Ke Koutou Lagolago Katoa Ki Te Fono Ki Te Hahaʼi Fuli ʼo Tokotou Kokelekasio
1 ʼI he ʼu taʼu kua hili neʼe maʼu e he tūpulaga he pepa fakaafe ki te ʼu fono ʼo te kokelekasio ʼo te kolo. Talu tana kumi te moʼoni, neʼe ina fakatuʼutuʼu ke kau ki te Fono ʼo te kokelekasio ʼi te ʼAhotapu, ʼo ʼalu fakatomuʼa. Neʼe fakamālo fakafiafia age he tahi ʼe fai faka mafola pea, lolotoga tana fai palalau, neʼe ina fakaafe ia ia ke fai hana ako faka Tohi-Tapu mo ia, ka neʼe fakafisi age ia. Kae, neʼe punamaʼuli ia ʼi te lelei ʼo te teuteuʼi ʼo te akonaki ʼaē ki te hahaʼi ʼo fetogi ai tana manatu, pea ʼi te hili ʼo te fono neʼe ina tali ke fai hana ako Tohi-Tapu. Ko te tūpulaga ʼaia neʼe vave tana tuputupu ʼi te faʼahi fakalaumālie pea neʼe papitema ia ʼi he ʼu māhina ki muli age. ʼE feala ai foki ke tou maʼu he ʼu ako e tolu mai te faʼifaʼitaki ʼaia.
2 ʼUluaki, ko te Fono ki te Hahaʼi fuli neʼe logologo. ʼE koutou fakaʼaogaʼi koa te ʼu kiʼi pepa neʼe tā moʼo logologo ʼo te polokalama ʼo te fono ki te hahaʼi fuli ʼo tokotou kokelekasio? Ka fakahā e te pelesita te kupu tāfito ʼo te akonaki ki te hahaʼi fuli ʼaē ka fai ʼi te vāhaʼa ka hoko mai, koutou manatuʼi te hahaʼi ʼi tokotou telituale ʼaē ʼe lagi fia logo tāfito ki te akonaki ʼaia, tatau aipe pe nātou lau ʼatatou ʼu tohi peʼe kailoa. Ko ʼihi hahaʼi ʼe mole nātou fia lautohi, peʼe faigataʼa ʼaupito tanatou lautohi, kae e lagi nātou fia fakalogo ki he akonaki faka Tohi-Tapu.
3 Lua, neʼe fakamālo fakafiafia age kia ia ʼaē neʼe hoki haʼu. Kapau ʼe koutou fakatuʼutuʼu ke koutou ʼōmai fakatomuʼa ki te fale fono, ʼe feala hakotou fakamālo ki ʼokotou tēhina pea mo tuagaʼane ʼo feiā aipe mo nātou ʼaē ʼe fia fai ki te moʼoni. (Hep. 10:24) Kapau ko he tahi ko tana hoki haʼu ʼaē ki te fono, e lagi feala pe ke mole ina ʼiloʼi te meʼa ʼaē ka hoko. Koutou fakamahino age ko ʼatatou ʼu fono ʼe kamata ʼaki te katiko pea mo te faikole, pea koutou fakahā age peʼe feafeaʼi te fakaʼaluʼalu ʼo te fono. Kapau ʼe feala, koutou fakaafe ia ia ke nofo fakatahi mo koutou ke feala ai hana mulimuli mo koutou ki te Tohi-Tapu pea mo hiva te katiko. Koutou fakaafe ia ia ke fai palalau mo koutou ki he ʼu fehuʼi ʼi te hili ʼo te fono.
4 Tolu, neʼe lelei te teuteuʼi ʼo te akonaki. Ko nātou fuli ʼaē ʼe nātou maʼu te pilivilesio ʼaē ko te fai ʼo he akonaki ʼi te kokelekasio ʼe nātou fakaʼaogaʼi he temi loaloaga moʼo teuteuʼi pea mo liuliuga te akonaki ʼaia moʼo uga ia nātou ʼaē ʼi te fono ke lahi tonatou ʼofa pea ke lelei tanatou ʼu gāue. ʼE tou tau fuli mo te ʼu faigataʼaʼia ia ʼaho nei, pea ko te ʼu moʼoni fakatupu lotomāfana ʼo te Folafola ʼa te ʼAtua ʼe ko te meʼa ʼaia ʼe ʼaoga kia tatou ke feala ai hatatou faʼa kātaki. ʼIo, tatau aipe peʼe ʼaoga te manatu ʼo te akonaki, ʼe mole hona maʼuhiga kia tatou takitokotahi mokā ʼe mole tou tokagaʼi te meʼa ʼaē ʼe talanoa ki ai te akonaki. ʼE faigataʼa koa takotou fakalogo ki te akonaki? E lagi ʼaoga ke koutou tohi he ʼu nota fakanounou, ohage pe ko tatatou fai tuʼumaʼu ʼi tatatou ʼu fakatahi. Koutou faiga ke koutou mulimuli ʼi takotou Tohi-Tapu te ʼu vaega fuli ʼaē ʼe lau pea mo fakamatala.
5 Neʼe fakatuʼutuʼu e te Sosiete te ʼu akonaki ki te kokelekasio ʼe lahi tona ʼu manatu faka Tohi-Tapu. Kae ʼaki te tagata taupau pelesita peʼe ko he tēhina neʼe ina hinoʼi, ko te ʼu tagata ʼāfea ʼo te kokelekasio ʼe nātou fakaʼaluʼalu te polokalama ʼo te Fono ki te hahaʼi fuli ʼo te kokelekasio. Ko te ʼu akonaki neʼe fai e te Sosiete neʼe fili ʼo mulimuli ki te ʼu meʼa ʼe ʼaoga ki te kokelekasio. Ke ʼaua naʼa galo he talanoa maʼuhiga, pea ke koutou lagolago katoa ki te Fono ki te hahaʼi fuli ʼo tokotou kokelekasio ʼi te vāhaʼa fuli.