ʼE Fetogi Anai Koa Te Hola ʼo Takotou ʼu Fono?

ʼI te faʼahi ʼaē ʼe lahi te ʼu kokelekasio ʼe nātou fakaʼaogaʼi te Fale Fono e tahi ʼe nātou loto tahi ʼo fai he fetogi peʼe fakatonutonuʼi te hola ʼo te fono, ko te faʼahi ʼaia ʼe kamata ʼi te ʼuluaki ʼaho ʼo Sanualio. Ko tatatou loto lelei ʼo lagolago ki te fakatuʼutuʼu ʼaia ʼe fakahā ʼaki ai totatou feʼofaʼaki pea mo tatatou fefakaʼapaʼapaʼaki. Ko te tautau fetogi ʼo te hola ʼo te fono ʼe faigamālie anai kia koutou takitokotahi, ke lahi ai takotou ʼolo ki te ʼu fono.

ʼI te tahi faʼahi, ko te fetogi ʼo te hola ʼi te taʼu ʼaenī e lagi ʼe mole tau mo feʼauga mo takotou polokalama ʼo ʼuhiga mo te gāue. Ko te faʼahi ʼaia ʼe fakamaʼua kiai te ʼu fetogi ʼi takotou fakatuʼutuʼu māhani ʼo lagi fakatupu faigataʼa. ʼE tou lotolelei anai takitokotahi ʼo tou faifaitahi, ʼo fakahā ʼaki ai ʼe tou leleiʼia te fakatuʼutuʼu katoa, ʼaē ʼe ina ʼaumai te fua lelei kia nātou ʼaē ʼe kau kiai.

ʼIo, ko te fetogi ʼaē ka fai ʼo ʼuhiga mo te hola ʼo te fono e lagi ʼe lahi tona lelei kia koutou. ʼI te temi ʼaenī, ʼe fakaloto mālohiʼi koutou ke koutou fai he ʼu fetogi ʼaoga, ke feala ai hakotou kau ʼi te vāhaʼa fuli ki te ʼu fono ʼo mulimuli ki te polokalama ʼaē neʼe fakatuʼutuʼu e te kokelekasio. Tou faiga ʼo taupau maʼu te manatu ʼa te tagata fai pesalemo ko Tavite, ʼaē neʼe ina ʼui fēnei: “Neʼe ʼau fiafia ʼi te ʼui mai ʼaē: ‘Tou ʼolo ki te fale ʼo Sehova.’ ”​—⁠Pes. 122:⁠1.