ʼE Tou Toe Toʼo Anai Koa?—Ko He Tahi Kole Ke Maʼu He ʼu Pionie Vaeluaʼi Temi
1 Koteā ʼaē ka tou toe toʼo anai? ʼE tou pionie vaeluaʼi temi anai koa lolotoga te temi ʼo te ʼAho Fakamanatu? Ko te pepa ʼaē ʼe ʼalutahi mo Te Minisitelio ʼo Te Puleʼaga ʼo Fepualio 1997, neʼe ina fakatokagaʼi mai te kupu tāfito ʼaenī: “ ʼE Kumi—Te ʼu Pionie Vaeluaʼi Temi e 190.” Neʼe mātou falala ʼe koutou vakavakaʼi fakalelei anai te kole ʼaia. ʼI te tohi ʼo te tānaki gāue ʼo te māhina ʼo Malesio 1997, neʼe mātou fiafia ʼi tamatou sio ʼaē neʼe ko te toko 249 neʼe nātou toʼo te selevisi pionie vaeluaʼi temi ʼi Niu-Kaletonia pea neʼe toko 2 ʼi Uvea mo Futuna! Kapau ʼe tou hilifaki ki te lahi ʼaia te toko 48 ʼo te kau pionie katoa pea mo te toko 6 ʼo te ʼu pionie makehe ʼo te māhina ʼaia, neʼe ko teitei 20 ʼi te teau ʼi te ʼu kaugā fai faka mafola fuli ʼaē neʼe nātou toʼo te selevisi pionie. ʼE tou toe fakahoko anai koa te faʼahi ʼaia lolotoga te temi ʼaenī ʼo te ʼAho Fakamanatu?
2 ʼE mātou vikiʼi fakamalotoloto ia nātou fuli ʼaē neʼe nātou faiga mālohi ke tuputupu tanatou gāue fai faka mafola ʼi te taʼu ʼaenī kua hili. ʼE hā lelei ai neʼe uga koutou e takotou ʼofa moʼoni kia Sehova ʼAtua pea ki tokotou kāiga. (Luka 10:27; 2 Pet. 1:5-8) Ko te ʼu kaugā fai faka mafola mo tanatou faʼahiga maʼuli kehekehe, neʼe nātou fai he ʼu fakatuʼutuʼu ke feala ai hanatou kau ki te selevisi pionie vaeluaʼi temi. ʼI ʼihi ʼu kokelekasio, neʼe teitei toko 30 te ʼu kaugā fai faka mafola ʼaē neʼe nātou toʼo fakatahi te selevisi pionie, ʼo kau kiai te tokolahi ʼo te ʼu tagata ʼāfea pea mo te ʼu tagata faifekau faka minisitelio.
3 Neʼe toe kau kiai mo te kau tūpulaga ʼi te taʼu ʼaenī kua hili. Ko te kaugā fai faka mafola ʼe taʼu 13 neʼe mole heʼeki papitema, neʼe atalitali ki te temi ʼaē neʼe feala ai ke ina fakahā kua ina foaki tona maʼuli kia Sehova. Hili tana papitema ʼi Fepualio, neʼe faitohi ʼo ʼuhiga mo tana fia liliu ʼo pionie vaeluaʼi temi ʼi Malesio: “Mai tona ʼaluʼaga ʼaē ʼe mole he meʼa ʼe ina tāʼofi ʼau ʼi te temi ʼaenī, neʼe ʼau foimo fai atu aipe taku kole ʼaē ke ʼau pionie. . . . Neʼe mole feala ke mātou ʼiloʼi he ʼu temi fakafiafia mo kanapaula neʼe mole koutou fai mai takotou fakaafe ʼofa ʼaē ke mātou pionie. ʼE ʼau fakamālo kia Sehova ʼi taku maʼu te pilivilesio ʼaenī ke ʼau kau ia nātou ʼaē neʼe nātou tali ki te fakaafe.” Neʼe ina fakatuʼutuʼu ke ina toe toʼo te selevisi ʼaia.
4 Neʼe lagi koutou kau ʼi te toko 249 ʼi Niu-Kaletonia ʼaē neʼe nātou toʼo te selevisi pionie vaeluaʼi temi ʼi Malesio ʼo te taʼu ʼaenī kua hili, peʼe ʼi te toko 190 ʼi ʼApelili, peʼe ʼi te toko 208 ʼi Maio, peʼe ʼi te toko 4 ʼaē neʼe nātou pionie ʼi Maio ʼi Uvea. ʼE koutou toe fai anai koa ʼi te taʼu ʼaenī? Kapau neʼe mole feala hakotou pionie ʼi te taʼu ʼaenī kua hili, ʼe feala koa ke koutou toʼo ʼi te taʼu ʼaenī? ʼE feala koa ke tou fakalaka ʼi te toko 249, te kaugamālie ʼo nātou ʼaē neʼe pionie vaeluaʼi temi ʼi Malesio 1997? Neʼe mole heʼeki ʼi ai he tahi age māhina neʼe tokolahi ʼaupito ai te kau pionie vaeluaʼi temi.
5 Tou Faiga Tāfito ʼi ʼApelili Pea Mo Maio: ʼI te taʼu ʼaenī, ʼe tō te ʼAho Fakamanatu ʼi te Moeaki, ʼaho 11 ʼo ʼApelili, ʼo liliu ai te māhina ko ʼApelili ko he māhina lelei ʼaupito moʼo fakatuputupu tatatou gāue ʼi te minisitelio. (2 Ko. 5:14, 15) Lolotoga te ʼu ʼuluaki ʼaho e 11 ʼo te māhina, ʼe tou tokaga anai ke tou fakaafe te tokolahi ʼo nātou ʼaē ʼe fia logo ke nātou kau ki te ʼAho Fakamanatu. Kapau ʼe koutou fakatuʼutuʼu ke koutou pionie vaeluaʼi temi, koutou foaki takotou pepa ʼi muʼa ʼo te temi ʼaē ʼe koutou fia kamata ai.—1 Ko. 14:40.
6 ʼUhi ʼaē ko fakaʼosi vāhaʼa e nima ʼi te māhina ʼo Maio, ʼe lagi faigafua anai ki te ʼu kaugā fai faka mafola ʼaē ʼe ako peʼe gāue temi katoa, ke nātou pionie vaeluaʼi temi ʼi te māhina ʼaia. Kapau ʼe koutou fakatuʼutuʼu ke koutou fai faka mafola ia hola e hogofulu, ʼi te ʼu fakaʼosi vāhaʼa e nima, pea ʼe tonu pe anai ke koutou fai te tahi ʼu hola e hogofulu ʼi te māhina ke koutou maʼu ai te ʼu hola e 60.
7 Lolotoga te ʼu māhina ʼo ʼApelili pea mo Maio, ʼe tou tufa anai te apone pea mo Te Tule Leʼo. ʼE tonu ke tupuʼaki hatatou lotomālohi ke tou pionie. He koʼe ʼe tou ʼui te faʼahi ʼaia? Koteʼuhi ʼe faigafua te fakahā ʼo te ʼu nusipepa pea ʼe tou leleiʼia te gāue mo te ʼu nusipepa ʼaia ʼi te minisitelio. ʼE feala ke tou fakaʼaogaʼi lelei ʼi te ʼu faʼahi fuli ʼo te minisitelio—ʼi te fai faka mafola ʼi te ʼu ʼapi, pea mo te ʼu fale koloā, ʼi tatatou fai palalau mo te hahaʼi ʼi te ala, ʼi te ʼu taulaga motokā, ʼi te ʼu ʼōloto pea mo he tahi faʼahiga fagonogono faigamālie. Ko te meʼa ʼaē ʼe maʼuhiga tāfito, heʼe lagolago Te Tule Leʼo pea mo te Réveillez-vous! ki te ʼu moʼoni ʼo te Puleʼaga. ʼE nā fakahā te fakahoko ʼo te ʼu lea faka polofeta ʼo te Tohi-Tapu, ʼaē ʼe fakamoʼoni ai ʼe lolotoga ʼafio te Puleʼaga ʼo te ʼAtua. ʼE toe malave foki te ʼu nusipepa ki te maʼuli ʼo te kau lautohi heʼe talanoa fakalelei ki te ʼu meʼa ʼaē ʼe ʼaoga moʼoni ki te hahaʼi. Kapau ʼe tou manatuʼi pe neʼe lave feafeaʼi te ʼu nusipepa maʼuhiga ʼaia ki totatou maʼuli, pea ʼe uga anai tatou e te faʼahi ʼaia ke lahi ʼaupito tatatou kau ki te tufa ʼo te ʼu nusipepa ʼaia ʼi ʼApelili pea mo Maio.
8 Moʼo teuteuʼi koutou ki te tufa lahi ʼaia ʼo te ʼu nusipepa, ʼe ʼaoga anai ke koutou toe vakaʼi te ʼu alatike ʼaenī: “Ko Te Tule Leʼo pea mo te Réveillez-vous!—Ko Te ʼu Nusipepa ʼe Feʼauga Lelei Ki Te Moʼoni” (Te Tule Leʼo ʼo te ʼaho 1 ʼo Sanualio 1994), “Tou Fakaʼaogaʼi Fakalelei Tatatou ʼu Nusipepa” (Te Minisitelio ʼo Te Puleʼaga ʼo Sepetepeli 1995), pea mo “Koutou Teuteuʼi Te Fakahāhā ʼo Takotou ʼu Nusipepa” (Te Minisitelio ʼo Te Puleʼaga ʼo ʼOketopeli 1996).
9 ʼE Tuku e Te Kau Tagata ʼĀfea Te Faʼifaʼitaki: Moʼo tokoni ki te tokolahi ʼo te ʼu kaugā fai faka mafola ʼaē neʼe pionie ʼi te māhina ʼo Malesio ʼo te taʼu ʼaenī kua hili, neʼe fakatuʼutuʼu e te ʼu tagata ʼāfea ʼo te kokelekasio ʼi Amelika te Moeaki makehe e tahi ʼi te māhina, ki te gāue fai faka mafola maʼa te kokelekasio katoa. Neʼe fai te ʼu fono fai faka mafola kehekehe ʼi te ʼaho ʼaia, ʼo feala ai ke kau te kokelekasio katoa ki te ʼu faʼahiga fai faka mafola kehekehe. Neʼe kau ki te ʼu faʼahi ʼaia te fai faka mafola ʼi te ʼu matani gāue, ʼi te ala, ʼi te ʼu ʼapi, te fai ʼo te ʼu ʼaʼahi, pea mo te fai faka mafola ʼaki te telefoni pea mo te faitohi. Neʼe fakaofoofo te meʼa ʼaē neʼe hoko, he neʼe ko kaugā fai faka mafola e toko 117 neʼe nātou kau ʼi te minisitelio ʼi te ʼaho ʼaia. Neʼe ko tonatou ʼu hola e 521 ʼi te minisitelio pea mo nātou tufa te ʼu kaupepa lalahi, mo te ʼu nusipepa pea mo te ʼu tohi e 617! Neʼe toe hoko atu te fiafia ʼo te Moeaki ʼaia ʼi te ʼAhotapu, he ko te tokolahi ʼaupito neʼe nātou kau ki te Akonaki ki te Kaugamālie pea mo te Ako ʼo Te Tule Leʼo.
10 ʼI te ʼu Fono Gāue fuli ʼo ʼApelili pea mo Maio, ʼe tonu ke fakamanatuʼi ki te kokelekasio te hola pea mo te faʼahi ʼaē ka fai ai anai te ʼu fono ki te fai faka mafola ʼi te vāhaʼa ʼaē ka hoa kiai, tāfito la mokā ʼe toe fai te tahi ʼu fakatuʼutuʼu ʼi te ʼu fakatuʼutuʼu māhani. ʼE fakaloto mālohiʼi te kau pionie katoa pea mo te ʼu kaugā fai faka mafola ʼaē ʼe mole pionie vaeluaʼi temi ke nātou lagolago ki te ʼu fakatuʼutuʼu ʼaia mo kapau ʼe feala.
11 ʼE tonu anai ki te tagata taupau ki te gāue ke palalau mo te tēhina ʼaē ʼe tokaga ki te ʼu telituale, ke nā fakatuʼutuʼu ke gāueʼi te ʼu telituale ʼaē ʼe mole fai tuʼumaʼu. ʼE tou faiga anai ke tou toe liliu ki te ʼu ʼapi ʼaē neʼe mole tou maʼu atu kiai he tahi, pea ke tou fai faka mafola ʼi te ʼu ala pea mo te ʼu fale koloā. ʼE feala ke faka maʼuhigaʼi te fai faka mafola ʼi te afiafi. ʼE tonu ke fakaʼui he tahi ʼu nusipepa ʼe feʼauga ki te ʼu māhina ʼo ʼApelili pea mo Maio ʼuhi ko te lahi ʼo te gāue.
12 Tokolahi Te ʼu Kaugā Fai Faka Mafola ʼe Feala Ke Nātou Pionie: ʼE kamata fēnei te kole ʼaē ke kita pionie: “ ʼUhi ko taku ʼofa ʼaē kia Sehova pea mo taku fia tokoni ki te hahaʼi ke nātou ʼiloʼi ia ia pea mo tana ʼu fakatuʼutuʼu ʼofa, ʼe ʼau loto ke lahi age taku kau ki te fai faka mafola ʼi taku toʼo te selevisi pionie vaeluaʼi temi.” Ko totatou ʼofa kia Sehova pea mo tatatou fia tokoni ki te hahaʼi ʼi te faʼahi fakalaumālie ʼe ko te ʼu tafitoʼaga ʼaia ʼo totatou foaki totatou maʼuli kia Sehova. (1 Tim. 4:8, 10) Ko he tahi ʼe fia pionie vaeluaʼi temi, ʼe tonu muʼa ke papitema, ke lelei tana aga, pea ke feala hana fai he ʼu hola e 60 ʼi te minisitelio ʼi te māhina katoa. Ka tou vakaʼi tatatou ʼu ʼaluʼaga, ʼe feala koa kia ʼihi ia tatou ʼaē neʼe mole heʼeki pionie ʼi muʼa atu ke nātou toʼo ʼi te taʼu ʼaenī, ʼi te māhina ʼo ʼApelili peʼe Maio?
13 ʼE tokolahi ʼi te ʼu kokelekasio ʼe lagi nātou sio anai ʼe feala mo nātou ke nātou pionie ʼi tanatou sio ʼaē ʼe tatau te ʼaluʼaga ʼo nātou ʼaē ʼe pionie pea mo tanatou ʼaluʼaga. Ko te ʼu fānau ʼaē ʼe kei ako, mo nātou ʼaē kua matutuʼa, mo nātou ʼaē ʼe gāue temi katoa, ʼo kau ai mo te ʼu tagata ʼāfea pea mo te ʼu tagata faifekau faka minisitelio, pea mo ʼihi atu, neʼe nātou maʼu te ʼu fua lelei ʼi tanatou pionie vaeluaʼi temi. Ko te fafine mo ʼana ʼu fānau e toko lua, ʼe gāue temi katoa, neʼe ina fai tana ʼu hola e 60, mo ina tufa te ʼu nusipepa e 108, pea mo ina kamata te ʼu ako Tohi-Tapu e 3 ʼi te māhina ʼaē neʼe pionie vaeluaʼi temi ai. Neʼe lava feafeaʼi tana fai te meʼa ʼaia? Neʼe ina fakaʼaogaʼi te hola kai ʼo tana gāue moʼo fai faka mafola ʼi te telituale ʼaē neʼe ōvi age kiai, neʼe faitohi ʼo fai faka mafola ai, pea neʼe fagonogono ʼi te ʼu taulaga motokā pea mo te ʼu ala. Neʼe ina toe fakaʼaogaʼi foki mo tana ʼaho mālōlō ke kau mo te kokelekasio ki te fai faka mafola. Logope la ʼi te kamata, neʼe manatu ia ʼe mole feala ke pionie vaeluaʼi temi, kae ʼaki te fakaloto mālohi ʼo ʼihi pea mo tana polokalama lelei, neʼe ina tauʼi tana ʼu faigataʼaʼia.
14 Neʼe fakafimālieʼi fēnei e Sesu tana ʼu tisipulo: “Ko taku ʼakau toho ʼe mālū pea ko taku kavega ʼe maʼamaʼa.” (Mateo 11:30) Neʼe ko te kupu tāfito ʼaia ʼo te alatike fakaloto mālohi ʼo Te Tule Leʼo ʼo te ʼaho 15 ʼo ʼAukusito 1995. ʼE talanoa ʼo ʼuhiga mo te tuagaʼane neʼe gāue temi katoa pea neʼe ko he meʼa fakatupu lotohoha kia ia. Neʼe manatu koa ʼe mole feala ke ina toʼo te selevisi pionie vaeluaʼi temi? Kailoa. ʼI tona fakahagatonu, neʼe ina fakatuʼutuʼu ke pionie vaeluaʼi temi ʼi te ʼu māhina fuli. Koteā tona tupuʼaga? He neʼe ina logoʼi ko te gāue pionie ʼe tokoni kia ia ke ina taupau maʼu he aga fakapotopoto. ʼI tana tokoniʼi te hahaʼi ke nātou ako te moʼoni ʼo te Tohi-Tapu pea mo tana sio ʼaē ki te fetogi ʼo tonatou maʼuli ke feala hanatou maʼu te ʼofa ʼo te ʼAtua, neʼe fiafia ʼaupito ai, logope la tana maʼumaʼua.—Taag. 10:22.
15 ʼE lahi age te ʼu tapuakina ʼaē ʼe kita maʼu ʼi te ʼu sakilifisio pea mo te ʼu fetogi ʼaē ʼe tonu ke kita fai ke feala hakita pionie. Neʼe faitohi te tuagaʼane ʼo ina fakamatala te meʼa ʼaē neʼe hoko kia ia ʼi tana gāue pionie vaeluaʼi temi: “Neʼe tokoni mai te selevisi ke mole ʼau tokaga pe kia ʼau kae ke lahi age taku tokoni ki te hahaʼi. . . . ʼE ʼau fakaloto mālohiʼi ia nātou ʼaē ʼe feala ke nātou fai te faʼahi ʼaia, ke nātou toʼo te selevisi.”
16 ʼE Maʼua Ke Fai He Polokalama Lelei: ʼI te pasina fakamuli ʼo te pepa ʼaenī, neʼe mātou toe tohi te ʼu polokalama ʼaē neʼe hā ʼi Te Minisitelio ʼo Te Puleʼaga ʼo Fepualio 1997. Lagi ʼe ʼalutahi he polokalama mo takotou ʼu ʼaluʼaga. ʼI takotou toe vakaʼi te ʼu polokalama ʼaia, koutou fakakaukauʼi te ʼu gāue ʼaē ʼe koutou fai māhani ʼi te māhina. Koteā te ʼu meʼa ʼaē ʼe ʼaoga ki te ʼapi ʼe feala ke fai ʼi muʼa ʼo takotou gāue pionie peʼe feala ke tuku faka temi ʼo aʼu ki te ʼosi ʼo takotou selevisi? ʼE feala koa ke koutou tuku ʼihi ʼu temi mālōlō peʼe ko te tahi ʼu temi fakafiafia? ʼAua naʼa koutou sioʼi te ʼu hola e 60 ʼaē ʼe tonu ke koutou fai, kae koutou fakatuʼutuʼu te ʼu hola ʼaē ʼe tonu ke koutou fai, ʼi te ʼu ʼaho fuli peʼe ko te ʼu vāhaʼa fuli. Ko hola pe e 2 ʼi te ʼaho peʼe ko hola e 15 ʼi te vāhaʼa ʼe ʼaoga ki te pionie vaeluaʼi temi. Koutou faka ʼuhiga te ʼu polokalama ʼaē ʼe tuku atu ohage ko he ʼu faʼifaʼitaki, pea ʼaki he peni, koutou tohi te meʼa ʼaē ʼe feala ke koutou fai moʼo fakatuʼutuʼu hakotou polokalama selevisi ʼe tau mo koutou pea mo takotou famili.
17 Ko te tali lelei pea mo te lagolago ʼaupito ʼaē neʼe fakahā e te kokelekasio ki te minisitelio ʼi te taʼu ʼaenī kua hili, neʼe ina fakatupu ai te fiafia ʼaupito ʼo te pionie katoa ʼaē neʼe ina tohi fēnei: “ ʼE ʼau fakamālo ʼaupito ki takotou fakaloto mālohi ʼofa ke ʼi ai he faiga makehe moʼo lagolago kia nātou ʼaē neʼe pionie vaeluaʼi temi. . . . Neʼe tokoni takotou ʼu polokalama ki te tokolahi ʼaē neʼe mole heʼeki nātou pionie ʼi muʼa atu, ke nātou ʼiloʼi ai ʼe feala ke nātou toʼo te selevisi. . . . ʼE ʼau fiafia ʼaupito ʼi taku kau ki te kautahi ʼa Sehova pea mo mulimuli ki te takitaki ʼofa ʼo te tagata kaugana agatonu mo poto.”
18 ʼE fakapapau fēnei mai ia Tāʼaga Lea 21:5: “ ʼE mahino ia ʼe fua lelei te ʼu fakatuʼutuʼu ʼo ia ʼaē ʼe gāue fakamalotoloto.” Pea ʼe fakaloto mālohiʼi fēnei tatou ia Tāʼaga Lea 16:3: “Tuku tau ʼu gāue kia Sehova totonu, pea ko tau ʼu fakatuʼutuʼu ʼe tuʼu mālohi anai.” Ei, kapau ʼe tou faikole kia Sehova ʼo ʼuhiga mo te ʼu tonu ʼaē ʼe tou fai pea mo falala mālohi ʼe tokoni mai anai kia tatou, ʼe feala ke tou tui papau ʼe fua lelei anai tatatou ʼu fakatuʼutuʼu ke tou pionie vaeluaʼi temi. ʼI takotou sio ʼaē neʼe haʼele lelei takotou fakatuʼutuʼu ʼi te māhina e tahi peʼe lua ʼaē neʼe koutou pionie vaeluaʼi temi ai, ʼe lagi feala anai ke koutou fakaʼiloga te meʼa ʼaē ʼe tuʼu ʼi te pepa pionie vaeluaʼi temi, ʼaē ʼe tou lau fēnei ai: “Koutou fakaʼiloga ʼi henī mo kapau ʼe koutou fia hoko atu takotou selevisi pionie vaeluaʼi temi ʼi te māhina fuli.” Tatau aipe peʼe koteā ʼaē ka tou fai, kae ʼe feala ke tou fakatuʼutuʼu ke tou toe pionie vaeluaʼi temi ʼi ʼAukusito, heʼe ʼi ai anai te ʼu fakaʼosi vāhaʼa e nima. ʼI tatatou fakaʼosi te taʼu gāue ʼi ʼAukusito, ʼe tou faiga fakatahi anai ke tou kau fuli ki te fai faka mafola.
19 Neʼe fakakikite fēnei e Sesu: “Ko ʼaē ʼe tui kia te ʼau, ʼe ina toe fai anai mo ia te ʼu gāue ʼaē ʼe ʼau fai; pea ʼe ina fai anai he ʼu gāue ʼe lahi ake ʼi te ʼu gāue ʼaenī.” (Soane 14:12) ʼE ko totatou pilivilesio fakafiafia ke tou tauhi ohage ko he ʼu kaugā gāue ʼa te ʼAtua ʼi te temi ʼaē ʼe lolotoga hoko ai te lea faka polofeta ʼaia. ʼI te temi ʼaenī, ʼe tonu ke tou fakalahi ai te faka mafola ʼo te logo lelei, ʼo tou fakaʼaogaʼi te ʼu temi faigamālie moʼo fai te gāue ʼaia. (1 Ko. 3:9; Kol. 4:5) Ko te toʼo putuputu ʼo te selevisi pionie vaeluaʼi temi mokā ʼe feala, ʼe ko he ʼaluʼaga lelei ʼaupito ʼaia moʼo fakahoko totatou maʼua ʼi totatou ʼuhiga kaugā fai faka mafola ʼo te Puleʼaga. ʼE tou atalitali fakamalotoloto ke tou sio peʼe lahi feafeaʼi anai te hiva fakavikiviki ʼa te kau pionie vaeluaʼi temi ʼi te temi ʼaenī ʼo te ʼAho Fakamanatu. (Pes. 27:6) ʼI tatatou fakakaukauʼi te ʼu fua ʼo te taʼu ʼaenī kua hili, tou fai te fehuʼi ʼaenī: ‘ ʼE tou toe toʼo anai koa te selevisi?’ ʼE tou falala ʼe tou fai anai!
[Talanoa ʼo te pasina 3]
ʼE Feala Koa Ke Koutou Pionie Vaeluaʼi Temi?
“Tatau aipe peʼe feafeaʼi tokotou ʼaluʼaga, kae kapau kua koutou ʼosi papitema, mo lelei tatatou aga, pea mo feala ke koutou fai te ʼu hola e 60 ʼi te māhina katoa ʼi te fai faka mafola, pea mo koutou ʼiloʼi papau ʼe feala ke koutou pionie vaeluaʼi temi ʼi te māhina e tahi peʼe laka atu, ʼe fiafia anai te ʼu tagata ʼāfea ʼo takotou kokelekasio mo nātou vakaʼi takotou kole ki te selevisi ʼaia ʼaē ʼe ko he pilivilesio.”—Organisés pour bien remplir notre ministère, ʼi te pasina 114.
[Talanoa ʼo te pasina 6]
Te Polokalama ʼo ʼUhiga Mo Te Gāue Pionie Vaeluaʼi Temi
Ko Te Faʼahiga Tokoni Moʼo Fai ʼo Te ʼu Hola e 15 ʼi Te Gāue Fai Faka Mafola ʼi Te Vāhaʼa Fuli
ʼI Te Uhu—ʼi Te Mōnite ʼo Aʼu Ki Te Moeaki
Ko te ʼAhotapu ʼe feala ke ina fetogi he tahi ʼaho
ʼAho Temi Hola
Mōnite Uhu 21⁄2
Feliatolu Uhu 21⁄2
Feliafā Uhu 21⁄2
Felianima Uhu 21⁄2
Feliaono Uhu 21⁄2
Moeaki Uhu 21⁄2
ʼO fakakatoa ko te ʼu hola e: 15
Ko Te ʼu ʼAho Katoa e Lua
ʼE feala ke fili he ʼu ʼaho e lua ʼi te vāhaʼa
ʼAho Temi Hola
Feliafā ʼAho katoa 71⁄2
Moeaki ʼAho katoa 71⁄2
ʼO fakakatoa ko te ʼu hola e: 15
Te ʼu Afiafi e Lua Pea Mo Te Fakaʼosi Vāhaʼa
Ke fili he ʼu afiafi e lua ʼi te lolotoga vāhaʼa
ʼAho Temi Hola
Mōnite Afiafi 11⁄2
Feliafā Afiafi 11⁄2
Moeaki ʼAho katoa 8
ʼAhotapu Kogaʼi ʼaho 4
ʼO fakakatoa ko te ʼu hola e: 15
Te ʼu Hili Hoʼatā ʼo Te Vāhaʼa Pea Mo Te Moeaki
Ko te ʼAhotapu ʼe feala ke ina fetogi he tahi ʼaho
ʼAho Temi Hola
Mōnite Hili hoʼatā 2
Feliatolu Hili hoʼatā 2
Feliafā Hili hoʼatā 2
Felianima Hili hoʼatā 2
Feliaono Hili hoʼatā 2
Moeaki ʼAho katoa 5
ʼO fakakatoa ko te ʼu hola e: 15
Toku Polokalama Gāue
Koutou fakatuʼutuʼu te ʼu hola ʼaē ka koutou fai ʼi te māhina
ʼAho Temi Hola
Mōnite
Feliatolu
Feliafā
Felianima
Feliaono
Moeaki
ʼAhotapu
ʼO fakakatoa ko te ʼu hola e: 15