Te ʼu Tapuakina Heʼe Kita Loto Fakafetaʼi Ki Te ʼOfa ʼo Sehova—Koga 2
1 ʼI te māhina kua ʼosi, neʼe tou talanoa ai ki te kupu tāfito ʼaenī, ʼo tou faka maʼuhigaʼi ia puani e fā, ʼe tou lava fakahā ai ʼi te minisitelio tatatou fakafetaʼi ki te ʼofa ʼa Sehova. (1 Soa. 4:9-11) Koʼeni te tahi ʼu puani e nima moʼo fai te faʼahi ʼaia. ʼE tou fiafia ai anai, mo kapau ʼe tou gāue katoa moʼo tokoni ki te hahaʼi ʼi te faʼahi fakalaumālie.
2 Te Fagonogono Faigamālie: ʼE lelei te faʼahiga fai ʼaia, moʼo maʼu te hahaʼi ʼaē ʼe fia kakai pea mo fia ʼiʼinu ki te faitotonu, pea mo tuku age kia nātou he ʼu tohi ʼe tokoni anai kia nātou. ʼE ko he meʼa lelei hatatou ‘fakaʼaogaʼi te ʼu temi faigamālie’ moʼo fagonogono ʼi te ʼu lakaga fuli, pea ki te hahaʼi fuli ʼaē ʼe tou felāveʼi mo nātou. (Ef. 5:16) ʼE lagi tonu ke tou lotomālohi moʼo fai te taʼi fagonogono ʼaia, kae kapau ʼe tou fakafetaʼi ki te ʼofa ʼa te ʼAtua pea mo tou fia tokoni ki te hahaʼi, pea ʼe tou fagonogono anai ʼi te ʼu temi faigamālie fuli.—2 Tim. 1:7, 8.
3 Neʼe fua lelei te gāue ʼa te misionea, he neʼe ina kamata tana fai palalau mo te tagata neʼe nā ʼolo tahi ʼi te takisi. Neʼe leleiʼia e te tagata te fai palalau. Neʼe fai te ʼu ʼaʼahi, pea neʼe kamata ai te ako Tohi-Tapu. Neʼe haʼu te tagata ʼaia ki te moʼoni, pea neʼe tuputupu ʼo liliu ko te tagata ʼāfea!
4 Koutou Faitohi: Lagi ʼe mole feala ke tou ʼolo ʼo faka mafola ʼi te ʼu ʼapi, heʼe lagi tou māʼimoa, peʼe lagi tuʼu kovi. ʼE tou lava faitohi, peʼe tou faitohi ʼi te olotinatea ʼo momoli ki te ʼu hahaʼi ʼaē ʼe tou ʼiloʼi, ki te ʼu hahaʼi ʼaē kua mate he tahi neʼe nātou ʼofa mamahi ai, peʼe ki te ʼu hahaʼi ʼaē neʼe mole tou maʼu ʼi te telituale. ʼE tou lava momoli tahi ai mo he kiʼi pepa lotu ʼe maʼu ai he logo faka Tohi-Tapu fakafiafia, pea mo ina fakaloto mālohi ia ia ʼaē ka ina maʼu te tohi ke toe faitohi mai mo kapau ʼe ʼi ai hana ʼu fehuʼi. Koutou tuku age takotou tuʼasila, peʼe ko te tuʼasila ʼo te Fale ʼo te Puleʼaga; koia ʼe kole atu ke mole koutou tuku age te tuʼasila ʼo te Petele.
5 Te Fagonogono ʼi Te Telefoni: ʼE lahi te ʼu kolo lalahi, ʼe ko he faʼahiga fai lelei ʼaia moʼo maʼu te hahaʼi, mo kapau ʼe mole feala ke tou maʼu nātou ʼi te faka mafola ʼi te ʼu ʼapi. Kapau ʼe tou fai te faʼahi ʼaia, ʼaki he aga fakaʼeteʼete, mo tou agalelei, mo aga fakaʼapaʼapa, pea mo aga fakapotopoto, pea ʼe nātou tali lelei anai.
6 Neʼe ʼi ai te tuagaʼane neʼe fai fagonogono ʼi te telefoni, pea neʼe ina fehuʼi ki te fafine peʼe kua ina fakakaukauʼi lelei tona ka haʼu pea mo te ka haʼu ʼo tona famili. Neʼe tali age e te fafine kua ina fai te faʼahi ʼaia. Neʼe ina fakahā age ʼe mole hana ʼamanaki, pea kua nofo pe ia ʼi tona ʼapi. Neʼe malave kia ia te agalelei ʼa te tuagaʼane, pea neʼe ina tali ke nā felāveʼi ʼi te fale fakatauʼaga meʼa ʼe mole mamaʼo mo tona ʼapi. Pea neʼe tali lelei e te fafine ke fai hana ako Tohi-Tapu!
7 Tou Tali Te Hahaʼi Foʼou: Kapau ʼe tou ʼofa ki totatou kāiga, pea ʼe tou tokagaʼi anai he tahi ʼe foʼou ʼi tatatou ʼu fono, pea mo tou tali lelei ia ia. (Loma 15:7) Tou fakahā age ki ai ko tatou ko te ʼu hahaʼi ʼe tou fia tokoni moʼoni kia ia ʼi te faʼahi fakalaumālie. Ko totatou ʼofa moʼoni pea mo tatatou kole age ke ina ako te Tohi-Tapu, ʼe ina lava uga ia ia ke ina tali tatatou tokoni.
8 Tatatou Aga ʼAē ʼe Lelei: ʼE tou faka mataleleiʼi te moʼoni, ʼaki tatatou aga ʼaē ʼe lelei. (Tito 2:10) Ka vikiʼi tatou e te hahaʼi ʼo te mālama ʼuhi ko totatou ʼuhiga kau Fakamoʼoni ʼa Sehova, pea ʼe nātou fakavikiviki ki totatou ʼAtua. (1 Pet. 2:12) Ko te faʼahi ʼaia ʼe toe tokoni ki te tahi hahaʼi ke nātou kamata haʼele ʼi te ala ʼo te maʼuli.
9 He koʼe ʼe mole tou vakaʼi te ʼu puani ʼaia e nima moʼo fakahā tatatou fakafetaʼi ki te ʼofa lahi ʼa Sehova kia tatou, pea mo maʼuliʼi te ʼu tokoni ʼaia? (1 Soa. 4:16) Kapau ʼe koutou fai feiā, ʼe koutou maʼu anai te ʼu tapuakina lahi.