ʼE Lelei Te Fakamatala ʼo Te Meʼa Neʼe Foaki Mai e Sehova!
1 Ko te tagata fai pesalemo ʼo te Pesalemo 48 neʼe ina fakatokagaʼi te kau Iselaele ke nātou ‘haʼele ʼo takafoli ʼi Sione, ke nātou lau te ʼu tule, ʼo fakasiosio ki tonatou ʼu tule ʼaē ʼe nofoʼi, ke feala ai hanatou fakamatala ki tonatou hōloga ki ʼamuli.’ ʼAki tonatou ʼofa ʼaē kia Sehova, neʼe nātou fia ʼiloʼi te ʼu faʼahi fuli ʼo te kele ʼo te pule faka teokalatike. ʼAki te ʼu faʼahiga meʼa ʼaia e feafeaʼi te tuku e Sehova tona huafa ki te kolo ʼaia! ʼE feala ke nātou palalau ʼo ʼuhiga mo ia, pea tāfito ke nātou tokakaga ke logo tonatou hōloga ki te ʼu meʼa fuli ʼaē neʼe nātou taupau fakalelei ʼi tonatou loto.—Pes. 48:12, 13.
2 ʼE tou maʼuʼuli nei ʼi te temi ʼe mole kei ʼi ai te fakatafito ʼo te pule faka teokalatike ʼo te Mesia ʼa Sehova ʼi Sione kae ʼi te Selusalemi ʼaē ʼi selo. (Hep. 12:22) Ko te Puleʼaga ʼo Sehova ʼaē neʼe tuku age kia Sesu Kilisito ʼe lolotoga pule nei talu mai te taʼu 1914. (Fkhā. 12:10) ʼE ko te gāue maʼuhiga ʼaia kia tatou. Mo tatou foki ʼe tou fia ʼiloʼi pe neʼe feafeaʼi te faka fealagia e Sehova ki tana ʼu kaugana ʼaē ko he ʼu hahaʼi fakalogo ki te Puleʼaga ʼi te kele ke nātou fai tona finegalo. Ko te ʼu faʼahiga meʼa fakaofoofo ʼo ʼuhiga mo te faʼahi ʼaia ʼe tuʼu ʼi tatatou tohi foʼou Les Témoins de Jéhovah: Prédicateurs du Royaume de Dieu. Neʼe fakafiafia tatatou maʼu te tohi ʼaia ʼi tatatou Fakatahi Faka Tisitilike “Akonaki Fakaʼatua.”
3 ʼI te ʼaho 1 ʼo Sepetepeli, neʼe kua ʼosi fai te tohi ʼaenī ʼi te ʼu lea e 20, pea ʼe lolotoga fakaliliu pea mo tā ʼi te temi nei ʼi te ʼu lea e 13. ʼE ʼi ai koa hakotou tohi? ʼE koutou lolotoga lau koa te tohi? ʼE koutou fakahā koa te ʼu meʼa ʼaē ʼe koutou lau ʼi te tohi?
4 ʼI te ʼosi vakaʼi ʼo te ʼu paki pea mo lau te ʼu kupu ʼe ʼalutahi mo te paki, ohage ko tona fakahā ʼaē ʼi te fakatahi, tokolahi te ʼu tēhina pea mo te ʼu tuagaʼane neʼe nātou lau fakavilivili te tohi ʼaia. Koteā tanatou ʼu manatu? Koʼeni he ʼu manatu.
5 Neʼe tohi e he tuagaʼane: “Ko te hokie te tohi neʼe ʼau holi mamahi ke foimo ʼosi ke ʼau toe lau. Kua ʼau aʼu nei ki te kapite 25. ʼI te lahi ʼo taku lau, neʼe hali ʼoku loʼimata pea neʼe fonu toku loto ko te ʼofa kia Sehova. Ko te tohi ʼe fakatupu lotomālohi pea mo fakaloloto ia te tui.”
6 Ko he tēhina neʼe kaugana kia Sehova ia taʼu e 40 neʼe ina ʼui fēnei: “Neʼe mole ʼau manatu ʼe ʼau holi ʼaupito ki te tohi ʼaia. Neʼe ʼau ʼalaʼala ʼo fualoa ʼi te pōʼuli pea neʼe ʼau ʼalaʼala uhu pea neʼe ʼau lau te tohi katoa ʼi te ʼu vāhaʼa e lua. ʼIo ko taku hoki laue te tohi fakatupu fiafia feiā. ʼE ko he toe tohi matalelei ʼe ʼaoga ki te fai kumi kae tāfito moʼo tou fakaloto mālohi.”
7 Ko He Polokalama Lautohi Tuʼumaʼu: Ko ʼihi ia nātou ʼaē neʼe nātou lau fakavilivili te tohi katoa neʼe nātou faigaʼi ke nātou toe lau kae ʼi te temi ʼaia ʼe nātou lau mamalie.
8 Kapau e tokolahi ʼi tokotou famili ʼe nonofo ʼi te moʼoni, e lagi ʼe koutou fia fakaʼaogaʼi te ʼu faʼahi ʼo te tohi ʼi takotou ako faka famili. Ko ʼihi ʼu famili neʼe kamata tanatou fai te faʼahi ʼaia ʼi te hili pe ʼo he ʼu ʼaho mo tanatou toʼo te tohi ʼi te fakatahi. ʼE mole faka ʼuhiga leva ia ko te ʼu faʼahiga meʼa ʼaē, ohage ko te teuteuʼi ʼo Te Tule Leʼo, ʼe mole tonu anai ke fai. Kae e lagi ʼe koutou leleiʼia anai takotou fakasiosio fakalelei ke koutou fakaʼaogaʼi he ʼu minuta e 15 peʼe 20 moʼo lautohi pea mo fai palalau ki te manatu ʼo te tohi Prédicateurs.
9 Ko ʼihi famili ʼe nātou lau te ʼu pasina e lua peʼe tolu—ʼo lagi ko he kupu tāfito e tahi peʼe lua—ʼi te afiafi fuli ʼi muʼa ʼo tanatou mavae ʼi te laupapa. ʼE lagi kua lahi he koga ʼo te tohi kua nātou lau takitokotahi, kae ʼe nātou maʼu he fua lelei mokā ʼe nātou lau mamalie te manatu ʼaki te faigamālie ʼaē ke nātou fai palalau ki te manatu ʼo te tohi. Ko ʼihi neʼe nātou fai te faʼahi ʼaenī neʼe ko te ʼu kaugana ʼa Sehova lolotoga te ʼu taʼu. ʼI tanatou lautohi, tokolahi ʼe nātou manatuʼi fakalelei te ʼu meʼa ʼe uga ai ia nātou. ʼE fiafia ʼonatou loto ʼi tanatou fai palalau fakatahi ki tanatou kau fakatahi ki te ʼu faʼahiga meʼa ʼe nātou lau.
10 ʼUhi ko te ʼu ʼaluʼaga ʼo tokotou ʼapi, e lagi ʼe koutou faigaʼi ke koutou lautohi tokotahi. Neʼe ʼui e te tuagaʼane neʼe faitohi ki te Sosiete: “Neʼe ʼau lau te tohi ʼaenī ʼi he kiʼi temi ʼi te afiafi fuli ʼi muʼa ʼo taku moe. Ko te tohi ʼaenī ʼe ina fakaloloto taku fakafetaʼi pea mo toku ʼofa ki te moʼoni, pea ʼe ʼau logoʼi kua ʼau ōvi kia Sehova pea ʼe ʼau fakamālo lahi ki ai ʼi taku nofo ʼi tona kautahi. Neʼe ʼau leleiʼia ʼaupito te ʼu pasina fuli neʼe ʼau lau.”
11 Logope la te mātolu ʼo te tohi ʼaia, kae ʼe mole feiā ia ki te ʼu faʼahi. Ko te faʼahi ʼaē ʼe kamata kiai ʼe talanoa ki te ʼu faʼahiga meʼa fakaofoofo talu mai te ʼu ʼaho ʼo Apele ʼo aʼu mai ki te taʼu 1992—ko te ʼu pasina pe e 108. Ko te ʼu faʼahi ʼaē ʼe tuʼu ʼi te ʼu pasina 13 ki te 150. Ko te ʼu faʼahi takitahi ʼe vaheʼi ʼaki te ʼu kapite. Ke ʼaua naʼa koutou lau fakavilivili, koutou lau he faʼahi e tahi, he kapite e tahi, peʼe ko he kupu tāfito; ʼe koutou leleiʼia; pea ke koutou maʼu he ʼu fua lelei mai ai.
12 Koutou Toʼo He Temi Moʼo Fakakaukauʼi ʼo Te Meʼa ʼAē ʼe Koutou Lau: Koteā koa takotou fakatuʼutuʼu mokā ʼe koutou lautohi? Ko te fuli ʼo te ʼu pasina—ʼo te tohi katoa—ʼe mole tonu anai ko hakotou fakatuʼutuʼu ʼaia. Ko te tohi Prédicateurs ʼe ʼi ai te fakamatala ʼo tokotou tofiʼa fakalaumālie. ʼE tonu anai ke koutou ʼiloʼi lelei. Koutou toʼo he temi ke koutou fakakaukauʼi te maʼuliʼi ʼo te ʼu faʼahiga meʼa ʼe koutou lau. ʼI takotou vakavakaʼi te gāue ʼa te kau Fakamoʼoni ʼa Sehova ʼo te temi muʼa, koutou vakaʼi peʼe feafeaʼi takotou mulimuli ki tanatou tui. (Hep. 12:1, 2) ʼI takotou lau te mafola ʼo te ʼapositasia lahi, koutou manatuʼi tāfito te ʼu hele ʼaē neʼe fakahalaʼi ai ia nātou ʼaē neʼe maliu kehe, ke feala ai he hāofaki ʼo tonatou faʼahi fakalaumālie. Pea ʼi takotou vakaʼi te hisitolia ʼo te temi ʼaenī, koutou vakaʼi te ʼu kalitate fakalaumālie ʼo nātou fuli ʼaē neʼe fakaʼaogaʼi e te ʼAtua, peʼe feafeaʼi tanatou fakahā ko te fai ʼo te finegalo ʼo te ʼAtua ʼe ko te meʼa maʼuhiga ʼi tonatou maʼuli, pea neʼe feafeaʼi tanatou aga ʼi te ʼu faʼahiga ʼaluʼaga—ko ʼihi ʼe faigataʼa ʼaupito—ʼaē neʼe faka fealagia e te ʼAtua.—Hep. 13:7.
13 ʼE koutou maʼu anai he tui loloto moʼo sivisivi ʼo te ʼu faʼahiga meʼa ʼe hā ai pe neʼe feafeaʼi te tuku e Sehova he mālama lelei ki tana hahaʼi ʼo ʼuhiga mo te moʼoni ʼo te Tohi-Tapu ʼaē ʼe tou leleiʼia ʼi te temi nei. Ko takotou ʼiloʼi lelei ia te kautahi fakahāhā ʼaē ʼe fakaʼaogaʼi e Sehova ʼe fakatuputupu anai koutou ke koutou leleiʼia te fakaʼaluʼalu ʼo te kautahi. ʼE koutou holi moʼoni anai ʼi takotou lautohi pe neʼe feafeaʼi, te fakahoko ʼo te lea faka polofeta, te faka mafola ʼo te logo lelei ʼi te ʼu faʼahi taupotu ʼo te kele. ʼE fiafia anai tokotou loto ʼi he ʼu fakamatala ʼo te hahaʼi faitotonu ʼi te ʼu faʼahi fuli ʼo te kele ʼaē neʼe faiva ʼi te faka mafola ʼo te Puleʼaga. ʼE lahi anai tokotou fakaloto mālohi e te ʼu faʼifaʼitaki ʼo te hahaʼi ʼe koutou lau pe neʼe feafeaʼi te kātakiʼi e te ʼu tēhina pea mo te ʼu tuagaʼane te ʼu faigataʼaʼia ʼuhi ko tonatou ʼofa ʼaē kia Sehova.
14 ʼI te ʼosi ʼo takotou lau he faʼahi ʼo te tohi, koutou toʼo he temi ke koutou fai palalau fakatahi ai ki tona maʼuhiga pea mo koutou toe vakaʼi te ʼu manatu. Kapau ʼe ʼi ai hakotou fānau kei liliki, koutou faka kau ia nātou ʼi te fai palalau ʼo koutou fakamahino age te ʼu paki pea ke koutou fakahā ke nātou ʼiloʼi te hahaʼi ʼaē ʼe tuʼu ʼi ai. Tatau aipe pe neʼe koutou lautohi tokotahi, koutou faiga ke koutou vaevae mo niʼihi te meʼa ʼe koutou ako. Kapau ʼe ʼaoga, koutou fakaʼaogaʼi te faʼahi ʼaē ʼe talanoa ai ki te ʼu ʼaʼahi pea mo te ʼu ako faka Tohi-Tapu ʼi te ʼu ʼapi. Ko te liuliuga ʼo te faʼahi ʼaia ʼe ina fakamaʼumaʼu anai ʼi tokotou ʼatamai pea mo tokotou loto, pea ʼe toe fua lelei anai foki ki niʼihi.
15 Koutou Tokakaga Ki Te ʼu Meʼa Fuli: Ko te ʼu temi ʼaē ʼe koutou fakaʼaogaʼi moʼo lau ʼo te tohi Prédicateurs ʼe tonu anai ke fakafiafia pea mo ʼaoga.
16 ʼE koutou loto koa ke ʼaʼahi e tokotou famili te ʼu pilō tāfito ʼa te kau Fakamoʼoni ʼa Sehova ʼi te malamanei? ʼE fakahā mai ʼi te ʼu pasina 208 ki te 209 te ʼu fale neʼe fakaʼaogaʼi e te Sosiete ʼi he sēkulō kua hili ʼi te kolo ʼo Pittsburgh. ʼI te ʼu pasina 216 ki te 217 ʼe feala ke koutou ʼiloʼi te ʼu fale neʼe fakaʼaogaʼi ki muli mai ʼi Brooklyn. Ko te ʼu paki ʼi te pasina 352 ki te 356 ʼe feala ke tokoni kia koutou ke koutou ʼiloʼi lelei te pilō ʼa te kau Fakamoʼoni ʼa Sehova ʼi te malamanei. Ko te ʼu kapite 26 pea mo te 27 ʼe nātou fakahāhā mai te ʼu faʼahi ʼo te gāue ʼe fai ʼi te ʼu Petele, pea ko te ʼu pasina 295 ki te 298 ʼe fakahāhā ai ʼihi ʼu manatu ʼo te maʼuli ʼi te Petele.
17 Tokolahi ia tatou ʼe mole maʼu hotatou faigamālie moʼo ʼaʼahi ʼo te ʼu filiale ʼo te Sosiete. ʼI te ʼu pasina 357 ki te 401 ʼo te tohi Prédicateurs ʼe koutou ʼaʼahi ai te mālama katoa. ʼE mole ʼaoga hona fai fakatavili. Koutou fakaʼaogaʼi he kiʼi temi ʼi te ʼu fenua fuli pea ke koutou fakafiafia. Koutou fakaʼaogaʼi te mape ʼi te ʼu pasina 415 ki te 417 moʼo vakaʼi te faʼahi ʼe tuʼu ai te ʼu filiale. Koutou lau te ʼu fakamatala ʼe ʼalutahi mo te paki ʼo te ʼu filiale. Kae ʼe feala takotou maʼu ʼi te ʼu kumiʼaga ʼihi talanoa fakaofoofo ʼo te ʼu fenua fuli. Koutou fakaʼaogaʼi te faigamālie ʼaia ke koutou ʼiloʼi ai takotou famili fakalaumālie ʼi ʼihi fenua.
18 Mokā fakatahitahi te hahaʼi, ʼe nātou tautau fai he ʼu gaoʼi ʼe fakamaʼuaʼi ke nātou ʼiloʼi te ʼu faʼahiga meʼa ʼe hoko ʼi te mālama. ʼE mole koa la ko he meʼa lelei te ʼiloʼi ʼo te ʼu ʼaho pea mo te ʼu faʼahiga meʼa maʼuhiga neʼe hoko ʼi te hisitolia ʼo te hahaʼi ʼa Sehova ʼo te temi ʼaenī? ʼE koutou maʼu anai he ʼu manatu feiā ʼi te lisi ʼe tuʼu ʼi te ʼu pasina 718 ki te 723 ʼo te tohi Prédicateurs. Ko te lisi ʼaia ʼe ina tuku mai he fakatuʼutuʼu tāfito; ʼe feala ke koutou fakatahiʼi ki ai mo ʼihi ʼu manatu ʼo te tohi. Koutou fakaʼaogaʼi te ʼu faʼahiga meʼa ʼaia moʼo fai ʼo hakotou fakamanatu. Ko te ʼu tūpulaga ʼo te famili e lagi ʼe nātou manatuʼi fakavilivili anai te ʼu meʼa ʼaia. Ko ʼihi ia tatou ʼaē kua matutuʼa e lagi ʼe tuai tatatou manatuʼi te ʼu faʼahi ʼaia. Kae ko te ʼu faʼahiga meʼa ʼaia ʼo te hisitolia faka teokalatike ʼe fua lelei kia tatou mokā ʼe tou ʼiloʼi. ʼI te hili ʼo takotou ʼiloʼi te ʼu ʼaho pea mo te ʼu faʼahi tāfito, ke koutou fai he fakatuʼutuʼu ki te faʼahi ʼaia. Koutou vakaʼi pe feafeaʼi takotou manatuʼi te ʼu faʼahiga meʼa neʼe hoko. ʼOsi ʼaia pea koutou fai palalau ki te kau ʼa te faʼahiga meʼa ʼaia ki te fakahoko ʼo te finegalo ʼo te ʼAtua. Pea, koutou fai palalau pe neʼe feafeaʼi tona ʼaoga ki tokotou maʼuli pea koteā takotou tali te meʼa ʼaē ʼe fai e Sehova.
19 Ko Te ʼu Faigamālie ʼe Tuku Atu Kia Koutou: ʼI takotou lau pea mo fai palalau ki te tohi Les Témoins de Jéhovah: Prédicateurs du Royaume de Dieu, ʼe koutou mamata anai ki te fakahoko ʼo te ʼu meʼa fakalilolilo ʼaē ʼe tuʼu ia Isaia 60:22. ʼE talanoa te tohi ʼi te pasina 519: “Ko te fakapapau ʼaē ‘ko ia ʼaē ʼe veliveli ʼe liliu anai ko te lauʼi afe e tahi’ neʼe hoko moʼoni ia, pea ʼo lahi age foki! Neʼe laka ʼi te ʼu fenua e 50 neʼe mole ʼi ai foki he ‘hahaʼi veliveli’—ʼaē neʼe mole ʼi ai he kau Fakamoʼoni ʼa Sehova ʼi te taʼu 1919, ʼaē neʼe mole heʼeki fai faka mafola ai he tahi—ia ʼaho nei kua fakalaka ʼi te toko lauʼi afe kau atolasio kia Sehova. ʼI ʼihi fenua, ko te toko lauʼi hogofulu afe, ʼio, ʼo laka ʼi te teau afe kau Fakamoʼoni ʼa Sehova ʼe nātou faiva ʼo faka mafola te Puleʼaga ʼo te ʼAtua! Ko te kau Fakamoʼoni ʼa Sehova ʼi te malamanei kua nātou liliu ‘ko he puleʼaga mālohi’—kua nātou lahi age ʼi te ʼu ʼatu puleʼaga e 80 ʼi te malamanei.”
20 Ko te gāue ʼaia ʼo te Puleʼaga ʼe tuputupu kae mole heʼeki ʼosi. Kailoa, ʼe fakatuputupu e Sehova te gāue ʼaia ki muʼa ʼo lahi age. E feafeaʼi koa takotou kau ki te gāue ʼaia? ʼE mahino lelei koa kia koutou te ʼu faigamālie fuli ʼaē ʼe tuku atu kia koutou? Lolotoga takotou ako te gāue neʼe fai e ʼihi, ʼofa pe ke uga koutou e tokotou loto ke koutou kau katoa ki te gāue lahi ʼaē ʼe taki e totatou ʼAtua ʼofa ʼaki ia Sesu Kilisito ia ʼaho nei.