ʼE Tonu Ke Lahi Te ʼu Fale ʼo Te Puleʼaga ʼUhi Ko Te Tuputupu ʼo Te Hahaʼi

¹ Neʼe kua fualoa te fakakikite e te polofeta ʼa Sehova “ ʼe tonu anai ke hū ia te ʼu meʼa ʼaē ʼe manakoʼia ʼo te ʼu puleʼaga fuli”. (Asea 2:⁠7.) ʼE tou fakatokagaʼi moʼoni ko te akonaki fakaʼatua ʼe ina ʼaumai te hahaʼi tokolahi ke nātou ʼiloʼi te moʼoni pea ke nātou liliu ko te kau atolasio kia Sehova. ʼI meʼa fakafiafia hatatou fakatokagaʼi ia te toko 135 neʼe papitema lolotoga te taʼu gāue 1993 ʼi totatou telituale! Koia moʼo tokoni ki te ʼu hahaʼi foʼou ʼaia, ʼe tonu ke tou ‘fakahaga totatou loto ki totatou ala’ ke tou ʼiloʼi lelei ai peʼe tou lagolago ki te gāue fakaʼatua ʼaki ʼatatou ʼu fealagia fuli (vakaʼi ia Asea 1:⁠5). Koia, ko tatatou kau ki te laga ʼo te ʼu fale ʼe ʼaoga ki te tauhi, moʼo tali ʼo te kau atolasio foʼou ʼaia ʼa Sehova, ʼe ko he faʼahi maʼuhiga ia ʼo tatatou lagolago ki te gāue fakaʼatua.

² Ko te Kesi ʼa te Sosiete maʼa te ʼu Fale ʼo te Puleʼaga neʼe fakatuʼutuʼu talu mai ʼapelili 1992 ʼi totatou filiale pea neʼe ina faka fealagia ki te ʼu kokelekasio e 14 ke nātou maʼu tanatou ʼu Fale foʼou ʼo te Puleʼaga. Lolotoga te taʼu gāue 1993, ko te ʼu kokelekasio e 5 neʼe tali tonatou ʼu maʼua ʼo ʼuhiga mo te laga ʼo tanatou Fale ʼo te Puleʼaga. ʼE ko he meʼa fakafiafia tatatou fakatokagaʼi pe neʼe feafeaʼi te foaki fakavilivili e te kau faka mafola ʼo nātou lagolago paʼaga ki te kesi ʼaia. Ko te paʼaga ʼaē ʼe toʼo mai te ʼu kokelekasio ʼe tuku ki te ʼu kesi ke tuputupu, pea ko te ʼu meʼa ʼofa ʼaia ʼe hoko atu tona ʼaoga, ʼi te taʼu mo te taʼu, moʼo laga ʼo he ʼu Fale ʼo te Puleʼaga.

³ Te tokoni ʼa te komite laga fale fakakolo: Ko tatatou komite laga fale fakakolo ʼe tokoni ki te ʼu tagata ʼāfea ʼaē ʼe nātou fakasiosio te ʼu gāue lolotoga he laga fale peʼe ko te fakafoʼou ʼo te ʼu Fale ʼo te Puleʼaga. ʼE tokoni kia nātou ke nātou fakafuafua peʼe ʼaoga he fale foʼou peʼe ko te fai ʼo he ʼu gāue ʼi te Fale ʼo te Puleʼaga kua ʼosi fakatuʼu pea ʼe ina foaki ake te tokoni ia muʼa ʼo te toʼo ʼo te kele ʼo aʼu ki te fakaʼosi ʼo te gāue. Ko te ʼu kokelekasio fuli ʼe fakalogo ki te komite ʼaia.

⁴ Ko te ʼu lauʼi teau hahaʼi neʼe kau ki te fakafoʼou ʼo te ʼu fale peʼe ko te laga ʼo te ʼu Fale ʼo te Puleʼaga. Ko te kau gāue ʼaia, ʼo kau ai te tokolahi kua māhani pea mo te ʼu tagata tufuga faiva ʼi te gāue ʼaia, ʼe nātou foaki tonatou temi pea mo tonatou mālohi ʼi te ʼu faʼahi kehekehe ohage ko te totogi ʼo te kele, te ʼu pepa faka puleʼaga, te fakatuʼutuʼu ʼo te gāue, te teuteuʼi ʼo te fakaʼui ʼo te ʼu meʼa gāue. Ko tanatou tokoni ʼe fai mai te totogi ʼo te ʼu meʼa gāue ʼaoga ʼe totogi lelei ʼo aʼu ki te teuteuʼi ʼo te kele pea mo te tokaga ki te fakaʼaluʼalu ʼo te gāue. Ko he meʼa lelei tanatou lagolago manavaʼofa ki te ʼu meʼa ʼe ʼaoga ki te Puleʼaga ʼaki ʼanatou koloā, pea ʼe ina foaki mai te ʼu tapuakina lahi mai ia Sehova. — Taag. 11:⁠25.

⁵ ʼE tonu anai ke faka felogoi te ʼu tagata ʼāfea ki te komite laga fale fakakolo mokā kamata fakatuʼutuʼu e te kokelekasio he fakafoʼou ʼo he fale peʼe ko he laga ʼo he fale foʼou. Koteā tona tupuʼaga? Ko te komite fakakolo ʼe ina maʼu te ʼu fakatuʼutuʼu moʼo taki ʼo te ʼu kokelekasio ʼi tanatou ʼu fakatuʼutuʼu. ʼE tonu ke tokaga lelei ki te fili ʼo te kele, ʼo mole gata pe ʼi te totogi, kae ke tokaga ki ʼihi age ʼu faʼahi. Ko te totogi ʼo te kele ʼe feala leva ke fakakau kiai ʼihi age faʼahiga meʼa: ko he ʼu gāue lahi ʼaupito moʼo tele ʼo te kele, ko te fakamaʼa ʼo te kele mai he ʼu faʼahiga meʼa fakatupu tuʼutāmaki peʼe ko he ʼu meʼa kovi mo he ʼu faigataʼaʼia mo te telepinale. Ki te ʼu kokelekasio ʼaē ʼe ʼaoga kia nātou he tokoni paʼaga ʼa te Sosiete, ʼe maʼu e te komite fakakolo te pepa ʼaē Fakaʼui maʼua ki he fakatuʼutuʼu ʼo he Fale ʼo te Puleʼaga (Kingdom Hall Loan Survey) pea ʼe feala hana tokoni ki te ʼu tagata ʼāfea ʼo ʼuhiga mo te tohi ʼo te pepa ʼaia.

⁶ Neʼe foaki e te Sosiete ki te komite laga fale fakakolo te ʼu faʼahiga paki ʼo te ʼu Fale ʼo te Puleʼaga. Ia muʼa ʼo te fili ʼo tanatou fale, ʼe tonu anai ke faka felogoi te ʼu tagata ʼāfea ʼo te kokelekasio ki te komite fakakolo pea ke nātou vakaʼi fakatahi te paki ʼo te fale katoa ʼo mulimuli pe ki te ʼu paki ʼa te Sosiete. Ko te faʼahi ʼaia ʼe fakasiʼisiʼi ai tona totogi pea mo faka fealagia ki te kokelekasio ke ina fili he fale ʼe lelei, kae ʼe feala tona fakaʼaogaʼi, ʼo fakaʼaluʼalu pe ki te faʼahiga laga ʼo te fale ʼi te faʼahi ʼaia.

⁷ ʼE tonu ke taupau maʼu te ʼu tosie ʼo ʼuhiga mo te fakaʼaluʼalu ʼo te falā ke totonu pea ke mahino lelei. Ko te ʼu tēhina faiva ʼe nātou foaki tonatou temi ki te komite laga fale moʼo tokoni ki te ʼu kokelekasio ke nātou fai he fakatuʼutuʼu ʼo ʼuhiga mo te fakaʼaluʼalu ʼo te falā ʼe ʼaoga pea ke nātou mulimuli ki ai. Ko ʼihi ʼe kaugā gāue mo te komite ʼo nātou tohi mo te ʼu kokelekasio te ʼu fehuʼi pea mo te ʼu pepa fakaʼui maʼua. ʼE maʼuhiga tanatou tokoni, koteʼuhi ko te ʼu tagata ʼāfea ʼo te ʼu kokelekasio ʼe mole nātou tatau mo te ʼu tēhina faiva ʼaia kua māhani ʼi te gāue ʼi te ʼu fakatuʼutuʼu ʼo ʼuhiga mo te fakaʼaluʼalu ʼo te falā ki te ʼu Fale ʼo te Puleʼaga. ʼI te fakaʼosi ʼo te gāue, ʼe maʼu e te komite fakakolo he pepa ʼe tuʼu katoa ai te paʼaga ʼaē neʼe fakaʼaogaʼi ki te faʼahi ʼaia.

⁸ Ko te hahaʼi neʼe punamaʼuli ʼi tanatou mamata ki te gāue: Ko te tokoni ʼa te laumālie maʼoniʼoni ki te ʼu tēhina ʼaē ʼe gāue ʼi te ʼu Fale ʼo te Puleʼaga ʼe ina fai he fakamoʼoni mālohi. Ko te tagata pule ʼa te sosiete neʼe ina fakatau te papa ki he fale neʼe ina tohi fēnei: “ ʼE mole heʼeki ʼau ōfo feiā ohage ko taku sio ʼaē ki te gāue ʼa te kau Fakamoʼoni lolotoga te laga fale. Neʼe ko he faʼahi ʼe lelei pea mo maʼuhiga, pea ʼe ʼau fiafia ʼi taku kau ki ai. ʼE tau mo koutou pea mo takotou hahaʼi te fakamālo, pea ʼe ʼau fakaʼamu ke lahi he ʼu fua manuʼia ʼi ʼakotou ʼu fakatuʼutuʼu.”

⁹ ʼI te tahi faʼahi, ko te tagata tufa meʼa gāue neʼe ina tuku tana tagata gāue ke haʼu ʼo gāue ʼi he ʼu hola ʼi te ʼu ʼaho ʼaia e tolu. ʼE fakamatala e te tagata ʼaia: “Neʼe maʼuhiga ki toku maʼuli taku gāue tahi mo koutou lolotoga te fakaʼosi vāhaʼa ʼaenī. ʼI te temi ʼaenī kua kehe leva taku manatu ʼo ʼuhiga mo te kau Fakamoʼoni ʼa Sehova! ʼE mole gata pe takotou faiga ʼi takotou fisifisi te ʼu matapā. Neʼe ʼau fiafia ʼi taku kau ki te gāue. ʼAua naʼa koutou punamaʼuli mokā ʼe ʼau kau ki takotou fono.”

¹⁰ ʼI te ʼosi ʼo he laga fale, neʼe tohi fēnei e te tagata pule kolo ʼo ina fakafofoga te kolo katoa: “Neʼe mātou punamaʼuli ʼi tamatou sisio ki te ʼu hahaʼi ʼe lauʼi teau ʼe kaugā gāue pea mo nātou laga fakavilivili te fale. ʼE ko he fale matalelei. Neʼe punamaʼuli ʼamatou hahaʼi ʼi te fai fakavilivili ʼo te ʼu gāue. Ko te Fale foʼou ʼaia ʼo te Puleʼaga ʼe ina fakamatalelei moʼoni te kolo, pea ʼe mātou leleiʼia tokotou fale pea mo tokotou kokelekasio.”

¹¹ ʼE ʼaoga ke lahi te hahaʼi gāue: Ko te komite fakakolo ʼe faiga ke ina fakaʼaogaʼi te hahaʼi faiva gāue ʼi te ʼu kokelekasio ʼaē ʼe nātou fakaʼaogaʼi anai te Fale ʼo te Puleʼaga ʼaē ʼe tonu ke laga peʼe ko he gāue ʼe fai ʼi he fale kua ʼosi fakatuʼu. ʼE nātou kaugā gāue foki mo ʼihi ʼu tēhina ʼo te kolo, tāfito te ʼu tagata ʼāfea pea mo te ʼu tagata faifekau faka minisitelio, pea mo akoʼi nātou ʼo ʼuhiga mo te ʼu gāue. Ko te ʼu tēhina faiva ʼaia ʼe nātou fakaʼaogaʼi anai tonatou ʼu faiva ki niʼihi ʼu gāue ʼi te kolo. ʼE tonu foki ko nātou ʼaē ʼi te kokelekasio ʼe nātou fakatuʼutuʼu ke laga he fale ʼe ʼaoga ke nātou lotolelei pea ke nātou gāue fakatahi; ʼe mole feala ke fakaʼui ki te komite fakakolo pea mo te ʼu tēhina ʼaē ʼe kau ki ai ke nātou tokakaga ki te gāue katoa (Neh. 4:6b). Ko te ʼofa ʼe tonu anai ke ina ʼekenaki te ʼu tēhina ʼaē neʼe akoʼi ke nātou foaki tonatou faiva ki te gāue ʼa ʼihi kokelekasio ʼaē ʼe laga fale peʼe nātou fai he ʼu gāue ʼi te Fale ʼo te Puleʼaga, pea ʼe ʼaoga lahi kia nātou he ʼu fale. — Neh. 5:19; Filp. 2:​3, 4. 

¹² Ko te kau faka mafola ʼaē kua papitema ʼaē ʼe ʼi ai honatou faiva ʼi te laga fale peʼe ko niʼihi faʼahi pea ʼe ʼiloa nātou ʼi te kokelekasio ko ni hahaʼi ʼe agapoto, ʼe fakaloto mālohiʼi nātou ke nātou foaki ia nātou ʼonatou kau ki te gāue lahi ʼaia. ʼE nātou maʼu anai mai te tagata taupau pelesita peʼe ko te sikalaipe te ʼu pepa ke nātou tohi ai tonatou faiva ʼi te laga fale peʼe ko niʼihi faʼahi ohage ko te gaohi meʼa kai, te tokalelei, te totogi ʼo te ʼu meʼa gāue, te faka au ʼo te falā, pea mo te fakatuʼutuʼu ʼo te ʼu pepa. (Kapau ʼe mole kei ʼi ai he ʼu pepa ʼi te kokelekasio, ʼe feala tana kole ki te Sosiete mokā ʼe ina ʼave tana pepa fakaʼui tohi ʼi te māhina.) Ko tatatou tali te pāui ʼaia, ʼe tou fakahā ai anai totatou ʼofa ki totatou kāiga — totatou ʼu tēhina faka kilisitiano. — Mat. 7:12; 22:39; Soane 13:⁠35.

¹³ Ko te tokoni ʼa te hahaʼi gāue ʼe leleiʼia: Tokosiʼi ʼe nātou mahino ki te toe gāue ʼaē ʼe fakapipiki ki te laga ʼo he Fale ʼo te Puleʼaga ʼo aʼu ki tanatou kau ki te gāue ʼaia. ʼI te ʼosi laga ʼo tanatou Fale ʼo te Puleʼaga, neʼe tohi fēnei e te ʼu tagata ʼāfea: “Ko te ʼu tokoni ʼaē neʼe tuku mai e te ʼu tēhina ʼo te komite laga fale fakakolo neʼe ko he tapuakina moʼoni. Mokā mātou manatuʼi te tokoni neʼe nātou foaki mai kia mātou, ʼaki tanatou takitaki te gāue pea mo te fakaʼaluʼalu lelei ʼo te kau gāue faiva, ʼe mole feala ke galo ia mātou ia 1 Petelo 5:​2, 3, ʼaē ʼe tou lau ai ʼe tonu ke fafaga te faga ōvi ‘ke ʼaua naʼa fai fakakinau, kae ʼaki te lotolelei; ʼaua naʼa fai ʼaki te holi ki te meʼa ʼe mole faitotonu, kae ʼaki te fakavilivili; ʼaua naʼa hage ko ni hahaʼi ʼe fia pule kia nātou ʼaē ko te tofiʼa ʼa te ʼAtua, kae ke liliu ko he ʼu faʼifaʼitaki ki te faga ōvi’. Ko te ʼu tēhina ʼaia ʼe nātou tuku te faʼifaʼitaki lelei ʼi te gāue kia Sehova. Lolotoga te temi katoa ʼaē ʼe fai ai te gāue, neʼe tuʼa lahi te feʼoloʼaki ʼa te ʼu tēhina, ʼo nātou ʼōmai mai mamaʼo, ʼo lahi te ʼu hola neʼe nātou fakaʼaogaʼi, ʼo nātou tuku tanatou meʼa gāue, pea mo nātou foaki he ʼu meʼa gāue, ko te ʼu meʼa fuli ʼaia moʼo tokoni kia tatou ʼo ʼuhiga mo te laga ʼo tatatou Fale ʼo te Puleʼaga. Ko te manavaʼofa ʼo te ʼu tēhina ʼaia ʼe fakahā ʼaki ai ʼe nātou ‘ ʼoʼofa ki te famili fakatautehina’, pea ʼe ko te faʼifaʼitaki maʼuhiga ʼaia neʼe tuku mai kia tatou! — 1 Pe. 2:17.”

¹⁴ Ko te lotolelei pea mo te faiva ʼo te ʼu tēhina ʼe hā lelei, ohage ko tona tohi ʼaenī: “ ʼI meʼa fakafiafia leva tatatou sisio ki te ʼu kokelekasio lea faka kolea, faka sepania, pea mo fakapilitānia ʼe gāue tahi feiā ʼo nātou atolasio kia Sehova ʼi te logo tahi!” Ko te ʼu palalau ʼa te Pesalemo 133:​1, 3 ʼe hoko moʼoni: “Koʼeni! ʼE ko he meʼa lelei pea mo logo lelei ki he ʼu tēhina hanatou nonofo fakatahi ʼi te logo tahi! ” Ko he tagata ʼāfea ʼe gāue mo he komite fakakolo neʼe palalau ki te pilivilesio lahi ʼaē ko te kaugana ki tona ʼu tēhina, neʼe ʼui maʼana “ko te ʼu kokelekasio ʼe fakaloto mālohiʼi foki ia nātou e te ʼu tēhina ʼaia ʼe ʼōmai mai mamaʼo moʼo tokoni kia nātou ke nātou fai fakalelei tonatou maʼua kia Sehova. (...) ʼE tou fakatahi moʼoni ko he famili fakatautehina, ʼo logo tahi ʼi te ʼofa”!

¹⁵ ʼAki te fakafetaʼi ʼo ʼuhiga mo te ʼu gāue neʼe fai ʼi te Fale ʼo te Puleʼaga, neʼe tohi fēnei e he tagata taupau pelesita: “ ʼI tamatou kokelekasio ʼe lahi ai te ʼu tēhina matutuʼa, pea neʼe mole feala tamatou fai ʼāteaina pe te gāue ʼaia. ʼE mātou fakamālo lahi atu, kia koutou pea mo te ʼu tēhina ʼaē ʼe hage ko koutou ʼe ia nātou te ʼofa ʼo Sehova pea ʼe mole gata ʼaki pe ʼi tanatou maʼu te ʼofa ʼaia kae ʼe nātou fakahā. ʼE mātou fia fakahā ki ʼomātou ʼu tēhina: ‘Ke hoko atu te lelei ʼo takotou gāue.’ Ko ʼakotou faiga ʼe leleiʼia e te tokolahi ʼi ʼotatou ʼu kaumeʼa pea ʼe mahino papau ia ʼe fiafia ai totatou Tāmai, ko Sehova.” Neʼe tohi fēnei e te tahi komite laga fale: “ ʼE mātou ʼiloʼi te kinakina ʼo te gāue ʼaē neʼe kau ki ai te tokolahi (Film. 21). Neʼe ʼui fēnei e te hahaʼi ʼo te koga meʼa ʼaia: ‘Ko Sehova ʼe nofo mo koutou! ’ ”

¹⁶ Ko tanatou lagolago paʼaga ʼe ʼaoga: Ko te ʼu meʼa ʼofa ki te Kesi ʼa te Sosiete maʼa te ʼu Fale ʼo te Puleʼaga neʼe tokoni ki te ʼu kokelekasio ʼi te temi kua hili pea ʼe mahino papau ia ʼe hoko atu anai tana fai te faʼahi ʼaia. ʼE mole tuku mai koa e Sehova te faʼifaʼitaki lelei ʼo ʼuhiga mo te foaki ʼaki te ʼofa (Sake 1:17)? Kapau ʼe moʼoni ʼe mole tatau tatatou ʼu fealagia, kapau ʼe tou tokakaga ki te ʼu meʼa ʼe tou fakaʼaogaʼi takitokotahi ʼe feala ai pe ke tou lagolago katoa ia te gāue laga fale. Ko te manavaʼofa ʼaia ʼe ina fakafiafia moʼoni ai te loto ʼo Sehova, pea ʼe ina tuku he loto mālohi ki ʼotatou ʼu tēhina.

¹⁷ “Ko he hahaʼi tokolahi” ʼe ʼāsili tona lahi ʼe nātou tali lelei te logo ʼo te Puleʼaga. “Ko te ʼu meʼa manakoʼia” ʼe ʼōmai ki te fale lotu fakalaumālie ʼo Sehova, ʼaē ‘ ʼe fakafonu ai tona fale ko te kolōlia’. (Fkhā. 7:⁠9; Asea 2:⁠7.) Ohage ko te faʼifaʼitaki ʼo te kau Sutea ʼi te temi ʼo Asea, ke tou fakahaga totatou loto ki te gāue ʼa te ʼAtua, pea ke tou lagolago fakalelei te laga ʼo te ʼu Fale ʼo te Puleʼaga, heʼe ʼaoga ʼaupito. Ko te ʼu Fale matamatalelei ʼo te Puleʼaga ʼe lauʼi afe neʼe laga ʼi te ʼu taʼu kua hili, kae ʼe hoholo fakavilivili tona tuputupu. Ko tatatou lagolago tuʼumaʼu ki te Kesi ʼa te Sosiete maʼa te ʼu Fale ʼo te Puleʼaga ʼe ko he faʼahi lelei ʼaia ke tou kau ai ki te gāue fakaʼatua.