Koteā Te Meʼa ʼe Koutou Fai Mo Kapau ʼe Mole Fia Logo Te Hahaʼi?
1 Ko te kupu ʼaē mole fia logo, ʼe faka ʼuhiga ki he tahi ʼe mole ina logoʼi he meʼa ʼi tona loto, ʼe mole ina fia ʼiloʼi he meʼa peʼe mole fia tokaga kiai. Ko te fihifihia māhani la ʼaia ʼe felāveʼi mo tatou ʼi te minisitelio. Koteā te meʼa ʼe koutou fai mokā hoko te faʼahi ʼaia? ʼE tupu ai koa hakotou vaivai ʼi tokotou minisitelio? ʼE lava feafeaʼi hakotou tauʼi te faʼahi ʼaia ke koutou fakahā te logo lelei ʼo te Puleʼaga ki te hahaʼi?
2 ʼUluaki, koutou faiga ke koutou ʼiloʼi pe koʼe ʼe mole fia logo te hahaʼi ʼo tokotou telituale. ʼE nātou feiā koa heʼe nātou meo ki tonatou ʼu takitaki faka politike pea mo tonatou ʼu takitaki lotu? ʼE nātou logoʼi koa ʼi tonatou loto ʼe mole ʼi ai he puleʼaki ki te ʼu fihifihia ʼaē ʼe felāveʼi mo nātou? ʼE nātou lotolotolua koa ʼo ʼuhiga mo te ʼu fakapapau ʼo he meʼa ʼe lelei age? ʼE hoki nātou fia fakakaukauʼi koa te ʼu meʼa fakalaumālie mo kapau ʼe nātou foimo sio ki te ʼu tapuakina moʼoni?
3 Tou Faka Maʼuhigaʼi Te ʼAmanaki ʼo ʼUhiga Mo Te Puleʼaga: Ko te ʼu fihifihia fuli ʼe feala ke fakatokatoka e te Puleʼaga. Koia mo kapau ʼe feala, ʼe tonu ke tou palalau ʼo ʼuhiga mo te ʼu fakapapau ʼo te Puleʼaga, ʼo talanoa tāfito ki te ʼu vaega ʼo te Tohi-Tapu, tatau aipe peʼe mole feala peʼe mole ʼaoga ke fakahā te vaega ʼo te Tohi-Tapu. (Hep. 4:12) Kae, ʼe lava feafeaʼi koa hatatou palalau ki te faʼahi ʼaia?
4 ʼE ʼaoga ke mahino te hahaʼi ki te tupuʼaga ʼo tatatou ʼaʼahi ia nātou. ʼE tonu ke mahino kia nātou ʼe tou ʼoʼofa ki totatou kāiga pea ʼe tou tokaga ki te hahaʼi. ʼE feala ke tou fai he fehuʼi moʼo uga ʼo tanatou fakakaukau ohage la, “Koteā koa takotou manatu ʼo ʼuhiga mo te puleʼaki ki [he fihifihia ʼe felāveʼi mo te hahaʼi]?” Kapau ʼe mole he fua ʼo takotou ʼuluaki palalau, koutou ʼahiʼahi he tahi age ʼuluaki palalau.
5 ʼI he telituale ʼe lahi ai te hahaʼi, pea neʼe mole nātou fia logo ki te logo ʼo te Puleʼaga, neʼe faiga te ʼu kaugā fai faka mafola ke nātou maʼu he ʼu ʼuluaki palalau moʼo lagaʼi ʼo te fia logo ʼa te hahaʼi. ʼI tanā fakahā te tohi Te ʼAtamai Mālama, neʼe ʼahiʼahi e te taumatuʼa te ʼuluaki palalau ʼaenī: “ ʼI takotou manatu ʼe maʼuhiga koa he ako ʼe lelei ke haʼele lelei ai te malamanei ia ʼaho nei? ʼI takotou manatu ʼe kau koa ki te ako ʼe lelei te maʼu ʼo te ʼatamai mālama ʼo te Tohi-Tapu?” ʼI he hoʼatā neʼe nātou tufa ai te ʼu tohi e tolu, pea ki muli age neʼe ʼui age e te fafine neʼe ina toʼo te tohi, neʼe ina lau katoa ia te tohi Te ʼAtamai Mālama pea neʼe loto ke fai hana ako Tohi-Tapu.
6 Mokā ʼe koutou felāveʼi mo te ʼu hahaʼi ʼaē ʼe mole fia logo, koutou ʼahiʼahi he ʼu faʼahiga palalau kehekehe, pea koutou fai he ʼu fehuʼi ʼe uga ai tanatou fia logo, pea koutou palalau ki te mālohi ʼo te Folafola ʼa te ʼAtua. ʼE feala ai ke koutou tokoni ki niʼihi ke nātou maʼu tatatou ʼamanaki taulekaleka ʼo ʼuhiga mo te Puleʼaga.