ʼo te Puleʼaga ʼaki te faiga ke tau tatatou aga pea mo tui mālohi.