Ke ʼi Ai He Fefakaloto Mālohiʼaki Iā Tātou Fuli
1. Ko te ʼu faigamālie makehe fea ʼaē ʼe tou maʼu ʼaki te ʼu ʼaʼahi ʼa te ʼu taupau feʼoloʼaki?
1 Neʼe tohi fēnei e te ʼapositolo ko Paulo ki te kōkelekāsio ʼo Loma: “ ʼE au fakaʼamu mālohi ke au sio kiā koutou, ke au foaki atu kiā koutou he meʼa ʼofa fakalaumālie moʼo fakaloto mālohiʼi ʼo koutou; peʼe ke iā koutou he fefakaloto mālohiʼaki, ʼo tahi lotomālohi ʼi te tui ʼa he tahi kehe, ʼa koutou pea mo au.” (Loma 1:11, 12) ʼAki te ʼu ʼaʼahi ʼaē ʼe fai ʼi totatou temi e te ʼu taupau feʼoloʼaki, ʼe tou maʼu ai te ʼu faigamālie ʼaē ke tou fefakaloto mālohiʼaki.
2. He koʼē ʼe tala fakatomuʼa ia te ʼaʼahi ʼa te taupau feʼaluʼaki?
2 Te Kōkelekāsio: ʼI te agamāhani, ko te ʼaʼahi ʼa te taupau feʼaluʼaki ʼe tala fakatomuʼa ki te kōkelekāsio iā māhina e tolu. ʼE tou maʼu ai he temi moʼo fetogi tatatou polokalama ke tou maʼu kātoa te ʼu lelei ʼo te ʼaʼahi ʼaia. (Efe. 5:15, 16) Kapau ʼe kotou gāue fakamālama, ʼe lagi feala ke kotou kole hokotou ʼu ʼaho mālōlō, ke kotou lagolago ai ki te fai faka mafola ʼi te vāhaʼa. Ko ʼihi ʼe natou fakatuʼutuʼu ke natou pioniē ʼi te māhina ʼaē ʼe ʼaʼahi ai e te taupau tonatou kōkelekāsio. Kapau neʼe kotou fakatuʼutuʼu ke kotou ʼolo ki he koga meʼa, ʼe feala koa ke kotou fai he ʼu fetogi ke kotou kau ki te vāhaʼa ʼaia?
3. Koteā ʼaē ʼe feala ke tou fai takitokotahi lolotoga te ʼaʼahi ʼa te taupau feʼaluʼaki ke fakaloto mālohiʼi ai tātou?
3 Ko te fakatuʼutuʼu tāfito ʼo te ʼaʼahi ʼa te taupau feʼaluʼaki, ʼe ko te fakaloto mālohiʼi ʼo tātou takitokotahi pea mo akoako ʼo tātou ki te gāue ʼi te minisitelio. ʼE feala koa ke kotou kole ke kotou gāue mo ia peʼe mo tona ʼohoana, mo kapau kua ʼohoana? ʼE fiafia te taupau feʼaluʼaki ʼi te gāue mo te kau fai faka mafola kehekehe, ʼo kau ai mo nātou ʼaē ʼe mole heʼeki faʼa māhani lelei ki te fai faka mafola peʼe mole heʼeki popoto lelei ʼi te minisitelio. ʼE feala ke ʼaoga kiā tātou fuli tana ʼu faʼahiga fakahā ia te logo lelei pea mo tou fakaʼaogaʼi tana ʼu tokoni fuli ʼaē ʼe ina foaki mai ʼaki te ʼofa. (1 Ko. 4:16, 17) Kapau ʼe kotou fakaafe ia ia ke kotou kakai fakatahi, pea ʼe ko he faigamālie ʼaia ke fakaloto mālohiʼi ai koutou. (Hep. 13:2) Mai tona ʼaluʼaga ʼaē ko tana ʼu akonaki ʼe mulimuli ki te ʼu meʼa ʼaē ʼe ʼaoga ki te kōkelekāsio, kotou fakalogo fakalelei.
4. ʼE tou lava fakaloto mālohiʼi feafeaʼi totatou taupau feʼaluʼaki?
4 Te Taupau Feʼaluʼaki: Neʼe tatau pē ia te ʼapositolo ko Paulo mo te ʼu tehina ʼaē neʼe tokoni kiai. Neʼe tau mo te ʼu faigataʼaʼia pea mo te ʼu tuʼania, pea neʼe loto fakafetaʼi ki te ʼu fakaloto mālohi ʼaē neʼe foaki age kiā ia. (2 Ko. 11:26-28) ʼI te logo ʼaē ʼa te kōkelekāsio ʼi Loma ko Paulo, ʼaē neʼe kua pilisoni, neʼe ʼalu age ki Loma, neʼe fagona ʼihi ki te Fakatauʼaga Meʼa ʼo Apiu moʼo fakafelāveʼi mo ia—neʼe mamaʼo iā kilometa e 74. “ ʼI tana sio ʼaē kiā nātou, neʼe fakafetaʼi ia Paulo ki te ʼAtua pea neʼe lotomālohi ai.” (Gāue 28:15) ʼE toe feala ke kotou fakaloto mālohiʼi fēia ia tokotou taupau feʼaluʼaki. Kotou fakahā age kiā ia “he fakaʼapaʼapa lahi” ʼo kotou lagolago fakafiafia ki tana ʼaʼahi ʼaē ia tokotou kōkelekāsio. (1 Tim. 5:17) Kotou fakahā age takotou loto fakafetaʼi moʼoni ʼo ʼuhiga mo tana ʼu faiga ʼaē ke kotou fiafia. Ko te taupau pea mo tona ʼohoana, ʼe nā fiafia anai ʼi tanā sisio ki takotou tui, mo tokotou ʼofa, pea mo takotou faʼa kātaki.—2 Tes. 1:3, 4.
5. He koʼē ʼe ʼaoga kiā tātou fuli iā ʼaho nei he fakaloto mālohi?
5 ʼI “te ʼu temi maʼuhiga ʼaupitō mo faigataʼa” ʼaenī, ʼe ʼaoga ke fakaloto mālohiʼi ia tātou fuli. (2 Tim. 3:1) Kotou fakatotonu ʼo kamata atu ʼi te temi nei, ke kotou lagolago mālohi ki te gāue fai faka mafola ʼaē ʼe fai ʼi te vāhaʼa makehe mo te taupau feʼaluʼaki. Ko tātou fuli—te ʼu taupau feʼoloʼaki pea mo te kau fai faka mafola—ʼe feala ke tou fefakaloto mālohiʼaki. ʼI tatatou fai ʼaia, ʼe tou toe ‘haga fefakaloto fīmālieʼaki anai pea mo fefakaloto mālohiʼaki.’—1 Tes. 5:11.