Ke Ke Tokaga Fakalelei Ki Tau Faiako
1 Ko te polokalama foʼou ʼo te Minisitelio Faka Teokalatike ʼe kamata anai ʼi Sanualio 1995. Koteā te meʼa ʼe foʼou ai te polokalama ʼaia? ʼI te taʼu kua hili, neʼe tou lau te Tohi-Tapu mai tona kamataʼaga. ʼI te taʼu ʼaenī, ʼe hoko atu tatatou lau te Tohi-Tapu mai ia Teutalonome ʼo aʼu kia 2 Hau. Ko ʼihi ia tatou neʼe mole heʼeki nātou lau te ʼu tohi faka Tohi-Tapu ʼaia ʼe haʼu mai te ʼAtua. Logo aipe ʼe tonu ke tou lau te ʼu tohi ʼaia ʼi te lea fakafalani, ʼe tonu ke tou fakatuʼutuʼu he temi ke tou lau te kapite ʼaē ʼe tuʼu ʼi te polokalama ki te vāhaʼa. Koteā he tahi age meʼa ʼe feala ke tou fai ke tou tokaga fakalelei ki tatatou akonaki pea ke tou maʼu ai he ʼu tapuakina lahi?—1 Tim. 4:16.
2 Lolotoga te taʼu, ʼe tou vakaʼi ai te tohi Toute Écriture est inspirée de Dieu et utile. Ko te tohi ʼaia ʼe tokoni anai kia tatou ke lahi ʼaupito age tatatou leleiʼia te lau ʼo te Tohi-Tapu. (Pes. 119:105) Kapau ʼe feala hatatou lau fakafalani, he koʼe koa la ʼe mole tou fakatuʼutuʼu he temi ʼi te vāhaʼa fuli ke tou toe vakaʼi ai te manatu ʼaē ʼi te tohi Toute Écriture?
3 Ko Te ʼu ʼUluaki Akonaki Mālohi Pea Mo Lelei: Ko te ʼu ʼuluaki akonaki ʼaē ʼe fakatafito ki te tohi Toute Écriture ʼe tonu anai ke mālohi pea mo lelei tona fai. ʼE tonu foki ke nātou fakahā ia te ʼaoga ʼo te ʼu manatu, ʼo fakaʼaogaʼi ke feala ai he loloto ʼo tatatou fakaʼapaʼapa ki te Folafola ʼa Sehova pea mo tana Fakatuʼutuʼu. Kapau ʼe fai te ʼuluaki akonaki ʼi te tohi Unis dans le culte, ʼe ʼaoga ke tou ʼaumai ki te fono Te Tule Leʼo ʼaē ʼe tuʼu ai te alatike ʼaia, pea ke feala hatatou mulimuli fakalelei ki te ʼuluaki akonaki. Ko te tēhina ʼaē ʼe ina fai te akonaki ʼe tonu ke ina fakahā lelei te ʼaoga ʼo te manatu ʼo te tohi ʼaia ke “tou fakavilivili ki te fakapotopoto.”—Hep. 6:1.
4 Ko Te Lau ʼo Te Tohi-Tapu ʼe Uga Ai Tatou Ke Tou Fakakaukau: Ke lelei tatatou lautohi, mo te fakaʼaluʼalu ʼo totatou leʼo pea mo fakahā ʼo te meʼa ʼi totatou loto, ʼe maʼuhiga ke tou faiva ʼi te fai akonaki. Tahi ʼaē meʼa, ko te koga ʼaē neʼe tuku mai ke lau ʼi te Akonaki numelo 2 ʼe mole loa, pea ʼe lahi te temi ke fai ai he ʼu fakamatala e te tēhina ʼi te kamataʼaga pea mo te fakaʼosi ʼo te akonaki. Ko te ʼuluaki palalau ʼe tonu ke lagaʼi ai te fia logo ki te akonaki pea mo teuteuʼi ia nātou ʼaē ʼi te fono ke nātou fakatokagaʼi tona ʼaoga. Ko te palalau fakaʼosi e lagi kau kiai he ʼu fakamatala pea mo fakahā tona ʼaoga, ʼo faka fealagia ai ki te tēhina ke ina fakaʼaogaʼi katoa te temi ʼaē neʼe tuku ake ki ai.
5 ʼE lahi te ʼu manatu ʼi te polokalama ʼo te ako pea mo te faʼahiga fai ʼo te akonaki ʼo fakatafito ki te “Polokalama ʼo Te Ako ʼo Te Minisitelio Faka Teokalatike Ki Te Taʼu 1995.” ʼE tou tokaga fakalelei ki tatatou akonaki ʼaki tatatou toe vakaʼi te ʼu tokoni ʼaē ʼe tuʼu ʼi te alatike ʼaenī, ʼaki tatatou teuteu fakalelei tatatou akonaki, pea ʼaki tatatou maʼuliʼi te ʼu tokoni ʼaē ʼe foaki mai, ke feala ai hatatou tuputupu ʼi te fakaʼaluʼalu ʼo totatou leʼo pea mo tatatou fai akonaki. Ko nātou ʼaē ʼe mole heʼeki tohi ʼonatou higoa ki te ako ʼaia, ʼe fakaafe fakafiafia ia nātou ke nātou fai te faʼahi ʼaia.