Te Tali Ki ʼAkotou ʼu Fehuʼi

◼ ʼE lelei koa hatatou pasipasi mokā toe tali e te kokelekasio he tahi neʼe fakamavae?

ʼI tona manavaʼofa, neʼe fai e Sehova ʼAtua ʼi te Tohi-Tapu he fakatuʼutuʼu kia nātou ʼaē neʼe agahala pea ʼe nātou fakahemala, ke nātou toe maʼu tona ʼofa pea ke toe tali nātou ʼi te kokelekasio faka Kilisitiano. (Pes. 51⁠:​12, 17) Ka hoko te faʼahi ʼaia, pea ʼe fakaloto mālohiʼi tatou e te Tohi-Tapu ke tou fakamoʼoni totatou ʼofa kia nātou ʼaē neʼe fakahemala moʼoni.​—⁠2 Ko. 2⁠:​6-8.

Logope la tatatou fiafia ʼaē mokā toe tali hotatou kāiga peʼe ko hatatou feʼilo, kae ʼe tonu ke tou taupau he faʼahiga fakaʼapaʼapa ʼi te temi ʼaē ʼe tala ifo ai te toe tali ʼa he tahi ʼi te kokelekasio. Neʼe fakahā te faʼahi ʼaia ʼi Te Tule Leʼo ʼo te ʼaho 1 ʼo ʼOketopeli 1998, ʼi te pasina 17: “ ʼE tonu ke tou manatuʼi, ko te tokolahi ʼi te kokelekasio ʼe mole nātou ʼiloʼi te tupuʼaga ʼo te fakamavae ʼo he tahi peʼe ko tona toe tali ʼi te kokelekasio. Pea tahi ʼaē meʼa, ko ʼihi neʼe lagi lotomamahi ʼaupito​—⁠pea lagi nātou lotomamahi fualoa​—⁠ʼi te agahala ʼaē neʼe fai e ia ʼaē kua fakahemala. Koia, kapau neʼe kita mamahi ʼi te agahala ʼaē neʼe ina fai, pea ʼe mahino ia ʼe lagi faigataʼa anai hatatou fiafia mokā tala ifo tona kua toe tali ʼi te kokelekasio, ʼo aʼu pe ki te temi ʼaē ʼe hoki feala ke tou tali e tatou totonu tana kua toe liliu mai.”

Logope la ʼe tou fiafia lahi ʼi tatatou sio ki te toe liliu mai ʼa he tahi ki te moʼoni, kae ʼe mole lelei anai hatatou pasipasi ʼi te temi ʼaē ʼe tala ifo ai tona toe tali ʼi te kokelekasio.