Tou Tala Te Huafa ʼo Sehova Pea Mo Tana ʼu Gāue
1 “Koutou fakafetaʼi kia Sehova, koutou fetapā ki tona huafa, koutou fakahā ki te hahaʼi tana ʼu gāue. . . . Ke fiafia te loto ʼo nātou ʼaē ʼe nātou kumi ia Sehova.” (Pes. 105:1, 3) Ko te tagata fai pesalemo ʼaē neʼe ina tohi te ʼu palalau ʼaia, neʼe fiafia ʼaupito ʼi te palalau ki te hahaʼi ʼo ʼuhiga mo Sehova pea mo tana ʼu “gāue.” Koteā tana ʼu gāue ʼaia? ʼE mahino ia, ʼe faka ʼuhiga ki te ʼuhiga hau faka kolōlia ʼa te ʼAtua, pea mo “te logo lelei ʼo tana hāofaki.”—Pes. 96:2, 3; 145:11, 12.
2 ʼI tatatou fakaōvi atu ki te māhina ʼo te ʼAho Fakamanatu ʼo te taʼu 2001, ʼe lahi te ʼu tupuʼaga ke tou fiafia ai ki te ʼu meʼa ʼaē ʼe fai e Sehova maʼa tatou. ʼO feafeaʼi? ʼE tou ʼiloʼi papau, ko te Taumafa ʼo te ʼAliki, ʼe ko te toʼotoʼoga ʼaē ʼe maʼuhiga ʼaupito ʼi te taʼu maʼa te kau Kilisitiano moʼoni fuli. ʼE mole he tahi age toʼotoʼoga ʼe maʼuhiga age, mo lahi age, pea mo makehe age ʼi te toʼotoʼoga ʼaia. ʼI te temi ʼaia, ʼe tonu kia tatou fuli ke tou manatuʼi te ʼu meʼa ʼaē neʼe fai e Sehova pea mo Sesu moʼo hāofaki ʼo tatou. ʼI te agamāhani, lolotoga te māhina ʼaē ʼe fai ai te ʼAho Fakamanatu, ʼe tou fakaʼamu ke lahi tatatou gāue faka mafola, moʼo tala “te logo lelei ʼo tana hāofaki”!
3 ʼE Koutou Pionie Vaeluaʼi Temi Anai? ʼI ʼApelili ʼo te taʼu ʼaenī kua ʼosi, ko te tokolahi ʼaupito neʼe nātou pionie vaeluaʼi temi: ko te toko 323 ʼi Niu Kaletonia pea mo te toko 11 ʼi Uvea. ʼI te taʼu ʼaenī, ʼe feala koa ke tou fakaliliu ia Malesio pea mo ʼApelili ko he ʼu māhina makehe, ʼo tou fakalahi ai tatatou gāue ʼi te minisitelio? ʼI Malesio ko Moeaki e nima, pea ko ʼApelili ko ʼAhotapu e nima. Ko te tokolahi ʼo te kau fai faka mafola ʼaē ʼe nātou gāue ʼaho katoa ʼi tanatou gāue faka mālama, neʼe nātou fakatokagaʼi ʼe feala ke nātou pionie vaeluaʼi temi, mo kapau ʼe nātou fakatuʼutuʼu ke nātou fai faka mafola ʼaho katoa ʼi te ʼu fakaʼosi vāhaʼa. Moʼo fai tona ʼu hola e 50 ʼi te māhina, ʼe tonu ki te pionie vaeluaʼi temi ke ina fai ia hola e 12 ʼi te vāhaʼa. Koutou vakaʼi lelei te ʼu polokalama ʼaē ʼe tuʼu ʼi te pasina 4. ʼE ʼi ai koa he polokalama ʼe to lelei anai mo koutou? Kapau ʼe mole ʼi ai, pea ʼe feala ke koutou fai tonu takotou polokalama ki te gāue pionie ʼi Malesio pea mo ʼApelili.
4 ʼO kamata atu ʼi te ʼaho nei, ʼe tonu ki te kau tagata ʼāfea ke nātou fakaloto mālohi pea mo lagolago ki te fakalahi ʼo te gāue fai faka mafola. ʼI te taʼu ʼaenī kua ʼosi, neʼe ʼi ai te kokelekasio neʼe pionie fuli ai te kau tagata ʼāfea pea mo te kau faifekau faka minisitelio, pea ʼi te toko 121 kau fai faka mafola, ko te toko 64 neʼe nātou pionie ʼi ʼApelili! Tahi ʼaē meʼa, neʼe fiafia te kokelekasio ʼi tanatou sio ko tanatou ʼu kaugā fagona foʼou e toko ono neʼe nātou kamata faka mafola ʼi Malesio pea mo ʼApelili. Ei, ʼe ko he temi lelei ʼaupito maʼa nātou liliki pea mo nātou ʼaē ʼe foʼofoʼou, ke nātou kole ki te kau tagata ʼāfea peʼe kua feala ke nātou fai faka mafola.
5 ʼE Tapuakina Te ʼu Faiga Makehe: ʼE lahi te ʼu tapuakina ʼaē ʼe maʼu e te ʼu kokelekasio ʼaē ʼe nātou fai he ʼu fakatuʼutuʼu makehe pea mo he faiga makehe. Ko ʼihi kokelekasio ʼe nātou faiga tāfito anai ke nātou gāueʼi te ʼu telituale ʼaē ʼe tahitahiga tona fai, peʼe tokaga tāfito ke fai te tahi ʼu agaaga ʼo te fai fagonogono, peʼe ko te faka mafola ʼaki te telefoni—heʼe lelei tona fai ʼaia moʼo palalau ki te hahaʼi ʼaē ʼe mole maʼu atu kiō nātou, peʼe ko te ʼu nofoʼaga ʼaē ʼe mole feala hatatou hū kiai.
6 ʼE tonu koa ki te mahaki mo te vaivai matuʼa, ke nā tāʼofi he tahi, ke mole kau ki te fai faka mafola ʼo mulimuli ki tana ʼu fealagia? Kailoa. Ohage la ko te tuagaʼane e taʼu 86 pea ʼe kosea, neʼe pionie vaeluaʼi temi ʼi ʼApelili logola tona vaʼe fua. Ko te fai faka mafola ʼaki te telefoni, neʼe ina faka fealagia kia ia ke kau katoa ki te gāue, ʼo ina fakalahi tana fakavikiviki kia Sehova. Neʼe ko he meʼa fakaloto mālohi kia ia pea mo tana kokelekasio.
7 Koutou Teuteu Lelei Ki Te ʼAho Fakamanatu: ʼI te taʼu ʼaenī, ʼe fai anai te ʼAho Fakamanatu ʼi te ʼaho 8 ʼo ʼApelili. Mai tona ʼuhiga ʼaē ʼe to anai ʼi he ʼAhotapu, koia ʼe lahi age anai te hahaʼi ʼaē ka ʼōmai ki te ʼaho ʼaia. ʼE feala ke kaugamālie ʼaupito te hahaʼi ʼaē ka ʼōmai ki te ʼAho Fakamanatu ʼaia, mo kapau (1) ʼe tou ʼōmai mo tatou ki te ʼaho ʼaia pea kapau (2) ʼe tou fakaafe te hahaʼi ke nātou ʼōmai. Ko ai ʼaē ʼe tonu ke tou fakaafe?
8 Koutou kumikumi ʼi te ʼu pepa ʼaē neʼe koutou tohi ai te ʼu higoa ʼo te hahaʼi ʼaē neʼe nātou fia ʼiloʼi te moʼoni, tatau aipe peʼe mole koutou ʼaʼahi tuʼumaʼu ia nātou. Ia vāhaʼa e lua peʼe tolu ʼi muʼa ʼo te ʼAho Fakamanatu, koutou ʼaʼahi tāfito te ʼu hahaʼi fuli ʼaia moʼo foaki age te kiʼi pepa fakaafe ki te ʼAho Fakamanatu. Kapau ʼe koutou fealagia, pea koutou fakahā ʼe feala hakotou ʼolo ʼo ʼaumai ia nātou ʼaē ʼe fia ʼōmai ki te ʼaho ʼaia.
9 ʼI ʼihi kokelekasio, ʼe mole fakaʼaogaʼi fuli te ʼu kiʼi pepa fakaafe ki te ʼAho Fakamanatu. ʼE tonu ki te ʼu sikalaipe ke nātou vakaʼi ke maʼu tautonu te ʼu kiʼi pepa fakaafe ʼaia, ke feala hona tufa katoa. ʼE lagi tou fia tohi anai ʼi te lalo pepa fakaafe te hola ʼo te ʼAho Fakamanatu pea mo te koga meʼa ʼaē ka fai ai. Peʼe lagi koutou fia fakapipiki ki te kiʼi pepa ʼaia he tahi pepa ʼe tohi ai te tuʼasila ʼo te Fale ʼo te Puleʼaga ʼaē ka fai ai te ʼAho Fakamanatu. Koutou manatuʼi, ʼe tonu ke tou fakatoʼo tonu ki te hahaʼi te ʼu kiʼi pepa fakaafe ki te ʼAho Fakamanatu.
10 Koutou Manatuʼi Ia Nātou Mole Kei Faka Mafola: ʼE ko he meʼa fakafiafia hakita sio ki he tahi ʼe ina ako te Tohi-Tapu, ʼe ina foaki tona maʼuli kia Sehova pea mo papitema. Kae ʼi te taʼu fuli, ko ʼihi ʼe mole kei nātou fakatahi mo tatou, pea ʼe mole kei nātou palalau ki te hahaʼi ʼo ʼuhiga mo te huafa ʼo Sehova pea mo tana ʼu gāue. ʼE tonu ke tou tuʼania ki te faʼahi ʼaia. Logola ko te tokolahi ʼo nātou ʼaē ʼe mole kei fai faka mafola, ʼe mole heʼeki nātou līaki te moʼoni, kae lagi kua nātou tuku tanatou faka mafola, heʼe kua nātou lotovaivai, peʼe ʼi ai tonatou ʼu fihifihia, peʼe ʼuhi ko te ʼu tuʼania ʼo te maʼuli. (Mat. 13:20-22) Ko nātou ʼaē kua vaivai ʼi te faʼahi fakalaumālie, ʼe ʼaoga he tokoni kia nātou, ke feala hanatou toe liliu mai ki te kokelekasio, naʼa taʼomia nātou e te mālama ʼa Satana. (1 Pet. 5:8) ʼI te māhina ʼaia ʼo te ʼAho Fakamanatu, ʼe tou fia faiga tāfito ke tou tokoni ki te kau fai faka mafola fuli ʼaē kua vaivavai, ke nātou toe kau ki te faka mafola ʼo te logo lelei.
11 ʼE tonu ki te sikalaipe ʼo te kokelekasio ke ina fakahā ki te ʼu tēhina takitaki ako tohi, pe ko ai ʼaē ʼe mole kei faka mafola ʼi tonatou ʼu ako tohi. Ko te Komite Gāue ʼo te Kokelekasio, ʼe ina fai anai he ʼu fakatuʼutuʼu ke fai he ʼu ʼaʼahi faka tauhi ōvi kia nātou fuli ʼaē ʼe mole kei fai faka mafola. Kapau kua nātou fakafuafua ʼe tonu ke fai hana ako Tohi-Tapu, pea ʼe tonu ki te taupau gāue ke ina vakaʼi pe ko ai ʼaē ʼe lelei anai ke ina fai te ako ʼaia, mokā ʼosi felogoi mo te kūtuga ʼaē ʼo te komite. Logola ʼe fai faka temi anai te ako ʼaia, kae ko ia ʼaē ka ina fai, ʼe ina tohi anai ʼi tana kiʼi pepa tānaki, te ʼu hola pea mo te ʼu ʼaʼahi ʼaē neʼe ina fai ai te ako.
12 ʼI ʼApelili ʼo te taʼu kua ʼosi, neʼe faka mafola te tuagaʼane ʼi te ʼu ʼapi, pea neʼe ina tuku te ʼu nusipepa ki te tagata ʼi te ala. Neʼe fakahā age e te tagata ʼaia ko tona ʼohoana ʼe ko te Fakamoʼoni ʼe mole kei fai faka mafola. Neʼe ina fakalavelave age peʼe tuʼu ʼifea ia te Fale ʼo te Puleʼaga, pea neʼe ina kole ki te tuagaʼane ke ʼalu age ʼo ʼaʼahi ia nāua taumatuʼa. Ki muli age, neʼe ʼolo te taumatuʼa ki te fono pea neʼe nā tali ke fai hanā ako Tohi-Tapu.
13 Koutou Fakalahi Takotou Gāue! Neʼe toe ʼui fēnei e te tagata fai pesalemo, ʼaē neʼe ina ʼui ke tou fakahā te huafa ʼo Sehova pea mo tana ʼu gāue: “Koutou hiva maʼa ia, koutou fai he ʼu musika maʼa ia, koutou ako tana ʼu gāue fakaofoofo fuli. Koutou laupisi ʼo ʼuhiga mo tona huafa taputapu.” (Pes. 105:2, 3) Tou fakahā ʼe tou manatuʼi te huafa lahi ʼo Sehova pea mo tana ʼu “gāue fakaofoofo,” ʼo tou fakatuputupu tatatou ʼu faiga ʼi te minisitelio, ʼo tou fai ke makehe ʼaupito te māhina ʼaē ka fai ai te ʼAho Fakamanatu ʼaia.
[Talanoa ʼo te pasina 4]
Ko Hola e 12 ʼi Te Vāhaʼa Ke Fai e He Pionie Vaeluaʼi Temi
ʼAho Hola
Mōnite 1 2 − −
Feliatolu 1 − 3 −
Feliafā 1 2 − 5
Felianima 1 − 3 −
Feliaono 1 2 − −
Moeaki 5 4 3 5
ʼAhotapu 2 2 3 2
Katoa: 12 12 12 12
[Paki ʼo te pasina 4]
ʼE ʼi ai koa he polokalama ʼe koutou leleiʼia?
Kapau ʼe faigataʼa, pea koutou fai tonu hakotou polokalama.