“ ʼE Mole Au Loto Au Kiai”
1 ʼE ko he palalau kua tou māhani kiai ʼi ʼihi telituale ʼo ʼuhiga mo te logo ʼaē ʼe tou faka mafola. Koteā ʼaē kā tokoni mai anai ke mole tou lotovaivai mokā tou tau mo te faʼahi ʼaia ʼi te telituale? ʼE lava feafeaʼi hatatou uga te fia logo ʼa te hahaʼi ki te logo lelei?
2 Tou Taupau He Loto Fiafia: Kapau ʼe tou manatuʼi ia te tupuʼaga ʼo te mole fia logo ʼa te hahaʼi, pea ʼe tokoni mai anai ke tou taupau he loto fiafia. Ko te hahaʼi ʼaē neʼe akoʼi age kiā nātou ia te akonaki ʼo te evolisio pe neʼe natou lahilahi ake ʼi te lotolotoiga ʼo he hahaʼi ʼe mole tui ki te ʼAtua, ʼe lagi mole maʼuhiga anai kiā nātou ia te Tohi-Tapu. Ko ʼihi lagi kua natou fiu ʼi te lotu ʼuhi ko te ʼu aga mālualoi ʼaē neʼe natou tokagaʼi. Ko ʼihi, lagi mole natou fia logo ki tatatou fai faka mafola ʼuhi heʼe natou loto tuʼania pea mo heʼe ʼamanaki. (Efe. 2:12) Ko ʼihi ʼe ‘mole natou fia logo’ heʼe natou mafasia ʼi te ʼu tuʼania ʼo te maʼuli.—Mat. 24:37-39.
3 ʼE feala pē ke tou fiafia ʼi tatatou minisitelio, logolā te mole fia logo ʼa ʼihi, heʼe tou ʼiloʼi ʼe tou faka kolōlia ia Sehova ʼaki tatatou faiga ʼaē ʼi te faka mafola. (1 Pet. 4:11) Tahi ʼaē meʼa, ko te palalau ki te moʼoni kiā nātou ʼaē ʼe mole heʼeki natou fia logo kiai, ʼe ina fakaloto mālohiʼi pē tatatou tui. Tou faiga ke tou maʼu te sio ʼa te ʼAtua ʼaē ki te hahaʼi ʼo te telituale. Neʼe lotomamahi te ʼAtua ki te hahaʼi ʼo Ninive ʼaē neʼe mole natou “ ʼiloʼi te kehekehe ʼo tonatou nima mataʼu pea mo tonatou nima hema.” (Son. 4:11) Ko te hahaʼi ʼo totatou telituale ʼe ʼaoga kiā nātou te logo lelei! Koia, ʼe mole tonu ai ke tou situʼa kiā nātou, kae ke tou kumi te ʼu puani ʼaē moʼo uga ai tanatou fia logo ki te logo ʼo te Tohi-Tapu.
4 Tou Palalau Ki Te ʼu Fihifihia ʼAē ʼe Hoko ʼi Te Telituale: ʼI takotou ʼu ʼuluaki palalau, ʼe lagi kotou lava lagaʼi he fihifihia ʼe hoko ʼi te telituale pea mo fehuʼi age tana manatu ki te faʼahi ʼaia. Kotou fakalogo lelei mokā palalau, ʼosi ʼaia kotou lau age ʼi te Tohi-Tapu ia te logo fakaloto fīmālie moʼo tali ki te ʼu meʼa ʼaē ʼe tuʼania kiai. ʼI te ʼosi ʼo te tuʼutāmaki neʼe hoko ʼi te telituale, neʼe fakahā e te tehina ki te hahaʼi ʼaē neʼe fai faka mafola kiai tana lotomamahi ʼaupitō ki te meʼa ʼaē neʼe hoko. Neʼe ina ʼui fēnei: “Meʼa faikehe, he neʼe kamata palalau ai te hahaʼi. Pea neʼe lahi taku ʼu fai palalau ʼi te ʼaho ʼaia koteʼuhi neʼe au tokagaʼi te ʼu meʼa ʼaē neʼe natou tuʼania kiai.”
5 ʼE ko te Puleʼaga ʼo te ʼAtua ʼaē kā ina fakatokatoka anai te ʼu fihifihia fuli ʼaē ʼe tau mo te hahaʼi. Kotou faigaʼi ke kotou ʼiloʼi te fihifihia ʼaē ʼe tuʼaniaʼi tāfito e te hahaʼi. Heʼe lagi feala ai ke kotou fakamahino age kiā nātou ia te logo ʼo te ʼamanaki ʼaē ʼe tuʼu ʼi te Tohi-Tapu. Kapau ʼe mole fia logo ʼi te temi ʼaia ʼe kotou faka mafola age, lagi ʼe fakalogo anai “i he tahi aho.”—Gaue 17:32.