He Koʼe ʼe Nātou Fai Te Gāue ʼAia?
1 Neʼe fakakikite fēnei ʼo ʼuhiga mo Kilisito, ko ‘te fakamalotoloto ʼaē ki te fale ʼo te ʼAtua ʼe ina mofi anai ia.’ (Pes. 69:9) Ko te fakamalotoloto ʼa Sesu ki te tauhi moʼoni ʼa Sehova neʼe ina uga ia ia ke ina fakamuʼamuʼa tona minisitelio. (Lu. 4:43; Soa. 18:37) Ko te fakamalotoloto ʼaia moʼo faka mafola ʼo te moʼoni, ʼe hā ia ʼaho nei ʼi te minisitelio ʼa te kau Fakamoʼoni ʼa Sehova. ʼI te taʼu gāue ʼaenī kua hili, neʼe ko te toko 645 509 ʼi te malamanei katoa, ʼaē neʼe kau ki te gāue pionie ʼi te māhina fuli. ʼI tatatou kua foaki totatou maʼuli ki te ʼAtua, ʼe tonu ke tou faikole peʼe feala hatatou fakatuʼutuʼu tatatou polokalama ke feala hatatou pionie vaeluaʼi temi peʼe pionie katoa.—Pes. 110:3; Tnk. 12:1; Loma 12:1.
2 ʼE tou maʼuʼuli ʼi he mālama ʼe tokakaga tāfito ai te hahaʼi ki te ʼu koloā, koia ʼe faigataʼa ai ki te tokolahi hanatou mahino, pe koʼe ʼe gāue kinakina anai he tahi ʼi te minisitelio, ka mole ina maʼu ai hana falā pea mo hona tuʼulaga. He koʼe ʼe fai e te kau pionie te gāue ʼaia? ʼE ʼiloʼi e te kau pionie, ko te gāue ʼaē ʼe nātou fai, ʼe ko he gāue moʼo hāofaki ʼo te hahaʼi. Kia nātou ʼe ko he maʼua ke nātou tokoni ki te hahaʼi, ke nātou hāofaki tonatou maʼuli, ʼuhi ko tonatou ʼofa ʼaē kia Sehova pea mo tonatou ʼu kāiga. (Loma 1:14-16; 1 Tim. 2:4; 4:16) Ko te taumatuʼa pionie neʼe nā tali lelei ki te fehuʼi ʼaia ʼo nā ʼui fēnei: “He koʼe ʼe ma pionie? ʼE feala koa hamā fakahā kia Sehova he tupuʼaga ʼo tamā mole pionie?”
3 Neʼe tohi fēnei e te tahi tuagaʼane ʼo ʼuhiga mo tana fakatotonu ʼaē ke kau ki te gāue pionie: “Neʼe ma fakatuʼutuʼu mo toku ʼohoana ke gāue pe he tokotahi, ʼo ma līaki te ʼu meʼa ʼaē ʼe mole faʼa maʼuhiga. Pea tahi ʼaē meʼa, neʼe lahi te ʼu tapuakina ʼaē neʼe foaki mai e Sehova kia māua, ʼo mole ina tuku māua ke ma maʼuli masiva, peʼe ke mole ma maʼu te ʼu meʼa ʼaē ʼe ʼaoga kia māua. . . . Kua ʼau ʼiloʼi papau te meʼa ʼaē ʼe tonu ke ʼau fai ʼi toku maʼuli—ko te tokoni ki te hahaʼi ʼaē ʼe ʼaoga kia nātou he tokoni ʼi te faʼahi fakalaumālie ke nātou ʼiloʼi ko Sehova, te ʼAtua moʼoni, ʼe mole mamaʼo ia nātou ʼaē ʼe nātou kumi ia ia.” ʼI tanatou sio ki te kua nounou ʼo te temi, ko te kau pionie ʼe nātou fakafeauga tonatou maʼuli ki te ʼu meʼa ʼaē ʼe ʼaoga tāfito ki te maʼuli, ʼo nātou kumi fakamalotoloto ke nātou maʼu te ʼu koloā fakalaumālie ʼaē ka tologa anai.—1 Tim. 6:8, 18, 19.
4 Kapau ʼe feala hakotou pionie, he koʼe ʼe mole koutou fakatahi mo te toko lauʼi afe ʼo tokotou ʼu tēhina pea mo tuagaʼane ʼaē ʼe pionie ʼi te malamanei katoa? Kapau ʼe koutou fai te faʼahi ʼaia, pea ʼe feala anai ke koutou maʼu te fiafia ʼaē ʼe nātou maʼu.