ʼE Koutou Leleiʼia Koa Te Faʼa Kātaki ʼa Sehova?
1 Neʼe feala koa hakotou ʼiloʼi te moʼoni, mo kanapaula neʼe mole faʼa kātaki ia Sehova ʼi te ʼu taʼu e 10 kua hili, mo te ʼu taʼu e 20, pea mo laka atu, ʼo ina tuku ke fai he faka mafola lahi? ʼE tou loto fakafetaʼi lahi ʼi tana fakagafua ki te tokolahi ʼaupito ‘ke nātou tafoki . . . ʼo fakahemala.’ Kae ko te ʼaho lahi ʼa Sehova ʼaē ka ina fakahoko ai te fakamāu, “ ʼe haʼu anai ohage he tagata kaihaʼa.” (2 Pet. 3:9, 10, MN ) Koia, ʼaua naʼa tou faka ʼuhiga te faʼa kātaki ʼa te ʼAtua, ʼe ko he tuai ʼi te fakaʼauha ʼo te tuʼu ʼaenī.—Hap. 2:3.
2 Tou ʼOfa Ki Te Hahaʼi: ʼE mole tou faʼa mahino ki te faʼa kātaki fualoa ʼa Sehova, kae ʼe mole tonu ke pulipuli kia tatou tana fakatuʼutuʼu. (Sonasi 4:1-4, 11) ʼE sio ia Sehova ki te fakaʼofaʼofa ʼa te hahaʼi, pea ʼe loto manavaʼofa kia nātou. ʼE toe feiā mo Sesu, neʼe ʼofa ki te hahaʼi ʼaē neʼe faka mafola ki ai, pea neʼe ina loto ke faka mafola te evaselio, ke tokolahi te hahaʼi ʼaē ka nātou lava maʼu te maʼuli heʼegata.—Mat. 9:35-38.
3 Ka hoko he ʼu tuʼutāmaki, ʼe mole tou ʼofa koa la ki te hahaʼi ʼaē ʼe mole nātou ʼiloʼi te moʼoni? ʼI te temi nei ko te hahaʼi ʼe nātou hage “ni faga ōvi ʼe mole ʼi ai honatou tagata tauhi,” ʼi tanatou faiga ʼaē ke nātou kātakiʼi pea mo mahino ki te ʼu faigataʼaʼia ʼaē ʼe hoko ki te malamanei. (Mko. 6:34, MN ) Kapau ʼe tou faka mafola te logo lelei ʼaki he loto faʼafai, pea ʼe tou fakaloto fīmālie anai te hahaʼi ʼaē ʼe lelei tonatou loto, pea mo tou fakahā ai ʼe tou fakafetaʼi ki te faʼa kātaki ʼa Sehova.—Gaue 13:48.
4 ʼE Maʼuhiga Tatatou Gāue: ʼI te taʼu ʼaenī kua ʼosi, neʼe papitema ai te toko 323 439 pea ko te toko 14 000 000 tupu neʼe nātou ʼōmai ki te ʼaho Fakamanatu. ʼE hā ʼaki mai ʼe kei toe te tokolahi ʼe feala ke nātou hāo ʼi te fakaʼauha ʼaē ka hoko ki te mālama agakovi ʼaenī! ʼE mole tou ʼiloʼi peʼe tokofia anai te “hahai kaugamalie.” (Apk. 7:9) ʼE mole tou ʼiloʼi peʼe gata anai ʼafea tatatou gāue, kae ʼe ʼiloʼi e Sehova. Ko te logo lelei ʼe faka mafola anai ʼo aʼu ki te temi ʼaē ʼe loto ki ai, “pea hoko mai ai leva te fakaʼosi.”—Mat. 24:14, MN.
5 Kua nounou te temi, pea kua fakaōvi mai te ʼaho ʼo te ʼAtua. (1 Ko. 7:29a; Hep. 10:37) Kua mahino kia tatou, ‘kua ōvi mai totatou hāofaki, talu mai te temi ʼaē neʼe tou tui ai.’ (Loma 13:11) Tou manatuʼi tuʼumaʼu pe koʼe ʼe faʼa kātaki te ʼAtua. Koia tou foimo faka mafola, ke feala ki te hahaʼi tokolahi ʼaē ʼe nātou fia fai ki te faitotonu, ke nātou sio ki te manavaʼofa lahi ʼa Sehova.