“Te ʼu Meʼa ʼe Fehiʼaʼinaʼi e Te ʼu Puleʼaga Katoa”
1 ʼI te ʼu taʼu ʼaenī neʼe tou fiafia fuli ʼi tatatou fakalogo ki te ʼu fakamatala fakatalakitupua ʼo ʼuhiga mo te ʼu tapuakina fakaofoofo ʼa te hahaʼi ʼa Sehova ʼi te malamanei. Ko te faka fealagia katoa ʼo te gāue ʼi Malawi ʼi te ʼosi ʼo te ʼu taʼu e 26 mo tonatou gaohi koviʼi neʼe uga ai tatou ke hali ʼotatou loʼimata ʼi totatou fiafia. Neʼe tou maʼu he fīmālie ʼi tatatou mamata ki te tō ki lalo ʼo te Kominisi heletiko ʼi te Eulopa ʼo te Potu Hahake ʼo ʼāteaina ai te ʼu tēhina ʼe lauʼi afe mai te maʼuli popūla ʼaia. Neʼe ia tatou te tuʼania ʼi tatatou logo ki te ʼu faʼahiga meʼa neʼe hoko ʼi te fakafeagai ʼaē ki te tauhi ʼi Heleni; neʼe tou fiafia ʼi tatatou maʼu te mālo fakatalakitupua ʼi muʼa ʼo te telepinale lahi ʼo te Eulopa. Neʼe tou fiafia ʼi te ʼu fakamatala ʼo ʼuhiga mo te mafola ʼo te ʼu filiale ʼo te Sosiete ʼaē neʼe faka fealagia ai te tā ʼo te ʼu tohi maʼa te hahaʼi ʼaē ʼe nātou kumi te moʼoni. Neʼe tou fakafiafia ʼi tatatou ʼiloʼi neʼe laka ʼi te 7 400 hahaʼi neʼe papitema ʼi te fakatahi ʼi Kiev, ʼi Ukraine. ʼIo, ko te ʼu tuputupu fakaofoofo ʼo te gāue ʼo te Puleʼaga ʼe fakatuputupu ai totatou fiafia!
2 Logope la ʼe ʼi ai te ʼu tupuʼaga ʼo tatatou fiafia, ʼe tou tokakaga ke ʼaua naʼa tou fiafia fakavale. Ko te ʼu fakamatalatala lelei ʼe feala ke nātou ʼeke ia tatou ke tou ʼui kua siʼisiʼi te fakafeagai ki te logo lelei pea ko te hahaʼi ʼa Sehova kua tali lelei ʼi te mālama. Ko te taʼi manatu ʼaia ʼe feala ke nātou fakahalaʼi tatou. Logope la tatatou maʼu he ʼu mālo pea mo te fua lelei ʼo tatatou tauʼi he ʼu faigataʼaʼia ki te logo lelei ʼi he ʼu fenua, ʼe mole galo ia tatou ko tatatou aga ki te mālama ʼe mole heʼeki fetogi. ʼI totatou ʼuhiga tisipulo ʼa Sesu, “ ʼe mole tou kau ki te malamanei.” ʼAki te faʼahi ʼaia, ʼe tou ʼiloʼi papau ko tatou ko te “ ʼu meʼa ʼe fehiʼaʼinaʼi e te ʼu puleʼaga katoa.” (Soane 15:19; Mat. 24:9) Lolotoga te tuʼu ʼo te faʼahiga meʼa ʼo te tuʼu ʼaenī, ʼe mole ʼi ai he meʼa ʼe ina fetogi te fakatuʼutuʼu tāfito ʼaē “ko nātou katoa ʼaē ʼe fia maʼuli ʼaki te fia pipiki ki te ʼAtua ʼi te fakatahi mo Kilisito Sesu ʼe toe fakatagaʼi anai mo nātou.”—2 Tim. 3:12.
3 Ko te hisitolia ʼe ina fakamoʼoni ia te totonu ʼo te fakatotonu ʼaenī. Logope la ko Sesu, te Tafitoʼaga ʼo te lotu faka Kilisitiano, neʼe ina tuku he fakamoʼoni fakaofoofo ia muʼa ʼo te ʼu pule mālohi pea mo tanatou hahaʼi gāue, neʼe tau ia ʼi te ʼaho fuli mo te ʼu mamahi pea neʼe teitei pe ia ke mate. Kae mo tana kau ʼapositolo neʼe nātou tokoni te tokolahi ke nātou liliu ko te ʼu tisipulo, neʼe nātou kau fakatahi ki te tohi ʼo te ʼu Tohi Faka Keleka faka Kilisitiano ʼo te Tohi-Tapu, pea neʼe nātou fakahā te mālohi ʼo te laumālie, ka neʼe fehiʼaʼinaʼi nātou pea mo gaohi koviʼi. Logope la te lelei ʼo tanatou aga pea mo tonatou ʼoʼofa ki tonatou ʼu kāiga, neʼe ʼui e te tokolahi ko te kau Kilisitiano ko he “magaʼi lotu” vaʼiganoa ʼaē ʼe ‘talanoa koviʼi ʼi te potu fuli.’ (Gāue 28:22) Logope la ko te kokelekasio faka Kilisitiano ʼi te malamanei ia ʼaho nei neʼe fakaʼaogaʼi tāfito e Sehova moʼo fakahoko ʼo tona finegalo, ka neʼe hoholo atu pe tona fakatagaʼi pea mo talanoa koviʼi e te ʼu fakatuʼutuʼu fuli ʼo te tuʼu ʼo te faʼahiga meʼa agakovi ʼaenī. Ke ʼaua naʼa tou ʼui ʼe fakagata anai te fakafeagai.
4 ʼI te ʼuluaki sēkulō, neʼe fakatagaʼi e Satana te ʼu tisipulo ʼa Sesu ʼi te ʼu faʼahi kehekehe. Ko te hahaʼi fakafeagai ʼaē ʼe fonu ʼi te fehiʼa neʼe nātou ʼulihi te kau tisipulo ʼaki te ʼu talanoa loi. (Gāue 14:2) Neʼe faigaʼi ke nātou matataku. (Gāue 4:17, 18) Ko te hahaʼi tokolahi ʼitaʼita neʼe nātou faigaʼi ke nātou fakalogologo. (Gāue 19:29-34) Neʼe pilisoniʼi nātou ka mole hona tupuʼaga. (Gāue 12:4, 5) Ko tonatou ʼu fili neʼe nātou tautau fakaʼaogaʼi te agamālohi fakasino. (Gāue 14:19) ʼI ʼihi faʼahi neʼe matehi te hahaʼi agatonu. (Gāue 7:54-60) Neʼe kātakiʼi e te ʼapositolo ko Paulo te ʼu faʼahiga fakataga ʼaia. (2 Ko. 11:23-27) Ko te hahaʼi fakafeagai neʼe nātou faigaʼi pe te faʼahi moʼo fakagata ʼo te gāue faka mafola pea mo fakatagaʼi ʼo te kau gāue faitotonu ʼaia.
5 Ia ʼaho nei ʼe toe fakaʼaogaʼi pe e Satana te ʼu faʼahiga meʼa ʼaia. ʼE fai te ʼu talanoa loi, ʼo ʼui ai ko tatou ko he magaʼi lotu peʼe ko he tauhi hāla. ʼI ʼihi fenua, neʼe ʼui e te ʼu puleʼaga ko ʼatatou ʼu tohi ʼe fakatupu kovi pea mo tapuʼi tona tufa. Ko tatatou fakaʼapaʼapa ki te toto neʼe vaʼiganoaʼi pea mo fakafeagai kiai te hahaʼi. ʼI te taʼu 1940 ki te 1945, neʼe lahi te ʼiʼita ʼo te tokolahi ʼo ʼuhiga mo te fakaʼapaʼapa ki te fuka ʼo nātou tauʼi ʼotatou tēhina, ʼo lavea ai ʼihi ia nātou, pea mo maumauʼi ʼonatou ʼu koloā. Ko te ʼu lauʼi afe neʼe ʼave ʼo pilisoniʼi ʼuhi ko tanatou ʼāteaina mai te ʼu meʼa ʼo te mālama. ʼI te ʼu fenua ʼaē ʼe pule fakahau neʼe tukuga koviʼi hala ʼotatou ʼu tēhina ʼo ʼui ʼe nātou fakafeagai ki te fakatuʼutuʼu kua ʼosi fai, ʼo tupu ai te fakatagaʼi pea mo te mamate ʼo te ʼu tēhina ʼe lauʼi teau ʼi te fale pilisoni pea mo te ʼu lotoʼā fakamamahi. Neʼe mole heʼeki gata te fakataga, ʼo hā lelei ai ko tatou ko te ʼu meʼa fehiʼaʼinaʼi ka mole hona tupuʼaga.—Vakaʼi te tohi Prédicateurs, kapite 29.
6 Koteā Koa Tatatou Falala Ki Te Temi Ka Haʼu? Tatau aipe peʼe tautau maʼu e te hahaʼi ʼa Sehova he tokalelei ʼi he faʼahi ʼo te kele, ka mole heʼeki fetogi te ʼu ʼaluʼaga. ʼE hoko atu pe te ʼita ʼo te Tevolo ʼi tona kapu ʼaē talu mai te taʼu 1914. ʼE ina ʼiloʼi kua nounou tona temi. ʼE tuputupu tona ʼita lolotoga tatatou fakaōvi ʼaē ki te mamahi lahi. ʼE ina tauʼi tāfito ia te Hau kua fakanofo, ia Kilisito Sesu, pea ʼe faiga mālohi ia ʼi te tau ʼo aʼu ki te fakaʼosi. Ko ia pea mo tana ʼu temonio ʼe nātou fakahāhā tonatou ʼiʼita ki te hahaʼi pe ʼaē ʼa Sehova ʼi te kele, ʼaē ʼe agatonu ʼo “mulimuli ki te ʼu fakatuʼutuʼu ʼa te ʼAtua pea ʼe nātou gāue ʼo fakamoʼoni kia Sesu.”—Fkhā. 12:12, 17.
7 Koia lolotoga tatatou faiga ki te temi ka haʼu, ʼe ʼaoga ke tou manatu fakapotopoto. Ke ʼaua naʼa tou manatu ʼe holomuli te Tevolo peʼe fakafisi. Ko te fehiʼa kia tatou ʼaē neʼe ina tuku ki te mālama ʼaenī ʼe feala pe ke hā ʼi he temi pea mo he faʼahi pe. Ko tatatou ʼāteaina moʼo faka mafola ʼi ʼihi ʼu fenua neʼe maʼu pe ʼi te hili ʼo he faiga mālohi ʼi he temi loaloaga. Ko te ʼāteaina ʼaia e lagi ʼe fakaʼeteʼete, ʼo fakatuʼutuʼu pe e he ʼu pule ʼe lotolelei peʼe ko he lao ʼe mole hā. ʼE feala pe ke hoko fakafokifā he ʼu fetogi, ʼo fakatupu ai he maveuveu pea mo he holoʼi ʼo te ʼu fakatuʼutuʼu tāfito ʼa te tagata.
8 Ko te tuputupu ʼi te temi nei pea mo te ʼāteaina ʼaē ʼe tou fiafia ai ʼi ʼihi ʼu fenua ʼe feala ke puli fakavilivili, pea ʼe toe tau anai ʼotatou ʼu tēhina mo te ʼu fakataga ohage pe ko te temi muʼa. Ke ʼaua naʼa tou fakahagahaganoa, ʼo tou manatu leva kua lavā ʼotatou ʼu fili. Ko te ʼita ʼaē ʼo te mālama e lagi ʼe mole hā tuʼumaʼu, kae ʼe hoko atu pe ia. ʼE hā mai, ʼi te Folafola ʼa te ʼAtua ko te fakafeagai ʼa te mālama ʼe haʼele ia ki muʼa kae mole gata ia lolotoga tatatou fakaōvi ki te ʼaho fakaʼosi. ʼE tonu foki ke tou nonofo tokaga, ʼo tou fakaʼeteʼete “ohage he ʼu gata, ka ke tou maʼa ohage ni lupe hina.” (Mat. 10:16) ʼE tonu ke mahino kia tatou ʼe tou “tau mālohi” anai ʼo aʼu ki te fakaʼosi, pea ko te faʼa kātaki ʼe ko te kalavi ʼaia ʼo totatou maʼuli.—Suta 3; Mat. 24:13.
9 ʼI he faʼahi pe ʼo te mālama ʼaē ʼe tou maʼuʼuli ʼaia, ko te faka mafola ʼe feala ke tuputupu ʼo mole ʼi ai he fakafeagai. ʼI te faʼahi ʼaia ʼe feala ai ke tou lotolotolua ki te maʼuhiga ʼaē ʼo tatatou tuʼania. Kae, ʼe maʼuhiga ke tou nonofo tokaga. ʼE feala ke fetogi fakavilivili te ʼu faʼahiga ʼaluʼaga. Ko te hahaʼi fakafeagai ʼe feala ke nātou fai he fakatuʼutuʼu moʼo fakafeagai kia tatou. Ko te kau ʼaposita ʼe nātou kumi tuʼumaʼu he ʼu faʼahiga manatu moʼo faka lākahalaʼi ʼo tatou. Ko te ʼu takitaki lotu ʼiʼita ʼaē ʼe ʼui maʼa nātou ʼe mole nātou leleiʼia tatatou gāue ʼe feala pe ke nātou fatufatuʼi tatou ʼi muʼa ʼo te hahaʼi. Ko hatatou fakatuʼutuʼu ʼo he laga ʼo he Fale ʼo te Puleʼaga ʼe feala ke tupu ai he fakafeagai ʼo mafola ʼi te ʼu vāhaʼa fale. ʼE feala ke tohi he ʼu talanoa moʼo fakatupu kovi ai kia tatou. Ko te ʼu takitaki ʼo te kolo ʼe feala ke nātou fai he talanoa ʼo mole nātou tokagaʼi tatou ʼo tupu ai te ʼiʼita ʼo te hahaʼi mokā ʼe tou ʼaʼahi ia nātou. ʼO tatau pe mo nātou ʼi totatou famili ʼaē ʼe tou ʼoʼofa ai e lagi feala anai ke nātou ʼiʼita pea mo nātou fakatagaʼi tatou. Koia ʼe tonu ke tou nonofo tokaga; ke mahino kia tatou ko te fehiʼa ʼo te mālama ʼe mālohi ʼaupito pea ʼe feala ia ke hā ʼi he temi pe.
10 Koteā Koa Tona Mālohi Kia Tatou? Ko te ʼu faʼahi fuli ʼaia ʼe ʼi ai tona ikuʼaga mālohi ki tatatou fakakaukau pea mo tatatou fakatuʼutuʼu ki te temi ka haʼu. ʼO feafeaʼi koa? ʼE tonu koa ke tou tuʼania te meʼa ʼaē ka tou kātakiʼi? ʼE tonu anai koa ke veliveli tatatou fai faka mafola heʼe fakatupu hohaʼa ki ni hahaʼi ʼo totatou tafaʼaki? ʼE ʼi ai koa he ʼuhiga ʼo tatatou ʼiʼita koteʼuhi ʼe fatufatuʼi tatou? ʼE feala koa ke pulihi e te ʼu fakataga totatou fiafia ʼi tatatou kaugana kia Sehova? ʼE ʼi ai koa he lotolotolua ʼo ʼuhiga mo te ikuʼaga? Kailoa ia! Koteā koa tona tupuʼaga?
11 Ke ʼaua naʼa puli ia tatou ko te logo ʼaē ʼe tou faka mafola ʼe mole haʼu mai ia tatou, kae mai ia Sehova. (Sel. 1:9) ʼE fakamaʼuaʼi tatou ke tou tokagaʼi te talanoa fakaloto mālohi: “Koutou kalagaʼi tona huafa. Koutou fakahā ki te hahaʼi tana ʼu gāue . . . ʼi te kele katoa.” (Is. 12:4, 5) ʼE ina fakagafua ke gaohi koviʼi tana hahaʼi heʼe ʼi ai tana fakatuʼutuʼu, ʼaē ke ‘tāpuhā tona huafa ʼi te kele katoa.’ (Ek. 9:16) ʼE tou fakahoko te gāue ʼaē neʼe fakatotonuʼi mai e Sehova, pea ko ia ʼaē ʼe ina foaki mai te mālohi ke tou faiva ʼi tatatou palalau. (Gāue 4:29-31) Ko te gāue ʼaenī ʼe maʼuhiga pea mo ʼaoga ʼaupito pea ʼe tonu ke fakahoko lolotoga te ʼu ʼaho fakamuli ʼo te tuʼu ʼaenī.
12 Ko te mālama ki te ʼu faʼahi ʼaia ʼe ina foaki mai kia tatou te lototoʼa ke tou fakafeagai fakamālohi kia Satana pea mo tona mālama. (1 Pe. 5:8, 9) ʼAki tatatou ʼiloʼi ʼaē ʼe nofo ia Sehova mo tatou, ʼe tou “lototoʼa pea mo mālohi,” ʼe mole tou matataku ki ʼotatou ʼu fili. (Teu. 31:6; Hep. 13:6) Logope la tatatou faiga ke tou aga fakapotopoto, agalelei, pea mo poto ʼe tou fakahāhā anai totatou loto ʼaē ke tou “fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata” ʼi tatatou tauhi. (Gāue 5:29) Kapau ʼe ʼi ai he faigamālie ke tou fakahā ai tatatou tui ʼe tou fakaʼaogaʼi anai. (1 Pe. 3:15) Kae, ʼe mole puli anai totatou temi ʼi he ʼu palalau mole hona ʼuhiga mo ni hahaʼi fakafeagai loto fefeka ʼe nātou faiga ke tou pulinoa. ʼE mole tou faiga anai ke tou ʼiʼita pea ke tou tali ia te meʼa ʼaē neʼe nātou fai mai mokā ʼe nātou ʼulihi tatou, ʼe tou “tuku ia nātou.”—Mat. 15:14.
13 Kae ko tatatou kātakiʼi ʼo totatou ʼu mamahi ʼe fiafia ai Sehova. (1 Pe. 2:19) Koteā koa te faʼahi ʼe tonu ke tou fai ke tou maʼu ai tona ʼofa? ʼE tonu koa ke tou kaugana ki ai ka mole ia tatou te fiafia koteʼuhi ʼe fehiʼaʼinaʼi tatou pea mo fakafeagai kia tatou? Kailoa ia! ʼE fakapapau e Sehova ʼe ina fakapale tatatou fakalogo ʼaki te “fiafia pea mo te tokalelei.” (Lom. 15:13) Logope la te ʼu mamahi lahi, neʼe nofo fiafia ia Sesu ʼuhi ko “te fiafia ʼaē neʼe fakapapau age ki ai.” (Hep. 12:2) ʼO feiā aipe mo tatou. ʼUhi ko te lahi ʼo te fakapale ʼaē ʼe tou maʼu ʼi tatatou faʼa kātaki ʼe ʼekenaki ai tatou ke tou “fakafiafia pea mo tou hopo fiafia” logope la te ʼu fakataga mālohi ʼe tau mo tatou. (Mat. 5:11, 12) Tatau aipe ʼi te temi mamahi, ko te fiafia, ʼe ko he tupuʼaga ʼaia ʼo tatatou fakavikiviki pea mo tatatou fakaʼapaʼapa kia Sehova, ʼe ko he lagolago ʼaia ki te logo ʼo te Puleʼaga.
14 ʼE ʼi ai koa he manatu lotolotolua ʼo ʼuhiga mo te fakahoko ʼo te faʼahi ʼaia, ʼo faka lākatonuʼi ai he ʼu manatu peʼe ko te mole maʼu ʼo he tonu? Kailoa ia. Ko te ikuʼaga ʼo te fakafeagai ʼa te kautahi ʼa Sehova pea mo te mālama ʼa Satana neʼe kua fualoa tona fakatuʼutuʼu. (1 Soane 2:15-17) Māʼiape te mālohi pea mo te lahi ʼo te fakafeagai, ʼe foaki mai anai e Sehova ia te mālo. (Is. 54:17; Lom. 8:31, 37) Tatau aipe peʼe mālohi ʼaupito totatou fakatagaʼi, ʼe mole he meʼa ʼe ina fakahēʼi ia tatou ke mole tou maʼu te fakapale. ʼE mole he ʼuhiga ʼo tatatou “tuʼania he meʼa,” koteʼuhi ʼe foaki mai e Sehova te tokalelei moʼo tali ki ʼatatou ʼu faikole.—Filp. 4:6, 7.
15 Koia, ʼe tou fakamālo kia Sehova ʼi te temi fuli mokā ʼe tou lau ʼi te ʼu tānaki ʼe mole kei fakatagaʼi ʼotatou ʼu tēhina peʼe kua fakagafua ke nātou fai faka mafola. ʼE tou fakafiafia mokā ʼe ʼi ai he ʼu fetogi ʼo faka fealagia ki te lauʼi afe hahaʼi fakamalotoloto ke nātou ʼiloʼi te logo ʼo te Puleʼaga. ʼE tou fakafetaʼi moʼoni kia Sehova ʼi tana foaki mai kia tatou te mālo ʼi te hahaʼi fakafeagai ʼaē neʼe fehiʼa kia tatou. ʼE tou ʼiloʼi ʼe ina tapuakina anai tatatou gāue pea ʼe ina fakatuputupu anai te ʼu faʼahi fuli ʼe ʼaoga moʼo fakavikiviki ʼo tona fale, ʼo te tauhi moʼoni pea mo foaki ki te ʼu hahaʼi “manakoʼia” ke nātou ʼōmai mai te ʼu fenua fuli ʼo nātou tali te ʼu faigamālie fuli.—Asea 2:7; Is. 2:2-4.
16 Koia, ʼe tou ʼiloʼi papau ko totatou fili, ia Satana, ʼe mālohi ʼaupito, pea ʼe fakafeagai tāfito kia tatou ʼo aʼu ki te fakaʼosi. Ko tana ʼu mahafu tau ʼe tautau fai fakahagatonu pea mo mālohi, ko ʼihi ʼe mole tou faʼa ʼiloʼi pea ʼe nātou fakahalaʼi tatou. Ko te fakataga ʼe feala ke hoko fakafokifā ʼi te ʼu faʼahi neʼe ʼi ai te tokalelei. Ko he ʼu hahaʼi fakafeagai agakovi ʼe feala ke nātou faiga mālohi ʼo gaohi koviʼi ia tatou. ʼI te temi totonu, ʼe hā anai ko nātou fuli ʼaia ʼe nātou “fakatuʼu tau ki te ʼAtua,” pea ko ia ʼaenī ʼe ina fakaʼauha anai ia nātou. (Gāue 5:38, 39; 2 Tes. 1:6-9) Moʼo talitali ki te faʼahi ʼaia, tatau aipe he faʼahi ʼe tonu ke tou kātakiʼi, ʼe tou faiga mālohi ke tou kaugana agatonu kia Sehova pea mo faka mafola te logo ʼo te Puleʼaga. Ko tatou ko te hahaʼi fiafia ʼo te kele, heʼe tou ʼiloʼi ‘ka tou liliu anai ko he ʼu tagata kua fakamoʼoni, ʼe tou maʼu anai te kolona ʼo te maʼuli.’—Sake 1:12.