Polokalama ʼo Te Fono Gāue

Vāhaʼa ʼo te ʼaho 10 ʼo Malesio

Kātiko 191

10 min: Te ʼu logo. ʼAki te ʼu manatu ʼaē ʼe tuʼu ʼi te pāsina 6 peʼe ko he tahi faʼahiga palalau ʼe ʼalutahi mo tokotou telituale, fai he ʼu faʼifaʼitaki moʼo fakahā te tufa ʼo Te Tule Leʼo ʼo te ʼaho 1 ʼo Malesio pea mo te Réveillez-vous ! ʼo Malesio peʼe ko te ʼu nusipepa fakamuli e lua ʼaē kua tau mai, ʼo ʼoloʼi kiai te kiʼi pepa fakaafe ki te ʼAho Fakamanatu.

20 min: He Koʼē ʼe Tonu Ke Tou Fakatahitahi? Ko he akonaki pea mo he fai palalau mo te nofoʼaki ʼe fakatafito ki Te Tule Leʼo (Fakafalani) ʼo te ʼaho 15 ʼo Maio 2007, ʼi te pāsina 11 ki te 13. Fakaafe te nofoʼaki ke natou faka atala pe neʼe fua lelei feafeaʼi kiā nātou tanatou kau ki te ʼu fono pea neʼe feafeaʼi tanatou tauʼi te ʼu fihifihia ke feala hanatou kau tuʼumaʼu ki te ʼu fono.

15 min: “ ʼE Feala Ke Tou Foaki Kiā Sehova.”a Kapau ʼe feʼauga te temi, fakaafe ia te nofoʼaki ke natou fakamahino ia te ʼu vaega Tohi-Tapu ʼaē ʼe tuʼu ai.

Kātiko 8

Vāhaʼa ʼo te ʼaho 17 ʼo Malesio

Kātiko 144

10 min: Te ʼu logo. Fakamanatuʼi ki te nofoʼaki ke natou ʼaumai Te Tule Leʼo ʼo te ʼaho 1 ʼo ʼApelili pea mo te Réveillez-vous ! ʼo ʼApelili peʼe ko te ʼu nusipepa fakamuli e lua ʼaē kua tau mai, ki te Fono Gāue ʼi te vāhaʼa kā haʼu pea mo natou teuteu ki te fai palalau ʼo ʼuhiga mo he ʼu ʼuluaki palalau ʼe ʼaoga ki totatou telituale. Te ʼu Tonu.

15 min: Te Tali Ki ʼAkotou ʼu Fehuʼi. ʼE fai e he tagata ʼāfea. Lau pea mo fai palalau ki te ʼalatike kātoa.

20 min: “ ʼE Tou Lava Tokoni Feafeaʼi Kiā Nātou ʼAē ʼe Kau Ki Te ʼAho Fakamanatu?”b ʼI te palakalafe 5, fakahā fakanounou pe lava kamata feafeaʼi he ako Tohi-Tapu mo he tahi neʼe haʼu ʼo fakalogo ki te akonaki ʼo te ʼAho Fakamanatu.

Kātiko 26

Vāhaʼa ʼo te ʼaho 24 ʼo Malesio

Kātiko 59

10 min: Te ʼu logo. Lau ʼo te falā pea mo te ʼu meʼa ʼofa.

15 min: Tou Teuteuʼi Te Tufa ʼo Te ʼu Nusipepa. Ko he fai palalau mo te nofoʼaki. ʼI te ʼosi vakaʼi fakanounou ia Te Tule Leʼo ʼo te ʼaho 1 ʼo ʼApelili pea mo te Réveillez-vous ! ʼo ʼApelili peʼe ko te ʼu nusipepa fakamuli e lua ʼaē kua tau mai, fakafehuʼi te nofoʼaki pe ko te ʼu ʼalatike fea ʼe lagi fia lau anai e te hahaʼi ʼo te telituale pea koteā tona tupuʼaga. Fakaafe ia te nofoʼaki ke natou talanoa ki he ʼu puani ʼi te ʼu ʼalatike ʼe natou fakatuʼutuʼu ke natou fakahā. Koteā te fehuʼi ʼe feala ke lagaʼi moʼo kamata he fai palalau? Ko te vaega Tohi-Tapu fea ʼi te ʼalatike ʼe feala leva ke lau age? ʼAki te ʼu manatu ʼaē neʼe fakahā ʼe ʼalutahi mo te telituale, fai he faʼifaʼitaki ʼo te tufa ʼo Te Tule Leʼo ʼo te ʼaho 1 ʼo ʼApelili pea mo te Réveillez-vous ! ʼo ʼApelili peʼe ko te ʼu nusipepa fakamuli e lua ʼaē kua tau mai.

20 min: ʼE Tou ʼAve He ʼu Logo Lelei ʼo He Meʼa ʼe Lelei Age. Hili he ʼu ʼuluaki palalau ʼe mole minuta kātoa, ʼe fai e te tagata ʼāfea ia he akonaki ʼe fakatafito ki Te Tule Leʼo ʼo te ʼaho 1 ʼo Sūlio 2005, ʼi te pāsina 18 ki te 19, palakalafe 10 ki te 14. Fakaafe ia te nofoʼaki ke natou fakamatala pe neʼe feafeaʼi tanatou maʼu he loto fīmālie pea mo he ʼamanaki ʼaki te logo lelei ʼo te Puleʼaga ʼi te temi ʼaē neʼe natou ʼuluaki logo kiai.

Kātiko 29

Vāhaʼa ʼo te ʼaho 31 ʼo Malesio

Kātiko 37

10 min: Te ʼu logo. Fakamanatuʼi ki te kau fai fakamafola ke natou ʼaumai tanatou ʼu kiʼi pepa tānaki gāue ʼo Malesio.

20 min: Tou Fakaʼaogaʼi Lelei Ia Te Annuaire 2008. Ko he akonaki pea mo he fai palalau mo te nofoʼaki. Vakaʼi ia “Te Tohi Mai Te Kolesi Pule” ʼaē neʼe tufa tahi mo Te Minisitelio ʼaenī. ʼE fakamatala e te nofoʼaki he ʼu meʼa e lua peʼe tolu neʼe hoko ʼe tuʼu ʼi te Annuaire neʼe fakalotomālohi ʼaupitō ai nātou. Fakatuʼutuʼu fakatomuʼa he kaugā fagona e tokotahi peʼe ko he tokolua ke nā fakahā pe neʼe nā fakatuʼutuʼu feafeaʼi tanā lau ia te Annuaire. Fakaʼosi ʼaki te fakalotomālohiʼi ʼo te nofoʼaki ke natou lau kātoa ia te tohi. Ko nātou ʼaē ʼe feala ke natou lau te Annuaire ʼi te Fakafalani, ʼe fakalotomālohiʼi nātou ke natou metitāsio ki te ʼu manatu ʼaē ʼe fakamālohi ai tatatou tui ʼaē ʼe tuʼu ai pea mo fakaʼaogaʼi moʼo tokoni ki tonatou fāmili pea mo te kau ako Tohi-Tapu ke tuputupu tonatou loto fakafetaʼi ki te kautahi ʼa Sehova.

15 min: “Tou Fefakalotomālohiʼaki Lolotoga Tatatou Kau Ki Te Minisitelio.”c

Kātiko 110

Vāhaʼa ʼo te ʼaho 7 ʼo ʼApelili

Kātiko 19

10 min: Te ʼu logo.

20 min: Koteā Te Tupuʼaga ʼo Te Fakaholomuli ʼo Te Papitema? Ko he akonaki ʼe fai e he tagata ʼāfea ʼe fakatafito ki Te Tule Leʼo ʼo te ʼaho 1 ʼo Sūlio 2006, ʼi te pāsina 29 ki te 30, palakalafe 14 ki te 17. Fakafehuʼi fakanounou he kaugā fagona e tahi peʼe ko he ʼu kaugā fagona e lua neʼe nā papitema ʼi tanā kei tūpulaga. Koteā ʼaē neʼe ina uga nāua ke nā fakahoko ia te faʼahi maʼuhiga ʼaia ʼi tanā kei tūpulaga? Neʼe tokoni feafeaʼi tanā papitema ʼaia ke nā tuputupu ʼo aʼu ki te fotufotuʼa fakalaumālie, ʼaē neʼe ko he puipuiʼaga maʼa nāua?

15 min: Neʼe Kua Kotou ʼAhiʼahiʼi Koa Te Kole Fakahagatonu Age Ke Fai Hana Ako? Ko he akonaki pea mo he fai palalau mo te nofoʼaki ʼe fakatafito ki te pepa neʼe tufa tahi mo Te Minisitelio ʼo Te Puleʼaga ʼo Sānualio 2002, ʼi pāsina 6. Fai palalau ki te ʼu ʼuluaki palalau faigafua ʼaē ʼe tuʼu ai pea feafeaʼi hanatou fetogi ke feala he kamata ʼo he ako Tohi-Tapu ʼaki te tohi Te Ako Mai Te Tohi-Tapu. Pea fai he faʼifaʼitaki e tahi peʼe ko he ʼu faʼifaʼitaki e lua. Fakalotomālohiʼi ia te nofoʼaki ke natou ʼahiʼahi lagi tuʼa tahi ʼi te vāhaʼa kā hoko mai, te kamata ʼo he ako Tohi-Tapu ʼo natou kole fakahagatonu ke fai he ako Tohi-Tapu.

Kātiko 44

[Nota]