Te Polokalama Foʼou ʼo Te Fakatahi Faka Silikosikilipisio
1 Neʼe fakakikite e totatou ʼAliki ʼe hoko anai he ʼu mamahi ki tana kau tisipulo. (Mat. 24:9) ʼE tonu ke tou tali feafeaʼi te ʼu ʼahiʼahi ʼaia? Koteā ʼaē ka tokoni mai anai ke tou kātakiʼi te mamahi? Ko te polokalama ʼo te fakatahi faka silikosikilipisio ʼo te taʼu gāue 2004, ʼe ina tali anai ki te ʼu fehuʼi ʼaia. Koʼeni tona kupu tāfito: “Koutou Fakafiafia Ia Koutou ʼi Te ʼAmanaki. Koutou Faʼa Kātaki ʼi Te Mamahi.”—Loma 12:12, MN.
2 Te ʼu Akonaki e Lua e Koga Fā: Ko te ʼuluaki, ʼaē ko tona kupu tāfito “Tou Fakatupu He ʼu Fua ʼAki Te Faʼa Kātaki,” ʼe talanoa anai ki te ʼu faʼahi ʼaē ʼe tou maʼu ai he ʼu fua. ʼE lahi te kau fai faka mafola ʼe fakafehuʼi anai ʼo ʼuhiga mo tanatou faʼahiga fai faka mafola, mo tanatou faiako, ʼi tanatou ʼiloʼi te maʼuhiga ʼo te gāue ʼaia. ʼE fakalogo lelei anai te ʼu mātuʼa ki te akonaki “Mokā Akonakiʼi Tatou e Sehova,” heʼe fakamahino ai anai peʼe lava feafeaʼi ki te ʼu mātuʼa ke nātou fakakaukau mo tanatou fānau. Ko te tēhina ʼaē ka ina fai te koga fakaʼosi ʼo te akonaki ʼaia, ʼe talanoa tāfito anai ki te ʼu meʼa ʼaē ʼe tonu ke tou fai ke mole lahi fau tatatou tokakaga ki te malamanei, pea mo tou liliu ai ʼo mole fua.—Mko. 4:19.
3 Ko te lua akonaki ʼaē e koga fā, ʼe fēnei tona kupu tāfito: “Tou Feleleʼi ʼi Te Lele ʼAki He Faʼa Kātaki.” ʼE ina fakahā anai pe koʼe ʼe fakatatau totatou maʼuli ki he lele. He koʼe ʼe tonu ke tou lele ʼo mulimuli ki te ʼu lekula? ʼE lava feafeaʼi hatatou fakamaʼamaʼa te ʼu kavega, pea ke ʼaua naʼa tou fiu ʼi te lele ki te maʼuli? Ko te ʼu tokoni faka Tohi-Tapu ʼaē ʼe foaki mai ʼi tona temi totonu, ʼe tokoni mai anai kia tatou fuli ke tou haga faʼa kātaki ʼi te lele.
4 ʼE Tapuakina e Sehova Tatatou Faʼa Kātaki: Ko te ʼu akonaki ʼaē ka fai e te ʼu tagata taupau feʼoloʼaki, ʼe nātou fakaloto mālohi anai te tui ʼo nātou ʼaē ka fakalogo ki te ʼu tokoni, pea mo nātou maʼuliʼi anai. Ko te tahi akonaki ʼe fai anai e te tagata taupau faka tisitilike, ʼe fēnei tona kupu tāfito “Ko Te Faʼa Kātaki ʼe Ina Fakaliliu Tatou Ko He ʼu Hahaʼi ʼe Tapuakina e Te ʼAtua.” Ko te akonaki ki te kaugamālie ʼe tali anai ki te ʼu fehuʼi ʼaenī: Ko te huafa ʼo ai ʼaē ʼe tonu ke falala ki ai te ʼu puleʼaga, pea koteā tona faka ʼuhiga? Ko te akonaki fakaʼosi “ ʼAki Takotou Faʼa Kātaki, ʼe Koutou Hāofaki Anai Tokotou Maʼuli,” ʼe talanoa anai ki te faʼahi ʼaē neʼe tokoni kia Sesu ke ina kātakiʼi te ʼu aga heʼe faitotonu, kae mole ina liufaki ʼaki te kovi.
5 Koutou manatuʼi ʼo ʼaumai takotou tohi École du ministère pea mo Te Tule Leʼo ʼo te vāhaʼa. Koutou fakalogo lelei, ʼo tohi te ʼu puani ʼo te ʼu akonaki, heʼe feala ai ke koutou toe vakaʼi ki muli age pea mo koutou fakaʼaogaʼi anai ʼi tokotou kokelekasio, ʼi te fakamanatu ʼaē ka fai.
6 ʼE ko Sehova totonu ʼaē neʼe ina teuteuʼi te kātoaga fakalaumālie ʼaia. Koutou ʼōmai ʼo kakai! ʼE tou kalaga fakafiafia anai mo kapau ʼe tou kau ki te polokalama katoa.—Isa. 65:14.