Te Temi ʼo Te ʼAho Fakamanatu—Ko He Temi Moʼo Fakatuputupu Tatatou Gāue
1. Neʼe koteā te ʼu fua lelei ʼo “te ʼu ʼaho lalahi” ki te kau Iselaele ʼaē neʼe manavasiʼi ki te ʼAtua ?
1 ʼI te taʼu fuli ko te kau Iselaele neʼe nātou fakahoko “te ʼu ʼaho lalahi ʼa Sehova.” (Lev. 23:2) Neʼe nātou toʼo honatou temi moʼo metitāsioʼi ia te agalelei ʼo tonatou ʼAtua, pea neʼe tupu ai tanatou fiafia ʼaupito pea mo uga ai nātou ke nātou gāue lahi ki te tauhi maʼa.—2 Fkma. 30:21–31:2.
2, 3. He koʼe ʼe lelei ʼi te temi ʼo te ʼAho Fakamanatu ke tou fakatuputupu ai tatatou ʼu gāue fakalaumālie, pea ko te temi fea ʼaē ʼe tou fai ai anai te toʼotoʼoga ʼaia?
2 ʼI te temi nei, ʼi te taʼu fuli ʼi te ʼu temi ʼo te ʼAho Fakamanatu ʼe tuputupu ai tatatou ʼu gāue faka teokalatike. ʼE ko he temi ʼe tou metitāsioʼi lelei ai te meʼa ʼofa ʼaupito ʼaē neʼe foaki mai e Sehova maʼa tatou—tona ʼAlo ulutokotahi. (Soa. 3:16; 1 Pet. 1:18, 19) Ka tou metitāsioʼi te ʼofa ʼaē neʼe fakahā e te ʼAtua pea mo tona ʼAlo, ʼe tou fia fakavikiviki ai kiā Sehova pea mo fia fai ia tona finegalo.—2 Ko. 5:14, 15.
3 ʼI te taʼu ʼaenī, ko te Taumafa ʼo Te ʼAliki ʼe fai anai ʼi te Felianima ʼaho 24 ʼo Malesio ʼi te ʼosi tō ʼo te lāʼa. ʼE tou lava fakatuputupu feafeaʼi tatatou kau ki te minisitelio ʼi te ʼu māhina ʼo Malesio, mo ʼApelili pea mo Maio?
4, 5. (a) Koteā ʼaē neʼe feala ai ki te tuagaʼane ke ina fagonogono ia te logo lelei ki te tokolahi? (b) Koteā te fakatuʼutuʼu ʼaē ʼe koutou sio ʼe fua lelei ʼi tokotou telituale?
4 Tou Faka Mafola Ki He Tokolahi: Tou faiga ke tou fagonogono ki he tokolahi mokā tou kau ki te gāue fai faka mafola. ʼE feala koa ke tou fakatuʼutuʼu ke tou fai faka mafola ʼi te ʼu temi ʼaē ʼe maʼu atu ai te hahaʼi ʼi ʼonatou ʼapi, ohage la ko te ʼu hili hoʼatā peʼe ko te ʼu ʼafiafi. Kapau ko ʼihi ʼi takotou ako tohi ʼe fia fai faka mafola ʼi muʼa ʼo te fai ʼo te ako tohi, ʼe feala ki te tēhina ʼaē ʼe ina takitaki te ako tohi ke ina fai he fakatuʼutuʼu moʼo fai he kiʼi fono gāue ki te fai faka mafola ke feala he gāue ʼi he telituale ʼe ōvi mai.
5 Ko te fagonogono ʼi te ʼu lāpalasi ʼe ko te tahi ʼaia fai faka mafola ʼe tou maʼu ai te tokolahi. ʼI Saponia, ko te tuagaʼane neʼe fia pionie vaeluaʼi temi logola tana gāue ʼaho kātoa. Pea neʼe tokoniʼi leva e te tagata ʼāfea, ʼi muʼa ʼo tana ʼalu ki tana gāue, ʼe feala hana fai fagonogono faigamālie ʼi te ala ʼaē ʼe ōvi ki te taulaga saliote afi. ʼI tana ʼosi tekeʼi tana umiuminoa pea mo tona vāʼi e ʼihi hahaʼi, neʼe ina foaki tuʼumaʼu te ʼu nusipepa ki te toko 40 hahaʼi, neʼe ko te hahaʼi ʼe ʼolo ʼi te saliote afi, mo te kau gāue ʼi te taulaga saliote afi, pea mo te hahaʼi ʼo te ʼu fale koloā ʼo te fale taulaga. Neʼe ina tufa ʼi te māhina tana ʼu nusipepa e 235. Neʼe ina kamata tana ʼu ako Tohi-Tapu e ono ʼaki pe tana fakahā ʼaē ʼi te ʼaho fuli ʼi te ʼu kiʼi minuta ia te ʼu manatu faka Tohi-Tapu.
6. ʼE lava feafeaʼi ki te kau tūpulaga ke nātou fakatuputupu tanatou ʼu gāue fakalaumālie?
6 Te ʼu Faigamālie Moʼo Fagonogono: Lolotoga ʼo te taʼu, ʼe lahi te ʼu temi mālōlō ʼa te kau ako e tokolahi. ʼE feala ki te ʼu temi mālōlō ʼaia ke liliu ko he ʼu temi faigamālie moʼo toʼo te pionie vaeluaʼi temi. Tahi ʼaē meʼa, ʼe lava fakatuputupu e te kau tūpulaga Kilisitiano tanatou ʼu gāue fakalaumālie ʼaki te fai fagonogono ʼi te faleako. ʼE koutou punamaʼuli anai ki te ʼu fehuʼi ʼe lava fai atu e tokotou ʼu kaugā ako ʼo ʼuhiga mo takotou lotu. He koʼe ʼe mole koutou fakaʼaogaʼi te ʼu fai palalau ʼaē ʼe fai ʼi te kalasi moʼo fai fagonogono ai? Ko ʼihi neʼe nātou fagonogono ʼaki te ʼu fime viteo ʼa te kau Fakamoʼoni ʼa Sehova. Ko ʼihi neʼe nātou kamata te ʼu ako Tohi-Tapu mo tonatou ʼu kaugā ako pea mo tokoni kiā nātou ke nātou tuputupu ʼo aʼu ki tanatou papitema. Ko te ʼu ʼaluʼaga ʼaia ʼe ko he ʼu ʼaluʼaga lelei moʼo “fakavikiviki ki te huafa ʼo Sehova.”—Pes. 148:12, 13.
7. (a) Koteā te ʼu faigamālie ʼaē neʼe maʼu e te tēhina moʼo fagonogono ki te hahaʼi? (b) Neʼe kua hoko koa he meʼa feiā kiā koutou?
7 ʼI takotou ʼu fai faka mafola māhani, koutou vakaʼi he ʼu faigamālie ke koutou palalau ai ʼo ʼuhiga mo totatou ʼAtua fakaofoofo pea mo tana ʼu fakapapau taulekaleka. Ko te tēhina ʼi te ʼaho fuli neʼe ʼalu ʼi te saliote afi, pea neʼe faka mafola ki te hahaʼi ʼaē ʼe heheka tahi mo ia mokā ʼe faigamālie. Ohage la, ʼi tana lolotoga fakatalitali ʼi te taulaga saliote afi ki te haʼu ʼa te saliote afi, neʼe fagonogono ʼi te ʼaho fuli ia minuta e nima ki te tūpulaga. Pea ko te tūpulaga ʼaia pea mo tona kaugā gāue kua nā ako te Tohi-Tapu. Neʼe fai te ako ʼi te loto saliote afi mokā nātou ʼolo. Ki muli age, neʼe logo te finematuʼa ki tanatou ʼu fai palalau, pea neʼe fakaōvi ki te tēhina ʼo kole age ke fai hana ako Tohi-Tapu. Mo ia foki kua fai tana ako ʼi te ʼu ʼaho ʼaē neʼe ʼalu ai ʼi te saliote afi. ʼI tana fai fagonogono ʼaia, ko te tēhina kua ina fai tana ʼu ako mo te toko 10 hahaʼi ʼi te ʼu loto saliote afi.
8. Koteā te faʼahiga fai fagonogono ʼe feala ke fai e nātou ʼaē kua mātutuʼa peʼe māhahaki moʼo fakatuputupu tanatou minisitelio?
8 Koteā te meʼa ʼe koutou lava fai mo kapau ʼe koutou faigataʼaʼia ʼuhi ko te mātutuʼa peʼe ko te māhahaki? ʼE kei maʼu te ʼu fealagia ke koutou fakatuputupu ai takotou fakavikiviki ʼaē kiā Sehova. Kua koutou ʼahiʼahiʼi koa te fagonogono ʼaē ʼi te telefoni? Kapau ʼe koutou tuʼaniaʼi te fagonogono ʼi te telefoni, koutou fakahā ki te tēhina takitaki ako tohi. ʼE feala ke ina fai he fakatuʼutuʼu ke koutou kaugā gāue mo he kaugā fagona ʼe māhani ʼi te taʼi fai fagonogono ʼaia. ʼI takotou kaugā gāue fakatahi ʼaia, ʼe koutou fetokoniʼaki anai ke koutou faiva ʼi te fai fagonogono.
9. ʼE tou lava tokoni feafeaʼi ki te kau ako Tohi-Tapu ke nātou kau mo te kokelekasio ki te fai faka mafola?
9 ʼE feala kiā nātou ʼaē ʼe foʼofoʼou ke nātou fia fakatuputupu tanatou fakavikiviki kiā Sehova ʼi tanatou kau ʼaē ki te ʼAho Fakamanatu. ʼE koutou lava tokoni kiā nātou ke tuku tanatou mātataku ʼi te kau ʼaē ki te fai faka mafola, ʼo koutou fakamatala age he ʼu fai faka mafola neʼe fua lelei, pea mo koutou akoako age peʼe feafeaʼi hanatou fakamahino te ʼu akonaki faka Tohi-Tapu pea mo te ʼu tali ʼaē ke nātou fai moʼo puipui tanatou tui. (1 Pet. 3:15) Kapau ko he tahi ʼe ina ako te Tohi-Tapu kua fia fai faka mafola, koutou fakahā te faʼahi ʼaia ki te taupau pelesita. ʼE ina fakatuʼutuʼu anai he fai palalau mo ia moʼo fakafuafua pe kua mulimuli ki te ʼu meʼa ʼaē ʼe fakamaʼua ki he tahi ke feala hana kau mo te kokelekasio ki te fai faka mafola. ʼE mahino ia, ʼe ko he faʼahi ʼe fakafiafia ai te loto ʼo Sehova ʼi tana sio ʼaē ki te hahaʼi foʼou ʼe nātou lagolago ki tana pule faʼitaliha!—Taag. 27:11.
10. (a) ʼE lava tokoni feafeaʼi atu kiā koutou he polokalama lelei ke koutou pionie vaeluaʼi temi? (b) Neʼe feala koa ʼi te taʼu kua ʼosi ʼi te temi ʼo te ʼAho Fakamanatu ke koutou pionie vaeluaʼi temi? Neʼe feafeaʼi takotou fakatuʼutuʼu ki te faʼahi ʼaia?
10 ʼE Feala Koa Hakotou Pionie Vaeluaʼi Temi? Ko te fakatuʼutuʼu ʼaē ke fai te ʼu hola e 50 ʼi te pionie vaeluaʼi temi, ʼe ko he faʼahi ʼe maʼuhiga ʼaupito. (Mat. 5:37) Koia ʼe tonu anai ke koutou fakatuʼutuʼu ʼi te vāhaʼa fuli ke koutou fai faka mafola ia hola e 12. ʼE ʼi ai koa he faʼahiga fakatuʼutuʼu ʼi te polokalama pionie vaeluaʼi temi ʼo te pasina 5 ʼe lelei kiā koutou? Kapau ʼe mole ʼi ai, pea ʼe koutou lava fai koa hakotou polokalama ke koutou pionie vaeluaʼi temi ʼi Malesio, mo ʼApelili peʼe ko Maio? Koutou kole kiā Sehova ke tokoni atu ki takotou ʼu faiga ʼaē moʼo fakatuputupu takotou selevisi.—Taag. 16:3.
11. ʼE lava tokoni feafeaʼi te ʼu tagata ʼāfea pea mo te ʼu tagata faifekau faka minisitelio ki te kau pionie vaeluaʼi temi?
11 ʼE tokoni lahi atu anai te ʼu tagata ʼāfea pea mo te ʼu tagata faifekau faka minisitelio ki takotou ʼu faiga ʼaē ke liliu te temi ʼo te ʼAho Fakamanatu ʼe ko he fakavikiviki makehe kiā Sehova. ʼE mahino ia ko te tokolahi iā nātou ʼe nātou pionie vaeluaʼi temi anai. ʼE fai anai e te ʼu tagata ʼāfea he ʼu fakatuʼutuʼu makehe mo kapau ʼe ʼaoga, moʼo fai he ʼu fono gāue, ohage la ko te ʼu hili hoʼatā, ʼi te ʼu afiafi, peʼe ko te ʼu fakaʼosi vāhaʼa. ʼE tonu ke felogoi te kau tagata ʼāfea mo nātou ʼaē ʼe ʼi ai tanatou ʼu telituale pionie peʼe ko nātou ʼaē ʼe tōkakaga ki te ʼu telituale, ke ʼiloʼi ai pe kofea pea mo te temi fea ʼaē ʼe fai ai anai te ʼu fono ʼaia, pea ko ai anai ʼaē ka ina fai ia te ʼu fono gāue ʼaia. ʼE fai anai e te kau tagata ʼāfea he ʼu fakatuʼutuʼu ke feala hakotou fai faka mafola mo niʼihi ʼi te ʼu ʼaho pea mo te ʼu hola ʼaē neʼe koutou fakatuʼutuʼu kiai. Kapau ʼe fai he ʼu fakatuʼutuʼu feiā, pea ʼe feala anai ke gāueʼi lelei te ʼu telituale pea ʼe lahi anai mo te ʼu gāue lelei.—Taag. 20:18.
12. He koʼe ʼe tou fia fakavikiviki kiā Sehova?
12 Koutou Faiga Mālohi: Kapau ʼe mole koutou lava pionie vaeluaʼi temi, koutou manatuʼi ko Sehova ʼe ina tali tatatou ʼu faiga pea mo tatatou ʼu sākilifisio ‘ ʼo fakalogo pe ki te meʼa ʼaē ʼe tou lavaʼi, kae mole fai ki te meʼa ʼaē ʼe mole tou lavaʼi.’ (2 Ko. 8:12) ʼE lahi ia te ʼu tupuʼaga ke tou fakafetaʼi ai kiā Sehova. Koia neʼe feala ai ke ʼui fēnei e Tavite: “ ʼE au fakavikiviki anai kiā Sehova ʼi te temi fuli pe; ʼe fakavikiviki tuʼumaʼu anai toku gutu kiā te ia.” (Pes. 34:1) ʼOfa pe ke tou faiga mālohi ʼo gāue ʼi temi ʼo te ʼAho Fakamanatu.
[Talanoa ʼo te pasina 3]
E Feafeaʼi Anai Hakotou Fakatuputupu Takotou Gāue?
◼ Tou faka mafola ʼi te ʼu temi ʼaē ʼe nonofo ai te hahaʼi ʼi ʼonatou ʼapi
◼ Tou fai fagonogono ʼi te ʼu lāpalasi
◼ Tou fai fagonogono ʼi te fale gāue peʼe ʼi te faleako
◼ Tou fai fagonogono ʼi te telefoni
◼ Tou pionie vaeluaʼi temi
[Talanoa ʼo te pasina 5]
Te ʼu Polokalama ʼo ʼUhiga Mo Te Gāue Pionie Vaeluaʼi Temi—Te ʼu Faʼahiga Polokalama Moʼo Fai Hola e 12 ʼi Te Gāue Fai Faka Mafola ʼi Te Vāhaʼa Fuli
ʼI Te Uhu—Mai Te Mōnite Ki Te Moeaki
ʼE feala ke fetogi he ʼaho pe ʼo te vāhaʼa ʼaki te ʼAhotapu.
ʼAho Temi Hola
Mōnite Uhu 2
Feliatolu Uhu 2
Feliafā Uhu 2
Felianima Uhu 2
Feliaono Uhu 2
Moeaki Uhu 2
Tānaki ʼo Te ʼu Hola: 12
Te ʼu ʼAho Kātoa e Lua
Koutou filifili he ʼu ʼaho e lua ʼo te vāhaʼa. (ʼO fakalogo pe ki te ʼu ʼaho ʼaē neʼe koutou filifili, ko te polokalama ʼaenī ʼe ko ʼona hola pe e 48 ʼi te māhina.)
ʼAho Temi Hola
Feliafā ʼAho Kātoa 6
Moeaki ʼAho Kātoa 6
Tānaki ʼo Te ʼu Hola: 12
Te ʼu Afiafi e Lua Pea Mo Te Fakaʼosi Vāhaʼa
ʼE feala ke koutou filifili he ʼu afiafi e lua ʼi te vāhaʼa.
ʼAho Temi Hola
Mōnite Afiafi 1 1/2
Feliafā Afiafi 1 1/2
Moeaki ʼAho Kātoa 6
ʼAhotapu Vaeluaʼi ʼAho 3
Tānaki ʼo Te ʼu Hola: 12
Te ʼu Hili Hoʼatā e Tolu Pea Mo Te Moeaki
ʼE feala ke fetogi he ʼaho pe ʼo te vāhaʼa ʼaki te ʼAhotapu.
ʼAho Temi Hola
Mōnite Hili Hoʼatā 2
Feliafā Hili Hoʼatā 2
Feliaono Hili Hoʼatā 2
Moeaki ʼAho Kātoa 6
Tānaki ʼo Te ʼu Hola: 12
Te Fakatuʼutuʼu ʼo Taku Polokalama Gāue
Koutou fakafuafua te ʼu hola ke koutou fai ʼi te ʼu temi/lakaga fuli.
ʼAho Temi Hola
Mōnite
Feliatolu
Feliafā
Felianima
Feliaono
Moeaki
ʼAhotapu
Tānaki ʼo Te ʼu Hola: 12