Faʼahi 2—Tou Maʼu He ʼu Lelei ʼi Te Ako ʼo Te Minisitelio Faka Teokalatike 1996
1 ʼI te hili pe ʼo te avahi ʼo te Ako ʼo Te Minisitelio Faka Teokalatike ʼi te taʼu 1943, neʼe ʼui fēnei e te tahi filiale ʼo te Sosiete: “Ko te fakatuʼutuʼu lelei ʼaia, ʼi he kiʼi temi nounou neʼe ina lavaʼi te tokoni ki te ʼu tēhina e tokolahi, ke nātou liliu ʼo faiva ʼi te fai akonaki mai muʼa, pea mo popoto ʼi te fai faka mafola, he neʼe manatu te ʼu tēhina ʼaia, ʼe mole feala anai ke nātou popoto ʼi te fai akonaki ʼi muʼa ʼo te kaugamālie.” ʼE kei hoko aipe te foaki e te Ako ʼo Te Minisitelio Faka Teokalatike he ako ʼe lelei, ʼaē ʼe ʼaoga kia tatou fuli.
2 Te Lau ʼo Te Tohi-Tapu: Ko nātou ʼaē ʼe kau ki te Ako, ʼe mole gata pe ia nātou te maʼu ʼaē ʼo he ʼu fua lelei. ʼI tona fakahagatonu, ko tatou fuli ʼe ʼi ai te meʼa ʼe tonu ke tou teuteuʼi—ko te lau ʼo te Tohi-Tapu ʼi te vāhaʼa fuli. Ko te polokalama ʼo te Ako ʼe ina fakahā pe ko te ʼu kapite fea ʼaē ʼe tonu ke lau ʼi te vāhaʼa fuli. ʼE lahi te ʼu vaega ʼo te Tohi-Tapu ʼe nātou fakamanatuʼi mālohi mai te maʼuhiga ʼo te lau te Tohi-Tapu ʼi te ʼaho fuli. (Sos. 1:8; Pes. 1:2; Gāue 17:11) Ko te lau ʼo te Tohi-Tapu ʼe maʼuhiga ki te lelei ʼo totatou maʼuli ʼi te faʼahi fakalaumālie; ko te faʼahi ʼaia ʼe ina fafaga te ʼatamai mo te loto. Kapau ʼe tou lau te Tohi-Tapu ʼi he ʼu kiʼi minuta pe e nima ʼi te ʼaho, ʼe feala ai anai ke tou taupau maʼu te polokalama lautohi ʼo te Tohi-Tapu. ʼI te fakaʼosi ʼo te taʼu, kua tou lau anai he ʼu kapite e 150 tupu ʼo te Folafola ʼa te ʼAtua. Kapau ʼe tou maʼu tuʼumaʼu he Tohi-Tapu, ʼe feala anai ke faigafua age te lau ʼo hona ʼu koga ʼi te ʼaho fuli.
3 Te ʼUluaki Akonaki: Moʼo uga te ʼu tēhina ke nātou fai he gāue agatonu pea mo faiva, ko ia ʼaē ʼe ina fai te ʼuluaki akonaki ʼe tonu ke ina fakaʼaogaʼi he ʼu faʼahiga fai ʼe lelei ki te akonaki, moʼo fakamahino te ʼu puani, pea mo fakatuputupu te loto fakafetaʼi kia Sehova, ki tana Folafola, pea mo tana kautahi. Ko te ʼu tagata ʼāfea pea mo te kau tagata faifekau faka minisitelio, ʼe feala ke nātou fakahoko te faʼahi ʼaia ʼo teuteuʼi fakalelei tanatou akonaki, pea mo mulimuli ki te kupu tāfito, mo tui papau ki te meʼa ʼaē ʼe nātou palalau kiai, pea mo fai ke fia logo te hahaʼi kiai. (Hep. 4:12) ʼE maʼuhiga kia ia ʼaē ʼe ina fai te akonaki ke mulimuli lelei ki te temi. Ko te tohi “Toute Écriture” ʼe tapuke ai te ʼu vaega faka Tohi-Tapu pea mo hā ai te ʼu puani kehekehe fakafiafia ʼo te Tohi-Tapu, ʼe feala ke ʼaoga kia tatou ʼi te faʼahi fakalaumālie. Ko te tohi Prédicateurs ʼe maʼu ai te hisitolia ʼo te temi nei ʼo te kautahi fakahāhā ʼa Sehova, pea mo te ʼu fakamatala moʼoni ʼo ʼuhiga mo te maʼuli ʼo te hahaʼi ʼaē neʼe nātou fakahā tanatou tui, tanatou faiva, tanatou aga faka lotu, pea mo tanatou ʼofa. ʼE lahi te tahi ʼu meʼa ʼe feala ke tou ako ʼo ʼuhiga mo tatatou tōfiga faka teokalatike, pea mo te ala ʼaē ʼe haga ia Sehova ʼo tapuakiʼi tana hahaʼi ʼi te temi nei.
4 Te ʼu Puani Maʼuhiga ʼo Te Tohi-Tapu: Ko te ʼu tēhina ʼaē ʼe nātou fai te akonaki ʼaia, ʼe tonu ke nātou filifili lelei te ʼu vaega ʼaē ʼe feala ke nātou fakaʼaogaʼi ke ʼaoga ki te kokelekasio. ʼE tonu ki te tēhina ʼaia ke ina lau te ʼu kapite fuli ʼaē neʼe tuku age, ʼo metitasioʼi, pea mo fai he ʼu kumi ʼo ʼuhiga mo te ʼu vaega ʼaē neʼe fili moʼo fakamahino te ʼuhiga ʼo te ʼu vaega ʼaia. ʼI te fakaʼosi ʼo te Index des publications de la Société Watch Tower, ʼe tuʼu ai te “Index biblique,” ʼaē ʼe feala ke ʼaoga moʼo maʼu ai he ʼu puani ʼo ʼuhiga mo te ʼu vaega ʼaia ʼo te Tohi-Tapu ʼaē neʼe fili. Ko te ʼu tēhina ʼaē ʼe nātou fai te akonaki ʼaia, ʼe tonu ke nātou maʼu he fakasiosio tonu pea mo ʼaua naʼa toe hilifaki kiai he ʼu puani kehe. ʼE mole tonu ke lahi age te ʼu puani ʼaē ʼe nātou teuteuʼi ʼi te ʼu minuta e ono ʼaē ʼe tuku age moʼo fai ʼo te akonaki ʼaia.
5 ʼE feala ke tou maʼu fuli he ʼu lelei mai te Ako ʼo Te Minisitelio Faka Teokalatike. Ko te faʼahi ʼaia ʼe feala ke tokoni kia tatou ke tou tuputupu ʼi tatatou ʼu fealagia ʼo te fai palalau pea mo tatatou faiako. Ko te fakaʼaogaʼi katoa ʼo te faʼahi ʼaia ʼe tokoni moʼoni anai kia tatou ‘ke ʼiloga tatatou ʼu faiga ki te hahaʼi fuli.’—1 Tim. 4:15.