Ko Te ʼu Fono Gāue ʼo ʼOketopeli

Vāhaʼa ʼe Kamata ʼi Te 6 ʼOketopeli

Katiko 29

10 min: Ko te ʼu logo ʼo te kokelekasio. Te ʼu Tonu ʼo Te Minisitelio ʼo Te Puleʼaga.

15 min: “ ʼE ʼi Ai Koa He ʼAho ʼe Feʼofaʼofani Ai Anai Te Hahaʼi Fuli?” ʼO fai ʼaki te ʼu fehuʼi pea mo te ʼu tali. Toe vakaʼi te ʼu puani maʼuhiga ʼo Te ʼu Logo ʼo Te Puleʼaga N° 35. Fakahā te fua lelei ʼe maʼu anai e te hahaʼi ʼi te telituale ʼi tanatou lau te pepa lotu ʼaia. Fakamahino ʼe maʼuhiga ke fai he ʼu fakatuʼutuʼu ʼi te temi nei ke tou kau katoa ki te tufa ʼo te pepa lotu ʼaia, pea ke tou tokakaga ʼo ʼaʼahi fakalelei ia nātou ʼaē neʼe fia logo ki te moʼoni.

20 min: “Ke Lahi Tatatou Tufa Te ʼu Logo ʼo Te Puleʼaga N° 35.” Ko te akonaki ʼe fai e te tagata taupau ki te gāue ʼo mulimuli ki te palakalafe 1 ki te 4. ʼOsi ʼaia pea fai te palakalafe 5 ki te 8 ʼaki te ʼu fehuʼi pea mo te ʼu tali. Toe vakaʼi te ʼu fakatuʼutuʼu ʼa te kokelekasio ʼo ʼuhiga mo te fai ʼo te gāue. Fakahā te ʼu fakatuʼutuʼu ʼe fai moʼo fakahoko katoa ʼo te gāue ʼi te telituale. Ko Te ʼu Logo ʼo Te Puleʼaga N° 35 ʼe feala ke tufa e te ʼu kaugā fai faka mafola mokā ʼe nātou fagonogono ki te hahaʼi ʼaē ʼe talitali ʼi te ʼu tauʼaga kā, ʼi te ʼu koloā liliki, ʼi te ʼu tauʼaga motokā, pea mo he tahi age faʼahi. Fakahā peʼe feafeaʼi te tokoni ki te ʼu hahaʼi ʼaē ʼe foʼofoʼou ʼaē ʼe nātou fia kau ki te gāue fai faka mafola. Fakapipiki kiai mo te manatu ʼi te pepa ʼe ʼalutahi mo Te Minisitelio ʼo Te Puleʼaga ʼo ʼApelili 1995, ʼi te palakalafe 11. ʼI ʼihi telituale ʼe lelei anai tatatou gāue takitokotahi pea ʼe toe lelei foki tatatou mole taki he kato mokā tou tufa Te ʼu Logo ʼo Te Puleʼaga. Fai he ʼu faʼifaʼitaki nounou e lua peʼe tolu.

Katiko 211 pea mo te faikole fakaʼosi.

Vāhaʼa ʼe Kamata ʼi Te 13 ʼOketopeli

Katiko 48

12 min: Ko te ʼu logo ʼo te kokelekasio. Lau ʼo te falā. Toe vakaʼi te ʼu puani ʼaē ʼe talanoa kiai Te Tule Leʼo pea mo te Réveillez-vous! ʼaē neʼe hoki tou maʼu. Fakamanatuʼi ki te ʼu kaugā fai faka mafola fuli, ʼe tufa anai te ʼu nusipepa mo Te ʼu Logo ʼo Te Puleʼaga N° 35 ʼi te fai faka mafola ʼaē ʼe fai ʼi te fakaʼosi vāhaʼa. ʼE tonu ke ʼaʼahi ia nātou fuli ʼaē neʼe fia logo ki te moʼoni pea ke tou teuteu ʼo fakahā kia nātou te apone.

15 min: Ko te ʼu logo ʼe ʼaoga ki te kokelekasio.

18 min: “Koteā Te Meʼa ʼe Koutou Fai Mo Kapau ʼe Mole Fia Logo Te Hahaʼi?” Ko te ʼu tagata ʼāfea e toko lua ʼe nā fai palalau ki te alatike ʼaia. Fakapipiki kiai mo te ʼu manatu ʼo te alatike ʼo Te Tule Leʼo, Fakafalani ʼo te ʼaho 1 ʼo Novepeli 1974, pasina 668 ki te 670, ko tona kupu tafito (“ ʼE Feafeaʼi Anai Takotou Aga Mo Kapau ʼe Mole Fia Logo Te Hahaʼi.”)

Katiko 72 pea mo te faikole fakaʼosi.

Vāhaʼa ʼe Kamata ʼi Te 20 ʼOketopeli

Katiko 42

15 min: Ko te ʼu logo ki te kokelekasio. Fakahā fakanounou te ʼu manatu tāfito ʼo te kaupepa foʼou, Un livre pour tous. Fakahā ko te kaupepa ʼaia neʼe teuteuʼi moʼo tokoni ki te hahaʼi ʼaē neʼe lagi lelei tanatou ako, kae ʼe mole lahi te meʼa ʼe nātou ʼiloʼi ʼo ʼuhiga mo te Tohi-Tapu. ʼE mole tou faiga anai ke tou fakahā kia nātou ko te Tohi-Tapu ʼe haʼu mai te ʼAtua, kae ʼe tou tuku kia nātou te kaupepa heʼe talanoa anai ki te faʼahi ʼaia. Fakaloto mālohiʼi ia nātou fuli ʼaē ʼe feala tanatou lautohi ʼi te lea Fakafalani ke nātou lau te kaupepa ʼaia. Vakaʼi he ʼu fakamatala ʼo te Annuaire 1996, pasina 6 ki te 8, ʼi te kupu “Distribution mondiale des ‘Nouvelles du Royaume.’ ” Faka maʼuhigaʼi te ʼu faiga ʼaē neʼe fai e te ʼu kaugā fai faka mafola takitokotahi moʼo tufa ʼo Te ʼu Logo ʼo Te Puleʼaga N° 35. Fakaloto mālohiʼi te ʼu kaugā fai faka mafola fuli ke nātou kau ki te tufa ʼo Te ʼu Logo ʼo Te Puleʼaga N° 35.

15 min: “ ʼE Lelei Koa Takotou Kai ʼi Te Faʼahi Fakalaumālie?” Ko te akonaki ʼe fakatafito ki Te Tule Leʼo ʼo te ʼaho 15 ʼo ʼApelili 1997, ʼi te ʼu pasina 28 ki te 31.

15 min: “Ko Koutou Koa Ko He Fakamoʼoni ʼa Sehova ʼi Te Temi Fuli?” Ko he akonaki ʼe fai e he tagata ʼāfea.

Katiko 129 pea mo te faikole fakaʼosi.

Vāhaʼa ʼe Kamata ʼi Te 27 ʼOketopeli

Katiko 43

12 min: Ko te ʼu logo ʼo te kokelekasio. Toe vakaʼi te tuputupu ʼo te tufa ʼo Te ʼu Logo ʼo Te Puleʼaga N° 35. Fakaafe ia nātou ʼaē ʼi te fono ke nātou fakamatala he ʼu meʼa neʼe hoko ʼe fakaloto mālohi. Fakahā pe neʼe feafeaʼi te lahi ʼo te gāueʼi ʼo te telituale pea ʼe tonu anai ke feafeaʼi tona fakahoko katoa ʼi te ʼaho 16 ʼo Novepeli. Kapau kua ʼosi tatatou tufa te pepa lotu ʼaia ʼi te telituale, ʼe tou tufa anai te tohi Te ʼAtamai Mālama ʼi te fakaʼosi ʼo te māhina. Fakamahino ko tatatou fakatuʼutuʼu ke kamata he ʼu ako Tohi-Tapu ʼaki tatatou ʼaʼahi ia nātou ʼaē neʼe nātou toʼo Te ʼu Logo ʼo Te Puleʼaga.

15 min: ʼE Lava Feafeaʼi Hatatou Maʼu Te ʼAmanaki ʼi Te Heʼe ʼAmanaki. Akonaki ʼe fai e he tagata ʼāfea ʼo fakatafito ki Te Tule Leʼo ʼo te ʼaho 15 ʼo Maio 1997, ʼi te ʼu pasina 22 ki te 25.

18 min: Ke Mū Tokotou Mālama. Akonaki pea mo he fai palalau ʼe fakatafito ki te tohi Notre ministère ʼi te ʼu pasina 84 ki te 89. Fakatuʼutuʼu fakatomuʼa ke fai e he ʼu kaugā fai faka mafola he ʼu fakamatala ʼo mulimuli ki te ʼu fehuʼi ʼaē ʼe hoa mai: (1) He koʼe ʼe fai faka mafola te kau Fakamoʼoni ʼa Sehova ʼi te ʼu ʼapi? (2) Neʼe feafeaʼi te mafola ʼo te faʼahiga gāue ʼaia ʼi te ʼuluaki sēkulō? (3) He koʼe ʼe maʼuhiga ke tou haga fai faka mafola ʼi te ʼu ʼapi ia ʼaho nei? (4) Koteā te ʼu ʼaluʼaga ʼe feala ke faigataʼa ai tatatou kau tuʼumaʼu ki te gāue fai faka mafola? (5) ʼE lava feafeaʼi tatatou maʼu he tokoni ke feala ai hatatou faʼa kātaki ʼi te gāue? (6) ʼE feafeaʼi anai tatatou maʼu te tapuakina ʼi tatatou fakamū totatou mālama? (7) Koteā te meʼa ʼe feala ke tou fai ke lahi ai te fua lelei ʼo tatatou felogoi mo te hahaʼi? Ko te ʼu kaugā fai faka mafola e toko tolu peʼe toko fā ʼe nātou fakamatala te ʼu meʼa fakaloto mālohi neʼe nātou leleiʼia ʼi te fai faka mafola ʼi te ʼu koloā peʼe ko te fagonogono ʼi te ala.

Katiko 1 pea mo te faikole fakaʼosi.